樂活 • 怡保(1) – 世外桃源The Banjaran Hotsprings Retreat

馬來西亞怡保 隱世酒店The Banjaran Hotsprings Retreat (Garden Villa)

隱世酒店The Banjaran Hotsprings Retreat位於馬來西亞 怡保市近郊的小桂林區，酒店四面全被羣山包圍着，充滿天地靈氣；內有幾個巨型天然石灰岩洞穴作不同用途，包括蒸氣浴、冥想、太極等等，此外還有天然溫泉瀑布、天然冷水瀑布、户外温泉和SPA中心。全酒店只有25間別墅，每間別墅都有獨立泳池和户外温泉。在這裡休息幾日後，絕對令人對返工再提唔起興趣。

樂活‧怡保 – 序 

今年中秋有4天假期，剛巧國泰有特價機票去吉隆坡，The Banjaran Hotsprings Retreat又出了個特價 Package，便決定去大馬嘆返三晚休息休息。

Day 1 – 晨早05:30起身，乘早機去 馬來西亞吉隆坡，在機場轉的士直接到 怡保市近郊的The Banjaran Hotsprings Retreat，入住泳池別墅Garden Pool Villa。下午在酒店嘆温泉，玩Dr. Fish，晚上在酒店食自助餐。

Day 2 – 早上在酒店食自助早餐後，往酒店內的天然岩洞Meditation Cave上太極班，然後到SPA Centre做一個專按腸和胃(肚池附近)的45min療程 – Chi Nei Tsang Abdominal Message。在酒店午飯後，乘的士到 怡保市舊城區，試盡怡保美食，包括 怡保白咖啡、咸吉水、怡保芽菜雞、沙河粉、樹上熟榴槤、鴨仔燈鹹涼茶、怡保大頭蝦. . . . 。晚上回酒店的 石灰岩洞酒窖(Jeff’s Cellar)嘆紅酒。

Day 3 – 早上在酒店食自助早餐後，往酒店內的天然水晶岩洞Crystal Cave打座冥想。冥想完畢，到酒店的温泉湖邊練 瑜伽，然後再玩天然蒸氣岩洞Steam Cave、天然的Ice Bath、天然的温泉瀑布、露天温泉浴池和温泉足部按摩徑，跟住去SPA Centre做75min SPA – Traditional Malay Urut。在酒店午飯後，到酒店附近的樂園The Lost World of Tambun玩。

17:30又再到SPA Centre做75 min的熱石SPA – Warm River Stone Massage，晚上在酒店食自助餐。

Day 4 – 早上07:30 Check-out，乘的士到 怡保市舊城區食早餐，今天試 新成發咖喱麵、新源隆茶室、黎記豆品店和 天津飲冰室。乘11:15出發的火車從怡保返 吉隆坡，跟住到Jalan SS2的榴槤檔食樹上熟榴槤。最後乘17:40班機回香港。

樂活‧怡保 – Day 1

早機出發，要晨早05:30 起身，去到機場先食早餐。

禁區候機室The Travelers Lounge食免費早餐，有南瓜粥和腸粉。

飛機準時12:30到吉隆坡，由於酒店都好貴，決定用最快的方法 – 的士直飛酒店。從機場13:20上車，16:10已到酒店，不用三粒鐘，比火車快兩個鍾(每人貴RM 80)，比巴士快三粒鍾(每人貴RM 110)，但可以嘆早幾個鍾，值得值得。

<<怡保>>

  

The Banjaran Hotsprings Retreat大門口

行入酒店，即時感覺靈氣迫人，四圍都係靑山流水，冒煙的溫泉，正到呢～話佢係小桂林簡直係貶低佢，桂林四處都係人山人海加飛劍，嘈嘈閉閉人又樣衰，但這酒店只有寧靜，除了早晚餐時在餐廳有多些人外，其他時間都好少遇到其他住客。

The Banjaran Hotsprings Retreat – Reception

The Banjaran Hotsprings Retreat – 花園

經過Reception、花園、温泉區和公用泳池後，到自已間別墅Garden Pool Villa了。

Garden Pool Villa – 進入大門後便是個泳池，私隱度100%，可以做亞當…

4日3晚The Banjaran Hotsprings Retreat Package每位RM 2320，包3晚Garden Villa、2日早午晚餐共6餐、SPA回贈RM 1000、每日一個 1hr活動和Lost World of Tambun入場門票(值RM 45)。

Garden Pool Villa泳池旁的大客廳

Garden Pool Villa睡房，張大床好舒服架。

酒店送了一個怡保特產 – 打捫柚，清香爽脆多汁，中秋節最啱食。

Garden Pool Villa衣帽間和洗手間，大過我在尼泊爾住的雙人房幾倍。

Garden Pool Villa淋浴間和室外温泉按摩池

可惜Reception Check-in的Staff儍吓儍吓，唔知17:00有個免費瑜伽呼吸班，冇通知我，累我玩少個活動。

在房游了陣水後，走出門外嘆嘆那些公用設施如温泉、腳板按摩區和Dr. Fish，話就話公用，但玩了個幾鍾都唔見有其他人，像包了間酒店一樣。

Dr. Fish水池正在維修，池裡只有30~40條魚，咬得唔夠响泰國甘頂癮。

Dr. Fish温水池

温泉 腳板按摩區 – 非常一流，石春的大少圓尖疏密不一，完全按到腳板每個穴位，加上浸住温泉水，效用更好，一般公園的石春路同佢冇得比。

温泉浴池又係Good到無得彈，個View像仙景一樣，唯一唔好係怡保的氣温始終唔夠Cool，浸温泉冇甘爽。

The Banjaran Hotsprings Retreat – 温泉浴池

嘆完公用設施，再返房嘆私家温泉。

The Banjaran Hotsprings Retreat內的奇石，似個人頭，有晒眼、口、鼻和頭鬚。

The Banjaran Hotsprings Retreat只有一間餐廳The Pomelo，供應三餐，可以兩個人坐在河上的小亭食，氣氛唔錯嘅。

我同小太熊坐了中間那個亭食晚飯

酒店包的自助餐，普普通通不太差，不過如果唔包餐，可以出怡保市食就更好了。

飯後再四圍行，間嘢的夜景都非常靚，可惜永遠天陰陰，冇星星。

The Banjaran Hotsprings Retreat – Reception

The Banjaran Hotsprings Retreat – Garden Pool Villa

原本打算來休息，點知四圍行來行去，返房又游轉水再浸浸温泉，又出客廳坐陣，都好忙吓，攪到成十二點先至瞓。

補充資料 :

1.    國泰 香港來回吉隆坡機票(連所有附加費及稅)每位HK$ 2525。

2.    由吉隆坡國際機場乘Long Distance Taxi到怡保RM 315，車程約3小時，最多坐 4人。

3.    吉隆坡國際機場兌換價RM 1兌HK$ 2.86，個兌換價比簽Card(約RM 1兌HK$ 2.7)更差。

4.    4日3晚The Banjaran Hotsprings Retreat Package每位RM 2320，包3晚Garden Villa、2日早午晚餐共6餐、SPA回贈RM 1000、每日一個1hr活動和Lost World of Tambun門票(值RM 45)。

--待續---