單戀大馬雙城(4) – 檳城榴槤 • 忘不了

令人忘不了的 檳城樹上熟榴槤 蜈公

今次單戀馬國雙城之旅，其實只有2個重點行程，就係入住檳城的榴槤果園 寶盛園(Bao Sheng Durian Farm)品嘗清晨剛從樹上掉下來的極品新鮮榴槤；和一嘗近年人氣大盛，身價比蘇眉更高的超級野生河魚之皇<忘不了Empurau>。能成功一嘗這2種人間極品，實在不枉這次馬來西亞之旅。

單戀大馬雙城 – Day 4

今天是行程最重要的一日，所有重要節目都放了在今晚和明天晨早，好興呀！

今日又係安樂醒，然後Me Me Mor Mor去食早餐。 

Sparking Wine早餐依然豐富好味

食完嘢焗吓Sauna游陣水，玩到11:30 Check-out。

今日會乘中午船返檳城，然後入 寶盛園(Bao Sheng Durian Farm) 住一晚，因比打電話約了早2日那司機，叫佢在檳城碼頭等，貪佢RM 25包一個鐘夠平嘛。

 約了Alun-Alun SPA 11:30在大堂接送，車我們到Kuah Town的分店做Massage。

Alun-Alun SPA位於Bayview Hotel內，唔算豪崋，但都算乾淨。

揀了1hr的Traditional Malaysian Massage，每位RM 120，水準很高手勢很好。

做完Massage可以沖涼，之後SPA Centre有車送我們到碼頭。

今日天晴，臨走再探一探這隻 神鷹。

乘這大船14:30回檳城碼頭，又係坐足3hr。

約17:40步出檳城碼頭，見到司機在等我們了，上車. . . . . .

第一站叫司機先送我去位於新關仔閣附近的 松花江餐室，到埗後，我話佢知今日的行程，先到松花江餐室吃小食，再到Batu Feringgi的餐廳“Golden Thai” 晚飯，再順路去 寶盛園，全程包車約3至4hr。

最後Confirm佢每個鐘RM 25，點知條粉葛話 :「寶盛園?? 好遠架. . . 唔順路. . . . 要走回頭兜個大圈. . . Golden Thai唔抵食架，我帶你去. . . .」

我 : 「咪玩啦，我第 3次來檳城了，識路架，開個價啦。。」

司機最後話 : 「咁啦，逐程計你，碼頭來這裡RM 15，再去Batu Feringgi收RM 40，等你食完飯去埋 寶盛園收多RM 60。」

頂，咁咪同我自己散截的士一樣價，駛Q包你車咩. . . .

我 : 「一口價啦，Total RM 100，唔制我就比 RM 15落車。」

司機： 「好啦，Total RM 100。」

成交後小太熊說： 「個司機咁麻煩，唔好幫襯佢啦。」

唉！算啦！的士從來在那個國家或地區都係咁麻煩的，總算比市價平了少少就算啦。

檳城人氣食店 松花江餐室

松花江餐室最出名就係 炭燒雞翼，見到都流口水。

話梅沙梨冰(RM 2.7) – 酸酸甜甜勁好飲，除檳城外，大馬其他地方飲唔到。

炭燒雞翼(每隻RM 2.2) – 皮脆肉嫩夠入味，比得上吉隆坡的黃亞崋，是檳城必吃小食。(Remark : 2016年06月再專程來幫襯，已經變了普通貨式，可惜。)

福建蝦麵(RM 4) – 算係今次行程最好味的福建蝦麵了，但湯底始終不及從前吃到的鮮甜，失望。

18:30食完嘢又上車，向沙灘Batu Feringgi進發。

黃士心推介的海鮮餐廳“Golden Thai” 

餐廳有冰鮮海產，價錢算幾貴。

較抵食係 巨型河蝦(RM 25.8 – 100g)，下次試。

這次行程的重點，就係食這野生河魚之皇<忘不了Empurau>。

<忘不了Empurau>是鯉魚的一種，野生於大石頭急流河域一帶，馬來西亞主要分布地區包括吡叻州、登嘉樓、彭亨、吉蘭丹、沙巴及砂勞越。<忘不了Empurau>的肉質脆嫩魚味鮮甜油味回甘，近年才開始被重視，現在屬大馬最高身價的魚，價格比起其他名貴海魚類如老鼠班、蘇眉還要高，每 1kg賣RM 588，每條最細都 1.3kg重。

