2017年12月13日

西伯利亞 萬里長征(11) – 漫步古城 伊爾庫次克(Irkutsk)

俄羅斯 伊爾庫次克 喀山教堂(Kazan Church)

伊爾庫次克(Irkutsk)這西伯利亞的主要城市建於1661年,除了是旅客到訪 貝加爾湖(Lake Baikal)必經的中轉站外,這城市本身也有很多值得遊覽的景點。其中以市內最大的 喀山教堂和 安加拉河(Angara River)河岸最值得遊覽。此外,觀賞這城市街上獨有的有趣木屋也是一件賞心樂事。



西伯利亞 萬里長征 – Day 12
<<Listvyanka (Листвянка)>>

今日瞓到08:30才起床執嘢,早上陽光普照。食完早餐便要離開咁有特色的俄羅斯民宿了。


早餐有麵包和芝士,另有婆婆即製的香腸和一大碟炒薯仔,味道很好但份量太大,又怕食剩太多好似唔俾面婆婆,頂硬上都係吃了七成,真係太大碟了。


09:45食完早餐便外出搵車返 伊爾庫次克,行出大馬路不久便有部無牌的士主動問我,開價RUB 2000,講了一大論,最後RUB 1500成交。



<<伊爾庫次克(Irkutsk)>>

乘這部無牌的士,11:00已經回到 伊爾庫次克火車站。


伊爾庫次克火車站先在這裏放下大行李,再出市中心行街。


大行李寄存服務毎日RUB 150


跟著在火車站前乘Tram 4A 喀山教堂,每位RUB 15,上車買票。


今次賣票的亞姨好古惑,只給了我2張舊車票,自己袋了RUB 30,以為我是遊客就唔知佢啲古惑野。


喀山教堂外圍是食物批發市場,我們先在這𥚃買些水果,今晚通宵火車可以食。


喀山教堂伊爾庫次克最靚和最大的教堂,內部裝飾十分華麗。


教堂內有聖水飲,立即隊返幾杯先,今後必定身體健康,仙福永享,壽與天齊。


行完教堂乘4A號電車到Central Market再入些貨今晚食。中途入士多買杯雪糕嘆吓先。

俄羅斯牛奶(RUB 57) – 像飲奶粉,很差;俄羅斯雪糕(RUB 45) – 貫水準,香滑奶味重,唔錯。


Central Market – 在這裡再買少少水果,小太熊最鐘意食,佢話健康喎。


發現5日前賣RUB 550的罐頭三文魚子,今天在隔離檔只賣RUB 420,立即買返罐先,這款三文魚子最抵食又好味。


再買些無酵餅今晚用來送送三文魚子。


魚乾唔買了,昨天那條還剩一半未食完。


買完貨便漫無目的地到河邊散步,路過Харлампиевский Михайло-Архангельский храм教堂、沙皇亞歷山大三世雕像,最後行到去Yunosti Island,天色越來越差,開始下毛毛雨。

Харлампиевский Михайло-Архангельский храм教堂


沙皇亞歷山大三世雕像


Yunosti Island(остров Юности)


和小太熊無無聊聊坐在公園打了陣機飲支汽水,已經差不多夠鐘要去火車站,於是早少少坐電車走,懚陣啲。

今日會乘16:15開出的001號西伯利亞火車往 克拉斯諾亞爾斯克Krasnoyarsk (Красноярск),車程17hr,二等房每位RUB 5728


火車早29min埋站,又上車lur


今次的Conductor唔再係傳統俄羅斯亞姨,而是很好肉哋的俄羅斯女生。


今次坐的二等車廂,和頭等車廂的分別是多了2張上格床及床單被套要自己鋪。


二等車廂送的水和小食。


16:15準時開車了,又見到西伯利亞孖寶 草原加電線桿了。


原來今天程車包了餐晚飯,18:00已經送來了。

豬肉飯和雞肉通粉肉又鞋又冇味,都唔識分係咩肉,飯很乾像泥沙咁散,通粉像食紙一樣,好難形容有幾難食。


中午在市場買的 三文魚子醬(RUB 420) – 爆油甘香唔係太咸,好好食,配上無酵餅都唔錯。


食飽飯我又四圍行吓探吓險,順便搵沖涼房的位置。

其他二等車箱的乘客都好靜,個個唔係睇書發呆就係瞓。


接著行進三等車卡時,三等車廂的大媽Conductor正在卡與卡之間的門口處理緊大量床單,佢一見我想進入三等車廂便起身欄截,然後大吹俄文和做手勢叫我回頭,佢大致意思應該係「死契弟,呢度係三等車卡,又冇餐廳又冇嘢賣你過來做咩?走走走唔好攪住亞姐做嘢。」

可能我當時實在太無聊,於是我又而姨哦哦地大吹「哦文」,說:「我有friend响入面喎,探人唔得咩?行吓都得掛. . . . . .

