縱橫沖繩 • 跨九州(22) – 石垣島Club Med假期

日本石垣島度假村Club Med

Club Med是很久以前已經認識的老牌大型度假村，在世界各地均有分店，全球首創一價全包旅遊概念，只要一個價錢，便由交通、住宿、娛樂以至膳食各方面也不須再額外花費。度假村每天除了提供三餐豐富自助餐連飲品，不同的酒吧也會全日供應多類餐酒及汽水任飲，並定時供應小食，保證肚餓時一定有嘢食。免費活動包括了出海浮潛、獨木舟、滑浪風帆、SUP、瑜伽班、健身室、空中飛人、爬山單車、壁球、乒乓球、籃球、水上體操等等，每晚也有特備表演和DISCO，總之不出酒店範圍也令住客感覺多姿多采。Club Med另一賣點設有兒童俱樂部，代旅客照顧不同年紀的小朋友，所以吸引不少家長帶同子女入住，既可親子亦可享受個人的時光。

縱橫沖繩 • 跨九州 – Day 12

行程：小浜島(天陰) →石垣島(陰晴不定)

繼續上一篇Day 12行程。

<<石垣島>>

今日又轉酒店，從小浜島回到石垣島Club Med住3晚。

早上11:20回到石垣島碼頭，去Club Med的巴士要12:55才開出，便把行李放在巴士總站，四圍行吓街。

巴士總站有Locker，大行李櫃¥600。

石垣市公設市場 步行街 – 市內乜都行過了，無無聊聊再行吓呢度，買返頂帽和買件T裇。

御菓子御殿 紫薯撻(每件¥216) – 行過4～5次都賣晒的新鮮紫薯撻，今日終於見到，比入膠袋的紫薯撻每個貴成¥70，但食落就完全分唔到，一樣咁好味。店的門口有位可以坐低食。

沖繩桃汁 – 是小浜島はいむるぶし的雪櫃免費飲品，因為太多飲唔晒要攞走，現在飲就啱晒。

12:55 - 13:46乘巴士No.9去Club Med，過了川平彎之後要多5min車程，在酒店門口的「クラブメッド」站落車，每位¥730。

落巴士之後自行到大堂Check in，冇人幫手攞行李，收得咁貴服務真係差囉。

今次訂了「石垣島Club Med度假村4日3晚」Package，每位HK$4320，包括3晚雙人海景房，全天候飲食和酒店的免費活動，不包括交通接送。

Reception放了不同活動和飲食收費的Breakdown，唔住淨食和參加活動每日要HK$1200，可以食3次自助餐和玩4～5次活動，其實平住川平彎然後入來淨玩一日都OK，唔駛住咁耐。

招呼我們的G.O. 是馬拉華人，一開聲就廣東話，正到呢…佢首先介紹Resort內的設施和活動，包括免費活動的參加辨法和不少超貴收費活動，免費和收費餐飲等等。

免費活動之中以 離岸浮潛(只有早上一團)、滑浪風帆(早午各一班)和 爬山單車(每日三班) 最受歡迎，必須每晚20:00在劇場外才可報名明天的團，不可預早報名。

Welcome Drink是冰凍茉莉花茶。

這是住客專用智能身份證，包括了房匙在內，參加活動需要用它記錄，在酒店的所有消費也必須用這房匙記錄，Check out時再比錢。

G.O. 強烈建議為我們把智能身份證扣在手上，但缺點是扣得太緊不能脫下，即係沖涼瞓覺屙屎都除唔到，周身唔舒服，我立即強烈表達我的感受，自己調教鬆緊度至可以脫下手帶。

每日的免費活動也會在早一晚約20:00貼在劇場外。

G.O. 帶我們去房，沿着條路行覺得自問己去了泰國馬拉的Resort，完全不是日本feel。

我們住這座大樓的頂層，面向沙灘和草地，私隱度高。

四人海景房(包括2人全日餐飲和活動)每晚HK$2880 – 這是親子四人房，不過2個人都可以租，房間殘舊但整潔，尚算舒適，有大露台，海景無敵。

天色雖然又變灰，但海景真係好靚，感覺心曠神怡。

在房休息一會兒之後，開始四處走走認識一下這Club Med先。

步出Reception便是這個打算卡位。

泳池開放時間09:00~19:00，使用的人唔係太多。

Bar Tingara – 由09:00-24:00住客也可以無限暢飲酒吧飲品包括啤酒餐酒雞尾酒和定時享用輕食點心。

乒乓波好旺場，24hr見有枱便可以玩，枱上有波板和乒乓波。

壁球也是有吉場便可以玩，共3個場不能預約。

24hr健身房，瑜伽房也在這𥚃。

劇場 – 每晚也有不同的表演節目。

空中飛人 – 好堅架，原本以為好低能想玩，但排隊時見到其他人玩得好專業，最後都係唔敢玩。

籃球好少人用，最多都只有2個人練波。

沿着路牌行出沙灘望望

石崎海岸 – 天色好轉，海水又藍又綠好靚呀，像玻璃水一樣，差一點點便有波照間島咁藍。

Water Sports Centre – 開放時間09:00-12:00和14:00-17:00，可以借SUP、獨木舟、滑浪風帆和浮潛用具(岸邊浮潛唔肯借蛙鞋，只有Boat Trip Snorkelling才有蛙鞋)。

