縱橫沖繩 • 跨九州(70) – 大阪周遊卡 玩轉大阪

日本大阪 道頓堀

日本大阪近年發展了很多新景點，但始終覺得 道頓堀是最能代表大阪的地方，每次沒逛過道頓堀就不算到過大阪。道頓堀是一條位於大阪市的運河，全長不足3km，運河兩岸聳立著各種巨大立體招牌，其中最經典肯定是 蟹道樂和固力果招牌。今日道頓堀的樣貌相比十多年前第一次來時分別不大，最大分別是遊客多了不只一倍，街上的食店差不多全部要排長龍，連買串章魚燒也要排上20min，相信下次不會再在大阪停留了。

縱橫沖繩 • 跨九州 – Day 38

行程：神戶→大阪(陰晴不定間中有雨)

繼續上一篇Day 38行程。

<<大阪>>

經過整晚交通又巴士又船又火車又地鐵，終於由九州的小倉來到大阪。

08:30在神戶落船，轉車轉到頭都暈，10:25去到今晚的酒店SPA World。

SPA World是一座集結了世界各國特色溫泉的娛樂中心，同時也是一間大型酒店，住客可以24小時隨時進出溫泉中心。

SPA World規矩程序多多，成日阻人出入，但規矩又令人混亂，麻X煩，早知住隔離酒店，分開買票入場浸仲好。

攪了好耐才能成功放下行李在Reception，跟著乘地鐵到[大阪港]玩摩天輪和坐郵船，上個月在關西空港買了張2日大阪周遊卡2日票(Osaka Amazing Pass)(大阪周遊パス) - 每張¥3600，可以2日內免費乘大阪市內的主要地鐵線，而且包了好多入場費包括道頓掘遊船河和日本最高摩天輪等等，實際價值超過¥10000。

海遊館 水族館 – 日本最壯觀的水族館之一，不過大阪周遊卡唔包，唔玩呢間。

大阪周遊卡2日(Osaka Amazing Pass)(大阪周遊パス) (每張¥3600) – 持卡可以直接排隊上帆船 聖瑪麗亞號，不用先換船票。

帆船 聖瑪麗亞號 – 剛好可以乘12:00開出的班次，自己買票每位¥1600。帆船以哥倫布發現美洲大陸時所乘的船「聖瑪麗亞號」爲設計藍本，從天保山海遊館西側的碼頭出發，在大阪港兜一個圈，每節大約45min。

聖瑪麗亞號共分4層，最低層的船艙放了很多海盜裝飾，但看不到船外風景。

頂層風景最好，也是最多人的地方。

開船了，駛過旁邊的郵輪，我就好鐘意玩呢啲，不過小太熊唔鐘意。

港大橋 – 1974年通車的鋼結構桁架橋，全長980m，在世界排名第三日本排名第一。

2/F是觀景餐廳，今朝未食早餐，先在這𥚃食少少嘢。

牛肉飯漢堡(ビーフライスバーガー)(¥400) – 用日本米製成的冷飯焦爽了些三流的肥牛肉和醬油，用微波爐叮返熱，肚餓食OK的，很頂肚。

好彩2個人只買了一個，食多個都嘥quota。

天保山大摩天輪 – 高112.5m的世界最大規模摩天輪之一，其中有8台底部是透明的車廂，憑大阪周遊卡可以免費搭乘， 自己買票每位¥800。

透明車廂不用加錢，但要等30min，因為個個都等透明車廂。

等又值得啊，透明車廂開揚好多，小太熊玩得好開心。

去到最高點可以望晒成個大阪市。

玩完摩天輪又坐地鐵去[なんば(難波)]，憑大阪周遊卡免費搭乘， 自己買票每位¥290。今次會去去道頓堀坐船，以前未玩過。

道頓堀 – 第5次來道頓堀了，今次比以往每一次都更加多遊客，而且遊客的國藉也有很大變化，今日多了很多以前極少見的非洲、越南、泰國、菲律賓、印度遊客，連英語世界的歐美澳洲客也數量大增。

