潛行宿霧 鯨鯊 • 風暴(6) – Oslob鯨鯊出沒

菲律賓宿霧渔村Oslob – 與鯨鯊同行

Oslob是菲律賓宿霧東南部的一個小漁村，從前完全沒有旅客，連Lonely Planet也沒有一句介紹。近年當地居民發現了多條鯨鯊到訪，因此把海岸定為海洋國家公園，並每天在海岸上餵飼鯨鯊，鯨鯊們因而留在海域內居住，並且每天定時到海岸開餐，就這樣Oslob便被發展為「鯨鯊村」，現在每天均有大量旅客從Cebu City和Moalboal到Oslob作一日遊，睇鯨鯊之餘並順道遊覽沿途的瀑布。

潛行宿霧 鯨鯊‧風暴 – Day 5

<<Moalboal>>

出發前原打算今早潛多2次水之後才剩車往Oslob，但小太熊話怕今日係平安夜Oslob的潛水店早關門，所以要我安排15:00前要到Oslob，反正潛水想見的已經見過了，今日潛唔潛都冇所謂，便安排了11:00車從酒店離開。

早上如常地06:45起身，跟著07:00開始食早餐。



食完早餐終於有時間在泳池游陣水，像私人泳池一樣咁爽。

09:45執齊行李退房，把行李放在Reception，然後去SPA Centre 10:00-10:50 做SPA。好彩帶夠現金埋單，因為比現金有3%節扣，比卡就收多3%手續費，來回6%都幾金架。

SPA Centre都好靚，50min ~ Swedish Massage每位P1250，技術普普通通，沒有前幾日宿霧市的Tree Shade SPA手勢咁好。

做完SPA行返去Reception啱啱11:00，前日預定的車亦都啱啱到，Fit到爆。

的士從Dolphin House Resort Moalboal往Oslob，85km距離車費P2000，中途停2hr再加P500。

11:00開車，30min便去到Kawasan Fall停車場，沿平路行25min便可以到達瀑布Kawasan Fall，再往山上行多10min是另一條瀑布Matutinao Fall。

一落車就有幾個Guide走埋嚟話帶我路，又介紹我玩跳水等等危險活動，又要不斷no no no no no……...

不遠處便是入口，先交低每位P45入場費，沿途勁多租用救生衣和安全帽，不過如果唔玩活動其實不用安全帽，但如果想游埋瀑布便規定要穿救生衣，不穿救生衣只可以游到水池中間。

沿路行都見到隔離條河的水像李施德林咁碧綠，比得上九寨溝。

不久以後穿過一條破舊的西班牙橋底。

Matutinao Fall – 因為要上山，行到去已經身水身汗。池邊所有枱椅也要租的，每張枱收P300。

水池好靚，不過時間唔多，所以決定不在這裡游水，返落Kawasan Fall才游。

很多人排隊玩Waterfall Jump，有十多米高，都相當刺激。

Kawasan Fall – 在這裡玩了40min，池水相當清涼又唔覺冰冷，浸在水𥚃十分舒服。

行返出入口處差唔多13:15，司機開車直飛Oslob的酒店Secter Place，14:20到，合晒小太熊要求。

<<Oslob>>

Secter Place – 小太熊揀的酒店，佢話評分很高，而且泳池同啲泳伴房都幾好，又係喎。



點知老細唔係帶我哋去那些池伴房，而係行過另一條河去幾間外觀很差的小屋。

門口不單只不是面向泳池，而且係面向馬路。

Deluxe Double Room(不包早餐)每晚P2500 – 搵笨呀，小太熊話網上沒有這些房的相，明搵笨，而且網上寫明房內有Locker才幫襯的，現在居然沒有，明天潛水時啲錢唔知放响邊度好。

跟住行1km到DEEP ZONE DIVE CENTER交錢Confirm明早06:00和08:00潛2次水睇鯨鯊。

DEEP ZONE DIVE CENTER在1/F，地下定士多。

比完錢，揀好所有裝備之後便四處行吓，其實Oslob根本冇野好行。

小太熊原本Target在這餐廳食，不過因為今日係平安夜關了門。

無無聊聊在街上行，發現了一間不錯的酒店和餐廳，入去飲杯野。

Brumini Resort – 環境比我們住的衰嘢好好多啊，而且價錢差不多，真唔開心。

Resto Bar – Brumini Resort的池伴餐廳，在這𥚃坐一陣間消礳一吓時間。

雪碧(P15)

