星馬布吉 • 動態移民(10) – 檳城 亞依淡(Air Itam)

馬來西亞檳城 – 亞依淡(Air Itam)

亞依淡(Air Itam)是 馬來西亞檳城喬治城距離9km的一處市郊小鎮，附近名勝有 極樂寺和升旗山，這𥚃的 亞依淡巴剎叻沙(Penang Air Itam Laksa)遠近馳名。榴槤價錢比喬治城便宜得多。

星馬布吉 • 動態移民 – Day 09

<<檳城>>

繼續上一篇Day 09行程。

12:42-13:20乘No.201巴士從 喬治城(George Town)到 亞依淡(Air Itam)，車費每位RM2，可以上車比現金。

亞依淡(Air Itam) – 馬來西亞檳城喬治城距離9km的一處市郊小鎮，附近名勝有 極樂寺和升旗山，這𥚃的 亞依淡巴剎叻沙(Penang Air Itam Laksa)遠近馳名。

檳城亞依淡巴剎叻沙(Penang Air Itam Laksa) – 位於巴剎外圍馬路旁，好大支嘢架，只開星期六日由1100至1700，今日星期六所以專程來幫襯，點知佢貼了告示，話今天和明天唔做生意，即是今次去足10日檳城也吃不到。

亞依淡市內也有些壁畫，無無聊聊一會兒便行完。

發現對面的Air Itam Market有檔叻沙排長龍，可能因為對面冇開檔所以客人唯有吃這檔，不過都試吓啦。

大廚很用心製作每一碗 叻沙，睇樣又幾好味。

亞參叻沙(RM5) – 湯底很多沙丁魚肉很鮮美，湯匙上的蝦醬不太甜夠咸香，瀨粉也很滑，整體上比得上愉園茶室的 叻沙，好食。

另外叫了 煎蕊(RM3.5)，冇麥精味只係甜味，很難食；椰青(RM5)又淡又唔凍，垃圾。

市場門口有檔 咖喱麵，叫一碗試吓。

咖喱蝦麵(RM7.5) – 湯底清甜有咖哩香，麵質和蝦肉也算彈牙，口感不差，值得一試。

Air Itam街邊榴連檔，見亞姐密密手不停開，又不停有人來大量買，便埋去叫亞姐揀個靚貨即時食，亞姐很好人，買咁少也沒有嫌我們cheap。

葫蘆(Ho Lor)800g(RM16) – RM20/kg，價錢超平，亞姐很大方收平多RM1。果肉外皮新鮮乾爽彈牙，絕對是今早樹上掉下的最新鮮貨式，黏喉度達90%，口感柔軟幼滑，微甜略帶米酒發酵香氣，香濃醇厚層次豐富，十分好食的頂級貨，90分。

葫蘆好好食，食完平價好嘢之後個人都勁開心，於是開多一個嘆吓。

紅蝦(Red Prawn)1.5kg(RM30) – RM20/kg。果肉肥厚色澤橙紅，花香味濃郁果肉清甜不帶苦味，口感順滑，好好食，黏喉度65%，層次感也略嫌不足，80分。

