伊甸園 塞舌爾(9) – 首都 維多利亞(Victoria) • 活在伊甸園

每天生活在伊甸園的塞舌爾人，睇賣相其實都好忙碌。

本地傳媒在介紹塞舌爾時，永遠只講佢嘅絕美沙灘、無污染綠水、奇幻海底、超豪酒店、威廉王子、海底椰和巨龜。受這些不負責任的傳媒影响，令我一直覺得塞舌爾是一處能把馬爾代夫比下去的完美無瑕樂土，亦以為活在伊甸園的塞舌爾人個個唔駛點做，日日响沙灘Hea吓吹吓水又一Day，來到之後才發現，原來活在伊甸園咪一樣要辛苦返工揾食？真係唔駛做就有銀用咩？只係發夢。除非係活在香港，咁就可以唔駛返工仲個個月攞皮幾嘢帶埋仔女免費去遊阜，跟住仲大呼皮幾嘢唔夠洗唔公平添。。。所以，活在香港的人絕對幸福過活在伊甸園的人，死未。。。。真係簫都吹鬈。

伊甸園 塞舌爾 – Day 8

<<La Dique>>

今天大清早小太熊又煮早餐了，有焗雞髀一隻(成本SCR34)、茄汁豆蘑菇意粉(成本SCR40)和豬肝醬(SCR20)，好味到我食清晒。

今日乘中午12:30船返Mahe Island，早上還有時間，決定行上La Dique最高333m的山頂Nid d’Aigle。從旅店踩10min單車去到上山的起點，因條路超斜，所以放下單車用脚起行，點知條路一直都係咁斜，差不多去到Snack Bellevue那一段因長滿青苔仲異常跣脚添，完全行唔到，免强試多一段都係咁跣，最後覺危險決定放棄了，那知已經太遲。

落山時我一個不小心跣底咗，心口撞了落塊方型大石，好傷呀。。。。。

撞到成條粉葛一樣，仲比小太熊影相，慘慘. . .

提早回程，路經島上的Venue Reserve，只是個小樹林，冇咩特別值得睇。

中午12:00，老闆娘派人送我地去碼頭，要離開La Dique了，來個總結 : 在La Dique潛水時只有短Wet Suit，影相時被珊瑚弄傷了雙脚，前晚摸黑踩單車炒車，整損了右脚眼，可能房間張床有蝨，住完3晚後全身好多粒粒，今早撞傷了心口，痛足6星期，這4日3晚La Dique行程簡直傷到入骨。

12:20上船，坐呢隻快船返Mahe，船程1.5hr，頭等位SCR1080，經濟位SCR835。

塞舌爾的小朋友，樣子大多唔太友善。

隻船12:30準時起航了，Bye . . . . . . La Dique，來生再見，因為今世都唔會再來了. . .

全船只有十幾個頭等位，我係坐上客。

只有頭等客有免費氣水啤酒和果乾小食。

<<Mahe Island>>

好快又個半鐘，到塞舌爾首都 維多利亞(Victoria)了。

隻船慢了20min，14:20才到維多利亞。今日原訂先在維多利亞行3hr，然後再去酒店Berjaya Beau Vallon Bay Resort。落船後，我去船公司Counter想話寄存行李，但職員死都唔肯，佢話寄存行李服務只可去程時使用，我係到埗所以冇得寄存。

死火，17kg背包點算好？？？唯有死死氣先坐的士去酒店先啦。點知. . . . . 大檸樂，冇的士，有嘅全被人Book了。有個好心嘅的士司機問我係咪要的士，去邊鼠？我話去Berjaya Beau Vallon Bay Resort吖唔該，佢就立即幫我call車，call緊之際，我問佢How much先？唔駛錢牙. . . . . 「Two Hundred and Fifty Rupees」. . . . . 唔係吓話？4.5km車程收我170港紙，搶咩，但苦冇其他車，又唔想做儍仔助長啲無良司機，又趕時間(Victoria的郵局收15:30，大部份商店17:00前收工)，只好再次出動我的强頂~~~~~揹住大背包行街。

就係咁，我就揹住大背包(小太熊只揹細袋，因為大背包內係二人行李)行出Victoria，走出自己的道路。

其實從碼頭行入Town只需10min，唔夠500m使見這迴旋處。

行多3min便到Victoria的地標Clock Tower了。

Victoria面積好細，多嘢睇的地方全集中在Clock Tower附近，行3hr乜都夠晒。

時間緊迫，趕在15:30收工前先到郵局參觀。

寄了張Postcard返香港比自己，郵費收SCR8。

郵局有海底椰賣，最平呢個都要SCR5000。

跟住就無無聊聊四圍逛，行吓街，但我揹住大背包唔方便入舖頭。

見到一間找換店，個rate比機場好約2%。

行行吓發現呢間超市有免費寄存行李，正呀！

放下行李，到街市走走。

街市賣的是一般日用品和食物，主要係本地人幫襯。

各式辣椒油，都見有老外買好多。

椰子油(SCR50) – 小太熊買了一支，用來浸浴好好用的，比泰國買平成倍。

不知名的生果，味道像番鬼荔枝酸酸的。

士多啤梨(每盒SCR35) – 味道唔夠香唔夠甜，普通貨式。

土制咸魚？？唔知咩味呢。

始終覺得塞舌爾人的友善指數一般般。

無背包情況下，繼續行街，走過教堂、大街、巴士站. . .

約17:00乜都行晒了，返去超市攞返行李，在門口見有幾架的士等客，問第一架車去Berjaya Resort幾銀？SCR200。。。。再問第二架車how much?? SCR200。。。。再問第三架車how much?? 都係SCR200。好很貴啫，我同第三個司機講，只4km路程咋喎，有冇discount呀？佢即回答：One Hundred Fifty la。OK！！！成交。幸好成交及時，因為剛上車便立即落大雨，仲要係瀑雨果種，算運氣唔差了。司機在車上說可以約佢從Berjaya Resort車去機場，收我SCR400，價錢都OK，便約實佢後天中午來接我地。

Berjaya Beau Vallon Bay Resort

雙人房連早餐(HK$1845) – 比東南亞的Berjaya貴最少一倍，我住地下。。

瀑雨下不停，想出外食飯都不行了，只有留在酒店食。

酒店餐廳叫Pizzeria，食西餐。

House Wine紅酒250ml (SCR 90) – 品質粗鞋，飲到舌頭鞋鞋哋 ; Pussy Foot(SCR 60) – 唔好飲，药水味濃。

燒牛柳五成熟Beef Fillet 200g (SCR 440) – 廚功一流，牛味香濃，肉質亦夠嫩，薯條都好得，令我有驚喜的牛柳。

Grilled Red Snapper Fillet(SCR 250) – 魚夠鮮甜味肉質夠新鮮，有水準。

估唔到响Berjaya都食到好嘢。當晚大雨下不停。

補充資料 :

1.        La Dique的山頂Nid d’Aigle不宜行上去，由山腰開始整段路都好跣。

2.        La Dique乘快船返Mahe，船程1.5hr，頭等位SCR1080，經濟位SCR835。

3.        由維多利亞(Victoria)乘的士去Berjaya Beau Vallon Bay Resort約4km，車費SCR 150。

4.        維多利亞(Victoria) 大部份商店17:00前便關門。

---待續---