道頓堀水上觀光船 – 憑大阪周遊卡免費搭乘，自己買票每位¥1200，在Donki廣告牌下先攞船票，夠鐘才排隊落船。

順利攞到船票，45min後出船，可以先去附近買些小食。

一行之下，發現檔檔小食都大排長龍，睇個勢半粒鐘都未必排到。

連區區幾粒鱆魚燒一樣排到上月球，啲人儍架。

呢檔10円燒餅有興趣啊，見人揸住大大件熱辣辣，而且應該15min便排到，一於食呢檔。

開始排隊時四圍望望，發現店內好細隻字寫住¥500….. 原來係每件要¥500，10円只係印在燒餅上的圖案，咁又冇興趣了，咁貴。

浮世小路 – 道頓堀大街和法善寺橫丁之間的一條小巷，充滿日本古代氛圍，每次去道頓堀也來這𥚃打個卡。

日式蜜瓜包夾雪糕，難得唔駛排隊，想試呢檔，因為在沖繩吃不到 世界第二美味蜜瓜包，但小太熊冇興趣，咁唔買了，一個人食太大個。

道頓堀水上觀光船 – 夠鐘上船，觀光船會沿着道頓堀川巡遊20min，由另一角度看看熱鬧持續繁華的道頓堀，感受大阪最強的魅力。

導遊不斷講笑話，又不斷撩岸上的人打招呼，不斷揮手大叫Con Ni Chi Wa，岸上大部份的人也報以微笑或者揮手回禮。

浮庭橋 – 去到這綱橋便掉頭回起點。

最後在 固力果巨人廣告前停船比我們打個卡。原來這和固力果巨人廣告於1935年已經出現，差不多90年了。

坐完船真係肚餓了，全街最抵食係 金龍拉麵，價錢和我2008年第一次幫襯時一樣，每碗¥600，相信現在平絕全日本。

金龍拉麵 道頓堀店 – 大阪歷史悠久的拉麵老店，以前從未見過人龍，今次排足40min才有位。

雖然人多等位，但仍然坐得很鬆動，唔會迫身迫勢。

攞完位便自己去自動販賣機買拉麵券，拉麵煮好後自己行上前拿麵。食客可以根據自己的喜好免費狂加韭菜或辣泡菜，單食配料也可以返本。

金龍拉麵(¥600) – 麵條是自家製作，粗身但口感不覺硬，湯底香濃3片叉燒也充滿肉香，比博多拉麵好食。最難得只只收¥600還可以泡菜韭菜任加。下次來再食。

幸せのパンケーキ – 有耐冇食過Happy Pancake想食多次，這店以前來過一次，從金龍拉麵行15min。

Happy Pancake(¥1380) – 味道一點也沒有變，依然咁好食。Pancake鬆軟厚身充滿濃鬱的雞蛋香氣，加上少許伴碟的蜂蜜和奶油更顯甘甜，食極都唔嫌。

Happy Roll Cake(¥580) – 期望有油布院B-speak的美味，最少也要比得上Mon Cher，可惜是失望。不過公平點講這件Roll Cake還是好好食，值得食。

食完Pancake乘地鐵回到[動物園前]，憑大阪周遊卡免費搭乘， 自己買票每位¥190，落車後先去通天閣，唔返酒店住。

新世界本通商店街 – 很熱鬧的遊客街，差點比得上道頓堀，街上全是特色搶眼的霓虹燈招牌，遠望大阪地標 通天閣。

ジャンボ釣船 つり吉 – 這間餐廳中間有個大魚池，食客可以在池上釣魚，廚師再 把魚獲製作為料理，好有特色啊，想入去試吓，但看看Google的評分只有3.0，唔知係咩問題，不過一定唔會係好嘢，唔試了。

