雲彩 雲南(1) – 麗江Banyan Tree

中國雲南麗江Banyan Tree

麗江Banyan Tree位於麗江 束河古鎮旁，從酒店大門步行15min便到 束河古鎮，距離麗江古城也只有8km。麗江Banyan Tree每間平房均面向 玉龍雪山，私隱度極高，可以在4~5℃的氣温下在户外的暖水按摩池浸浴，感覺出塵，如置身世外桃園一樣。

雲彩 雲南 – Day 1

小太熊今次同Sun N Sea Holiday買了4晚Package，再自己訂多2晚酒店到雲南玩了7日，住Banyan Tree、騎馬、上雪山、做SPA，好舒服。

早上由香港出發經昆明轉機到麗江，上機前在候機室食啲嘢先。

香港機場Plaza Premium Lounage – 今日人少少冇乜客，嘢食亦唔多，最好食係出前一丁杯麵和三文治。

飛機到達昆明後要等2hr轉機，在機場Coffee Shop坐一陣間。

可樂(￥25) – 搶錢呀，咁鬼貴；烤香腸(￥5) – 粉腸一條，好很難食。

好快又乘機飛到麗江，步出麗江機場已是滿山田園，非常翠綠，而且温度和濕度都令人很舒服。出發前已經通知了Banyan Tree航機到埗時間和約了酒店車接機，而航班亦準時，但駕車遲到了30min，真過份，仲收到咁貴，司機Sorry都冇句，真差勁。

從麗江機場走Banyan Tree足足40km，沿途也是十分翠綠，氣溫也很清爽。

車子駛進麗江Banyan Tree，一進門便是這精緻的園景，走過拱橋後，職員立即出來歡迎我們。

Garden Villa No.206花園別墅(連雙人早餐)每晚HK$3000 – 這間是麗江Banyan Tree最平的別墅，有私人大花園和户外暖水按摩池，私隱度100分。

户外暖水按摩池

按摩池便在睡房外，雙人床面向玉龍雪山。

瞓在床上可看見這個玉龍雪山景

今次在這裡住2晚，所以今日下午會留在酒店歎世界，明天才出去玩。

麗江Banyan Tree的花園

酒店的餐廳，早晚2餐也會在這裡食。

在這麼大的酒店行吓參觀吓，又在自己房歎吓，話咁快便過了半日，天黑了。

夜晚在中菜廳食，食物的水準很高。不過因為冇訂位，去到的時候話Full了冇位，後來Check了十幾分鐘才説有張2人枱取消了，所以有位。

蟲草花燉水鴨湯(￥68) – 很精緻的湯水，只有一小壺得2啖，湯水的肉味十分之香濃，用日式清酒杯來品嚐，好似飲XO咁矜貴。

錦繡玉鴛鴦 – 是金華火腿片，很香口的前菜，好味；山羊㷛 – 很大㷛很多羊肉，肉味香濃帶點羊酥，配菜有很多竹筍冬菇豆腐卜，好正。

原本想叫多一味餸，但寫菜的小妺妹話山羊㷛很大，足夠2人吃了，所以冇再叫。今餐吃了￥450，啲嘢又好食環境又好，唔貴喎。

食完飯之後返房，巧靚呀。

中午四圍行都未有時間浸浸房間的按摩池，現在終於可以慢慢嘆了。

夜晚4～5℃浸暖水池很好feel，相信冬天落雪重正。

雙人King Size大床

Garden Villa花園別墅的客廳

大浴室

深夜又出了花園浸浴睇星星，忘記咗幾夜至瞓覺了，覺得在咁靚房瞓覺很浪費時間。

雲彩 雲南 – Day 2

昨晚瞓咁少，今日早上要先去 玉龍雪山，下午再遊 麗江古城，都好忙呀。

清早太陽未出嚟就起身再浸，自己都覺得有些變態。

浸完沿07:30去食自助早餐，早餐勁多嘢食，而且都好味。

餐廳用全落地玻璃，設計糅合了中西特色，簡約又舒適，胃口都好啲。

皮蛋瘦肉粥的粥底很綿呀，好鬼死好食。

早餐之後叫酒店Call的士出去 麗江古城。

麗江古城大水車

先在 麗江古城包的士到 玉龍雪山，在古城外問了幾部的士，開價都要￥180至220來回。最後一部個阿姐司機開價￥150一天來回，嘩咁平，總共要行64km的，即刻成交。

