旅居英國 • 動態移民(10) – 英國最細小房屋@威爾斯

英國最細小房屋(The Smallest House in Great Britain)@威爾斯 康威(Conwy)

英國最細小房屋(The Smallest House in Great Britain)位於威爾斯北部 康威(Conwy)的碼頭區，房子建於16世紀，共有兩層樓總高度3m，面積只有3.05m x 1.8m，原本用作居住之用。直到1900年，當時的租戶是一位高1.9m的漁民Robert Jones，因為房間太矮小令他不能完全站立，當地法院認為這屋子太細小不適合人居住，他最終被迫遷出，之後房子變為Conwy的人氣旅遊景點。

旅居英國 • 動態移民 – Day 13

<<Betws-y-Coed>>

繼續上一篇行程。

中午回到Betws-y-Coed，在火車屋休息一會兒後，再出外走走。

Betws-y-Coed火車站外有不少為遊客而設的餐廳和商店。

火車站旁邊有一間由火車車廂改建而成的餐廳The Buffet Coach Café，好有特色，決定去食午餐。

The Buffet Coach Café – 由一列舊火車卡改裝而成，裝飾懷舊古雅，但排氣系統很差所以內有油煙味。今日冇乜客，加埋我們也只有2枱。

職員帶我們坐低之後，我見佢離開時突然在地上拾起個銀包，一看之下發現是小太熊的銀包，我便行去攞返。原來小太熊出門口時冇拉背囊拉鍊，好彩銀包跌在這裡，如果跌在街上便搵唔返了，今次真係好彩。

Wholetail Scampi & Chips (炸蝦寶薯條)(£8.95) – 炸蝦寶幾有蝦味而且夠鬆脆，不過我嫌外皮太厚，薯條是手工厚切，炸得夠脆，口感滿分；San Miguel Beer (大生力啤) 660ml(£3.8) - 熟悉的味道，感覺親切。

食完午餐繼續四圍行。

Sapper’s Suspension Bridge – 橫跨River Conwy連接Betws-y-Coed火車站及對岸的吊橋，路過時的搖動幅度相當大，夠刺激。

行過吊橋之後是大牧場，好多羊仔，過兩日會再來行耐啲。

趁未天黑，早點返火車屋煮晚餐，難得黃昏開始冇落雨又未天黑，今晚出花園食。首先開張枱飲杯餐酒先，跟著小太熊去煮嘢食。

有火車經開我們的花園前，感覺好開心好好玩的，而且好chill呀。

餐湯又係昨晚的 吞拿魚紅蘿蔔洋蔥湯，夠晒清潤。

前菜和昨晚一樣 雜錦芝士番茄煙三文魚，不過在花園享用的感覺好得多。

食完天色開始黑，氣溫亦急降，凍到要返入屋繼續食。

洋蔥煎鱈魚伴蘑菇 – 味道和在香港超級市場買的鱈魚差唔多，魚肉幾嫩亦有魚油香，小太熊煎得好靚，洋蔥汁都好冶味。

油鹽水生菜的口感依然係硬，食到牙都軟。今晚全餐晚飯成本每人約£6.5。

食完飯小太熊洗碗，我就自己出外行吓，夜晚小鎮好靜架，怕鬼真係唔好一個人行。

Betws-y-Coed火車站外水靜河飛鬼影都冇隻，好彩仲有燈，否則我真係唔敢行了。

火車站內靜到只有蟲鳥嗚聲，十足等緊幽冥列車。

小鎮內的2間高級餐廳都幾旺場架。

又靜又凍，行了一陣便返屋企，都係安全第一。

旅居英國 • 動態移民 – Day 14

今日大致天晴，早上坐巴士No.19北上到34km外的沿海小鎮 蘭迪德諾(Llandudno)玩一日。

今朝06:00起身煮早餐比小太熊食，又係 餐蛋出前一丁加熱奶茶(每位成本價£1.2)，大家都未食嫌。

巴士No.19準時08:40在Betws-y-Coed火車站出發，今日要坐3程巴士，買全日票1-bws ticket(£5.7)比較化算，上車和司機買票。bws是威爾斯文，即係bus。

<<康威>>

第一站先在中途小鎮 康威(Conwy)落車，在小鎮漫步1hr45min後再乘下一班巴士往Llandudno。康威(Conwy)是威爾斯其中一個自治區，鎮內建築物充滿英國威爾斯色彩，好靚而且令人驚喜，其中以康威城堡和英國最細小房屋最馳名。

