瑞士仲夏 • 簡約自然(完) – 走過蘇黎世 • 靜待法蘭克福最後一夜

小太陽登上了國泰頭等機艙，等待衝上雲宵。

現時國泰航空長途線的頭等艙總共有6個座位，其中4個是窗口位，每個座位的面積大約等於9個經濟位，非常舒適。頭等客位提供的酒類飲品質素甚高，但主食就時好時差十分極端，只有一盒魚子醬吃了5次也能夠保持水準。如果旅程在香港出發，乘客便可享用國泰在香港國際機場的頭等專用候機室 寰宇堂或玉衡堂，如果在歐洲出發，候機室會和商務人共用，設備和食物質素相差甚遠。

瑞士仲夏‧簡約自然 – Day 17

繼續上一篇Day 17的行程。

要離開 列支敦士登了，先乘14:47 - 15:12巴士從 列支敦士登的酒店往瑞士Sargans，再轉15:28 - 16:23火車去Zürich。在Zürich有37min轉車時間，小太熊叫我四圍影啲相，佢睇住大行李。

<<蘇黎世>>

蘇黎世(Zürich) – 典型的歐洲大城市，新舊建築物夾雜其中，非常繁忙的街道之中也存在一些偷閒的露天茶座，充滿歐洲特色。

蘇黎世火車站 – 站內有個很特別的網、小太熊搬了入去休息。

在Zürich火車站行了個圈後，乘17:00 - 21:08班次的德國ICE往 法蘭克福(持有Swiss Travel Pass只需要比Basel至法蘭克福一段車費，票價€49.9)。

<<法蘭克福>>

火車行至中段便不斷無故停下來，而且站站停，停的時間越來越久，最後Delay了45min，21:53才到達 法蘭克福。在法蘭克福火車站的Burger King買了個Whopper (€4.39)和Whopper Cheese(€4.99)今晚在酒店食。

Frankfurt(Main) Hbf – 步出 法蘭克福火車站便見到滿街外來人污煙漳氣，好像很多壞人，感覺甚差。

酒店Capri by Fraser Frankfurt距離火車站1.6km，只能揹著大背囊行25min去，但唔好彩下着中雨要開傘，行李都濕了少少。

Capri by Fraser Frankfurt – 法蘭克福市內的中價酒店，幾舒服的。

雙人房(包早餐)每晩€95 – 房間面積很大，整潔舒適，有個小型開放式廚房，唯一唔好係冇景。

Whopper (€4.39) – 今晚的晚餐，始終覺得Burger King好味過麥記。

沖埋涼都01:00了，只能瞓6hr，因為明天小太熊話要早一點起身去濕平，

瑞士仲夏‧簡約自然 – Day 18

早上07:00起身，落G/F食早餐。

自助早餐味道唔差，呢個價錢都算抵住。

食完之後才發現原來可以每人Order一份蛋，但枱面冇寫職員又冇講，只有熟客至知。

DM dm-drogerie markt – 食完早餐後小太熊話要去這裡濕平，從酒店行10min去到商場內的舖。小太熊話要買Annemarie Börlind、Balea Ampullen Beauty Effect Lifting Kur和 眼部緊緻精華膠囊喎。

最後買了€138，行返酒店時又落雨了。雨勢越來越大，變成瀑雨添，困了在酒店走唔到，好彩最後雨勢轉弱了些，我們便開雨傘快步行返去火車站Frankfurt(Main) Hbf。

網上資料話，在Frankfurt(Main) Hbf可以乘S-Bahn 8 或 9號去機場，但在地下鐵路搵了很久也只找到S 1-7 缐，卻見到售票機可以買到 S8和S9的票(每位€4.9)，便買票先。

