極地追蹤(3) – 芬蘭極光舞動Dancing Aurora@Inari.Finland

這次極地追蹤旅程最强的一幕極光 – 2013年2月8日晚上23:30在芬蘭Inari的冰湖上，當時漫天都見極光起舞，實在不枉此行。

極地追蹤 挪威•芬蘭•愛沙尼亞 – Day 2

<<Ivalo>>

昨晚食了白果，但我仲有4晚留在北極圈內，而且越上越北，更會有2晚住在挪威極北之地，位處極光環的中心，即極光最强位置，所以我對睇見極光仍充滿信心，不像香港團只住了一晚北極圈便要離開。

我諗連神都會說 : 「自由行是好的。」

今朝06:15便起了身，在清醒的情況再享受完這麽舒服的玻璃屋後，08:00左右行去Celebration House食早餐。

早上08:00個天才開始光，而且還在落飄雪，但明顯冇昨日咁凍。

這天的早餐不是旅程最豐富，但肯定係最好食的一次。

煙三文魚肥美新鮮，番茄又新鮮又甜，麵包新鮮軟熟，連唐心蛋都蛋香撲鼻，攪到我又要博命。

食完早餐執行李Check-out，出到Reception才09:45。今早Book了10:00參加一個2hr的Reindeer Safari，在自已酒店Santa’s Resort Kakslauttanen出發，回程就送我返Hotel Kakslauttanen。

話就話2hr的Reindeer Safari，其實由酒店來回馴鹿場都要一粒鐘，另外又有約半個鐘茶點時間和十分鐘穿保暖衣，其實真正坐馴鹿車的時間只有45min。

導遊準時來接我們，他是Sámi人(即係北極圈內的原居民)，佢一見就話認得我，原來昨天正是佢用鹿車載一對新人到Hotel Kakslauttanen冰雪教堂行禮，所以我們見過面了。

穿上保暖衣，開始出發。

鹿車經過一片雪地森林，個景都幾童話世界，但可惜今日個天灰灰的，沒有昨日的藍天白雲。

早上氣温有–17℃，穿上了保暖衣完全唔覺凍，話咁快就玩完回到起點了。

玩完鹿車，可以參觀吓個鹿場，餵嘢比鹿仔食。

跟住就會入去傳统Sámi人住的帳幕，生柴火煎Pancake食。

自助煎Pancake，每人一份。

勁有風味的Pancake，味道唔錯。

食完Pancake就車我們返酒店，咁就每位€ 123了，芬蘭的活動真係貴到冇朋友。

中午在酒店又行一會，等到夠鐘就坐15:05 – 17:00班巴士由Hotel Kakslauttanen去Inari。中午開始個天清返晒，Keep住這天氣今晚實見到極光了，今晚極光指數有“2”，唔差架。

從Hotel Kakslauttanen行兩分鐘出大馬路，在這巴士站斜對面等車，當時一片藍天。

巴士遲到了10min，中途在這站休息25min，隔離有兩間超市。

只四點幾，又開始積厚雲了，今晚唔太樂觀。

<<Inari>>

17:00去到Inari個天已黑晒，但星都見唔到一粒，天氣甚差。

今晚因為Book唔到Hotel Inari，要住間遠少少的Hotel Kultahovi Inari。同司機講聲，佢會專登車到去你酒店停車。

由Sámi人經營的Hotel Kultahovi Inari

最平的G/F雙人房(向湖)連雙人自助早餐，每晚€ 90。

房很細，但都好乾淨。

今晚求其在自己酒店的餐廳食飯，嘩！人山人海9成滿，諗住佢係好嘢，點知又貴又唔好味。

松露蟹肉忌廉湯(€ 14.9) – 蟹肉都幾鮮甜，忌廉湯唔太cream，好味道。

Lake Inari白魚肉加魚子伴蝦沙律(€ 12.8) – 幾特色的一味傳统菜式，味道OK！

肉眼牛扒(€ 24.8) – 牛味唔夠，扒王之王肯定正佢多多，呃錢。

煎Lake Inari紅魚(€ 25.9) – 四個字講晒，又貴又差。

兩份主菜都又貴又差，比人揾老襯，食個€ 10的Pizza好過。

Check-in時酒店介紹了兩個有用的芬蘭極光網站(www.yr.no和www.sgo.fi)，準確預測未來幾小時的每小時天氣變化和提供現場天空照片，天氣預測話22:00前還是滿天污雲，但22:00 – 03:00都一片清天，心情當堂好返啲。飯後小睡一個鐘，22:00準時起身出發睇極光。

