台北 賞櫻

台北陽明山公園 – 2月份已開始盛開着櫻花，大量市民都走到這裡賞櫻。

2007年2月的農歴年假只有4天，四處的機票都超貴，只剩下上海和台北2個選擇。最後選了到台北賞櫻，因為小太陽大鄉里，未見過櫻花，便趁櫻花盛放的季節一遊台灣。

台北 賞櫻 – Day 1

放工後乘夜機到台彎桃園機場，轉乘巴士前往台北市的 兄弟飯店，然後步行600m便到今晚住的 大來飯店，去到酒店已經深夜了。

大來飯店 – 酒店近捷運 南京復興站，出入算方便，今次會連續在這裡住4晚。

雙人房(包括早餐)每晚NTW2400 – 房間很細，完全沒有景觀，尚算整潔。

第一次來到台灣感覺很新鮮，所以過了零時都唔想瞓住，落樓下逛逛夜街。酒店附近差唔多全部店舖都關門了，只剩下2間24hr營業店。

一茶一坐 – 24hr營業的台式茶坐，夜媽媽仲有好多人。

牛油吐司；燒賣和珍珠奶茶 – 全部都唔得，茶味唔夠香，奶味不夠濃，連珍珠都唔夠煙韌硬硬實實；燒賣入口似食緊嚿味精粉丸；吐司新鮮香脆，不過牛油冇乜味，怪怪的。

吉仔茶 – 用吉仔茶粉開的，完全寡酸到爆，好很難飲。

在台灣的第一餐竟然垃圾到爆，非常之失望，小太熊開始對我的安排有點兒不滿。

永和豆漿 – 試埋呢間便試完了，希望好食啦。

熱豆漿；菜肉煎餃子；紫薯饅頭 – 全部的味道也很正常，饅頭很有咬口，不過小太熊覺得太普通，每款只吃了一啖，其餘的我全部食晒。

食完之後正式回酒店沖涼瞓覺了。

台北 賞櫻 – Day 2

今日是農曆年三十，早上遊 故宮博物館，下午到 淡水。今朝瞓到09:30，都夠精神。

早餐在飯店地牢的餐廳吃自助餐

食物的味道和種類都唔差，入得口的。

餐後乘捷運再轉巴士往台北 故宮博物館。

故宮博物館 – 都幾悶的博物館，小太熊一邊行一邊劣評如潮，話我的節目安排得差喎。

中午開始落雨不停，乘捷運到 淡水後依然冇停雨。

淡水老街 – 天色很灰又落雨，都冇乜心機行，又冇心機入餐廳食嘢，行唔夠一個鐘就決定返酒店休息了。

乘捷運返回 南京復興站，因為今天是年三十晚，街上的店舖已經全部關門了，唔知今晚食乜好，所以便行入隔離的 兄弟飯店搵食。

兄弟飯店 – 在南京復興站一出就見到。

中菜廳全場爆滿一個位都冇，只剩下地牢的日本菜館 菊花廳有位，迫住食啦。

兄弟飯店的日本菜館 菊花廳

今晚只供應2款套餐，一律每位NTW1200，質素一般啦，真係好一般，魚生像一般超級市場買到的貨色。

台北 賞櫻 – Day 3

今日年初一，又係毛毛細雨，早上到 陽明山公園賞櫻。

巴士站人山人海啊，單是在台北市等巴士已等了一小時，等了2班車才上到車，又有一啲台灣人打尖，攪到我明明有位坐都變了冇，唉…….印像好差

巴士內迫到沙典魚一樣，仲要捱個幾鐘車。

到達 陽明山後，雨叫做停咗，遊人就非常之多，檔檔小食都要排隊。

試吓呢檔 貢丸，幾香口彈牙的。

沿公路的櫻花樹未開花，沿著這條路一直行便會去到較多花的公園。

沿途甚多小食檔～試了紫番薯和花生糖夾雪糕，味道都幾得意。

陽明山花鐘 – 大約行了45分鐘到達最多盛放櫻花的花園，看見盛開着的櫻花，不過數量唔多，天氣又差。

小太熊又買了一條 粟米熱狗。

大屯瀑布 – 人山人海，瀑布的水量太少，完全冇睇頭。

草山行館 - 同樣非常之多人，好彩啱啱露台位置有張吉檯，入去食了少少野。

接著打算坐陽明山的循環線巴士往山上的景點兜一兜，點知上車之後又落大雨，而且大霧到乜都見唔到，最後原車回到起點，攪足1.5hr，真冇癮。

