北海道 知床半島 ~ 熊出沒!注意!
知床半島 位於日本北海道東,屬世界自然遺產,區內最值得一遊的著名景點有 知床五湖和 羅臼岳。知床半島的天然資源豐富,除了盛產海鮮,陸上亦有很多野生動物,其中最著名的肯定是 棕熊了,區內不時會見到 熊出沒。在 熊出沒 的地方,必須帶備熊鈴才可以在郊野活動。
極上‧北海道 – Day 9
<<知床半島>>
昨晚小太熊臨時決定,今朝要04:00起床,然後要我揸車到附近兜兜,來個Morning Safari喎,佢話昨天馬路上咁多鹿,可能有熊添呀。
非常眼瞓地慢慢開車,沿著去知床五湖和木下小屋的路慢駛,不久便有嘢睇了。
小鹿正在吃奶,母親鹿就眼甘甘望著小太熊。
沿途勁多鹿,原來晨早真係會多些動物。
在車上影影吓相,四隻鹿仔特然好似受了驚地跑過馬路,我以為係自己嚇親佢地啦,隔了10秒,我離遠見到熊呀!!係野生棕熊,唔係小太熊呀。
再往山林處走
佢行得好慢,最後行入樹林了。
好正呀,小太熊終於遇到同類了,雖然大家膚色唔同,不過小太熊好開心啊!
車再繼續向前行多60min都冇再見到鹿以外的動物了。
今天好開心地返酒店食早餐。
酒店送了雙人 遊船河「硫黄山 コース」路線1.5hr,自己比錢每位要¥3300架。
乘這艘小船出海,整個船河時間大約70min。
昨晚住的酒店「知床グランドホテル北こぶし」
知床八景之「フレペの滝」
知床半島的懸崖和峽彎
最後去到溫泉瀑布「カムイワッカの滝」便回頭了,去唔到有熊出沒的位置。
遊完船河返酒店出車離開知床市,今日會揸去 羅臼市,沿途遊覧知床半島的景點。
第二站到知床八㬌之一「カムイワッカ湯の滝」,是條天然暖水瀑布,因為瀑布上游有個泉眼,因此河水混和了熱水而變成微暖。
沿著河中央向上行幾分鐘,便會見到一個水池,可以當溫泉來浸。
「カムイワッカ湯の滝」天然瀑布溫泉 – 泉水只是微暖,因為環境夠天然,初時都幾舒服,但浸浸吓全身越來越痕,可能是水質關係,浸唔夠10min便要上水,最慘係牡水沖身。
知床八㬌之一「知床峠」,遇上今日天氣好,羅臼岳特別靚。
中午到達目的地 羅臼市,小太能話要去「知床食堂」食飯先,佢話「知床食堂」係區市最Top的餐廳,而且食堂的招牌菜「汁煮金目鯛」每日限賣10份,太遲去怕會賣晒牡得食啊。
小太熊落車先,我要在店外泊好車,泊車處只是普通L位,左右均已泊了車,但空間唔算特別窄,我貪方便求期用車頭駛入車位,但入錯了位,要倒車再來,但入極都唔正,最後泊得斜斜的樣衰衰,開門落車都有些難度,我便慢慢郁前駕車想攞多少少位,點知車頭突然好似碰到嘢,小太熊在車外大叫「撞咗啦,仲郁,花晒啦」,我即時入返後波郁後少少,跟住冇心機再泊這裡了,駛過隔離個大停車場,勁多位,一樣你免費。
車頭花晒了,今次賠硬 保險NOC那上限¥20000。
出車第2日被影快相,第4日已經碰花了車頭,還有6日要揸車啊!個人牡晒心機頭Dup Dup,小太熊仲好衰,耐不耐就笑吓禾,攪到禾更加牡心機。但牡心機都要食飯的,頭Dup Dup地行上2/F的 知床食堂。
今日唔算旺場,還有幾張枱。
汁煮金目鯛定食(¥2900) – 是「知床食堂」的招牌菜,每日限定10份,每份賣¥2000-3500,視乎魚的大小,今日還有3條,我要了條最大的。
一啖金目鯛入口...... 鯛!失望,鮮美度和肉質都只算是普通好食的一條魚,完全沒有驚喜,2010年在東京築地「喜代村」吃的 汁煮金目鯛魚頭比這次更好食。
三色丼(¥3000) – 食堂另一招牌美食,三文魚子一貫高水準,外皮脆卜卜魚油甘香不太咸;海膽只是紫海膽,好食過一休屋些少,但和禮文島馬糞海膽冇得比;蟹肉是解凍的松葉蟹,解凍蟹來說已經很鮮甜了;都係果句,在香港比多少少錢都可以食到這種味道。