食完之後越來越多本地人來買，個個一買便7～8個起，好豪架。

其他榴槤檔有些冇咁好生意，有些就見佢賣清光，都係本地人最知邊檔係好嘢。

極樂寺 – 馬來西亞最大的佛寺，檳城最著名的景點之一，今日大維修封了寺，冇得去。我細個時自己去過一次了，小太熊來了檳城第6次都未去過。

唔緊要，到附近的 升旗山消磨下時間。乘Grab車到 䌫車站，2km收費RM5。

升旗山(Penang Hill) – 今天冇乜人，正啊，上次星期日來排到出馬路，要比多RM50買Express Ticket。

原來都係呃人的，買完票至知室內有條長隊，因為要讓位給Express Ticket的富貴客，15:30-17:00等了個半鐘才上到䌫車。

䌫車來回票(RM30)，Express Ticket立即可以上車，但每位要RM80，最低工資一粒鐘都賺唔到一半差價。

升旗山清真寺(Masjid Bukit Bendera) – 這座清真寺是為在山上生活和工作的穆斯林而建。

Bel Retiro – 是升旗山上的政府洋房，於1789年由檳州州長建造，至今仍為政府專用，是高級政府官員和來訪政要的度假勝地。

升旗山上遠望檳城全景，今日天陰陰，時晴時雨。

不久之後便落雨了，不能行山，又見太多人冇乜好行，便到餐廳飲杯嘢坐一陣間。

David Brown’s Restaurant & Tea Terrace – 䌫車站旁邊的餐廳，似幢英式古宅，環境典雅清幽，只係濕度太高和有嘢咬。

百事(RM11.6)；七喜(RM11.6) – 是這裡的最平消費，食嘢太貴所以唔叫了，不過見附近枱枱也食得很豪。

離開時18:30-19:30排隊等䌫車，聽到前面阿叔不斷重複地享著「無止境的等不禁心動搖，一分一刻也感到寂寥」，又幾應境喎。

落山之後很多Grab車但勁貴，等了15min開始降價便立即成交。

19:55-20:18乘Grab車回到George Town，8km距離收RM20，貴了少許。

南京酒店(Nam Keng Hotel) – 由3間1960年代檳城舊民居改建的精品酒店，只有樓上樓下共有8間房間，糅合復古加時尚的娘惹設計。

內部天井及走廊設計顏色多彩多姿，燈飾和瓷磚也充滿娘惹風格，懷舊風味十足。

雙人房(不包括早餐)每晚HK$350 – 冷氣充足熱水強勁，房間整潔，喜歡舊建築的話一定十分滿意。

晚到汕頭街揾食，以前試過好多間茶室了，今晚試新嘢。

新月宮茶室(Sin Guat Keong) – 汕頭街內比較有人氣的茶室，乜都有得食，而且賣相幾好。

沙梨冰(RM3.3)；吉仔冰(RM3.3) – 味道一流的鮮榨果汁，好好飲，百喝不厭。

粿條看似炒得鑊氣十足，先來一碟。

炒粿條(RM6.5) – 螄蚶幾鮮甜，整體味道只是不過不失，都算唔差，不過下次唔再食了，要留肚食更好的。

亞蔘叻沙(RM6) – 湯底鮮甜，加上不少菠蘿和生菜很爽口，瀬粉夠滑，好食，但今日晏晝和愉園茶室好少少，所以又係下次唔再食。

沙嗲烤豬肉由馬拉姐姐主理，勁好生意所以幫襯佢。

沙嗲烤豬肉10串(RM13) – 充滿有炭火香氣，沙爹醬很好味，豬肉有肉味但很多渣，而且有輕微未熟透，下次唔食了。

食完晚餐，立即又到宵夜時間，去 牛干冬小食街繼續掃街。

牛干冬雲吞麵 – 區內的超強人氣食店，網上好評極多，小太熊好想試。現場見到師傅們快手快腳，功架十足，睇到都香噴噴。

等了一會才有位，小太熊留意到，附近的大馬女生也穿很少布，而且身型都好fit喎。

牛干冬雲吞麵(RM5.5) – 麵質爽口彈牙，配上甜豉油和豬油典常香口，雲吞瘦瘦的一啖一口，叉燒看似好硬其實夠腍和有肉味，勝在平價，出色的街頭小食，值得一試。

牛干冬附近也滿街壁畫，食完麵逛一陣街才回酒店。

不經不覺已經在檳城過了6日，比以往任何一次檳城之旅也要長，可是仍然未有玩嫌食嫌的感覺，應該和物價低有很大關係。

補充資料 :

1.     馬幣RM1=HK$1.82，HSBC Visa Card兌換價。

2.     檳城現在市面上已經沒有的士，連George Town也沒有，只有機場還有Coupon Taxi。雖然有幾個叫車Apps，但只有Grab可以真正叫到車，其他Apps次次都話冇車。

3.     用Grab叫車的價錢像買股票一樣，不斷升升跌跌，最高和最低價錢可以相差3倍，全馬來西亞也是這樣，非常之不便。

4.     檳城巴士班次不太疏，每小時也有1～3班車，而且可以用Google查到巴士時間表，不比Grab車差。

 

---待續---