2017年10月12日

西伯利亞 萬里長征(1) – 鐵幕誘惑 • 俄羅斯

俄羅斯 西伯利亞鐵路的東方起㸃 海參崴(Vladivostok)

西伯利亞鐵路(Trans-Siberian Railway)是全世界最長的鐵路,橫跨歐亞大陸7個時區,從西方的 莫斯科(Moscow)開始連接多個俄羅斯重要城市至東方的 海參崴(Vladivostok),全長9288公里,一口氣由頭坐到去到尾的車程需要76夜共146小時。她是從前廉航未普及的年代,窮背囊客從東方到歐洲的廉價交通工具。
在前蘇聯的鐵幕统治下,這片土地對外封閉了70年。

我未了解西伯利亞之前,感覺上她是處  荒涼、淒美、廣闊、浪漫、純潔和靜寂的地方.........西伯利亞鐵路兩旁盡是如畫風光,乘搭整段鐵路可以感受到7個時區不同風土人情地貌,結交天涯同道人,旅程真令人響往啊......



西伯利亞 萬里長征

小太熊終於決定要去西伯利亞走一轉了,而且決定把儲了9年的大假一次過用哂佢,去足31日。原本這些大假我打算用來去南極的,現在冇機會了。

由於時間算是充足,所以最初打算去埋 阿爾泰和堪察加等較難去的地方,但發現真係十分之難去,一個月肯定唔夠,最後決定從東方開始完全走晒整段西伯亞鐡路之後,再從莫斯科北上至俄羅斯的 白海(White Sea),走遍俄羅斯較易去的地方。

西伯利亞 萬里長征31天行程的9個大站

STOP 1 – 海參崴(Vladivostok) : 旅程的東方起點,在這𥚃停留2日。

STOP 2 – 伊爾庫茨克(Irkutsk) : 整個西伯利亞旅程最靚的地方,停留7天,遊覽 貝加爾湖(Baikal Lake)伴小鎮Listvyanka和湖中小島 奧爾洪島(Olkhon Island)

STOP 3 – 克拉斯諾亞爾斯克(Krasnoyarsk) : 停留3日,住進傳統俄羅斯鄉村屋Dacha

STOP 4 – 葉卡捷琳堡(Ekaterinburg) : 西伯利亞的大城市,位於歐亞分界線上,停留2日。

STOP 5 – 喀山(Kazan) : 俄羅斯三大歴史文化城市之一,排名僅在 莫斯科和聖彼得堡之後,停留2日。

STOP 6 – Suzdal : 俄羅斯市郊的金環小鎮,停留1日。

STOP 7 – 聖彼得堡(St.Petersburg) : 俄羅斯第二大城市,停留3日。

STOP 8 – 凱姆(Kem) : 俄羅斯西北部白海的沿海小城鎮,會在這裏乘船到白海中的小島 索羅維斯基島(Solovetsky Island),停留3日。

STOP 9 – Petrozavodsk : 俄羅斯西北部的小城,停留2日,遊奧湼加湖的 基日島(Kizhi Island)Bolshoi Klimenetsky Island (Большой Клименецкий остров)


這次旅程的來回機票要HK$530011晚通宵長途火車票共HK$8400,俄羅斯30天旅遊入境簽證成本HK$779,合共佔了行程總費用的40%




[西伯利亞鐵路列車]

俄羅斯西伯利亞火車主要分為頭、二和三等車廂,另有少部分車次有比頭等更高一檔的Deluxe車廂。今次難得坐足整段鐵道,當然會試晒4Class啦。


西伯利亞列車的火車頭已經沒有以往的舊款蒸氣火車頭咁靚了,太現代化look


三等車廂全開放式卧鋪設計,每單位共有上下6張床位,較為多人擠迫,而且大部分時間都唔開冷氣,坐定都熱到標汗,一半窗更加開唔到,熱到出精,所以麻甩佬通常都喜歡唔著衫,女生就喜歡穿背心熱褲。因為蘇聯佬很多高頭大碼,他們的腳板都隊了出走廊,行過時火車搖一搖的話隨時咀了落腳板底,慘情。但話時話,環境比大陸的硬卧火車好好多。


