縱橫沖繩 • 跨九州(57) – 福岡屋台 品味文化

九州福岡 中洲屋台

日本的文化遺產 屋台即是路邊車仔檔，主要售賣拉麵、串燒、 餃子、關東煮和天婦羅等地道美食，給下班的打工仔飲啤酒吹水的聚腳點，現在只剩下九州的福岡僅存有真正的屋台。福岡的屋台主要集中在 中洲和天神一帶，到屋台體驗日本的飲食文化是每次到訪福岡的重點節目。

縱橫沖繩 • 跨九州 – Day 31

行程：黑川溫泉→福岡(陰晴不定間中微雨)

繼續上一篇Day 31行程。

<<福岡>>

西鉄ホテルクルーム博多祇園 櫛田神社前 – 在大東園食完下午茶，行返酒店已經天黑，返房洗個面休息一陣，再去中州行街食嘢。

中洲 南新橋 – 中州是博多區  的人工小島，是福岡屋台三大集中地之一，聽說島上還有很多娛樂地帶、居酒屋和卡拉OK等等。穿過這小橋便進入中洲。

分隔中洲的 博多運河

進入中洲又冇話好熱鬧，反而有點水靜河飛。

發現有黃店呀，現在香港已經很難找到黃店，想支持吓都有罪，來到日本一定要支持吓啦。

不過都係諗吓啫，點敢支持黃店呀，想唔要命咩～

繼續沿着冷清清的街上行，撞鬼咩！日頭火車站多人過乜，夜晚條街鬼影都冇，咩構造呀。

中洲懸橋 – 終須行到有人氣的地方，原來全部集中在屋台附近的河邊。

中洲屋台 – 最能深入體驗九州道地美食文化的地方肯定是中洲屋台街了，連日本遊客也是來這些屋台食嘢。拉麵、串燒、天婦羅、關東煮等等日式頹物滿街都係，一排小販屋台沿着河邊擺檔，迫人過今年香港年宵市場，光是散步已能感受這份熱鬧喧騰。

屋台從18:30左右開始營業。上年10月去 天神屋台時大部份屋台也沒有營業，很開心今日見到中洲屋台這麼興旺，相信天神那區也回復舊觀了，不會像腥港那樣越來越折墮。

聽說日本的屋台是當地人的社交場所，打工仔刷老闆鞋的聖地，麻甩佬支持黃店前後的落腳點，生意唔愁做。

屋台必吃的頹物一定是博多名物 豚骨拉麵，因為現在屋台生意太好所以一般屋台都煮得冇乜誠意，求卵其煮碗頹麵比你快快食完好走，哀過大學的螢光汁頹飯。

食物質素雖然頹，但價錢和大餐廳米芝連都相差無幾，慘得過今時今日大把人報復式排隊爭住幫襯，唔搶錢對唔住死去的亞爺啦。

今日其實有目標的，就係尋找真正 博多豚骨拉麵的發源地，中洲屋台的代表～博多長浜拉麵(博多長浜ラーメン やまちゃん)。

博多長浜拉麵(博多長浜ラーメン やまちゃん) – 是博多豚骨拉麵的起源地，在天神區和博多駅也有分店，每間分別幫襯過2次都覺得好食，今晚特來試試這元祖屋台店。

前面排了十多人，但只排了20min便有位，因為見個個客都只係坐15分鐘便離開，快過去澳牛食光速快餐。

排隊時伙記已經比定餐牌我哋落定單，誓以最短的時間收我哋錢然後踢我哋走。

終於坐到埋位，迫到雙手不能正常垂下，一定要擺出一個詠春問手的姿勢才不會入侵隔離日本美少女的私人空間，簡直有咩食都冇心機睇。

成盆關東煮都冇乜誠意，西貢松記嗱喳麵一定好食得多。

每個人都要點飲料每個人至少要點一道菜

生啤(¥660)；烏龍茶(¥330) – 貴到大餐廳一樣。按照現場觀察，真係所有人都最少點一杯飲品和一款食物。

博多豚骨拉麵(¥858) – 湯底算是香醇濃郁，麵條較幼細口感卻清爽偏硬，叉燒的肉味一般，味道是好的。但食了兩啖伙記便過來滋擾，要我們和隔離的美少女一共4人一齊移過一個位，見入鄉隨俗，忍你。

明太玉子燒(¥990) – 好卵味的蛋卷，明太子有少少辣很冶味，見好多人叫，應該都出名的。

坐到周身唔舒服，食飯完快快走了。這時美少女又被要求移過去我們的位，一餐15min的光速餐要搬2次位，澳牛簡直連車尾都跟唔上，呢檔屋台簡直不知所謂。

找錢時伙記找了堆散銀給我，因為太迫人我冇數錢便行開，立即跟手數數，挑那媽找少了¥100，正想返去攞返但小太熊又阻住我，佢話行開咗冇証冇據好難攞返喎，唓！小太熊就係咁鐘意唔幫我幫人哋，明明人哋唔啱都係咁，上次在四國高知食飯收多了錢又係咁。

博多駅 – 聖誕燈飾已經佈置完成，行個圈欣賞一下。

還有個多月才聖誕，不過已經很有氣氛了。

行返酒店的中途又見兩檔屋台，原來福岡的屋台真係腥港以前的小販一樣，有生意就有人做。

回到酒店浸個溫泉，好舒服。

果汁雪條免費任食，試了黃色，以為係菠蘿味，但得個甜字。

明天倒茄咁早又要起身，乘最早火車去佐賀睇熱氣球節。

 