由於黃士心、幟哥和韜韜都高度推介<忘不了Empurau>，因此幾貴都想試一試，有錢佬名人食家的口味有何出衆。

揀了這條最細的<忘不了>，重1.28kg，賣RM 755，仲要加一和6%消費稅，共收RM 876，折實港幣 2150，真係未食都貴到<忘不了>。

揀完魚，坐近沙灘位睇完日落至食，富豪享受啊！

細Tiger Beer RM 11.6，邊飲邊嘆日落。

上菜了，第一次食這麽貴的魚，不論係兩價或條價都係未試過咁貴，究境會唔會唔好味呢？定只係好普通呢？還是真係咁令人<忘不了>呢？好緊張呀！！

野生河魚之皇“忘不了Empurau” – 重1.28kg，賣RM 876，折實港幣$2150。

試一口魚腩，魚油味回甘好香口啊！再試一口魚身肉，肉質真係脆嫩魚味勁鮮甜，味道完全冇令我失望，已是我想像中最美味的河魚味道了。。。只係。。。真的好貴。

2個人隊晒成係魚，勁呀！

另加送的椒盬炸“忘不了” 魚鱗，幾香口但食唔落了。

“Golden Thai” 位於沙灘Batu Feringgi旁，環境一流。

食完飯出發去 寶盛園，去到都21:00了，比錢落車。正當愁緊明天點走時，司機話明早RM 40車我哋返出George Town，嘩！比市價 RM 70平一大截，唔通佢有“陰毛”？ 唔理lur，就約實佢明早10:00走啦。

晚上的 寶盛園，榴槤團都離開了，寧靜又舒服。

這狗仔好乘好聽話的。

原本食完條魚飽到漚，想沖涼瞓覺了，點知小太熊問老闆 ： 「有冇榴槤食呀？」老闆話仲有2個好嘢，樹上掉下來只4hr的紅蝦和青皮十五，攞出來招呼我們。

樹上掉下來只4hr的 紅蝦(右)和青皮十五(左)，每個重約1.5kg。

老闆介紹這個 青皮十五表面的白點是種寄生蟲，想入侵進榴槤內但失敗，證明這榴槤很健康抵抗力強，果肉必靚，而且會帶有濃濃酒味；而這個 紅蝦產自20年老樹，果肉會帶有强烈花香味，一試難忘。

介紹完畢，老闆快手破開2個榴槤。

榴槤 青皮十五 – 外皮乾爽肉質creamy，入口即溶，濃甜中帶點點牛奶香，極品果皇，但我只嘗到輕微酒味，不如老闆講的濃烈。

榴槤 紅蝦 – 果肉呈橙紅色，細核，味道甘苦微話中點微花香，味道獨特香氣十足，屬檳城出產的榴槤之皇，可借那花香味完全比不上3年前不這裡吃的那個紅蝦。

我居然食得晒2個榴槤，奇蹟。食完返房瞓了。

唔係呢間，這間細房每晚只RM 180。

我們住這間大房，每晚RM 280，有冷氣熱水風扇大電視。

房間面向私人大泳池和榴槤園

泳池旁是 山竹樹，可借山竹未熟。

泳池旁另一棵係 榴槤樹，所以加了大網防止榴槤掉下時攪出人命。

感覺非常原始的浴室，我見到好大隻小強，仲有蚊添。

鄉郊地方點少得小動物呢！

當晚在果園內enjoy個自然環境，24:30才入睡。

單戀大馬雙城 – Day 5 (完)

今朝06:00就起身了，立即跳落池游水。

房外面就係對着這棵 榴槤樹了。

游水行出房外走走，立即見到很多榴槤掉下來了。

小太熊好開心呀，我要食晒你地。

新鮮的榴槤只有清新的榴槤香，沒有香港賣的那陣貓屎石油氣味。

我住的泳池大屋，每晚只RM 280。

我哋繼續在榴槤園四處行，沿路見地上都好多榴槤，非常驚險。

見工人開始執榴槤了，陣間有得食。

行返上大廳，老闆預備了健康飲品比自己做早餐，請我們飲了2杯，是雜果菜汁來的，清新醒胃。

榴槤送來了，老闆立即逐個嗅，要揀樹上掉下來不足2hr的最新鮮榴槤出來比我們吃。

老闆話，樹上掉下來不足2hr的榴槤會有種分泌物，會令口腔舌頭產生“麻”的感覺，時間一久便會失去，如非入住榴槤園很難有機會食到，一試難忘。

揀到2個好嘢了，快快手即開即食。

榴槤 D604 – 質感無械可擊，甜苦奶味均濃烈，爽脆外皮包着軟滑如綿的果肉，大啖地吃一口後含在口腔感受品嘗. . . . . . 你亞爺吖. . . . 真係有陣“麻”的感覺呀，食榴槤食到這種境介，實在覺得人生很美好。

