旅居英國 • 動態移民(09) – 尋幽探秘 威爾斯(Wales)

英國威爾斯小鎮Betws-y-Coed火車小屋 – No.2 Railway Cottages

威爾斯(Wales)位處大不列顛島(Great Britain)西南部，為英國的4個構成國之一，與英格蘭(England)、蘇格蘭(Scotland)、和北愛爾蘭(Northern Ireland)合組成 英國(United Kingdom)。威爾斯的人口只有三百多萬，國內最大的國家公園是 史諾多尼亞國家公園(Snowdonia National Park)，公園內有不少令人驚喜的小鎮和自然環境，當中的小鎮Betws-y-Coed寜靜舒適，充滿度假氣氛，很受英國當地人歡迎。

旅居英國 • 動態移民 – Day 12

<<倫敦>>

今日坐08:46的火車從London Euston往威爾斯小鎮Betws-y-Coed，連續住7晚，所以要買定足夠食物入去，因為預計在小鎮買會貴好多。05:45起床，準時06:30在酒店Holiday Inn Express London-Hammersmith 食早餐。

最後一天早餐有點唔捨得，因為接下來的日子大部份都冇酒店早餐食了。

乘地鐵(£3.2)由Hammersmith 到Euston Square，大意上錯了另一月台的車，好彩未開之前發現落返車，真係險。因為過了07:30，被計了繁忙時段貴了£0.7。

今日由London Euston站出發，站內有超級市場，上車前買了冰鮮的雞髀、三文魚、鱈魚、牛扒、煙三文魚、火腿和雞蛋，應該足夠一星期食了。

買完食物去睇水牌，今次班車比較早出月台位置，可以早點上車。

上車了，遲上車會冇位放大行李好麻煩架，每卡車只有6件大行李位，我和小太熊都佔咗2件了。

因為目的地太偏僻，今日要轉2次車，首先08:46-10:53由London Euston去Crewe；轉車11:48-13:00 由Crewe去Llandudno Junction ；13:34-14:04 再轉2卡小火車由Llandudno Junction 去Betws-y-Coed，2人全程車費£46.7(需要持有Two Together Railcard)，整程車基本上幾準時。

在Llandudno Junction轉車有30min，夠時間出站行個圈，原來車站旁邊已經有間大型超級市場Iceland，所有類型食物也可以買到，早知不用老遠從倫敦運糧食過來啦，立即加碼買些蔬菜水果和牛奶。

<<Betws-y-Coed>>

下午14:04準時到達Betws-y-Coed，唔好彩落大雨，今日冇節目了，不過出了多日太陽今日落雨都好正常吖。

Betws-y-Coed火車站已經充滿威爾斯小鎮風情，一落車已經好開心和放鬆。

火車站旁右邊是2卡火車餐廳，很有特色而且價錢唔貴又冇乜人，搵日要來試試。

小火車停一陣便要離開了，每日只有十幾班車經過。

Betws-y-Coed火車站好靚啊，本身已經是旅遊景點，好有度假氣氛，站內的建築充滿威爾斯的風格，四處也寫上威爾斯文，感覺好開心好新奇。

Betws-y-Coed是威爾斯國家公園Snowdonia National Park 內的中心小鎭，很多巴士線會路過這裡，每日也有十多班火車經過，交通算係方便。

火車站入口已經充滿古典味，車站旁邊的餐廳環境也靚得過份。

今次訂了火車站附近的民居小屋No.2 Railway Cottages，樓高兩層三房兩廳加埋大花園，每7晚租金£667，租3晚都係咁貴，即係租7日起跳。

中間那間屋便是No.2 Railway Cottages，右邊是No.1，左邊是No.3，全部都出租。

No.2 Railway Cottages (每晚£95) – 花園可以望住小火車經過，屋內空間超大十分舒適，樓上是3房和浴室，樓下是客飯廳和大廚房，適合自己餐餐煮飯。位置便利環境一流，非常滿意這間小屋。

