旅居英國 • 動態移民(04) – 塔橋灣畔The Tower Hotel

倫敦塔橋(Tower Bridge)

倫敦塔橋(Tower Bridge)是英國倫敦一座橫跨泰晤士河的高塔式鐵橋，已經接近130年歴史，是英國的地標建築。不少人包括小太熊都把倫敦塔橋(Tower Bridge)與倫敦橋(London Bridge)混淆，以為倫敦塔橋就係London Bridge，其實倫敦橋(London Bridge)只是一座其貌不揚，位於倫敦塔橋的上游約1km的另一座石屎橋。

旅居英國 • 動態移民 – Day 06

<<約克>>

今日早上乘火車從York返回倫敦。 

Wheatlands Lodge Hotel – 今日終於重見藍天了，和第一天到埗時一樣咁好天氣，不過要走了。

酒店房間包了今朝的早餐，不是自助餐但係可以Order好多野食，餐廳都幾靚，只係冇乜景觀。

傳統英式早餐都包括乳酪或水果做頭盆，我揀士多啤梨乳酪小太熊就揀了西柚；英式奶茶只係茶包加鮮牛奶，飲慣港式奶茶都覺得呢啲太淡，但飲慣咗又覺得幾清香喎。

Full English Breakfast – 有齊煙肉香腸雞蛋番茄炸薯餅茄汁豆和Black Pudding，其實真係好油口，尤其是塊Black Pudding，食完會立即感覺血管有點塞塞哋，唔可以成日食的，其他食物的熱量和鹽份都係太高。牛油果占多士可以無限加添，可以食埋中午果餐。

今天的火車10:23-13:31從York到London King’s Cross，中途要在Leeds等25min轉車，持有Two Together Railcard 2人車費£45，今日早上即時買票已經加至£123。

York Railway Station – 火車準時到站開出，整個旅程的誤點不超過10min，完全可以接受啊，英國火車暫停沒有傳聞中咁差勁。

<<倫敦>>

火車準時到倫敦King’s Cross Station，轉乘地鐵(Tube) Circle 線由King‘s Cross (7個站)直接到Tower Hill 站，用Oyster Card 車費£2.5。

今晚住靚嘢，位於倫敦塔橋和泰吾士河畔的The Tower Hotel。

The Tower Hotel – 酒店坐落於泰吾士河邊，倫敦塔橋隔離，雖然已經開始有點殘舊，但係性價比甚高，絕對物有所值。

倫敦塔橋景雙人房(連早餐)每晚HK$1600 – 房間望正倫敦塔橋，景觀完全滿分冇得輸，房內雖然有些少殘舊，整體上仍然好舒服，所以決定今晚買外賣回來慢慢歎。

由窗口望出去就係呢個景，望晒塔橋，泰吾士河和碎片大廈(The Shard)。

在房內沖杯奶茶休息夠之後便出附近行吓，順便買點食物。剛上到塔橋便遇上狂風大雨，來到英國成個星期還是第一次見這麽大的雨勢，好彩20min左右便轉返微雨，沒有影響今日行程。

Druid Street Shaft – 位於火車橋底的市集，街上有不少型格小店，有酒吧花店麵包店等等，不過大部分都冇開門，行了一會便離開。

The Circle – 位於倫敦塔橋附近的型格住宅區，設計風格獨特但欠缺景觀。

Shad Thames Historical Wharf Bridges – 倫敦塔橋旁一條歷史悠久的街道，建築物之間建有大量橋樑連接，設計獨特。 在 19 世紀時這地區是倫敦的綜合倉庫，存放大量的茶、咖啡、香料和其他商品，這些商品會被卸載到旁邊泰晤士河的船上然後運往其他地方。

泰吾士河畔放置了大量藝術品，遊客又多了些打卡位。

倫敦塔(Tower of London) – 位於泰晤士河北岸的一座城堡，是英國王室的宮殿，始建於千多年前，1988年被列為世界文化遺產。曾經用作軍械庫、鑄幣廠、宮殿、刑場和天文台等等，在第二次世界大戰期間曾用作監獄使用。

Hay's Galleria – 位於泰晤士河南岸一座歴史建築物，以前是倫敦的倉庫，於三十幾年前改建為混合用途的建築，現時內有辦公室、高級餐廳、商店和公寓。

繼續沿路行到London Bridge Station 附近的麥當勞買外賣晚餐。

再經過這間Johnny’s Fish Bar買炸魚薯條。

再入超級市場買支 紅酒(£6)，在英國買到的紅酒質素都係一般，價錢永遠由£5～£15左右，都唔會太貴亦唔會超平，印象中幾個月也沒有在英國的商店見過超過£30的紅酒。