Statue of Llywelyn the Great – 雕像矗立在Conwy小鎮的中心，Llywelyn the Great活於1173 年～1240 年，從 1216 年開始便統治威爾斯的大部分地區，都好巴閉架。

The Castle Hotel – 位於小鎮大街High Street，外觀十足千年古宅，小太熊話咁舊的酒店好易撞到果味野架。

小鎮內間間屋都幾百年歷史，淨係沿著High Street行街欣賞建築物已經好新奇。

原來英國孖寶在威爾斯也很普及。

沿海岸有城堡和餐廳，可惜要到4月旺季才開業，到時有新鮮青口食，今日冇口福了。

這小店售賣新鮮青口，不過現在未開門。小太熊好想食。

英國最細小房屋(The Smallest House in Great Britain) – 位於Conwy的碼頭區，可惜現在停業，要到4月2日旅遊季節開始才重新開放，今日摸門釘，只可以在外觀賞。

康威城堡(Conwy Castle) – 古堡已有七百多年歴史，古時用作防禦外敵，現在開放給遊客參觀。由於時間有限加上入場費唔平，決定只在城堡外圍行一個圈。

沿著城牆行可以同時欣賞小鎮和古堡，其實仲好睇過比錢入古堡內參觀。

古堡出入口以一條鋼索橋連接對岸Llandudno Junction，橫跨 康威河(River Conwy)。

匆匆忙忙參觀完古堡，便趕快乘10:40巴士 No.5去另一小鎮Llandudno，今次可以停留5hr慢慢行。

上車要Scan今早買的1-bws Ticket。

<< Llandudno>>

蘭迪德諾(Llandudno) – 位於威爾斯的康威郡自治區內一個臨海城鎮，150年前已經被譽為威爾斯的度假勝地。落巴士之後立即感到強烈度假氣氛，各方面的環境都勁似法國南部蔚藍海岸。

Holy Trinity – 市內的聖公會教堂，又係歷史悠久。

沿著大街行到海邊，全部都係度假酒店，而且房價很貴。

觀光巴士冇乜客，唔知係咪因為老漢廢炎呢。

街上大部份人都很老了，後來發現英國全國都有這現象，遊客大部份都已經登六。

蘭迪德諾戰爭紀念碑(The Llandudno Cenotaph) – 建於第一次世界大戰之後，矗立在沿海的廣場Prince Edward Square，列出了在大戰中喪生的45名本土人。

Beach of Llandundno – 今日太冷海灘上冇乜人，相信夏天時一定佈滿曬太陽的泳客。

Llandudno Promenade – 激似法國尼斯的海濱長廊，完全估唔到在英國也會有這種環境，好有驚喜。

海鳥們都好激進，昅到實人們的食物，驚告牌寫住話佢哋最鍾意係雪糕和薯條，好變態架。

蘭迪德諾碼頭 (Llandudno Pier) – 碼頭沿岸全是遊藝攤位、小食亭和機動遊戲，但卻比較冷清，大部份機動遊戲都唔開。

有咖啡杯呀，聽啲老嘢講以前啟德遊樂場都有架。後面間酒店已經摺埋荒廢咗了。

Llandudno Pier Deck Amusement Arcade – 碼頭的盡頭是一間餐廳加遊樂場，賣的只是快餐式食品，玩的只是小學雞攤位遊戲。

對岸是一座小山Little Orme，山後約50km便是英國名城 利物浦(Liverpool)。

在Llandudno Pier Deck望返去 Beach of Llandundno，原來都好遠了。

繼續沿著機動遊戲旁邊的小徑行上Great Orme山頂。

Great Orme – 由石灰岩形成的小山，屬於市內的自然保護區，設有多條路徑能登上山峰。山腰有個數千年歷史的銅礦場，4月旅遊季節開始便可以入內參觀，但現在關閉。

補充資料 :

1.     £1兌HK$10.66 (HSBC網上兌換)

2.     在威爾斯Snowdonia National Park內的交通以巴士為主，詳細時間和路線可以參考Snowdon Sherpa的網站和Apps。

3.     巴士車票可以上車和司機購買，收信用卡和Applepay。即日來回票(Return Ticket)和全日票(1-bws Ticket)比較常用。

4.     在Snowdonia National Park坐了4日巴士，遇的巴士基本上很準時，跟到Apps內的Schedule，只有No.6B連續多日失踪，我在最後一天才見到這巴士。

---待續---