餐廳在14:00-16:00供應下午茶，冇乜人食，因為住客剛剛才食完午餐，只有少量新Check in的住客才會食少少。

今日未食午餐，係咁椅飲杯啤食啲水果啦。

15:00-16:00有滑浪風帆班，不過教得差啲學生又差，幾常有人失控衝入游泳區但教練又唔理，安全意識差到冇朋友。

暫時冇咩活動，便一個人打陣壁球，好耐冇打了，一陣便氣喘到斷氣。

17:00-17:30參加了瑜伽班， 只有30min仲包埋Warm up和Cool Down，導師都幾Hea。

瑜伽班逢星期三休息，其餘日子每日也有3班，每班最多10人左右，不過幾日都未試過Full。

Bar Tingara – 晚飯前來飲杯嘢先。

兒童的非酒精Menu，好多選擇啊，小朋友一定好鍾意。

大人Menu多很多款酒，有紅白酒啤酒雞尾酒，也有汽水果汁和Mocktail。

17:30開始有小食供應，送啤酒唔錯，不過唔食太多了，太飽食唔落飯。

Fruit Punch – 小太熊飲Mocktail，係橙汁菠蘿汁溝紅石榴糖漿 ; Blue Dolphin – 我試藍色夏威夷，有檸檬汁雪碧溝毯酒。再加些芝士小食送酒。

18:30-20:30是晚餐時段，18:15已經排了40～50人，晚餐時段是最多人的，反而早午餐有好多人唔食。

晚餐非常之多人，散賣要¥9500架，一定唔值。

日本清酒任飲。

第一Round先吃點壽司送清酒，質素唔差的，和元氣壽司差唔多。

煎魚和煎雞扒普通啦，唔算太差，比傳說中好。

烏冬麵都係快餐店質素，很普通但一定唔難食。

食物質素冇乜驚喜，唔食咁多慳返啲Quota。

19:47行到去劇場外排隊報名明天的免費活動，已經有廿幾人排在前面了，都幾癲吓。

成功報了明天早上的Boat Snorkelling和下午的Mountain Bike，真係遲些來都Full。

19:45 – 20:30劇場有Children Show，原來係住客的小孩子天才表演，有些小朋友好叻又有些嚇到喊，有些就上到台唔敢出聲，真係幾好的小朋友訓練。

Club Med Signature – 在隔咗酒吧叫杯野飲，一邊飲一邊睇表演。

20:30 – 21:15是Adult Show，不過原來只係空中飛人表演，冇乜成人表演，揾笨。

接着是民謠演唱。

最後表演雜技，水準絕對有馬戲團咁高質素，其實日間見佢哋只係普通員工，有些在餐廳招呼人客，真係多才多藝。

夜晚泳池好靚，不過唔準游水了。

21:15在酒吧有Disco，表演散場後便過來鬆一鬆，氣氛唔錯㗎。

今日節目好豐富，在Club Med的日子日日都係咁樣過的。

 

補充資料 :

1.     日元現金匯率￥100 兌HK$5.9，在這價錢入了不少貨。

2.     日元Visa Card簽賬匯率￥100 約兌HK$5.35。

3.     石垣島Club Med度假村4日3晚Package，10月每位HK$4320，包括3晚雙人海景房，全天候飲食和酒店的免費活動，不包括交通接送。7～8月暑期每位收HK$7000，冬天淡季每位只收HK$3000。

4.     Club Med免費活動之中以 離岸浮潛(只有早上一團)、滑浪風帆(早午各一班)和 爬山單車(每日三班) 最受歡迎，必須每晚20:00在劇場外才可報名明天的團，不可預早報名。

 

---待續---

日本沖繩、九州、山口縣40天行程參考(點連結有詳細遊記)