就這樣大家你一言我一語地雞同鴨講,最後大媽很激氣地放了我入三等車卡,但關門後佢竟然立即Lock住度門,把我關在車卡內,我拍門佢又唔理,好很毒的一招,是考我智慧了,夠創意,我鐘意。


三等車廂內一樣咁靜,有些人還自製了布廉,夠晒私隱。


原來這三等車卡是最後2卡,根本冇餐卡和頭二等卡了,難怪大媽知道我是來攪事,又阻住佢執床單所以咁激氣,但佢現在把2卡三等乘客都鎖住,人地咪去唔到餐卡食飯囉,於是我參觀完之後便等多10min再嘗試拍門,等佢開鎖,不過佢真係唔理。

最後唯有用Google Translate揾最後一卡的Conductor求救,佢明白件事之後便大笑,然後開返門比我走。離開時要跳過一大堆床單,又滋擾到那惡大媽Conductor,佢今次怒啤住我,啤到我跟住唔敢再行入這三等車卡。

 這程17hr的長途火車只有一個大站「濟馬(Зима)」停30min,其餘的小站全部只停1 ~ 2min



<<濟馬(Зима)>>

19:57到達 濟馬(Зима)站,可以離開月台到附近行20min


從火車站行5min有座鄰似 碉樓的建築物。


附近還展出了一部舊式的火車頭,款式唔同早前見到的蒸氣火車頭。


上車前Pat Pat痕買了些小食上車嘆。

利士薯片(RUB 76);雪糕(RUB 55);大啤酒(RUB 72)


雪糕好正,真係日日食都唔嫌。

食完嘢帶埋RUB 150過隔離有浴室的車卡沖涼,但唔知㸃解那個Conductor只答了我「No shower」。就係咁就牡得沖了,唯有去厠所沫身,所以我幾時都話,俄羅斯人最叻的英文就係NO」,已經完全表達到,駛咩同你解釋咁多。



西伯利亞 萬里長征 – Day 13

朝早瞓醒覺,日出了,火車上的日出都幾靚架。





<<克拉斯諾亞爾斯克(Krasnoyarsk)>>

火車到達 克拉斯諾亞爾斯克(Krasnoyarsk).......乜咁似 荔景........


火車08:07埋站了,從今日這地區開始可以用Uber叫車,方便好多了,唔駛再和的士司機鬥智鬥力。

克拉斯諾亞爾斯克 火車站


在廣場前CallUber,但是可能司機還未用熟這Program,明明來到隔離都兜返出去,攪來攪去最後等了足足20min

從火車站去酒店Apart-Otel' Iris3.2kmUberRUB 89


Apart-Otel' Iris – 從大馬路轉入內園便見到這座2層高的平房酒店。


因為太早未能夠Check in,我們先在Reception放下大行李。


由於7月還是 蜱蟲(Ticks)出沒的季節,Lonely Planet話會傳播腦炎好危險架,到郊外時一定要做預防措施,所以第一時間去超級市場買藥先。
  
酒店Apart-Otel' Iris對面有間超級市場,內有蜱蟲噴霧賣。


蜱蟲噴霧(RUB 89) – 有咗佢就唔怕蜱蟲的腦炎菌了。


買完藥在隔離的餐廳Mama Roma食早餐。

Mama Roma – 是樓上酒店的附屬餐廳,散客可以比現金或信用卡。


自助早餐每位RUB 330,食物豐富又好味,超抵食。


食飽慢慢嘆埋杯茶。

今天打算到市郊的Stolby Nature Reserve行半日山,然後去動物園。

10:00在餐廳叫Uber車去,今次架車很快便停在餐廳門口,非常Pro






補充資料 :

1.)      USD 1 RUB 58.6 (當地銀行現金兌換價),即太約 HK$1 = RUB 7.48

2.)      乘的士從Listvyanka回到 伊爾庫次克,車費RUB 1500,車程65min,約72km

3.)      伊爾庫次克(Irkutsk) 市內有幾條主要電車線No.1, 24a穿梭火車站、Central Market、喀山教堂等主要地㸃,Google MapMaps.me可以找到電車站位置。每程RUB 15,上車後有票務員售票。

4.)      001號車次西伯利亞鐵路從 伊爾庫次克(Irkutsk) 克拉斯諾亞爾斯克(Krasnoyarsk),車程17hr,二等房每位RUB 5728,包1餐晚飯。

5.)      克拉斯諾亞爾斯克(Krasnoyarsk) 市內可用Uber叫車,比的士平和方便。






---待續---

12 則留言:

  1. 火車盒飯個樣非常難食

    回覆刪除
  2. 紅色教堂好靚!賣舊車票阿姨咁叻,比佢賺少少啦!

    回覆刪除
    回覆
    1. 這教堂我覺得是伊爾庫次克最靚的教堂。
      我如實報導佢啲醒目手法咋,冇當場揭穿佢呀😬

      刪除
  3. 得你一個壽與天齊都唔好話唔驚

    回覆刪除
    回覆
    1. 係喎,一時醒唔起,大鑊😅得我自己一個飲咗啲聖水。

      刪除
  4. 顏色好鮮艶,其實都有原因,冬天落大雪時,離遠都還可以望到嘛。

    回覆刪除
    回覆
    1. 應該是空氣沒有微塵,所以特別清。

      刪除
  5. 回覆
    1. 它是伊爾庫次克最靚的一座教堂,是必遊的景點👍

      刪除
  6. 三等車廂的大媽好勁,鎖門呢招真係出奇制勝
    蜱蟲噴霧俾你買到,可以安心行山

    回覆刪除
    回覆
    1. 咁絶都做得出,好彩我醒目,否則返唔到房都唔知㸃算,可能要企到下一站。
      的確是行得很安心,但又真係唔見有蜱蟲喎,不過小心啲始終是好的😬

      刪除