沙巴 • 砂勞越 婆羅乃雙週(1) – Mt. Kinabula神山之戰

馬來西亞沙巴神山Mt. Kinabalu ~ South Peak(4032m)

神山(Mt. Kinabalu)位於 馬來西亞婆羅乃(又稱婆羅州)沙巴，海拔4095米。從神山國家公園的起點(海拔1866米) 開始，不斷向上行8.72km便可到達東南亞最高峯 神山山頂Low’s Peak，普通人需時約 8.5小時，一般來回行程會分2日行，在半山瞓一晚。

 沙巴‧砂勞越 婆羅乃雙週 – Day 1

2006年4月4日，天朗氣清，從屋企的露台望出 銀線灣一片藍天白雲加帆船，小太陽心情興奮，因為明天一早便要開始參加 神山之戰，登上東南亞最高峯。

上機之前先在機場候機室食免費自助餐，味道唔錯架，今日仲坐到窗口位添。

黃昏到達沙巴(Sabah)的首府 亞庇市(Kota Kinabalu)，今晚住市中心的住Beverly Hotel。

雙人房(連早餐)每晚HK$360 - 房間整潔又有落地玻璃。

SEDCO Complex – 從酒店行15min便到，內有很多海鮮酒家和小食，晚餐豐檢隨心。

叫了一隻 斑馬瀨尿蝦，一條河魚 金鳳魚，一碟 薯仔菜 和BBQ雞翼，合共RM 67，好抵啊。

由於明早07:00要出車，酒店餐廳還未開門，酒店便安排了明早06:00送早餐到房內，不另收費，Beverly Hotel的服務真一流。

沙巴‧砂勞越 婆羅乃雙週 – Day 2

Room Service早餐準時06:00送到，比想像中豐富啊，原本以為只有茶和麪包，原來仲有煙肉煎蛋和橙汁，好開心，一陣實夠力行了。

小太熊出發前Book了一個 神山攻山Package，2位收費HK$2600，包來回亞庇冷氣專車接送，山上一晚冇暖氣冇熱水的床位，導遊和落山後的一餐午餐。

07:00從酒店出發，2小時車程到達旅行團必到的 神山國家公園的入口。

今日很好天，在國家公園的入口可遠望神山山頂。

公園入口處人山人海，導遊替我們登記後，約10:00開始出發。

今天由起點Timpohon Gate(1866m)出發，行到Gunting Lagadan Hut(3323m)，然後瞓一晚，明早02:30再出發攻頂等日出。

一開始就不斷上....上....上，因為太斜和高海拔，行1km差不多要1小時，比平時1小時行4km慢得多。途經很多樹林區。

雖氣温都有17～18度，不過因為濕度高，行不夠30min便全身濕晒了，攪到一停下休息啲汗便會好冰凍，好難頂。

大約每個鐘都會行到這類避雨亭，可以休息飲啲水，不過耐唔中都好鬼多人的。

繼續努力，沿途天氣開始陰晴不定，大部分時間都非常之大霧，氣溫亦越來越低。

山上空氣清新，很多橙色的地衣。

仲有 豬籠草(Pitcher Plant)

有少部分路要用繩索幫忙至行到架。

行了3小時，看見神山的Ugly Sister Peak (海拔4032m)了。

接著一段時間非常之大霧，乜都睇唔到。

特然間吹來濃霧，攪到棵樹像鬼樹一樣。

小太熊到此一遊  

15:00終於行到山上第一間旅館Waras Hut(3243m)，都好簡陋啊。

再行多30min，行了5個半鐘，終於到山上最大的旅館Laban Rata Resthouse (3272m)。

Laban Rata Resthouse – 這是山上最好的住宿，有餐廳和糧水供應，而且房有暖氣和熱水，可惜早3個月都Book唔到房。

因為我們的旅館要上升多50m，而且沒有食物供應，所以決定先在這裡食飽才繼續上，不走回頭路食飯了。

Laban Rata Resthouse室內餐廳唔係好多人。

室外直程冇人，同小太熊包場先。估唔到咁好環境都冇人。

炒飯(RM 11.5)； 美極雞湯麵加雞絲(RM 5.6)；美極咖哩湯淨麵(RM 2.6)；礦泉水1.5Liter(RM 10) - 講真味道真係嘛嘛，麵太琳雞絲冇肉味炒飯又冇乜餸，不過因為太肚餓，所以都覺得食咗好舒服。

