四國尋味 • 上山下鄉(8) – 小豆島醬油の宿 島宿真里

四國小豆島醬油の宿 島宿真里

「島宿真里」是四國小豆島上數一數二的高檔旅館，有近百年歷史，全間旅館就只有7間獨立部屋「離」，在日本國內甚有名氣，客房的新派和風室內設計優雅舒適，旅館的地道特色 醬油會席也是一大賣點。旅館跟當地老字號「丸金醬油廠」合作，把醬油與地道食材進行配對，會席所選的4種醬油包括不作任何過濾的頭抽「諸味たれ」、攪拌過一次頭抽「生あげ」、頭抽過濾後的「淡口生揚」和將頭抽加入原材料再次發酵、攪拌和泡煮一年半的「二段熟成」，配上地道高級食材，因此吸引了很多本土人士到來。

四國尋味 • 上山下鄉 – Day 7

<<小豆島>>

繼續上一篇Day 7行程。

從 二十四の瞳映画村乘巴士返回 丸金前，落車見到對面有間菓子店，便進去買些小食。

和菓子都比較普通，日本四處也可以見到，不過小太熊都想試吓。

豆沙餅(￥183) – 不出所料，真係好普通，不過都算好味。

慢慢沿著馬路行1km經過一條小村，終於到了。

四國小豆島醬油の宿 島宿真里 – 我們剛進入旅館外圍便立即有人行出大門口招乎我們，反應很快服務好好啊。

職員先招乎我們在大廳坐低休息，吃些茶點。

大廳裡自家釀製了二十瓶水果酒，供住客飲用，味道很甜果味很香，而且酒精濃度高達40%，好激架，飲一小杯便整個身暖晒。

茶點的雪糕和小丸子都好好味，如果今朝在 森國酒造時有這些小食送酒便Perfect啊。

跟著便入房了，今次小太熊好大手筆，不理我的反對，租了間貴房。

離れ・貴賓室「お」の間(包早餐和晚上醬油會席)每晚￥79920

進入房間便見到今早托運的大背包。房間分兩層，樓上是睡房和私人檜木風呂浴室，地下是客廳和飯廳，温泉更附送泡湯用的清酒，酒店表示有美肌功效，認真富貴。

地下飯廳，枱下有暖氣的，戶外是個小花園。

飯廳行落幾級便是客廳，現在忙著，今晚才有時間慢慢歎。

從這樓梯上一層便是睡房

睡房也很大，戶外是個大露台。

露台望出去是小豆島的村莊，也可以看到日落和星星。

房間供應的凍香草茶，飲幾杯休息一陣子之後便去浸溫泉。

島宿真里 有2間私人風呂「石の湯」和「竹の湯」，中午到零晨時份都是供住客私人使用，見到冇鎖門便可以入去用，早上會改為住客公用並分開男女。可能因為所有房間內都有浴池，所以都冇乜人用。

石の湯 – 戶外和戶內池的環境都很舒適，古式古鄕之餘更帶有鳥語花香。

下一個節目是返房的浴池再浸，因為這裡面向日落，可以邊浸邊欣賞，好歎架。

私人風呂附上用來倒進溫泉泡湯用的清酒，好富貴啊！有Blogger話飲過幾口，唔錯的。

一邊浸一邊望著太陽沉落山，皮也開始甩了，上水休息一會兒在露台涼涼個身。

竹の湯 – 趁著還有些少光，浸埋這個私人湯便去吃晚餐了，這裡和石の湯其實差不多。

今天的晚餐是 島宿真里的地道特色「醬油會席」，以「丸金醬油廠」出品的醬油配對不同的地道高級食材，好豐富呀。

紅茶割りアイスフレーバーティーに(￥600) – 即係 小豆島柑汁疏打，小太熊飲這杯。

特別純米酒(￥500) – 我叫這個，估唔到叫平酒都咁細杯，這旅館都真係幾貴；檸檬に夏みかん酒 – 跟餐的開胃檸檬酒。

我們坐在吧枱，看著大廚精心製作的每道菜式。

八爪魚醬油漬 – 精美的餐前小食，用淡口醬油醃成的伴菜並煮熟細八爪魚，吊出八爪魚的淡香。

いかなご南蛮漬け – 用淡醬油伴沙律菜，味道有點古怪。

醬油會席 所選用的4種醬油包括不作任何過濾的頭抽「諸味たれ」、將頭抽加入原材料再次發酵18個月和泡煮的「二段熟成」、攪拌過一次的頭抽「生あげ」和頭抽過濾後的「淡口生揚」，味道由淡至濃，像試茶品酒一般。