二等車廂獨立房間,每房4張床位,冷氣比三等強勁,好似比三等好,但假如不幸同房遇到變態蘇聯佬不斷施放沙林毒氣,便要被迫不停疏散,那麼就不如坐三等了。


頭等車廂獨立房間,每房2張床位,沒有了從前的古雅裝飾,只是個普通房間,沒有驚喜。茶枱下有一個電插頭可以义電,不用像二、三等車廂幾十人爭用一個插頭。房間冷氣一般都足夠,只是停站時一定停冷氣。


Deluxe車廂獨立房間,整潔舒適,每房有上下2張床位,下舖是雙人床,房內有獨立沖涼房,水夠熱水力又勁,有數個電插頭供义電,還可以自己調較冷氣大小。只有少量車次設有這個Class


每卡車廂都有熱水供應,可以沖茶和沖杯麵,但個別車務員較懶散,我試過水唔夠熱攪到個麵好難食,又試過水中有大量啡色泥,像咖啡般。


每卡車都有2格廁所,所以三等的使用量是頭等的4倍,是否乾淨就完全視乎乘客的PK度和車務員的勤奮度了,我見過三等的廁所都可以接受,也見過頭等廁所的地下有一粒屎,真係......


001號列車的傷殘車卡内有一個沖涼房,沖一次RUB 150,水力很足水也很熱,我天天幫襯,其餘車次就未見過有。


車務員(Conductor) – 每卡列車都必定有個當值的車務員,以前就話全部都是俄羅斯亞姨,現在已經有半數是後生仔女了,而且還有不少是俄羅斯美少女......


Conductor們一般都好勤力,停站上落客check飛㷛水掃地執床洗廁所加廁紙賣零食日日做到牡停手,真係辛苦了這些美少女。


火車上的物價其實唔算很貴,幾銀港紙就買到支水或杯麵,飲食完全不是問題。


頭等車廂偶然會包一餐飯的,但品質就比得上政府醫院大房的飯咁好食,肉鞋囗又冇味,飯像沙一般鬆散,所以都係自備杯麵較好。


餐卡每列火車都會有餐卡,通常位於頭等卡隔離,全部都係這個現代化look,沒有以前的古飾古鄉設計咁靚了。餐卡長期冇客的,最多人時也只有78人,除了因為啲嘢又貴又唔好食,還因為佢哋經常亂屈人錢,價格唔跟餐牌,全單加10%15%20%隨佢喜歡,佢L晒。


火車經常會在大站停15-30min,月台上都必定有俄羅斯地道嘢食賣,所以坐火車只須擔心食得太多。


每一個火車站都必定有大量小食亭,啤酒薯片和雪糕是必買的。


即食薯容和杯麵也是搶手貨,但味道當然唔及腥港買果啲啦。




至於西伯利亞鐵路沿途是否風光如畫呢?

當然係有啦,最靚一段在 烏蘭烏德往 伊爾庫茨克的一段,沿著貝加爾湖行駛,完全是碧湖藍天。這張相是隔著火車玻璃窗影的。


其餘都有些大草原的。


見得最多一定係電線桿了,簡直無處不在,平均每一秒大約見到一枝,所以如果想影一張沒有電缐桿的相,必須找緊那0.5秒的空間。


其餘95%時間........都是冇乜風景的,只適宜對窗發白日夢。


有人話在西伯利亞鐵路的旅途中,火車上很多同是天涯旅行人,因為乘車時間較長,和其他乘客日對夜對,可以認識來自四方志同道合的朋友,南天北地談天說教......但實情是.......因言語有別,一般俄羅斯人都不太喜歡和外國人溝通,包括麥記和Burger King的職員,所以去到俄羅斯想找人吹水?學識俄文先會好啲啦。

