國際都會 上海(2) – 豫園 • 七寶古鎮

上海 豫園商城

豫園位於上海黃浦區，是建於明朝1559年的江南式園林花園。豫園外圍是旅遊名勝城隍廟和豫園商城，附近有多家著名食店，包括 南翔饅頭店和 上海老飯店。

國際都會 上海 – Day 3

早上在酒店食自助餐，只食了少少白粥和雞蛋，想留肚一陣間食其他好嘢。

食完早餐行去附近的Mandara SPA，訂了後日做1.5hr SPA，每位￥900。

坐的士10:00到豫園，原來上海的士都好平，如果有4個人真係平過坐地鐵。

豫園老街 - 商店十分旅遊化，價錢也是遊客價。

豫園(入場票￥30) – 原來江澤民好鐘意玩，四處也見到他的提字，佢分明比晒啲嘢朱油基做，自己唔駛做。

豫園九曲橋 • 湖心亭

始建於明朝1559年的花園

在豫園行了個幾鐘，沿途不斷試小食，其中這檔最滿意。

香米打糕(￥19.8 – 500g) – 甜甜哋，勁好咬口。我想買￥5，但老細歧視我這個港燦，唔肯賣咁少，因為旁邊啲表叔個個都大大聲買一百幾拾，大有「一千幾百尤如垃圾」嘅氣勢，於是我要￥10，佢先好唔願意地賣比我。唉，大佬，啲糕雖然好食，但唔洗食其它嘢咩。

約11:00離開豫園前，到 南翔饅頭店食早餐。這間店非常攪嘢，分三層共3間店：地下外賣部、1/F船舫和2/F鼎興樓，旅遊書話樓層越高小籠包的味道越好，價錢亦越貴。有人試過地下的小籠包後，只用一個字來形客…………….平，但對味道隻字不提。我去到地下舖時發現港燦團已早一步在排隊，人龍很長起碼要排半個鐘。￥12有16隻小籠包，包皮勁厚，看見港燦們都吃得很滿足。

南翔饅頭店 地下外賣部

我們沿樓梯上樓，經過1/F 船舫見開始有人排隊，再上2/F 鼎興樓，好彩未滿坐，有位。

鼎興樓的廚房

蟹糕小籠包(￥55) – 這就是上海最好嘅小籠包???味道雖然好，但因價錢唔平，而且皮好厚，期望越大失望越大。始終味道同台彎鼎泰豐爭幾遠吓。

巨型 灌湯蟹糕小籠包(￥22) – 湯味幾鮮甜，蟹味濃郁，但包皮太厚太硬，不能吃。

飲完湯，打開一看，Oh….唔怪得咁香蟹味啦，這麽多蟹糕，要食埋佢。

行出 豫園商城走到 上海老街

西施豆腐坊 – 跟住旅遊書的資料來到這間 豆腐店，都幾多遊客。

鹹豆腐花(￥3) – 很香滑豆味亦香濃，北方人吃豆腐花也喜歡咸食的。

可能南方遊客太多，甜豆腐花已加價到￥5，搵笨啊。

臭豆腐(￥3～4件) – 臭氣沖天……….炸得夠脆口，正。

上海老飯店 – 豆腐花都未落格，13:00又要到這名店食午飯。

四喜烤夫(￥12) – 有水準，醬油味不太濃，可以吃出麵根的味道 ; 紅油荀尖(￥12) – 鮮嫩可口荀香樸鼻，價錢平好抵食。

蟹粉豆腐(￥18) – 超水準之作，很多蟹粉味道一流。

蟹粉小籠包(￥30) – 包皮超厚餡料冇乜蟹粉，好唔掂。

小糭子 – 每啖一隻的甜糭，幾得意幾好味。

下午乘的士到上海的水鄉  七寶古鎮

七寶古鎮～七寶塘橋

七寶鐘樓

七寶方糕(每件￥2) – 七寶古鎮的名物，買一件試吓無妨，糕味香但口感很差，食到成口粉。再買多一件 赤豆米糕亦好難食。

川湘閣 – 七寶古鎮 南大街的小店，見門口有乞兒雞賣，便進去試吓。

乞兒雞(每隻￥20) – 肉質嫩口有雞味，好食，最好2～3人試1隻。

晚上約了人到 徐家滙的菜館 – 新鄧家菜晚飯

酸辣湯 – 酸酸辣辣很開胃好飲，很有上海風味。

蠔油菜心 – 好新鮮好嫩。

清炒河蝦(￥68) – 好食過 杭州天香樓的龍井蝦仁，爽口有蝦味。

水煮牛肉(￥48) – 辛香樸鼻夠刺激，廚功一流。

紅燒肉(￥52) – 味道像杭州 東坡肉，香口又有肉味。

蟹粉麵(￥58) – 味道唔錯，蟹粉份量唔少。

第三天還是主打食，個肚已脹到爆開了…….

 

---待續---