坐呢部的士，阿姐司機都好鬼型架。

阿姐先車我去買支 氧氣(￥20 + ￥10按樽)，我心諗有冇咁誇張呀，坐吊車上4000幾米高都要氧氣？不過都買了一支。

阿姐都好好服務，明明只話去 玉龍雪山，但係佢中途都不斷在其他景點停車，讓我們落車影相。

中途路過一些藏廟。

在公路旁邊再停低，在靚的角度觀賞 玉龍雪山。

東巴萬神園(入場費￥15) – 阿姐好介紹，入面都好靚好多嘢睇，行了足足90min。

跟著的士直駛到 玉龍雪山(入場費￥80)的吊車站。

乘吊車上4506m的看台，來回再收￥160。

落吊車後，可再沿木棧道上到4636m高，看冰川和雪山。

吊車站附近的標高石人山人海排隊影相，我哋唔影了，去最高的位置才影。

玉龍雪山 冰川

上到最高處4680m，氣溫只有0℃，我唔着衫影張相先，好凍好激呀，望到四圍的人都嘩嘩聲。

我剝完衫之後有好多人排隊學我呀。

落返去吊車站了，支氧氣都未用過，臨走才攞出來吸晒佢。

走啦...玉龍雪山

原本打算15:00回到 麗江古城行街，因為在 東巴萬神園行多了90min，回到麗江古城已是黃昏17:00了，要行快一點趕返啲時間。不過好彩，呢度日照時間比較長。

中午飯都未食，一落車立即食碗正宗雲南過橋米線(￥15)。

慢慢行入去古城，沿途都很翠綠整潔，不像我認識的大陸。

進入古城要收入場費，位位￥40。

古城內的所有溪河小屋都好靚，氣溫又清爽，慢慢行非常舒服。

好夢麗江 – 河伴的小店，入裡面飲嘢。

小太熊飲龍井茶，我飲 大理國玫瑰啤酒，真係有玫瑰味好特別喎。

溢澯古井 – 古城內的古蹟，井水滿滿的，井旁放了2隻碗給人飲用井水。

我裝了一碗井水想試一啖甜唔甜，未放入口便給小太熊喝止了「肚痛呀，唔準飲」「知道」。

行攰了可以坐在河邊休息，夠晒寫意悠閒。

坐下睇了一陣旅遊書，介紹了附近的「大石橋小吃」有麗江特色小食，便過去坐低試吓。

麻辣黃豆麵條(￥4) – 湯底鹹鹹辣辣很刺激，麵條夠彈牙，不過黃豆比較硬；麗江粑粑(￥4) – 有點兒像豆沙鍋餅，內有很多豆沙餡，比較油膩。

差不多日落了，行上半山看麗江古城全景。

麗江古城全景

睇完便落山搵 三眼井，怎知去到附近都搵唔到，不斷重複行來行去搵了差不多30min，天黑了才搵到。

三眼井 – 麗江古城居民的用水都從這裡來，最上的古井是飲用水，流到中間的池用來洗菜，再流到最底的池用來洗衫。

入黑後的古城開滿彩燈，比日間更加靚啊。

原本吃了碗麵和過橋米線已經飽了，不過見到街上很多很靚的餐廳，便揀了一間河畔餐廳幫襯。

麗江酸湯魚 – 看餐牌時以為是酸湯浸魚，是一味餸，點知原來是一碗酸湯，那條細細的河魚只是湯料，而且魚肉有些腥味和非常之多骨，湯底亦太酸，唔係幾好味。

另外再要了一碟炒白菜，當係買個位享受一下啦，加埋茶錢都要￥100。

餐廳伴着這個河景，環境都好靚㗎。

麗江古城不知為何越夜越多人。

酒吧街企滿了人，而且有唔少老外個個揸住支啤，好有蘭桂坊feel。

臨走時有位小妹妹賣 花燈(￥10)，可以放到河上許願的，我也買了一盞，要身體健康啊。

又回到門口的大水車，都差唔多22:00，走了。

在古城外截的士返酒店，由於Banyan Tree係貴酒店，驚的士司機知道我去嗰度會開天殺價，於是我便說去 束河古鎮，司機開價￥30都合理。快到 束河古鎮時便會路過Banyan Tree，我便叫司機停在酒店門口，然後比￥30司機，點知佢話我古惑呀。

夜晚返到房又再浸按摩池，唔夠瞓呀。頭兩天行程很豐富，又有雪山又有古城又有得嘆。明天做埋SPA才離開。

---待續---