樂活 • 怡保(2) – 遺忘30年的人情 • 味道

馬來西亞怡保 隱世酒店The Banjaran Hotsprings Retreat (Water Villa)

怡保 是馬來西亞霹靂州(Perak)的首府，亦是一個典型的大馬舊城市，市內全是2~3層高的戰前樓，像檳城、古晋、亞庇等大馬名城一樣，發展緩慢，樣貌仍停留在40~50年前，所以《父子》同《色戒》兩部戲都貪怡保個Town夠殘夠舊，在這裡取景。今次到怡保，除了想在The Banjaran Hotsprings Retreat舒適地親親大自然外，還想在舊城內逛逛老牌冰室，那些小學常常經過，好恨入去食嘢但又冇錢幫襯的冰室，感受一份遺忘了30年的味道和人情味。

樂活‧怡保 – Day 2

<<怡保>>

原本打算06:30起身，早些開始玩，但張床太舒服啦，最後都係瞓到07:30至mei mei mor mor起身。

Package包的美式早餐，乜都有，味道亦唔錯。

早餐麵包新鮮焗的，非常好味。

食完早餐，行過去酒店內的一個大型岩洞 – Meditation Cave。這岩洞主要供住客學做瑜伽和太極，洞內有天然河流，岩洞高約20m，非常壯觀。

The Banjaran Hotsprings Retreat – Meditation Cave

今早09:30有免費太極班，師傅和同學未到，自已包起整個石灰岩洞練一練瑜伽先。

師傅準時09:30到，其他住客都係死懶鬼，全班居然只有我同小太熊兩個，二人包一個師傅，正呀! 最正仲係個師傅講廣東話架。。。。

學足一粒鍾太極，師傅曉教我氣隨意走~氣聚丹田~以柔制剛~以弱勝強~以肥壓瘦~以大欺小…，做到滿身大汗。

練完太極，11:00做SPA，酒店個Package包了RM 1000的SPA回贈，可以免費做三次，爽呀。。今日選擇了一個專按腸和胃(肚池附近)的45min療程 – Chi Nei Tsang Abdominal Message，價值RM 240。雖然按得幾好，但水準相對Banyan Tree還有一段距離，價錢卻一樣，所以覺得唔係好值，不過Package包了，冇所謂啦。

The Banjaran Hotsprings Retreat – SPA Centre

12:30在The Pomelo食午餐，又係Package包埋，可隨意在餐牌選一款頭盆、一款主菜、一款甜品和一杯果汁，如果自費加加埋埋都要成RM 140一位，但味道只係普普通通。

頭盆 – Pomelo Salad (RM 34.8)

頭盆 – Grilled Scallops Skewer (RM 41.8)

主菜 – Grilled Beef Tenderloin (RM 75.4)

主菜 – Pan Seared Fillet of Coral Trout (RM 64.5)

甜品 – Espresso and Chocolate Almond Cake (RM 27.8)

甜品 – Banana and Walnut Nougat (RM 27.8)

全部都唔難食，不過怡保市內的野食肯定平靚正過這餐好多。

食完飯叫Reception Call的士，等了成 25min至有車，出Town唔塞車也要坐25min。的士司機其怪我會在怡保玩4日咁耐，佢話:「4日??怡保冇乜好聊渣喎，香港咪仲多野聊?」佢可能唔知我間酒店這麽正，有錢有時間真係聊7日都唔覺悶。

今日先到火車站買兩日後返吉隆坡的火車票，跟住開始怡保半天食食食之旅。

怡保市政大樓，位於火車站對面。

買完火車票，從怡保火車站行10min便到達舊城的白咖啡街Jalan Bandar Timah，全怡保最懷舊的茶室都集中在這條街，是怡保白咖啡的起源地。

第一站到Jalan Bandar Timah街內最出名的茶室 – 天津飲冰室。

天津飲冰室 – 全店滿座，剛巧有人食完離開，唔駛等位。這間茶室相信已50年不變，充滿人情味，門口檔雞絲河粉必食。

凍白咖啡(RM 1.6) – 只是普通，好過香港一般茶餐廳飲到口都酸嘅三流凍咖啡，但香滑濃味都不及街內其他老牌茶室；凍咸吉水(RM 1.6) – 味道都係一般。

雞絲沙河粉(RM 4) – 極品中的極品，湯底相信用了大量蝦頭熬成，鮮甜濃郁，沙河粉亦滑不溜口，是整個行程吃到最好的東西，可惜香港食唔到。下次去大馬，可能會為這碗河粉專程到怡保走一躺。

