極地追蹤(5) – 挪威極北之King Crab Safari

挪威極北的 野生皇帝蟹(King Crab)，蟹肉又鮮甜又脆口彈牙，每隻足有3kg，在Gamvik的街市每 1kg只賣€10，只係香港八份一價錢。

極地追蹤 挪威•芬蘭•愛沙尼亞 – Day 4

<<Gamvik>>

昨晚落雪落到朝早，今日08:00起了身外出行吓，昨晚落完大雪，旅店屋外的積雪厚了好多。

開始出大陽了

旅店養了兩匹極地馬仔Fjord Horse，好肥好可愛，可以騎的，不過冇問幾多錢。

旅店養的雪橇狗(Husky)，好乖好可愛。

Ate弄好早餐了，其他人未起身，我和小太熊食先lur。

自家早餐比預期豐富，凍肉煎蛋芝士麵包鮮奶乜都有。

食完早餐，Ate架車載我們到小鎮附近逛逛。

看見Gamvik的雪地和彩色小屋，我覺得幾似我1997年去過的格凌蘭小鎮。

Gamvik的教堂，連今日星期日朝早都唔開門。

教堂旁的墓地

行完小鎮，Ate車我地去歐洲最北的燈塔，即位於挪威Gamvik的Slettnes Lighthouse。由燈塔離小鎮4km，行路都去到的。Ate架車因最尾一段路厚雪，只能去到約2.5km，要自己行最後的1.5km，約行25min。

在這裡落車向前行，係咪好有極地追蹤Feel呢。好彩今日好暖，有–3℃。

三面都係不見盡頭的雪地

到啦到啦，望見前面歐洲大陸最北的燈塔Slettnes Lighthouse，即係十九幾年前電波少年的終點站，估唔到我今日都可以用對脚慢慢行到去。

到達極地盡頭，可惜燈塔門鎖住了，上唔到塔頂，四圍的Office又冇人。

等了十幾分鐘都冇人，沿脚印返轉頭。

回頭途中，遇到5個燈塔職員，他們說冇鎖匙，但可試試到Gamvik的博物館，問keep燈塔鎖匙的職員借鎖匙，然後再上塔，又說他肯借的。雖然今日係星期日，但職員都可能在館內，可碰碰運。

可惜我們中午會去King Crab Safari，冇時間了，唯有下次啦(可能幾十年後了)。

Ate接我們返旅店後，便預備了簡單的午餐，有麵包、芝士和熱湯暖吓個身。

出發前一天，我和Satu說了今日自費參加King Crab Safari，佢安排了今日下午出發，在離Gamvik不遠的小鎮KjØllefjord出船。但我問Ate關於個Tour的資料時，佢就乜都唔係好清楚，只知13:00出車，去到KjØllefjord就等上船去捉巨蟹。

Ate準時車我們出發，原來由Gamvik去KjØllefjord都好遠，最少60min車，沿途雪景很壯觀。

今日中午開始又積雲，天地一片白，今晚的極光又唔樂觀了。

來到北極，居然見到風力發電。

<<KjØllefjord>>

沿途Ate帶我們遊車河，約14:30來到KjØllefjord了，這個鎮比Gamvik大好多，連較大型的酒店都有，但. . . . . . 有客咩？？

Ate揾到個Agent，Agent講挪威話的，表示要先等一隻大船埋岸，我們要到16:00才乘小船出海去隻大船果度。Ate的挪威話是有限公司，誤會理解成 “先等一隻大船埋岸，我們16:00乘小船出海接駁上隻大船，然後去攞魚捉黄帝蟹。”

飲吓茶，四圍行吓，很快16:00了，即係芬蘭時間17:00，所以天都黑了。

街上的車鋪滿雪

Ate話陣間可能會坐這種大船出海。

夠鐘了，我們立即穿上一身防水保暖衣，出發。

Ate都和我們一齊出發

只十幾分鐘，天色已由灰暗變成全黑了。

跟住，Agent帶我們三人上了隻六人小艇，只5min便去到一間Seafood Factory，然後帶我們進入工場內，在幾個水池內捉了十幾隻黃帝蟹落兩個膠籃。

我和小太熊睇到O晒咀，問Ate佢哋攪乜東東，Ate都O埋咀說唔知攪緊乜。但Ate同Agent的挪威話又溝通得麻麻. . . . . . . 唯有見步行步了，都似被人揾笨。

Agent又帶我們落返小艇，把黃帝蟹都送埋落船，跟住話大船到了，現在就駛過去....