今日全日的節目都好似好失敗。乘巴士返回台北，到士林夜市掃街。

士林夜市 – 很熱鬧很多嘢食的夜市，入到去個人當堂精神返晒，好開心四圍食。

行進市場第一檔便是 麥芽糖，立即買一件，好香麥芽味好清甜，黐牙黐得好犀利㗎，唔小心黐住埋幾條頭髮。

跟住食 紅油炒手和雲吞麵，味道都OK。

草莓牛奶 – 都係普通，士多啤梨不是太香甜，牛奶亦不算香濃。

大腸包小腸 – 小太熊話一定唔好食，死都唔肯試。

肉操飯 – 味道幾好的，鹹鹹地。

虱目魚羹 – 有點兒似香港的魚肉翅兩溝。

水煎包 – 排了15分鐘隊，新鮮熱辣辣爆曬汁，香脆好味的水煎包。

玩到冇嘢玩，做了一支耳燭，整到隻耳仔塞滿灰，on9。

蜂蜜苦瓜汁，第一次飲，好清熱喎。

蚵仔麵線 – 太少蚵仔，搵笨實，阿宗麵線好食好多。

台北 賞櫻 – Day 4

今日依然落雨。早上會到 九份玩一日。

在酒店食完早餐，出發。

九份老街 – 整條老街全部都係小食店，又係人山人海，整日都落雨，要撐傘果隻呀。

第一餐試 台灣牛肉麵，普通味道咋。

阿婆手工魚丸 – 口感好粉，冇乜魚味，湯底太味精，垃圾。

九份芋圓 – 點解唔煙韌嘅？不過露台位幾好景。

妹記茶寮 – 雨勢越來越大，於是入去品一品茶，好好飲架。

窗口位的景觀好好喎

開始泡茶了，味道相當清香。

另加一碟茶果子送茶。

天台位坐唔到了，落大雨吖嘛。

九份最後一站是茶館對面，昇平戲院旁邊的菜館 小上海。

豬油撈飯 – 冇甜䜴油一齊撈，有欠滋味；三杯雞 - 妖.....叮熱貨式，而家未叮夠時間，個心還是冷的，垃圾呀。

夜晚返台北市食飯，今晚試 度小月的擔仔麵。

全店滿座坐得好迫，不過啱啱唔駛排隊。

酥炸蚵仔 – 蠔味很香濃炸得鬆脆，好味。

擔仔麵 – 呢碗都好食，這餐滿意。

夜遊24hr營業 誠品書店，買了本澳洲旅遊書，年尾去。

晚上到 台北101上塔頂，入場費要NTW400。

台北 賞櫻 – Day 5(完)

今日下午機返香港，早上到圓山飯店飲早茶。

圓山飯店 – 成立於第二次世界大戰後，早年為臺灣最頂級的國際性飯店，現時仍然是五星級飯店，飯店的宮殿式大樓在1973年落成。

圓山飯店中菜廳 圓苑

裡面一點也不高檔，好似翡翠拉麵小籠包。

今日諗住飲茶，2個人叫了5碟點心，都正路啦。

水煎豬肉餃子 – 味道唔錯呀，不過有成10隻仲大大隻，食完都飽啦，瀨嘢了，嚇到豬兜標晒汗。

鮮蝦餃子 – 又係大大隻兼且皮好厚，味道一般，食唔晒呀。

白玉燒賣 – 味道和鮮蝦餃子七分似，分別只係這款冇蝦，啲皮和豬肉餡完全一樣。

赤豆米糕 – 話係宋慶齡最喜歡吃的甜點所以才試吓。完全係甜麵粉一舊非常黐牙，濕Pat Pat，好很難食，宋慶齡鄉下一定係饑荒。

今餐嘢勁難食，仲貴到要NTW800一位，唔值。

中午乘捷運去西門町，食阿宗麵線和牛雜。

西門町 牛雜大王 – 牛雜味道一般。

阿宗麵線 – 很多人排隊，個個買完都企響街食。

碗麵線好特別喎，味道幾好，比起前日士林夜市那碗正好多。

台北市最後一擊 鼎泰豐

連老外都幫襯

蟹粉小籠包 – 雖然味道比不上東海的蟹粉小籠包，但係已經好好食，很有蟹粉味，亦都爆汁，正。

紅燒牛肉麵；赤豆鬆糕 – 2款都好食，味道比香港的分店更好。

下午乘巴士到桃園機場。

在機場隊了一杯500ml的果仁雪糕，成NTW240都好貴，味道只係一般。

普普通通過了2007的農歴年，見識了台北的特色。

 

 

 

-----台北 賞櫻(完)-----