絕地 • 天行 尼泊爾(11) – 最後一個目標 Gokyo Ri (5330m)

2011年4月24日 05:30 在Gokyo Ri 山腰望到日出

絕地‧天行者日記 尼泊爾EBC – 第 12 天

今天晨早 04:35 由 Gokyo (4750m) 出發上 Gokyo Ri (5330m)山頂，可惜行到一半我終於頂唔順放棄了，但小太熊好叻，成功登上這旅程的最後一個目標。行完Gokyo Ri (5330m)後立即全速撤退，原本今天目標要行到 Dole (4200m)，可惜中途又落雪，我因害怕像昨天一樣，便選擇 13:00 在Machhermo (4410m)落腳休息。今日狀態甚差，不只早上登山失敗，連落山的路段也感異常吃力，而且病得好勁，鼻涕不停，昨天還有1/16條命，今日又少一半，只剩下 1/32條人命了。

總步行時間(連休息)  –  4 小時55分鍾

 昨晚約了Sidar 今早 04:00 出發上山，但如果天氣差便取消，落山算了。

今早 02:00 和 04:00 分別起了兩次身，從窗外望到湖上一片大霧，心想今早唔駛上山了，好嘢。誰知 04:15 Sidar 拍門，話只係我見到的方向有霧，其餘位置可見到清天和星星，妖。。。玩咩!!

最後決定不理生死，展開最後一擊。我們立即狂食朱古力和飲保礦力，準備出發，看見室温有 4°C，都算暖。

04:35 起行了，我掛上頭燈，深深吸了幾口氣 Warm up後，慢慢一步一步向山上行。這段山路很平均地鈄，上極也是這個斜度，預計要 3hr才到山頂。昨天落了整日雪，山路上鋪滿了雪，行的時候比較冼和更吃力。開始時我的狀態不太差，但行了半小時後，心臟開始累了，又到極限了，呼吸不能再深再快了，只能用現有的呼吸狀態吸取氧氣。

越行越高，我開始要休息，停下來呼吸十數次後，再向上行十多步，如此這般，停下來呼吸的時間越來越長，但亦只足夠向上行多十步八步。捱到 05:30，終於看見天空開始變金黃了。

Gokyo Ri (5330m) 山腰看日出

05:55到達山腰 約5050m時，我停了下來不斷呼吸，但始終提不起力量再行前一步，而且開始感到，再强行上山便會「心碎、人亡」。想了一會，我決定放棄了，正所謂“贏要谷、輸要縮”，命仔要緊 ，養好病下次再來吧。

由於我落山完全冇問題，小太熊和 Sidar一起繼續攻山。

07:30小太熊上到山頂了，完成了四大目標，只有 小太熊。 

山頂回望第三湖和第二湖 

珠峰位置背光，看不見(Gokyo Ri 應該看日落最好，但中午後天氣又經常轉壞。)

小太熊在山頂狂影相，話影比我睇喎。 

小太熊落山了，中途又見到 第三湖和第二湖。 

Gokyo 和 第三湖 

我只花35分鍾便回到起點了。小太熊就 09:00 才回來。

大家都極餓了，早餐叫了極美味的 番茄吞拿魚 Pizza (Rs 550)。 

10:00 離開 Gokyo (4750m)，全速撤退。但很不幸，剛步出旅店又開始括大風了，而且强度比得上前幾日，令只剩 1/32 條人命的我倍感吃力。

途經 山中第二湖，很細，冇乜睇頭。 

向山下走，經過 山中第一湖，這麽細的一灘水都叫湖，玩咩?? 

