小太陽: 旅居英國 • 動態移民(07)

2022年10月8日

旅居英國 • 動態移民(07) – 倫敦鴨店Duck & Waffle

英國倫敦塔橋(Tower Bridge)

今次出發去英國之前以為英國的天氣長年多雲潮濕有微雨，現在來了英國一星期後發現情況比預期好得多，近日更加天天陽光普照，唔搽太陽油一定曬傷塊面。後來和一些英國人了解，他們表示近兩年英國真係多了很多陽光，天氣很反常，此外物價也很反常，出街食飯的價錢不少地方都加了20%以上，一場老漢廢鹽對世界的影響實在深遠。

旅居英國 • 動態移民 – Day 09

<<倫敦>>

繼續上一篇行程，食完Itsu之後繼續漫步倫敦市。

Fortnum & Mason – 小太熊話事頭婆好鍾意响呢度濕平架，濕完平就會上4/F的The Diamond Jubilee Tea Salon 食下午茶，所以一定要入去行吓，吸吓啲貴氣都好。

Fortnum & Mason賣的東西又貴又高檔，不過齋睇唔買就免費，睇幾耐都得，而且英國人又斯文又平等，齋睇唔買都完全冇壓力架。

見到火腿和Macaron便諗起8年前在巴黎老佛爺成隻豬髀買走，再買幾打Macaron做手信，果時好富貴架，冇依家咁拆墮要齋睇唔買。

The Diamond Jubilee Tea Salon – 因為事頭婆好鍾意响呢度食下午茶，所以呢度的下午茶好Full架，唔Book便冇位，仲要成70幾磅一位，唔捨得食喎，等下一世先啦。

繼續沿著Regent Street轉入Oxford Street，街景有點似上海法租界喎，呢度一定自古以來係某蟈一部份了，一定係除非唔係。

行運動用品店時買了一支噴鞋用的防水噴霧Crep Protect(£12.99)，下個月去蘇格蘭行West Highland Way的時候可以用。

估唔到街上仲見到呢款古董收費廁所，而且依然運作正常，比£0.5可以鎖門20min，希望下次來仍然見到佢啦。

行到Baker Street地鐵站，旅遊書明明話有很多福爾摩斯剪影，但去到時很多地方都维修中，搵唔到剪影。

福爾摩斯紀念館(Sherlock Holmes Museum) – 聽講是一間於1990年成立，收藏了很多有關福爾摩斯物品的博物館，內裡按照了小說中的情景來布置，完整複製了福爾摩斯的起居室和臥室。因為入場費太貴又係唔捨得入去。

攝政公園(The Regent's Park) – 不知為何黃昏前啲雀仔特別活躍，好似想歡迎我哋。

行完公園都差不多夠時間食飯了，今晚Book了Heron Tower 40/F的餐廳Duck & Waffle，由Baker Street坐地鐵去London Liverpool Street (£2.5)，再行400m去餐廳。

Baker Street Station – 站內裝飾確係幾古老，最衰唔見晒啲福爾摩斯剪影。

London Liverpool Street – 倫敦其中一個火車總站，有地鐵連接其他地方，站外有M記，唔怕冇平嘢食。

蒼鷺塔(Heron Tower) – 2011年落成的倫敦市商業摩天大樓，高230m，40/F便是24hr營業的餐廳Duck & Waffle，早幾日上網訂了今天黃昏日落時段。

大廈大堂的樓底超高，裝飾也十分之型格。

乘Lift上到40/F，一開Lift門便好似去咗日本咁，有驚喜啊。

穿過千鳥居後便是酒吧，風景好靚啊，唔食飯都應該上來飲杯嘢。

沿酒吧旁邊的樓梯行上一層樓才到餐廳。

再要穿過這酒吧區。

終於行到Duck & Waffle，比預期中少人喎，明明話Full晒冇位的。

餐廳很好，安排了窗口位給我們，可以由黃昏食到天黑，齋睇景都抵。

呢個View應該比坐上London Eye更加開揚。

今日餐廳內的遊客都唔少，個個都不停影相，手機食先，這裡的環境確係比食物更吸引。

初初望住呢位女士差點認錯佢係孟晚舟，不過係真都唔出奇吖，依家個個都興「潤」過來歐洲。

西班牙紅酒Familia Castano 175ml (£9.6)；Diet Coke (£3.4)；日落倫敦景免費

Duck & Waffle(£25) – 餐廳的招牌主菜，原味窩夫上伴有炸鴨腿和太陽蛋，加些糖漿一同吃，鴨腿炸得皮脆肉香，只係肉味弱少少，加埋雞蛋和窩夫一齊食，味道和想像中一樣但都很有新鮮感，雞蛋窩夫和鴨肉都味道鮮明沒有化學混和效果，值得一試的名物。