進入大門便是超級大廚房，嘩！香港好多人間屋都都冇咁大。

經過廚房之後便是客廳，好靚好舒服架。

未來差唔多日日都在這飯廳裡，飯廳外便是小花園。

每日都有十幾班只有2卡的火車經過門前，啱晒啲火車迷。

除了真的載客火車，仲有呢架比小朋友玩的玩具火車會經過門前。

穿過樓梯上1/F便是浴室，有齊大浴缸和淋浴間，設備齊全。

主人房有2個大衣櫃，張床和枕頭都好舒服，長住呢間屋都唔錯喎。

另外有2間細房，住6個人都很鬆動。

小鎮的環境。原來從火車小屋行5min便有一間便利店Londis，可以買到大部份食物，價錢整體上都可以接受。

便利店Londis，從火車站行5min便到。

凍肉牛奶蔬果雞蛋餐酒乜都有，價錢有些和倫敦一樣(餅乾和牛奶)有些貴了一倍(生菜)。

未來7日的糧食，差不多全部從倫敦帶來的。墨西哥車輪鮑是香港帶來送禮用的。

火車屋只供應鹽，沒有油和胡椒粉，所以在Londis買了一支油(£1.25)、白酒(£6.49)、朱古力(£1)和餅乾(£0.59)，全部都比較抵買。

在Holiday Inn飲唔晒的Twinings Tea，現在可以飲埋佢。

沒有火車埋站時，火車站都係鬼影都冇。

火車站內的Art Gallery放滿了藝術品，用垃圾製作了很多作品，犀牛和大猩猩最特出。

這些展品都幾可怕，小太熊唔肯睇。

油畫的風格也很前衛，唔知想表達啲咩呢～

火車站附近有間Tourists Information Office，似記念品商店多過遊客中心，冇乜特別資料可以提供，唔去都擺。

由於屋企太舒服，決定早些返去飲杯茶歎吓世界。

伯爵奶茶加埋之前酒店送的曲奇餅做下午茶，可惜花園落雨，否則在戶外歎茶更加爽。

晚餐由小太熊做大廚，我乜都唔做等食，做大爺。

車厘茄芝士伴煙三文魚 – 芝士係Sainsbury's買的雜錦芝士，唔好食，下次唔再買雜錦芝士。車厘茄和煙三文魚都正常。

吞拿魚紅蘿蔔洋蔥湯 - 賣相和味道都合格，算是好飲。

油鹽水西生菜 – 英國的西生菜口感比美國西生菜硬，冇咁好食，不過在英國會常常食，因為平價菜的選擇唔多；番茄蘑菇伴牛扒 – 牛扒今早在倫敦買的，用附送的蒜香牛油煎得很香，不過塊肉真係唔得，肉味很怪而且口感鞋爆，最好食係番茄同蘑菇。

全餐晚飯成本每人約£6，在英國生活成本上，飲食佔的比例是相對較低的。

英國的廁紙不知為何都係薄得過份遇水即溶而且好貴，亦極少有獨立包裝，平均每券要£0.5以上，唔係好慣。

旅居英國 • 動態移民 – Day 13

今日晨早05:30起身煮早餐比小太熊食，然後要趕07:15的巴士No.6B 去小鎮Bangor，因為這巴士每日只有一班車，迫住咁早起身。

餐蛋出前一丁麻油麵 – 唔係自己讚自己，好食過茶餐廳呀，餐肉又厚又脆皮，太陽蛋7城熟，麵質啱啱夠淋，味道一流。

巴士站就在火車屋1min步行距離，07:05去到巴士站，見旁邊的電子時間表顯示巴士No.6B準時到，便放心地等待。

等到07:15，顯示器上這班6B巴士消失了，以為巴士快到，點知等到07:30依然影都冇…..頂，第一日坐巴士就中招，好彩係去果程，如果回程唯一的巴士失踪了都唔知點算。

今日去唔到Bangor了，唯有臨時改行程，決定今日在Betws-y-Coed行行附近的景點。

第一站去Fairy Glen，因為巴士班次太疏，一日只有兩三班車，所以決定從火車屋行3km，沿途大部份是馬路，冇乜大景點睇。

沿途都會見到這類用灰色傳建造的小屋，在威爾斯常常見到。

山林偶然會靚到仙景一樣，以為自己去了不丹。

沿路有些酒店古老得像鬼屋一樣，小太熊一定唔敢住啦。

整段路有一半也是馬路，英國的司機開車又飛咁快，壓力都唔細。

穿過埋古老石拱橋便快到了。

Fairy Glen是英國威爾斯Snowdonia National Park 內的河谷，內有行山徑可作2hr左右的遠足活動，風景幾靚但沒有驚喜，唔去都唔可惜，時間多就可以一遊。

Fairy Glen入場費£1，入場前自己用現金入落木箱，搵緊散銀時，已經有人跑出來問駛唔駛唱散銀。

一隻雀仔在門口唱著歌歡迎我哋來探佢～

第一次見這種羊仔，威爾斯的動物品種原來也很古怪。

沿著指路牌方向行到河浴。

雖然今日天灰有微雨，不過河浴風景幾靚，Fairy Glen又真係幾有仙氣。

玩完河谷之後，繼續向前行1km去到 Conwy Falls，沿途是山徑，都幾荒蕪。

全英國的山徑都常常見到這類閘門，要從旁邊行過去，可能係想隔開啲動物掛。

這段路原來要上斜的，都辛苦架。

Conwy Falls(入場費£1.5) – 瀑布唔算大不過勉強都算靚，整體來說都算流的一條瀑布，不值得專程去。

回程時見有巴士站在入口附近，想坐巴士返屋企，點知一日只有2班車，下班車要等4hr，仲唔知會唔會放飛機，都係行路算啦。

今早條路行到有點悶了，兜另一條路行返火車屋，今次沿途有些少風景。

回程一段路較長，不過唔駛行咁多馬路，較多山林風景。

回程時經過另一條石拱橋，遇到一位英國人話呢度好靚，叫我落河邊影相。威爾斯都幾多這種石橋。

一棵鬼爪樹從石屋頂長出來，幸好出返太陽，如果天黑經過都幾陰森可怕。

補充資料 :

1.     £1兌HK$10.66 (HSBC網上兌換)

---待續---