我越諗越r頭，如果係上大船再出海捉蟹，兩條契弟做乜春要帶兩大籃蟹上小艇呢？我再多口問多次Ate，佢仍然係答我同一句話，唔知攪緊乜。

小船向海行了15min，見到一路講緊的大船了，真係好很7大呀 – 原來係五萬噸挪威郵輪，我即時同小太熊講，請佢食鹵味，原來係送貨呀！！！！曉！！！！

果然比我烏鴉口up中，隻小艇駛過去郵輪處，把兩籃黃帝蟹送了上船後，便一枝箭般駛回馬頭，Ate仍然係O咀狀態。

郵輪客今晚有黃帝蟹食了。整個King Crab Safari由穿好保暖衣至除下保暖衣，只用了60min。

上岸後，Agent話Tour完了，問我OK嗎？滿意嗎？如果15年前，我已媽义到佢反艇，但今日唔同了，火氣細了好多，只係諗，錢我未比，想我比一分錢你都難。

Ate見我黑晒面，立即話唔關佢事，係Satu安排的。又打電話比Satu講了十幾分鐘，然後再call剛才的Agent買返隻蟹(佢話每1kg ~ € 10)，等我都叫做有蟹食，唔駛咁樣衰，又話Agent唔啱，返到Inari至同Satu計數. . . . . 都算佢處理得OK！

等埋隻黃帝蟹已18:30，天氣仍差，還開始落雪。去到中途更有大風雪，心諗今晚實冇極光了。

<<Gamvik>>

返到Gamvik已17:30，Ate開始煮晚餐，我哋就沖涼先。沖完涼出外望望，個天竟然清返，仲見滿天星。正呀，預備食完飯就出去等睇極光。

約20:15左右，臨開飯，我只穿了2件衫，1條長褲，普通襪加拖鞋，手襪都冇的情況下，出外再望望. . . . .

嘩！成條極光在前面間屋飛過，好深色(現場太多燈光影响了條極光的能見度)。

我立即攞脚架出外影相，只見極光從不同位置標出來。

極光越來越強，當時只有約–2℃，我又唔夠衫，好凍，但都繼續影相。小太熊和其他人看了一陣，見極光冇再加强便返入屋了，只剩我一個。

只見極光再不斷增強，而且舞動得越來越勁，所以冷彊了手脚我仍唔走住。

這場極光Show只比前晚差小小，但我依然覺得強勁。

約21:00極光減弱了，才見小太熊走出來叫我入去食飯。我話我來睇極光的，唔係主打食飯。小太熊話：「仲唔返入去，凍死你呀！」

入到屋已有晚餐了，今晚有Catfish，共9個人(我和小太熊、Ate、香港海味店太子爺、三個來Working Holiday的老外和兩個美國人)一齊開飯。

Catfish的魚肉很滑，廚功甚佳，個汁底和薯仔都好好味。

食完飯再出去睇極光，但見極光佈滿整個天空，卻時強時弱。

又睇了成個鐘，始終冇剛才咁勁了。

約23:00，Ate煮好隻黃帝蟹了，八隻蟹脚佢分了我們每人一隻。

北歐人勁浪費，食黃帝蟹只食蟹脚，掉了個身，連蟹膏都唔食，唉. . . 心痛。原本諗住比返買黃帝蟹的錢Ate，但見佢這麽分晒成隻蟹，重好，慳返。

隻蟹脚勁大又鮮甜又脆口，高水準，鮮甜度比得上頂級的兩斤半重潮州凍蟹。

食完蟹再出外睇極光，只見天空少了好多星，多了好多雲，只剩下這方向有極光。

又過一陣，連這位置都積雲了，便返房瞓覺，當晚冇再出去了。

補充資料 :

1.    這個Gamvik Tour都好均真，Satu話叫我們玩完3日回到Inari才比錢佢，又話我哋一定滿意這處地方，比錢時會好開心。

2.    自費參加真正的King Crab Safari，計歐羅每位約€ 130，但必須叫Satu確認Detail先，否則好似我咁就浪費時間。

3.    最後回到Inari我和Satu講數，佢初時話這個King Crab Safari收我七折，但我還佢價Zero Pay，佢最後都接受，連Ate都幫我口，整個講數過程都算愉快。其實這次可能Satu都係比人呃，但我始終浪費了半日極寶貴的時間，所以我完全唔比錢。

4.    這次Gamvik – 3日遊是個特別體驗，Satu都均真老實，導遊Ate服務一流，值得推介。如果玩到真正的King Crab Safari便Perfect了。

5.    歐洲大陸最北的燈塔Slettnes Lighthouse只在夏季開況，可以上塔頂，上完有證書。如果其他月份去，燈塔職員說可試試到Gamvik的博物館，先問keep燈塔鎖匙的職員借鎖匙，然後才上塔，在博物館非辦公時間那keep燈塔鎖匙的職員都可能在館內，他肯借的，可碰碰運。

---待續---