炸雞翼(P270) – 炸得很鬆化，雖然像一般的雪雞翼一樣冇乜肉味，不過點了辣椒汁之後就變得好好味道。

食完小食之後慢慢行返酒店，要上斜坡行10分鐘，行到標晒大汗。

中途發現一間麵包店，在這裏買了三個麵包，明天做早餐。

Restaurant Choobi Choobi – Oslob最靚的餐廳，從我們的酒店Secter Place行5分鐘便到，位處懸崖之上，享有無敵大海景，店員的服務也十分好。

因為今天是平安夜，今晚只會營業1小時，由17:00～18:00，但是客人很少，我們坐在最好View的近海位置。

Tiger Black Beer (P100) ; Mango Shake (P130)

BBQ豬肉(每串P20) – 有炭火香味，肉味一般，不過醃得幾好食，只嫌略為甜了些少。

清蒸倉魚(P450-500g) – 味道OK，和一般的大排檔差不多，不過豉油有些微偏甜。

黑椒炒海蝦(P475) – 海蝦幾新鮮，黑椒味亦夠濃，但係落得太多糖，太甜。

鹹魚炒飯(P200) – 雞蛋炒飯加了大量鹹魚仔乾，好食，但太大碟兩個人食唔晒。

18:00天黑之前行返酒店，今晚20:00便上床瞓覺，明天05:00起身一定夠精神潛水了。

潛行宿霧 鯨鯊‧風暴 – Day 6

因為我要執行李，所以04:45便要起身，小太熊可以瞓多半個鐘。一大清早其實都唔肚餓，不過一會兒要潛兩次水，點都要吃點東西，便勉強把昨天買的麵包吃一半。

麵包(每個P5) – 平得過份，但其實味道唔差的，我吃了一半，小太熊唔肯食。不過潛完水回來佢就食晒，我想食少少都冇。

我們05:40出發，大約06:00行到去潛水中心，今天總共有8個人潛水，原來其餘6個人未揀Equiptments，等得佢哋揀好裝備，仲要睇多一套簡介片，搞到07:00才開始出發。

原來潛水的地點就是潛水店對出的沙灘，從沙灘行落大海便開始潛。

小丑魚(Red & Black Anemonefish)

潛落水底之後，游水大約5分鐘，便見到鯨鯊，原來有好多條的，有大有細共7～8條。

從水底向上觀望鯨鯊的姿態，每一條都有10多米長。

潛到2～3m水深的地區，可以近距離少少觀賞鯨鯊們的美態。

看到Snorkelling的人和鯨鯊的距離更加近，其實最好就係玩一次潛水加一次Snorkelling，這樣就可以從所有角度觀賞鯨鯊們。

最後都係游近些同條魚玩吓，感覺都幾震撼嘅。

臨上水時見到這條不知名的魚仔。

潛到08:15回到潛水店沖身，這時老細話因為今日係聖誕節，所以國家公園提早關門，不能作第二潛了。其實又冇乜所謂，要睇要玩的都完成了，早點走攞返錢仲好。

今日Book了11:00車離開酒店回Cebu City，原本擔心潛2次會很趕沖唔切涼，現在09:15已經回到酒店，可以慢慢沖。

還有時間剩，可以在酒店泳池游水，這些池伴房真係唔差的，可惜這𥚃的老細呃人。

Klook訂的車準時11:00到酒店，去Mactan Island車程150km，車費HK$432。

14:25到達Mactan Island的酒店Dusit Thani Mactan Cebu Resort。

補充資料 :

1.     HK$1兌P6.33(永恆找換公司)。

2.     在Dolphin House Resort Moalboal退房時比信用卡要收3%手續費，比現金就有3%折扣，來回6%，數目都唔細。

3.     從Dolphin House Resort Moalboal乘的士到Oslob，85km距離車費P2000，中途停2hr再加P500，可以在Panagsama Beach的Agent訂車。

4.     在Oslob潛水睇鯨鯊，每位收費P1500，包括所有裝備，國家公園另需要收P1500入場費。

---待續---