由Hotel Kultahovi Inari行去Hotel Inari旁的湖邊要沿着這條冷冰冰的路行10min

剛到湖畔的小屋，我便在北方看見這一片微綠的極光，但小太熊分唔到，以為係一片雲，要我曝光25秒影張相睇佢先信。

小太熊：「唓！咁就係北極光嗱，唔係吓wah~~~」

我答：「嘩！見到都執身彩啦，你想又紅又綠滿天飛呀？」

小太熊：「乜北極光唔係應該咁架咩~~咁流架~~~又暗又唔識郁，我見人哋啲相. . . .乜乜物物. . . . . . 又紅又紫標出來fuk fuk聲架…………下删一萬字」

在–17℃加微風一邊講一邊玩One Night Stand，影吓啲微弱北極光，好快過了半個鐘，正想入去Inari Hotel休息吓暖暖個身，便發現西北方的極光越來越强，而且開始變形。

我影繁西北方的時候，小太熊大叫：「果邊又有啦！果邊又有啦！快啲影快啲影. . . 」

我立即轉部相機向東北方，果然又見一條綠光由地下標上天。

小太熊又大叫：「果邊又有啦！果邊又有啦！變緊形呀變緊形呀，快啲影快啲影. . . 咁慢架，冇左啦！！」我答：「我見我見！影緊影緊！」

在小太熊的強勢指揮下，我不停左左右右，前前又右地影低不斷變形的極光，不停把相機轉向，未set就按快門，所以D相都斜斜哋。

約23:15左右，手指脚指都彊硬了，但只極光越來越强，變得越來越快，滿佈西面北面東面和天空上，強光持續了最少20min。

終於見到紫色極光了，現場見和張相的強度差不多，但現場見的綠光強度就要打七折。

越來越誇，直情係極光舞動，大自然版的 – 幻彩詠芬蘭。

看見這最強一幕，已感今次值回票價了。

最後整個天空像宇宙大爆炸般佈滿極光，跟住散場。

睇到約23:45，強光散去，天空只剩下一片微淡的極光，這時真係要入Hotel Inari回氣了，否則凍死都未天光。

休息了20min，又出去等多30min，始終再冇乜料到，最後因為太累，返酒店瞓了。後來在挪威聽個老外講，當日約02:00又出現超强極光(我只信一半，因為後來發現個老外成日老吹，而且佢冇睇到我23:15那一幕。)

我就覺得今晚好好彩，可能跟住都再見唔到了。但小太熊個心好雄，話跟住兩日極光指數有“3”，而且明早會出發往挪威極北，極光環的中心，小太熊話一定勁過今晚喎。

補充資料 :

1.    參加Reindeer Safari可出發前一晚在Reception Book，2hr的Reindeer Safari收費每位€ 123，兩位起(包酒店來回馴鹿場接送，坐馴鹿車遊樹林約45min和在真正Sámi人的屋內生火煎Pancake和泡茶，有保暖衣供應)。

2.    由Hotel Kakslauttanen去Inari的巴士每位€ 17.3，車程約120min，上到車才買票，當日冇乜客。

3.    在Inari睇極光的最佳位置在Hotel Inari旁的Lake Inari湖邊，由Hotel Kultahovi Inari行去要10min，所以住Hotel Inari最方便。

4.    Hotel Kultahovi Inari提供了兩個有用的芬蘭極光網站(www.yr.no和www.sgo.fi)，準確預測未來幾小時的每小時天氣變化和提供現場天空照片，唔駛一早站着呆等極光，非常實用。

5.    大家平時見到的北極光相都係經過20秒以上曝光，所以相片會比現場眼見更綠。我感覺現場見的綠色只有相見的六至七成，但紫色就差不多。

---待續---