接下來上的菜式便可以按自己的口味配上以上四款不同的醬油。

にし貝の黄味酢和え(醬油地魚)

オード海老淡ロぼん酢(醬油蝦肉)

自然薯とろろ煮(吞拿魚肉清湯)

あやめゆき空豆(上)；たけのこ芋姫大根(下)

上面4款小食都很新鮮和精美，味道雖然不屬最高級別，但可以食得出廚師的用心。

初春の造り盛鉢畑野菜 – 刺身很鮮美，伴碟的野菜全部都生食，小紅菜頭有些硬實，巧健康呀，伴上「二段熟成」同吃冇咁淡口。

オリーブ牛茶葉焼(橄欖牛肉茶葉烤) – 牛肉味的濃度中等卻帶著點點清香的茶葉味，伴上少許「淡口生揚」更能吊出牛肉味；生こびき平麺と生素麺 – 小豆島的特色素麺，爽口彈牙有麵香，和「生あげ」最配襯。

渡り蟹さばきいりこ酢(酢物) – 由於蟹肉蟹膏本身已經很鮮甜甘香，所以唔需要加醬油了，原味仲好食。

最後職員拿出三款島上的橄欖油，味道又係由淡至濃架，最右和中間那支要四千幾円架。

土鍋のオリーブご飯(橄欖鍋飯)和てんぐにし貝の清汁(清湯) – 混入顆粒飽滿的橄欖蒸成的白飯，加點濃味橄欖油和「諸味たれ」撈起同吃，好好食架。清湯像水咁清。

ヨーグルトあいす(小豆島柑乳酪雪糕) – 明顯好味過醬油雪糕啦。

食飽飽，再去 石の湯浸一浸，正式沖涼洗頭。

晚上返房外露台睇星星，再沖杯茶在屋內唔同地方歎吓，住靚房真係唔捨得瞓啊，一於返到香港才瞓個夠。

四國尋味 • 上山下鄉 – Day 8

今朝07:00又起身浸，小太熊話我變熊架，一日浸咁多次，會中溫泉毒架，但佢又跟著來浸喎。

石の湯 – 今天改為男士住客公用，不過我浸完都冇其他人，小太熊那邊都係。

早餐很豐富好味，住多幾日實肥多幾磅。

早餐後送上一杯冰凍野生蜂蜜，好香甜的。

食完早餐和小太熊輪住坐按摩椅，真係好鬼爽。

10:10旅館有免費Shuttle Bus車住客去 土庄碼頭離開小豆島，但是我要去 福田碼頭坐船返 姫路港，所以要在 安田站跳車再自己轉巴士。

島宿真里 免費Shuttle Bus，準時10:10出車。

不用10min便去到 安田，巴士要11:04才有車，原本打算在附近餐廳飲杯嘢等車，但所有餐廳都最早開11:00，只有在巴士站呆等。

乘11:04-11:28巴士(14km)往 福田(￥200)，接駁11:40開往 姫路的船。巴士遲到了5min，攪到都好緊張，卻原來一落車已經是碼頭，2min已經可以買票上埋船了，相信隻船都會等埋巴士客的。

補充資料 :

1.)    ￥100兌HK$7.15 (永恆找換公司)。

2.)    小豆島的巴士線可以到達所有主要景點，班次一般約每小時一班，單程￥200，全日票￥1000。

3.)    小豆島福田港每天有7班船來往兵庫縣的 姫路港，船費￥1520，需時100min。

4.) 島宿真里 有免接駁車往返 土庄碼頭。

---待續---