最易溝通的一定是小朋友,佢地四處找人同佢地玩,唔駛講嘢都明晒啦。


蘇聯佬鄰居通常都會由朝瞓到晚,按時施放沙林毒氣,瞓醒就睇書,見得最多的只有佢個籮柚,要吹水只可以同佢籮柚吹。


在漫長的旅途上,瞓覺一定是最好的節目了,在火車上搖吓搖吓地瞓,其實都幾舒服。


可能火車上始終缺乏食物和水,所以見到些蘇聯男女都很饑渴,饑渴到在公共場所當衆.........或者係我誤會啦,男的可能是蘇聯特工,女的可能是外國特務,帶有違禁物品,所以不斷被捜身,但見佢被搜遍全身都牡發現喎,真奇怪。



西伯利亞鐵路沒有歐洲火車的月票或套票等旅客優惠,必須逐程車買票,票價像股票一樣,價錢每秒也在變,能否買到好價錢便要考考眼光和運氣了。買票可以上網買,把e-ticket打印出來便可以上車,每次上車必定要對Passport Number和姓名。如果買的是西伯利亞鐵路支線的車票,可能唔係e-ticket,這樣便要在火車站找部出票機把車票印出才可以上車。如果買了e-ticket也可以找出票機印張正式車票,但印了正式車票後e-ticket便不能再使用。
  
 火車票出票機通常大站的出票機都有英文,但是 海參崴那部機只有俄文,都幾麻煩。此外,我試過在 喀山站出票時特然壞機,找職員攪了成個鐘。


自己print出來的e-ticket – 可以用它直接上火車。如果想換正式車票,也可以去出票機出張正式車票,但出票後這張e-ticket便會自動取消,所以假如出票機在最後一個step發神經壞機但又取消了這張車票,真係唔知㸃算。


正式火車票票上印有全名和Passport Number,上車時車務員必對。


大火車站都會有行李寄存服務,但多數不是24hr的。




[西伯利亞鐵路沿綫城市內的交通]

巴士常用的交通工具,有時都有似樣的巴士站,通常是後門上車,前門落車時比錢,司機有找續,但不懂俄文就有些麻煩。路線通常在Google Map找,但偶有出錯是正常的,不要太認真。


電車也是常用的平價交通工具,無聊冇節目時遊車河一流。只要見到電線上掛了個有電車號碼的牌,便是電車站了。


的士所有俄羅斯的士都不按錶收費,但大部分的士開價都很合理,大約每1kmRUB 25 ~30,個別地區如 海參崴會收每1km – RUB 50,整個旅程只遇過幾次給開天殺價。


Uber – 西伯利亞有超過一半地方可以使用Uber了,價錢超平,每1km只收RUB 15 ~ 20,短程平過巴士,而且完全不需要用俄文溝通,是旅客的首選。




[俄羅斯特色住宿]

除了莫斯科,俄羅斯其實冇乜令我特別想去住的酒店,今次亦只能揀到2處較特別的住宿。

俄羅斯傳統村屋Dacha – 位於西伯利亞大城市 克拉斯諾亞爾斯克(Krasnoyarsk)的郊區,是一棟俄羅斯傳統小木屋,有獨立旱廁,沒有自來水,有限度供電,屋外是片農地,種滿了各類疏果,可以自己摘來煮,是幾特別的體驗。


Hotel Complex Ostrov – 奧湼加湖上的小酒店,這小酒店位於俄羅斯西北部 奧湼加湖中一個連Google Map都冇名的小島上,酒店有傳統俄羅斯浴,又可以在夕陽下釣魚,算是整個行程最特別的一晚了。




[俄羅斯 西伯利亞的特色風景及文化]

這麼山長水遠來到西伯利亞,當然想睇啲平時見唔到的文化和風景啦。但老老實實,西伯利亞一般的風景真係普通過我啲普通話,不過,只要你對她不存在期望,相信她還是偶爾會帶來驚喜的。以下有些這次旅程中遇見的精選人物和地方。

克拉斯諾亞爾斯克(Krasnoyarsk) – 係咪好似荔景呢,我都以為返了香港,除了這𥚃,有些地方和元郎完全一樣。


教堂和紀念銅像在西伯利亞是無處不在的,比香港的7-11更多。


俄羅斯西北部白海中的 索羅維斯基島(Solovetsky Island),島上有與別不同的俄羅斯風貌。


俄羅斯文化遺產 芭蕾舞「天鵝湖」是遊聖彼得堡的重點節目。


世界級的彩霞日落,在俄羅斯多處地方也可以見到。


俄羅斯美少女更加是通街都見。




[俄羅斯 西伯利亞的特色美食]