最後要問警察，才知要上返地面的火車月台上車，原來S-Bahn 8 和 9是大火車來的。最後準時去到Frankfurt International (T2)。

國泰航空頭等專用櫃台，小太熊去Check in先，唔駛排隊架。

攞到登機証和候機室入場証了。

小太熊唔肯入候機室住，佢話要去Duty Free Shop買埋Amala Hydrating Yogurt Mask先喎。

國泰航空法蘭克福機場(T2)候機室，頭等要和商務人共用，好流。

地方很大但也好迫人。

原本我只要了杯香檳，但貪心的小太熊係都要拿些吃的，自己又唔食，攪到我唔想浪費食物而食了多少。

夠鐘上機了，小太熊慣性地走了去經濟位條Q排隊.....要叫佢至識排返啱隊。我地條隊最多6個人咋。

上機了，空少空姨立即送來問候卡。

13:50起飛了，先歎杯香檳食啲甩士。

頭等位真係濶大，啲雲海相唔會見到機翼架。

15:30開始美酒佳餚午宴，很想再吃去程時那澳洲和牛西冷，但這次竟然轉了普通燒牛柳，離譜呀。

餐前麵包好好食的，好彩剛才候機室冇乜食嘢，現在肚餓了。

魚子醬配香檳(Caviar and Champagne) – 魚子醬入口沒有脆卜卜爆開，而是慢慢溶化，咸度適中魚油甘香，味道獨特，配上香檳是完美的配搭。

魚子醬粒粒晶凝通透，簡直像一盒藝術品，相當誘人。

白瓜忌廉湯 – 幾好味的西湯，換了一杯白酒來送湯，令味覺更加配合。

香辣蝦球沙律 – 今次的凍蝦味道較淡，幸好襯了杯較清淡純味的白酒，令這道沙律加了不少分。

上主菜了，不過今餐冇乜期望。

野菌卷伴芝士番茄醬 – 小太熊唔想食咁多肉所以要了這款素食料理，那野菌卷的卷好難食。

燒牛柳 – 連產地也沒有的燒牛柳，弄到十成熟，又鞋又乾，牛肉味淡，幸好伴了一杯波爾多紅酒，令這碟垃圾變成勉強可以入口的肉。

藍莓牛油麵包布甸伴草莓雪糕 – 伴葡萄牙砵酒同吃，甜甜哋很好味道。

芝士餅乾 – 未夠飽食埋佢一定夠了。

最後送上心意朱古力，貴嘢來的。

食完飯看了套戲，可以早些瞓了，明天還要返工。

瑞士仲夏‧簡約自然 – Day 19(完)

半醒的狀態下瞓到04:00左右，原來天光了，於是起床聽吓歌。空少見我起了床便問我要不要食早餐，咁早啲食囉。

鮮果碟 – 水果幾新鮮；餐前麵包焗熱了的，好食。

冬菇鱈魚粥 + 煎蘿蔔糕 – 蘿蔔糕乾了些，但味道還不錯，粥都好食。

港式奶茶 – 用粉開的，味道一般；香芒牛奶乳酪 – 呢杯好好味，只是怕熱量高了些。

太陽出來了....在飛機睇日出真係靚。

飛機06:45降落香港，平安返到來了。臨走時到Terminal 2的 賞心堂看看。

賞心堂 – 國泰在Terminal 2離境大堂的休息室，給剛到步的旅客沖個涼食少少野。

入面又噏又焗，面積極細而且全店滿座，坐得非常唔舒服。食物種類甚少。

白粥和燒賣都好食過剛才的飛機早餐。

食完野乘85折的士直接返工了，冇遲到架。整個旅程都聽見小太熊不斷講：「其實瑞士都冇果啲人講到好得咁緊要啫，好普通之嘛，我話好多地方都好過佢啦，啲嘢又貴食物又唔好味，風景睇得多都悶啦。」原來不知不覺小太熊已經被縱壞了。小太熊因為去過太多比瑞士更好的地方，令瑞士這個被所有人評價為最靚的地方，在小太熊眼中已經冇乜驚喜。

補充資料 :

1.    CHF 1=HK$8.41；€1 = HK$9.72

2. 國泰航空香港來回 法蘭克福頭等機位 每位180,000里再加HK$1136稅，用錢買要HK$139,750。

3.    15天瑞士交通証Swiss Travel Pass CHF 485，可免費任搭瑞士境內的巴士和火車。此外，也可免費任搭 列支敦士登的巴士，以及免費進入 列支敦士登部分博物館。

4. SBB Mobile是瑞士交通Apps，可以用佢來Search瑞士的火車和巴士班次。

5. DB Navigator是德國交通Apps，可以用佢來Search德國的火車和巴士班次。

6. 從列支敦士登 “Maschlina” 去德國法蘭克福，可乘巴士轉火車，最快6hr20min到達。如果持有Swiss Travel Pass只需要比Basel至法蘭克福一段車費，票價€49.9。

7. 從法蘭克福火車站Frankfurt(Main) Hbf 可以乘火車S-Bahn 8 或9號到機場，車費€4.9，車程26min，每15min一班車。

-----瑞士仲夏‧簡約自然(完)-----