過了兩個湖之後，天色變暗，温度又再降至 4°C，又抬烈風，令人咀喪。由於我今早又再傷了元氣，又捱唔住了，落山都捱唔住了，但都要捱落去呀。。。。個心仲會跳呀，即係可以行啦，行吧。。。。不久又再落雪，天呀，好辛苦呀，我要返屋企呀。。。。

13:00 終於捱到 Machhermo (4410m)了，決定在這裡住一晚。 

Sidar 和 porter知道決定在Machhermo (4410m)住一晚後很開心，他們快步帶我走向村內一間最殘舊的旅店。Machhermo (4410m)不是大站，只有三、四間旅店，旅客亦不多。

今晚住這間 Snowland Lodge 

雙人房 (Rs 500)，我在數天後一次發現導遊報大數想落格的事件，所以現在懷疑導遊可能開大房租落了格，房價可能只係 Rs 200 至 400。 

間房有兩邊對流窗，風景和位置好好。 

中午吃了 雜菜批 (Rs 240) 和 吞拿魚炒飯 (Rs 350)，食物幾好味，但衞生甚差，兩個店主對手異常污糟，見到都想嘔。

今日全店只有我們一枱客，所以店主給了 Sidar 和Porter一間雙人房，而且待他們如上賓，我吃吞拿魚炒飯，店主大方地炒多兩碟給他們，相信整個山中行程佢地最鍾意這旅店。

越來越冷，我食完飯買了盆熱水 (Rs 150) 洗面洗脚，15:00 便開始瞓了，室温只有 5°C。

瞓到 18:30 有些餓，和小太熊出去開飯。進入飯廳便見Sidar 、Porter和店主在玩啤牌，十分高興。我點了 吞拿魚螺絲粉和咖哩雜菜飯 做晚餐，店主又大方地煮了好多咖哩雜菜和白飯全店人一起食。

可惜店主對手太多黑污漬，看來三年冇洗過手，而且我同小太熊睇住店主徒手攞完 牛屎入飯廳的火爐生火後，再入廚房煮飯???????? 咪即係要食屎????小太熊很驚又開多個火頭 – 肚痛。

飯菜其實幾好味道，Porter 吃了兩大碟，店主還不斷叫我加飯加餸，但唔好啦，始終都係食屎。

食完晚飯和 Sidar 商討明天行程，我想 06:00 起行，去到 Dole 才食早餐。點知條契弟又講價，又話Dole 的早餐唔好食，死都話叫我食埋早餐至起行。妖，太討厭了，為了自己可以早餐時再做大爺嘆好嘢，成日啊支啊咗，最討厭係佢開始想拖延我的行程，不停遊說我在山區留多一、兩晚(等佢可多賺佣金，e.g.好多人最後一天會由 Namche Bazar 行六至七小時返回起點 Lukla，連Lonely Planet都係這樣Plan，但佢不停話這段路太長，不可能一天行完，Porter 都頂唔順，叫我在中段的 Phakding 住多一晚，分明當我儍仔老點)。我開始發覺佢壞心腸，並露出孤狸的尾巴了，決定扣起佢的部分 Tips。

今日又係異常大風，中午 12:00還下起雪來(温度只有4°C)。中午 15:00左右陽光再現，但不一會又落雪。晚上最低室溫有 1°C，但感覺比前幾次0°C更寒。

病完全冇好轉，好彩冇再惡化。

又瞓了，直至明早 05:00。

絕地‧天行者 失憶備忘錄

1.)    小太熊話，Gokyo Ri (5330m) 山頂的風景和我在山腰看到的差不多，而且今早有煙霞，視野不太好。

2.)    今日第 6晚冇涼沖了，好彩亦係最後一晚。

3.)    今日終於投降了，連落山心臟也感吃力，只剩 1/32 條人命了。

4.)    今日係山中生活的第 11日，全日都感到好凍，好想快些回香港開工、飲茶、睇醫生、沖凉.........

5.)    今天共行了 4小時55分鐘

04:35 – 05:55  Gokyo (4750m) to Gokyo Ri 山腰(約5050m)

05:55 – 06:30   Gokyo Ri 山腰(約5050m) to Gokyo (4750m)

10:00 – 13:00  Gokyo (4750m) to Machhermo (4410m)

---待續---