通天閣 – 塔高108m，由設計東京鐵塔的設計師於同期設計，憑大阪周遊卡可免費上到一般展望台，自己買票每位¥900。

超級多人排隊上塔，等了足足45min才上到一般展望台，排隊沿路也是金光閃閃。

一般展望台已經可以望到大阪市全景。

行回酒店途中經過Donki，¥322買了袋柑今晚食。

SPA World原來夜晚才是最旺的時段，裡面多人到唔想浸。

雙人房(包括早餐)每晚¥17787 – 房間又細又冇景觀，住客可以免費進入SPA温泉中心，非住客入場收費¥2500，即是房價實收¥12787。

SPA World 4樓為歐洲主題區，今日招待女賓，6樓是亞洲主題區，今日招待男賓。

亞洲主題區共有十多個浴池，設有伊斯蘭風格的熱水浴，也有日本和東南亞的特色温泉，桑拿室和蒸氣房。(借用官網圖片)

亞洲主題區看似吸引，但浴池的現場實況是迫到人貼人，完全唔enjoy，旅客來自世界七大洲，早知咁旺一定唔去，好嘢應該留返比各國初到日本的旅客，只浸了個多小時已經冇乜癮，早點返房瞓，原本預計玩足3hr的。

縱橫沖繩 • 跨九州 – Day 39

行程：大阪(陰晴不定間中有雨)

早上有點微雨，小太熊晨早特然話想去 木津市場的「木津魚市食堂」，佢話昨晚看見羣組好多人大贊喎，便同佢行1.2km過去望吓。

木津魚市食堂 – 大阪木津市場的海鮮丼専門店，06:00開店，我們07:10來到已經排了大約40人，走去隊尾排隊再看看。

店內原來只有8個位，根據以前在壽司大排隊4hr的經驗，每一轉人客大約停留45min，我們要第5～6轉才排到即係最少等4hr。

等咁耐好似又唔係咁值，想食的話下次05:00來排隊，應該可以第一轉便有位。後來在FB羣組有人大駡，話呢度只係普通好食，唔駛排隊才值得一試，根本不值得排幾個鐘，鬧啲人成日食了少少普通嘢就作文幾版紙吹到天咁大。

行返去SPA World食早餐，但房卡過唔到門口大閘，原來張卡出了閘便不可以再進入，攪了好耐才入得返去，所以話呢間SPA World的管理真係不知所謂，唔應該幫襯。

早餐不是太差，但絕對談不上好食。

全份自助早餐只有這杯軟雪糕和可樂最好味。

今日天氣依然經常落雨，繼續用 大阪周遊卡2日票玩轉大阪。

 

  

補充資料 :

1.     日元現金匯率￥100 兌HK$5.9，在這價錢入了不少貨。

2.     日元Visa Card簽賬匯率￥100 約兌HK$5.35。

3.     大阪周遊卡2日票(Osaka Amazing Pass)(大阪周遊パス) - 每張¥3600，可以2日內免費乘大阪市內的主要地鐵線，也包括了很多入場費包括 道頓掘遊船河和日本最高摩天輪等等，實際價值超過¥10000。

  

---待續---

日本沖繩、九州、山口縣40天行程參考(點連結有詳細遊記)