Fondant Potatoes (£9.1) – 加了這款伴菜，圓柱形狀的焗薯仔肉，外觀特別味道就係一般薯仔。

入黑後越來越多人了，個個都喜歡夜啲食晚餐。

遠望倫敦塔橋和倫敦塔

特登食慢啲，等到天色完全黑透，睇埋倫敦夜景才離開，呢度仲高過London Eye架，剩係入場費都可以收你£20。

雪糕(每球£2.8) – 甜品又唔貴喎，而且這球椰子雪糕好好味道。

返酒店的途中路過超級市場，買了些罐頭做儲備，再買些牛奶和水果今晚食。

今日買了唔少糧食，包括 : 吞拿魚(£0.9)、鯖魚(£0.9)、沙典魚(£0.55)、西班牙車厘茄(£0.99)、韓國Spam午餐肉340g(£2.25)和 2 Pint牛奶 (£0.9)。

坐地鐵(£2.6)由London Liverpool Street回酒店站Hammersmith。

返到酒店有點口痕，又食個Mama冬陰杯麵(£0.5)，呢個杯麵好正，尤其係湯底，微酸微辣很美味。來了英國只係一星期，肚腩越來越漲添，有種破列的感覺。

英國超級市場的食物價錢可以平得很過份，而且品質很高，不過住落之後發覺全英國來來去去都係得這十幾樣吃的東西比較平，出街食飯完全沒有平價選擇，除咗麥當勞。

旅居英國 • 動態移民 – Day 10

今日又係全日天晴。

朝早食酒店早餐時開始有點悶了，食少啲唔駛咁肥。

食完早餐乘地鐵由Hammersmith到Soho，忘記了有繁忙時間，早了4min於08:56入了閘，車費貴了£0.7，要£3.2，真係大意。

蘇豪廣場(Soho Square Gardens) - 蘇豪區內的普通公園都已經咁靚。

皇宮劇院(Palace Theatre) – 可容納1400人的大劇院，於 1891年已經開業，《孤星淚》從1985年開始在這劇院演出了19 年。我上次來倫敦時便是在這大劇場睇孤星淚演出。

倫敦的四大名物巴士、的士、郵筒和電話亭都係無處不在。

倫敦的電話亭相當攪鬼，呢個乜嘢都上網的年代依然有好多傳單貼在電話亭內，看來人客全部都七老八十了。

仲有Adult Store，英國實在係自由世界，當之無愧。

朝早再行吓唐人街，都有靚食材啊，買來煮都唔錯。

周街都係人民公社，不如唔好叫唐人街，改名做共產街吖嘛～

原來連華英雄都搬咗來倫敦開分店，下次來一定要入去支持吓。

呢檔雞蛋Pancake香噴噴，如果再住耐啲應該會買件試吓。

Historic Seven Dials – 唐人街附近一個很特別的社區，七條街道在中央迴旋處匯合，中心是一根紀念柱，社區保留了 17 世紀的原始佈局，區內有小型歌劇院和特色食店。

Rock and Sole Plaice – Historic Seven Dials區內賣炸魚薯條的老店，小太熊原本話佢排名高想試吓，不過去到見到佢完全冇客又縮沙唔買了。

Historic Seven Dials區內的民居都好有風格，真係同其他區唔同啲。

Seven Dials Market – 無意之中發現這人氣室內美食廣場，內有很多好嘢食架，原本冇諗住响呢度食都比佢吸了入去幫襯。

裡面只係典型的英式美食廣場，不過其中一檔好吸引我啊。

The Cheese Bar – 迴轉壽司食得多，迴轉芝士還是第一次見，忍不住要坐低試吓。玩法同迴轉壽司一樣，不同顏色碟不同價錢，最平一碟£3.25，最貴£5.78。

法國白酒Le Lesc Blanc (125ml) – 是最平的白酒，味道清新帶果香送芝士一流。

Clothbound Cheddar(左上)(£3.25)；Cheshire(右上）(£3.25)；Beauvale(右下)(£3.25)；Tunworth(左下)(£3.25)；Cured Ham(下)(£3.25) – 因為孤寒所以唔捨得試貴芝士，5碟要晒最平的款式，不過都全部唔同味好好食，有濃味有淡味有臭的有奶香的，如果人多可以試埋貴價芝士便更好了。