榴槤 葫蘆 – 質感D604更佳，外皮呈現榴槤最美麗的皺紋，肉厚核細，苦味回甘，輕甜中近核的薄衣帶微微朱古力味，“麻”的感覺比D604更甚，我直情感覺“麻” 到落喉嚨。

呢個好嘢連老闆都食埋一份，仲留了一件比個仔添，佢話佢都唔係成日食到呢種級數好架，因為佢日日都對住榴槤，所以佢話唔係最頂級佢唔食的。

嘆完2個，老闆再揀了3個唔同品種的靚嘢，快手開埋佢。

榴槤 青皮紅肉 – 老闆一開就叫“唉吔”，失威了，千揀萬揀揀了個開始有蟲蛀的榴槤，那一要掉。青皮紅肉 的質感密度相對較低，肉身又厚又幼滑，味道較簡單及相對地清香，適合初學人士。這個沒有“麻”的感覺了。

榴槤 蜈蚣 – 甜苦味道均最濃的一個，齒甲留香餘韻悠長，雖然不“麻”，但吃完3個榴槤從舌頭還可感到她的香味，證明她的味道是衆多品種最強的一個，10個Like。

榴槤 40年老樹紅蝦 – 今天吃不到最頂級的80年老樹紅蝦了，只有這40年的紅蝦。像酒一樣，榴槤果樹越老產出的榴槤越純越濃越“麻”，尤其係紅蝦，所以老闆將這個放到最後才吃。這紅蝦老闆又食埋一份，她香氣的獨特完全又蓋過剛才的4個，而且又有“麻”味，但實在真係已太飽了。

食完榴槤全身熱，浸落泳池涼返夠先。

話咁快又到了10:00，要走了。

司機遲了10min，我們10:10出發。

我 : 「去George Town，Jalan Perak這地圖的位置。」

司機問: 「Jalan Perak好長架，果處係咩地方。」

我 : 「係茶室，那裡的福建蝦麵很好味的。」

司機問: 「啊！果檔福建麵，今日星期一唔開架，我車你去食鴨啦。」

我 : 「今日開架，去啦。」

司機: 「果檔福建麵好多人架，朝早8點就賣晒了，你想食福建麵，我朋友响附近開了一檔，我叫佢留2碗比你哋啦，叫佢等埋你哋至收檔。」

司機跟手就打電話Ge lee Goo lu。。。

我 : 「唔駛留啦，唔駛留啦，唔駛留啦，唔駛留啦，去返Jalan Perak啦。唔食鴨啦，去返Jalan Perak啦。」

司機跟手又就打電話Ge lee Goo lu。。。

車行多15min，司機問: 「咁你依家去邊吖？」

我 : 「咪Jalan Perak囉，去啦。」

唔怪得昨天開價咁平，市價RM 70佢收RM 40，原來真係有“陰毛”，好彩佢都衰唔晒，我唔比佢呃都肯車我去目的地。

就係咁，11:10我哋終於到達126 Jalan Perak，再試3年前食過最好味的福建蝦麵了。

科水RM 40落車，司機太煩了又唔老實，雖然最後都係平了好多，但冇再幫襯佢了，亦唔打算介紹給其他人。

補充資料 :

1.         Alun-Alun SPA提供酒店接送，在Langkawi有幾間分店，手勢很好，值得一試。

2.         寶盛園(Bao Sheng Durian Farm)大泳池房每晚 RM 280，另加住宿期間任食榴槤每位加收RM 150。

3.         寶盛園位於浮羅山背，從George Town乘的士去要60min，單程公價RM 70，最方便係包的士入去，可沿途玩吓飲吓，包的士公價每小時RM 35，3hr起。

---待續---