來到西伯利亞這麽Dry的地區,不要期望有乜好嘢食了,雖然整體上俄羅斯的食物不算好食,但是偶爾也有些還可以的傳統美食。

羅宋湯(Borsh) – 俄羅斯的國菜,用大量紅菜頭加上少許牛肉煮成,俄國人喜歡再加入大量Sour Cream來增加酸味,是俄羅斯最好飲也是我最常飲的湯。


貝加爾湖魚湯用貝加爾湖的魚Omul加貝加爾湖的水煮成,魚肉鮮甜湯水味美,肚餓時飲簡直一流。


俄羅斯魚子醬款式繁多,但定律是「平嘢冇好,好嘢冇平」在街市買的貨九成是難食的流嘢。


罐頭三文魚子醬(RUB 420) – 這款是在街市買到最好味的魚子醬,爆油甘香不太咸,非常扺食,試過另外幾款不是太咸便是味道怪怪的。


鱘魚子醬Sevruga Caviar(5g : RUB 900) – 收得咁貴,味道當然係好,魚油豐富甘香獨特又夠口感,配香檳一流。


俄羅斯紅莓汁 ; 俄羅斯紅酒紅莓汁是俄羅斯的特色飲品,酸酸甜甜有㸃像利賓納,幾乎每間餐廳也供應這款飲品 ; 俄羅斯的紅酒就差點了,一般都偏甜又唔夠醇厚,比北海道的紅酒更差。


俄羅斯的水果種類又多又好食,尤其是水蜜桃布冧和桃駁梨,多數又甜又多汁,差點比得上日本貨。


燒貝加爾湖魚Omul – 這款白身魚比預期鮮甜,在俄羅斯來說是很好味了。


貝加爾湖魚Omul刺身較淡口的刺身,味道一般,只是身痕試一試。


俄羅斯生啤 + 貝加爾湖魚乾生啤唔錯,魚乾是湖魚生矖而成,咸咸哋用來送酒幾過癮。


煙燻 貝加爾湖魚Omul – 魚肉不是十分乾,魚油充足但咸了些少,味道唔錯,是生啤的最佳伴侶。


俄羅斯餃子冇中國北方的餃子咁好食,通常是磨菇、薯仔、豬肉或羊肉做饀料,再加入Sour Cream,是我在俄羅斯的主要糧食。


蒙古羊肉包因為西伯利亞緊貼蒙古國,所以有很多蒙古菜食,其中這款羊肉包子很流行,味道亦唔差。


俄羅斯朱古力唔試過真係唔知,原來俄羅斯朱古力好好味的,夠香濃又唔係太甜,品質甚高。


俄羅斯雪糕俄羅斯大部分的雪糕都好好食,夠香滑又重牛奶味,差不多每日食一杯。


新鮮皇帝蟹鮮甜美味價錢又平,我連續吃了2餐,只在 海參崴限定。

下一篇正式開始「西伯利亞 萬里長征」旅程,踏進 普京帝國盛世俄羅斯。






補充資料 :

1.)      USD 1 RUB 58.6 (當地銀行現金兌換價),即太約 HK$1 = RUB 7.48

2.)      俄羅斯境內很多銀行,而且辦公時間很長,換錢很方便,但滙價間間唔同,即使同一銀行不同分行的滙價也不同。此外,俄羅斯四處也見支緩PLUSJetcoCirrus等的ATM提款機,提款的滙價和當地銀行差不多,只是每次要約HK$20手續費。

3.)      俄羅斯旅遊簽證30天每位收費HK$546(領使館自己的網站上明明寫HK$390,但使館職員收我HK$546,不過有收據的。),申請前要上網同俄羅斯的Agent買一封Visa Support Letter,每人再收USD 30