日數	行程路線	日程重點
Day 01	香港→大阪→石垣島	大阪近郊半日遊 ; 石垣市半日遊
Day 02	石垣島→與那國島	石垣市The Breakfast Hotel超值早餐 ; 與那國島半日遊
Day 03	與那國島	與那國島潛水(Part 1) ; 與那國島潛水(Part 2)+與那國島巴士半日遊
Day 04	與那國島	與那國島潛水(Part 3)
Day 05	與那國島	與那國島1天自駕遊(Part 1) ; 與那國島1天自駕遊(Part 2)
Day 06	與那國島→石垣島	石垣市半日遊 ; 石垣島半日美食遊
Day 07	石垣島	石垣島巴士1日遊(Part 1) ; 石垣島巴士1日遊(Part 2) ; 石垣牛烤肉～石垣屋
Day 08	石垣島→竹富島→石垣島	石垣市酒店超值早餐 ; 竹富島半日遊 ; 石垣島黃昏釣魚團
Day 09	石垣島→波照間島→石垣島	波照間島單車1日遊(Part 1) ; 波照間島單車1日遊(Part 2)
Day 10	石垣島→西表島→石垣島	西表島半日遊 ; 石垣島半日遊+石垣牛烤肉～石田屋
Day 11	石垣島→小浜島	小浜島單車半日遊 ; 小浜島南十字星度假村
Day 12	小浜島→石垣島	小浜島南十字星度假村 ; 石垣島Club Med假期(Part 1)
Day 13	石垣島	石垣島Club Med假期(Part 2) ; 石垣島Club Med假期(Part 3)
Day 14	石垣島	石垣島Club Med假期(Part 4) ; 石垣島Club Med假期(Part 5)
Day 15	石垣島→沖繩那霸	那霸市半日遊
Day 16	沖繩那霸→沖繩南部→恩納	沖繩南部自駕遊(Part 1) ; 沖繩南部自駕遊(Part 2)
Day 17	恩納→讀谷討→大石林山→古宇利島→名護	沖繩讀谷村體驗捕魚 ; 大石林山 • 古宇利島美食
Day 18	名護→沖繩萬座酒店	沖繩美ら海水族館 ; 花人蓬午餐 • 沖繩洲際萬座海濱酒店
Day 19	沖繩萬座酒店→讀谷村→美國村→那霸市	萬座毛 • Trip Café紫薯甜品 • 讀谷村 • 美國村 • 沖繩民瑤居酒屋
Day 20	沖繩那霸	那霸市1日遊(Part 1) ; 那霸市1日遊(Part 2)
Day 21	沖繩那霸→與論島	5小時渡輪往與論島 ; 與論島自駕遊
Day 22	與論島	與論島魚市場 ; 百合ヶ浜 ; 與論島浮潛 ; 與論島鄉土料理
Day 23	與論島	與論島自駕遊 ; 與論島酒店Pricia Resort Yoron
Day 24	與論島→奄美大島	8小時渡輪往奄美大島• 奄美大島鄉土料理
Day 25	奄美大島(通宵渡輪往鹿兒島)	奄美大島自駕遊(Part 1) ; 奄美大島自駕遊(Part 2) • 11小時通宵渡輪往鹿兒島
Day 26	鹿兒島→宮崎	宮崎日南海岸自駕遊 ; 宮崎秘湯旅館ホテル日南北郷リゾート
Day 27	宮崎→霧島	飫肥 • 宮崎牛燒烤午餐 ; 霧島溫泉秘湯~旅行人山莊
Day 28	霧島→熊本	霧島神宮 • 熊本市半日遊
Day 29	熊本→阿蘇	阿蘇火山一日遊 ; 阿蘇火山秘湯~阿蘇廣場飯店
Day 30	阿蘇→黑川温泉	黑川温泉1日遊(Part 1) ; 黑川温泉1日遊(Part 2) ; 黒川温泉旅館いやしの里樹やしき
Day 31	黑川温泉→福岡	篠栗九大之森 • 福岡燒肉店~大東園 ; 福岡中洲屋台
Day 32	福岡→佐賀→福岡	佐賀國際熱氣球節 ; 佐賀牛季樂本店午餐 • 福岡市半日遊
Day 33	福岡→山口縣美禰市→山口縣長門市	山口縣秋芳洞 • 秋吉台 • 秋吉台自然動物公園Safariland ; 長門湯本溫泉～大谷山莊
Day 34	長門市→角島→長門市	長門大寧寺 • 角島大橋 • 元乃隅神社 • 楊貴妃の墓 ; 山口縣絕景温泉ホテル楊貴館
Day 35	長門市→萩城	萩城半日遊 ; 山口縣萩温泉旅館～萩本陣
Day 36	萩城→小倉	小倉1日遊(Part 1) ; 小倉1日遊(Part 2)
Day 37	小倉→門司港→新門司港(通宵渡輪往神戶)	門司港半日遊 ; 門司 • 神戶內海郵輪阪九フェリー
Day 38	神戶→大阪	大阪2日遊(Part 1)
Day 39	大阪	大阪2日遊(Part 1)
Day 40	大阪→香港	大阪2日遊(Part 3)