食完飯繼續向 知床半島東部進發,會行多20km左右,沿途停車遊吓景點。
天然 熊岩
セセキの滝 – 馬路旁的大型瀑布
最後一站「瀨石温泉」是位於海上的天然温泉
「瀨石温泉」的泉眼位於海中,當水退時温泉浴池便會露出水面,水温都有接近40℃,但水漲時海水會湧進池內,令水温下降。
出發前小太熊已經Check過今日中午會水退,可惜來到都牡得浸,因為水池長滿了青苔好核凸,今日還在清洗中未開放,唯有明朝晨早再來碰碰運。
駕車返回 羅臼市,再到附近的天然温泉「熊の湯」浸一浸。「熊の湯」是區內著名的天然公眾露天風呂,收費全免,男賓部完全開放連門都冇,在停車場位置更可以清楚看見男賓出浴;女賓部就好啲,外面睇唔到裡面。
女賓部有木板圍着,男賓部就全開放。
「熊の湯」男賓部 – 浸在這風呂都非常Free,可惜池水温度超高,應該有最少46℃,太熱我完全浸唔到,只能用木桶仔畢水再加冷水沖身,連同場的老外都說「Too Hot」。
在停車場位置可以清楚看見男賓出浴
浸完浴,到今晚的旅館「陶灯りの宿 らうす第一ホテル」Check-in,位於「熊の湯」1.5km。
旅館大堂很舒適,在這裡休息一會。
旅館內的 足湯
雙人淨房(¥14340) – 房間整潔舒適,不過冇View。
陶灯りの宿 室內温泉 – 忙了一整日,現在正式沖個涼先。
陶灯りの宿 露天風呂 – 男賓浴池又大又開揚,游水都可以。
女賓露天風呂又細又冇View,小太熊話係歧視喎。
沖完涼駕車到 羅臼市食晚飯,原本Target了「Kajika 鰍」,但不知為何又冇開門,最後在市內兜了幾個圈,揀了這間外觀最好的「旬菜家ゆらり」,但未知食乜。
鋪外又見有 野生孤狸,像野狗咁慘。
店內原來已有十多個客,都算旺場。
餐牌是全日文,要靠Google翻譯來點菜,但今次譯得麻麻。
毛蟹麵豉湯 – 誠意十足賣相一流,有半隻毛蟹仔,湯底很夠味。
炸魚沙律 – 普通好味啦。
かに天丼(¥2000) – 皇帝蟹脚天婦羅飯,蟹脚肉幾甜,碗飯都幾好味,唔貴。
燒牛舌(¥1100) – 味道一般,很油口,質感似豬腰,很古怪,整體上唔係咁好食。
北海道蜜瓜雪糕(¥200) – 回旅館前路過7-11,見門口廣告「北海道季節限定蜜瓜雪糕 1/7 – 31/8」好似好正便買一杯食。唓!流嘢!冇咩蜜瓜味,北海道來講這杯雪糕算差了。
回到旅館再嘆嘆温泉才瞓覺。
補充資料 :
1. ¥100 = HK$7.57 (永恆找換公司)
2. 在北海道TOYOTA租10日車,連全保險共¥122094。但TOYOTA的全保險仍然唔包NOC (Non Operation Charge),如果碰花架車最多自己要比多¥20000,撞到架車唔識行就最多自己要比多¥50000。
3. 今次10日環遊北海道總共行了1862km,入油總共用了¥8376。
4. 北海道的道路全部限速50km/hr或以下,即使在高速公路亦只許70km/hr,令到冇人唔超速,只視乎超多或少。北海道的道路上不時會見到黄色牌寫着 自動速度取締路線。然後不遠處便見到相機影人快相,整個10天自駕旅程有7日都遇到快相機,小心。
咁好彩竟然見到熊,係咪好近距離見到?
回覆刪除其實HI花左架車係咪要即刻報警的?
距離大概40~50m,唔敢再行近了,太近有些危險。
刪除理論上係,但報了警也要賠,所以冇報。
4月份開始, 租toyota 也有noc, 加 1620円/日 包晒
刪除太好了,下次就唔駛咁煩。
刪除哇!小太熊好大隻~~
回覆刪除果隻係大太熊,小太熊今天冇出鏡~
刪除