食完飯再向山上行多10分鐘，到今晚瞓的旅店Gunting Lagadan Hut(3323m)。

今晚住一間4人房，我和小太熊要一張上下格床，同房還有一對丹麥老人家，他們說行到這裡已經頂唔順，決定明早不上山頂了。 

旅館沒有熱水和暖氣，現在已經17:00了，氣溫已經下降至10度左右，但因為今日出了整日汗全身又咸又嗅，於是忍著冷沖了個超級凍水涼，原本諗住洗埋頭，但因為濕完頭和身之後實在太冷頂唔順，連番梘都搽唔到，最後都係冇洗頭，只係用冷水沖沖身再抹返乾，接著便上床休息了，預備明天零晨02:30再出發。我沖完涼後開始有高山反應，有些頭痛和反胃，瞓得甚差。小太熊仲慘，比我老點佢洗埋頭添，佢又頂得住搽到番梘洗頭水喎，真利害。

沙巴‧砂勞越 婆羅乃雙週 – Day 3

整晚都瞓唔着，好辛苦捱到零晨01:30起床後，行返落去Laban Rata Resthouse吃些簡單的早餐，準時02:30出發，直上山頂。

Laban Rata Resthouse已經很多人在吃早餐了，自助早餐每位RM 15，雖然平，都有奄列多士奶茶同焗豆任食架。

食完早餐02:30出發，黑媽媽上山的過程唔算太辛苦，山頂最後一段路全是岩石，有幾段路需要爬繩上。我們行了3小時，終於上到東南亞最高峯 神山山頂Low’s Peak(海拔4095.2米)了。

山頂已經人山人海等緊日出了。

日出了，好好彩今日天朗氣清，唔一定睇到架。

小太熊戰勝神山了，於2006年4月6日早上在Low’s Peak看日出。

跟著個個都排隊影張到此一遊相。

停留了1hr左右，旅客們都相繼開始落山了。

落山的時候一下不小心燉了落地下，好彩冇跌親。

看完日出後落山，回望東南亞最高峯Low’s Peak (海拔4095.2m)。

繼續落山，沿途經過Ugly Sister Peak (海拔4032m)。

繼續落山，離山頂越來越遠。

最後路過這個神山的招牌 – South Peak(海拔4032m)。

好靚呀，小太熊好鐘意South Peak啊!

穿過埋這8.0km的路牌之後便全速落山了。

近山頂的路全是岩石也比較斜，沿途都需要用繩索幫助落山。

大約09:00回到Laban Rata Resthouse，每人食碗湯麵補充一下，再休息一會兒才落山，因為行了這麼多路又急上急落，大髀肌肉已經相當之酸軟了。

回到起點時已經中午一點幾了，雙腳酸軟到不得了，要用行山柺杖借力，儘管如此，仍然有好多老外同讀國際學校的打壞後生比我們追過頭了，佢哋仲流過我好多。

上山用了8.5小時，落山都用了6小時。司機已經在起點等我們，一到埗立即開車起行，到附近的餐廳吃午餐(團費已包)，已經餓到不得了。

中式午餐有三餸一湯白飯任裝，有炸雞髀、甜酸魚和炒白菜，味道OK 㗎。

回到Kota Kinabalu)的酒店Beverly Hotel已經17:00了，由於太攰，今晚決定唔出街早點休息，因為明天又要倒塔咁早起身趕早機。首先沖個靚涼先，然後落樓下食酒店的自助晚餐。

Beverly Hotel地下餐廳自助晚餐每位RM35，食物質素一般，不過都幾抵食。

今晚非常之攰，瞓得好甜。

沙巴‧砂勞越 婆羅乃雙週 – Day 4

零晨04:00要起身了，仲係好眼瞓囉。昨晚通知Beverly Hotel把我們的自助早餐改為今早04:00的In Room早餐，不用另外加錢。

吃過早餐後，乘的士到內陸機場。今日會乘06:30班機從 亞庇市到Palau Layang-Layang，來回機票每位要US$220。小太熊再經網站買了一個Palau Layang-Layang酒店的Package，每位US$805包4晚Layang-Layang Island Resort 住宿 + 9次潛水 + 每日5餐。

飛機是這些小型的12人機。

飛機往東方的南中國海峽飛了大約30min，很快便到Palau Layang-Layang了，今日天氣好好。

Palau Layang-Layang - 這是一個位處海洋中心的環狀珊瑚礁，本身沒有陸地，馬來西亞政府在珊瑚礁上興建了一個軍事用的人工島，島上亦建有一間Resort，除了Resort的範圍，島上其他地方也是軍事禁區。

--待續--