補充資料 :

1.     日元現金匯率￥100 兌HK$5.9，在這價錢入了不少貨。

2.     日元Visa Card簽賬匯率￥100 約兌HK$5.35。

 

 

---待續---

日本沖繩、九州、山口縣40天行程參考(點連結有詳細遊記)

日數	行程路線	日程重點
Day 01	香港→大阪→石垣島	大阪近郊半日遊 ; 石垣市半日遊
Day 02	石垣島→與那國島	石垣市The Breakfast Hotel超值早餐 ; 與那國島半日遊
Day 03	與那國島	與那國島潛水(Part 1) ; 與那國島潛水(Part 2)+與那國島巴士半日遊
Day 04	與那國島	與那國島潛水(Part 3)
Day 05	與那國島	與那國島1天自駕遊(Part 1) ; 與那國島1天自駕遊(Part 2)
Day 06	與那國島→石垣島	石垣市半日遊 ; 石垣島半日美食遊
Day 07	石垣島	石垣島巴士1日遊(Part 1) ; 石垣島巴士1日遊(Part 2) ; 石垣牛烤肉～石垣屋
Day 08	石垣島→竹富島→石垣島	石垣市酒店超值早餐 ; 竹富島半日遊 ; 石垣島黃昏釣魚團
Day 09	石垣島→波照間島→石垣島	波照間島單車1日遊(Part 1) ; 波照間島單車1日遊(Part 2)
Day 10	石垣島→西表島→石垣島	西表島半日遊 ; 石垣島半日遊+石垣牛烤肉～石田屋
Day 11	石垣島→小浜島	小浜島單車半日遊 ; 小浜島南十字星度假村
Day 12	小浜島→石垣島	小浜島南十字星度假村 ; 石垣島Club Med假期(Part 1)
Day 13	石垣島	石垣島Club Med假期(Part 2) ; 石垣島Club Med假期(Part 3)
Day 14	石垣島	石垣島Club Med假期(Part 4) ; 石垣島Club Med假期(Part 5)
Day 15	石垣島→沖繩那霸	那霸市半日遊
Day 16	沖繩那霸→沖繩南部→恩納	沖繩南部自駕遊(Part 1) ; 沖繩南部自駕遊(Part 2)
Day 17	恩納→讀谷討→大石林山→古宇利島→名護	沖繩讀谷村體驗捕魚 ; 大石林山 • 古宇利島美食
Day 18	名護→沖繩萬座酒店	沖繩美ら海水族館 ; 花人蓬午餐 • 沖繩洲際萬座海濱酒店
Day 19	沖繩萬座酒店→讀谷村→美國村→那霸市	萬座毛 • Trip Café紫薯甜品 • 讀谷村 • 美國村 • 沖繩民瑤居酒屋
Day 20	沖繩那霸	那霸市1日遊(Part 1) ; 那霸市1日遊(Part 2)
Day 21	沖繩那霸→與論島	5小時渡輪往與論島 ; 與論島自駕遊
Day 22	與論島	與論島魚市場 ; 百合ヶ浜 ; 與論島浮潛 ; 與論島鄉土料理
Day 23	與論島	與論島自駕遊 ; 與論島酒店Pricia Resort Yoron
Day 24	與論島→奄美大島	8小時渡輪往奄美大島• 奄美大島鄉土料理
Day 25	奄美大島(通宵渡輪往鹿兒島)	奄美大島自駕遊(Part 1) ; 奄美大島自駕遊(Part 2) • 11小時通宵渡輪往鹿兒島
Day 26	鹿兒島→宮崎	宮崎日南海岸自駕遊 ; 宮崎秘湯旅館ホテル日南北郷リゾート
Day 27	宮崎→霧島	飫肥 • 宮崎牛燒烤午餐 ; 霧島溫泉秘湯~旅行人山莊
Day 28	霧島→熊本	霧島神宮 • 熊本市半日遊
Day 29	熊本→阿蘇	阿蘇火山一日遊 ; 阿蘇火山秘湯~阿蘇廣場飯店
Day 30	阿蘇→黑川温泉	黑川温泉1日遊(Part 1) ; 黑川温泉1日遊(Part 2) ; 黒川温泉旅館いやしの里樹やしき
Day 31	黑川温泉→福岡	篠栗九大之森 • 福岡燒肉店~大東園 ; 福岡中洲屋台
Day 32	福岡→佐賀→福岡	佐賀國際熱氣球節 ; 佐賀牛季樂本店午餐 • 福岡市半日遊
Day 33	福岡→山口縣美禰市→山口縣長門市	山口縣秋芳洞 • 秋吉台 • 秋吉台自然動物公園Safariland ; 長門湯本溫泉～大谷山莊
Day 34	長門市→角島→長門市	長門大寧寺 • 角島大橋 • 元乃隅神社 • 楊貴妃の墓 ; 山口縣絕景温泉ホテル楊貴館
Day 35	長門市→萩城	萩城半日遊 ; 山口縣萩温泉旅館～萩本陣
Day 36	萩城→小倉	小倉1日遊(Part 1) ; 小倉1日遊(Part 2)
Day 37	小倉→門司港→新門司港(通宵渡輪往神戶)	門司港半日遊 ; 門司 • 神戶內海郵輪阪九フェリー
Day 38	神戶→大阪	大阪2日遊(Part 1)
Day 39	大阪	大阪2日遊(Part 2)
Day 40	大阪→香港	大阪2日遊(Part 3)