日數	行程路線	日程重點
Day 01	香港→大阪→石垣島	大阪近郊半日遊 ; 石垣市半日遊
Day 02	石垣島→與那國島	石垣市The Breakfast Hotel超值早餐 ; 與那國島半日遊
Day 03	與那國島	與那國島潛水(Part 1) ; 與那國島潛水(Part 2)+與那國島巴士半日遊
Day 04	與那國島	與那國島潛水(Part 3)
Day 05	與那國島	與那國島1天自駕遊(Part 1) ; 與那國島1天自駕遊(Part 2)
Day 06	與那國島→石垣島	石垣市半日遊 ; 石垣島半日美食遊
Day 07	石垣島	石垣島巴士1日遊(Part 1) ; 石垣島巴士1日遊(Part 2) ; 石垣牛烤肉～石垣屋
Day 08	石垣島→竹富島→石垣島	石垣市酒店超值早餐 ; 竹富島半日遊 ; 石垣島黃昏釣魚團
Day 09	石垣島→波照間島→石垣島	波照間島單車1日遊(Part 1) ; 波照間島單車1日遊(Part 2)
Day 10	石垣島→西表島→石垣島	西表島半日遊 ; 石垣島半日遊+石垣牛烤肉～石田屋
Day 11	石垣島→小浜島	小浜島單車半日遊 ; 小浜島南十字星度假村
Day 12	小浜島→石垣島	小浜島南十字星度假村 ; 石垣島Club Med假期(Part 1)
Day 13	石垣島	石垣島Club Med假期(Part 2) ; 石垣島Club Med假期(Part 3)
Day 14	石垣島	石垣島Club Med假期(Part 4) ; 石垣島Club Med假期(Part 5)
Day 15	石垣島→沖繩那霸	那霸市半日遊
Day 16	沖繩那霸→沖繩南部→恩納	沖繩南部自駕遊(Part 1) ; 沖繩南部自駕遊(Part 2)
Day 17	恩納→讀谷討→大石林山→古宇利島→名護	沖繩讀谷村體驗捕魚 ; 大石林山 • 古宇利島美食
Day 18	名護→沖繩萬座酒店	沖繩美ら海水族館 ; 花人蓬午餐 • 沖繩洲際萬座海濱酒店
Day 19	沖繩萬座酒店→讀谷村→美國村→那霸市	萬座毛 • Trip Café紫薯甜品 • 讀谷村 • 美國村 • 沖繩民瑤居酒屋
Day 20	沖繩那霸	那霸市1日遊(Part 1) ; 那霸市1日遊(Part 2)
Day 21	沖繩那霸→與論島	5小時渡輪往與論島 ; 與論島自駕遊
Day 22	與論島	與論島魚市場 ; 百合ヶ浜 ; 與論島浮潛 ; 與論島鄉土料理
Day 23	與論島	與論島自駕遊 ; 與論島酒店Pricia Resort Yoron
Day 24	與論島→奄美大島	8小時渡輪往奄美大島• 奄美大島鄉土料理
Day 25	奄美大島(通宵渡輪往鹿兒島)	奄美大島自駕遊(Part 1) ; 奄美大島自駕遊(Part 2) • 11小時通宵渡輪往鹿兒島
Day 26	鹿兒島→宮崎	宮崎日南海岸自駕遊 ; 宮崎秘湯旅館ホテル日南北郷リゾート
Day 27	宮崎→霧島	飫肥 • 宮崎牛燒烤午餐 ; 霧島溫泉秘湯~旅行人山莊
Day 28	霧島→熊本	霧島神宮 • 熊本市半日遊
Day 29	熊本→阿蘇	阿蘇火山一日遊 ; 阿蘇火山秘湯~阿蘇廣場飯店
Day 30	阿蘇→黑川温泉	黑川温泉1日遊(Part 1) ; 黑川温泉1日遊(Part 2) ; 黒川温泉旅館いやしの里樹やしき
Day 31	黑川温泉→福岡	篠栗九大之森 • 福岡燒肉店~大東園 ; 福岡中洲屋台
Day 32	福岡→佐賀→福岡	佐賀國際熱氣球節 ; 佐賀牛季樂本店午餐 • 福岡市半日遊
Day 33	福岡→山口縣美禰市→山口縣長門市	山口縣秋芳洞 • 秋吉台 • 秋吉台自然動物公園Safariland ; 長門湯本溫泉～大谷山莊
Day 34	長門市→角島→長門市	長門大寧寺 • 角島大橋 • 元乃隅神社 • 楊貴妃の墓 ; 山口縣絕景温泉ホテル楊貴館
Day 35	長門市→萩城	萩城半日遊 ; 山口縣萩温泉旅館～萩本陣
Day 36	萩城→小倉	小倉1日遊(Part 1) ; 小倉1日遊(Part 2)
Day 37	小倉→門司港→新門司港(通宵渡輪往神戶)	門司港半日遊 ; 門司 • 神戶內海郵輪阪九フェリー
Day 38	神戶→大阪	大阪2日遊(Part 1)
Day 39	大阪	大阪2日遊(Part 2)
Day 40	大阪→香港	大阪2日遊(Part 3)