Cod and Chips(£8.5) – 薯條已經焗到唔脆，而且炸得太乾，炸魚的脆皮亦已經焗濕晒唔脆，不過可以望住塔橋食，感覺味道還是可以的。

芝士漢堡(£0.99)；蘋果批(£0.99)；Mayo Chicken Burgers(£0.99) – 全部都係超值選，價錢比香港更平，最衰英國的魚柳包唔做特價。炸雞漢堡Mayo Chicken Burgers嘛嘛哋下次唔買，都係傳統的芝士漢堡和蘋果批好食。

今晚呢餐環境一流，由黃昏食到天黑，倫敦塔橋做主菜。呢間房性價比很高，抵住。

懶惰的小太熊話怕凍唔行夜街了，我自己一個出去睇吓夜景，倫敦的夜景確係好靚，而且不會被微雨和大霧天氣影響太大。

The Tower Hotel – 今晚從酒店起步，行上塔橋橫過泰晤士河，慢慢欣賞倫敦的夜景。

倫敦塔橋(Tower Bridge) – 交通繁忙的古橋，估唔到夜媽媽加埋凍冰冰毛毛細雨都仲有唔少遊客。

倫敦塔(Tower of London) – 古堡夜晚發晒光都好靚，睇古堡始終係外面靚過裡面。

碎片大廈(The Shard) – 英國最高建築物，72層樓高309.6m，2012年11月落成。

英國的天氣真係幾凍，已經3月了，這麼在河邊行一陣夜街已經凍到手指僵硬，影相都有點困難。

旅居英國 • 動態移民 – Day 07

昨晚等到塔橋關燈才瞓，今朝太陽未出嚟又要起床了，次次住貴酒店都係瞓咁少，爭取多些清醒的時間享受間房。

晨早起身從房間欣賞倫敦塔橋，睇住個天慢慢光，塔橋也重新亮燈

見冇乜雨便自己一個落樓下行吓，看看不同時段的塔橋景色，小太熊就繼續瞓覺囉。

酒店房間包了早餐，小太熊今早以為可以望住塔橋食早餐的，點知去到餐廳至知原來食早餐的餐廳是望不到塔橋的，有點兒失望。

最好的位置亦只能望住內灣，唯有坐呢度啦，其實景觀都唔錯，只係同期望有很大落差。

自助早餐的食物質素很高，水果夠新鮮，煙肉和雞蛋等等都好食。

食完之後發現原來有另一間有塔橋景的餐廳Vicinity 08:30開始也供應早餐，但要另外比錢，早知訂房時唔買早餐，可以比多啲錢去Vicinity食。

食完早餐返上房歎多一陣間便要Check out，今日天氣藍到爆，是好開始。

今日會轉去另一間酒店Holiday Inn Hammersmith住5晚，先把行李放在The Tower Hotel再出去行街，黃昏才回來取回行李。

首先帶小太熊橫過倫敦塔橋過對面岸，然後繼續行街。

Old City Hall – 行過塔橋之後立即見到呢座特別的市政廳，它位於倫敦泰晤士河南岸，聽講Old City Hall只係佢個名，實際上其實不是用於市政用途，而是出租用作商業用途。

倫敦橋(London Bridge) – 小太熊一直都以為London Bridge即係上面果座塔橋，其實只係下面呢條不起眼的石屎橋，於1973年才通車，但係佢其實都好巴閉架，重建之前的倫敦橋有成2000年歷史，第一條倫敦橋以木建成，是倫敦歷史最悠久的一座橋，1750年之前倫敦橋是橫過泰晤士河的唯一橋梁。

從London Bridge望返去Tower Bridge，原來都行咗好遠了。

St. Paul's Cathedral (聖保羅教堂) – 英國聖公會倫敦教區的主教座堂，原址教堂最初建於公元604年，現存的建築物也有三百多年歴史。

Millennium Bridge (千禧橋) – 橫跨倫敦泰晤士河的一座鋼索橋，全長325m，於2000年6月10日正式開放，行過橋上時會出現搖擺振動，相當好玩。

千禧橋上有人用麵包引來一大羣海鳥，海鳥們非常之眼明咀快搶麵包，好睇過海洋公園啲表演。

倫敦碎片大廈(The Shard) – 英國最高的建築物，外型有點像火箭。

補充資料 :

1.     £1兌HK$10.66 (HSBC網上兌換)

2.     乘火車由York 到倫敦，持有Two Together Railcard，網上預訂雙人票價£45。即日買票已經加至雙人票價£123。

3.     乘倫敦地鐵(Tube)由King’s Cross 到Tower Hill 站，用Oyster Card 非繁忙時間車費£2.5。

---待續---