4.)      藍十字保險31HK$395

5.)      Lonely Planet表示,俄羅斯的警犬是俄羅斯境內最危險的動物,經常屈遊客錢,離遠見到都要兜路行。飲食男女記者10年前在 葉卡捷林堡火車站外也遇上警犬想屈錢,攝影師還被推跌在地上。我今次試過一不留神在Kem的火車站外被一自稱Police的動物查Passport和火車票,還用手機把Passport 和車票所有資料影低,不過冇屈錢,但不知道那些個人資料會否用來犯罪或申請信用卡。

6.)      在俄羅斯行走,Google Translate 是必須要的,所以最好有上網卡。小太熊去到海參崴買當地的MTC電話卡,RUB 3505GB可用30日,但離開了出卡地區便當漫遊計算,要不斷增值才可以繼續用,30天大約要再入多RUB 400,計法都幾複雜,且要花時間出卡和入錢。

7.)      Maps.me 是必備的Apps,地圖完全靠佢。

8.)      我就去鴨寮街買了張俄羅斯上網卡,HK$2003GB,插卡即用30日,覆蓋俄羅斯全國及歐洲大部分國家,收得唔比MTC卡差,下次去都用呢張卡,好過去到才浪費時間買卡。








---待續---

24 則留言:

  1. 基日島(Kizhi Island), 想起又想再去.
    我那年是跟河輪, 在船上住了三晚,(4天三晚)
    每天到一/二處地方遊玩, 其他時間在船上HEA,很回味那份悠閒.

    回覆刪除
    回覆
    1. 我最初都想可以捱完西伯利亞火車之後,像你這樣在聖彼得堡坐郵輪去基日島的,但最後夾唔到船期,又唔係好識搵那裡有郵輪假期,最後都要坐返通宵火車去。

      刪除
  2. 令人大開眼界的西伯利亞之旅,個款朱古力我在長白山都見過,但無買來吃,原來走寶了!

    回覆刪除
    回覆
    1. 那款朱古力在俄羅斯的東方比較流行,但去到歐洲部分就未見過,原來中國都有得賣,味道令人喜出望外呀。

      刪除
  3. 好有共鳴呀! 堪察加真係要搵一次單獨去至得!
    Deluxe 的車廂真係好鬼正!
    你見嘅饑渴情度都不及我見到的,剛上車的亞嬸,同瞓係走廊位的亞伯一齊攪嘢,真係當我地無到呀!
    睇嚟天氣唔錯啊! 唔見你post基日島嘅相?

    回覆刪除
    回覆
    1. 要去堪察加一定要預足時間至得,資料又冇言語又唔通,乜都要去到至算。
      在Deluxe車廂瞓得好舒服架,冷氣又夠熱水又勁,值得一試。
      我記得你寫過這一幕,不過我冇你咁好彩呀,遇到我見的一場已經算幸運了,其餘遇到的三等鄰居都很斯文的。
      基日島唔掂呀,大重建中,啲洋蔥頭拆晒再起過,我去時只重建了7、8個,有排攪,你去時洋蔥頭有幾十個的。

      刪除
    2. 咁慘!山長水遠特登去基日島就係為左D木質洋蔥頭,真係想喊!我諗你一定講x#ry%6d&kdw

      刪除
    3. 好彩果日都有藍天,又去了附近的小島住了一晩,都冇白去的。

      刪除
  4. 回覆
    1. 話遲2年唔駛返工至去喎,可以去耐啲。

      刪除
    2. 只係近年很多同事未退休便病死咗,唔想學佢哋啫。少有少洗,好過冇命洗。

      刪除
  5. 好正的行程, 當年也曾乘過七天的火車去俄羅斯, 但沒有停留, 等睇你的見聞

    回覆刪除
  6. 等再分享吃得苦中苦,升為人中龍

    回覆刪除
    回覆
    1. 其實今次行程都唔算很吃苦😂
      已經寫咗好多篇了

      刪除
  7. 好特別的旅程,我要慢慢睇,你們是夏天去的嗎?

    回覆刪除
    回覆
    1. 是呀,七月去的,冬天去太凍了,不過冰天雪地又另有一番風味。

      刪除
  8. 我剛去完俄羅斯,都有買呢款朱古力,幾好味,不過送曬俾小朋友食。

    回覆刪除
    回覆
    1. 小朋友應該會好鐘意呢款味道的,朱古力味幾濃。

      刪除