怡保名菜有三寶，就係 芽菜、雞和沙河粉，未食過等於未到過怡保。

怡保芽菜(RM 2) – 和香港食到的芽菜完全兩樣，怡保芽菜條條肥大爽甜，食落嗦嗦聲且冇草青味，一食上癮，原因係怡保有大量石灰岩山，因此怡保的泉水都含大量礦物質，特別適合種植芽菜和制沙河粉。

特色薄餅(RM 1.8) – 用沙葛、雞蛋、蝦米、芽菜和糖做餡，咸咸甜甜幾過癮，值得一試。

食得太飽，要行一陣落隔後才能再食了。

中午在舊城四處逛，那些舊街十足十10年前未番新的檳城George Town。

在街上行了個幾鍾，行了最大的街市都找不到 榴槤，小太熊極度失望，我於是盡最後努力，轉入一條街Jalan Dato’ Tahwil Azar碰碰運氣，居然比我在街上一個大排檔找到了三個今日賣剩的 怡保樹上熟榴槤，雖然係賣剩，但都係極品。

Jalan Dato’ Tahwil Azar的大排檔(Remark : 2017年10月再到這揾榴槤，發現已經變成一幢大廈。)

怡保土產榴槤 五指果(2kg~RM 15) – 外皮亁身，果肉黏喉，榴槤香樸鼻，味道主香甜，部份帶點輕微甘苦，和上次檳城吃到的有得揮，而且價錢平一倍。

兩個人即場食了一半，餘下半個包回酒店雪凍食，比熱食正好多。

食完榴槤已飽了大半，但時間緊迫，只好頂硬上過兩條街食埋 怡保必吃的地道菜 – 芽菜‧雞‧河粉。由於本本雜誌都推介「老黃芽菜雞沙河粉」，見佢又係最多客，便入去完一完心願。

怡保市 老黃芽菜雞沙河粉

店內一大筒芽菜，見伙記不停一手一手找上煲白灼。

兩個人Order了一碟芽菜、半隻雞和兩碗湯河粉，共收了RM 20。

怡保芽菜 – 和天津飲冰室同樣爽甜，但加了胡椒粉，味道反而有點不及天津飲冰室那一碟。

白切雞 – 加了豉油，都有點雞味，如果期望不高的話，味道係OK嘅，但唔明佢點解咁出名；沙河粉 – 質地比天津飲冰室好，但湯底差十萬倍，這碗只係豉油湯底；果漢果茶(右)(RM 1.4)和薏米水(左)(RM 1.4) – 幾清熱。

食完 芽菜‧雞‧河粉，又走過對面間「鴨仔燈鹹涼茶」飲番杯排吓熱毒。

鴨仔燈鹹涼茶(每杯RM 0.6) – 杯涼茶鹹鹹濕濕老老土土又幾有人情味，路過又唔想這間一代鹹嘢咁快消失咪幫襯吓囉。

怡保市的街道有些似曾相識，有點像意大利Bologna的長廊。

行了陣街，又買了怡保另一特產，「余合炭燒香餅」出品的 炭燒香餅。

余合炭燒香餅(10個獨立包裝~RM 8) – 以麥芽糖、炸蔥頭加芝麻作餡料的福建傳统小食，十分香脆好味，但其他品牌我就未試過了。

食完晒已黄昏18:00了，決定作最後一擊，乘RM 6的士去 周中師傅推介的「民眾酒家」食大頭蝦。周中師傅話怡保大頭蝦的地位等如太湖的大閘蟹喎，又話個蝦頭勁多蝦膏，好好味喎….所以在肚皮飽到列開的狀態下還要專程去一試。

記得上次在 胡志明市食到的炭燒大頭蝦鮮甜味美，蝦頭的蝦膏又Cream又甘香，成日發夢想再食，所以對怡保大頭蝦期望很高，點知……..唉!!

怡保  民眾酒家

生猛大頭蝦(RM 14~100g) – 每隻最少200g。

兩個人淨叫兩隻蝦好似好衰，所以叫多煲蟹肉翅，點知…..

蟹肉煲翅(RM 40) – 劣，湯底唔鮮甜，用豉油味精溝出來的，屎到不得了。

豉油王亁煎 怡保大頭蝦(RM 70兩隻~共500g) – 蝦肉彈牙，但完全冇味淡口，頭上的膏亦不多，而且四隻勁多肉的蝦鉗失踪了(上次在 胡志明市會把蝦鉗原隻上碟後再拿回去廚房拆肉的)，周中師傅真大整估。

民眾酒家 完全唔得。

食完蝦截的士返酒店，個馬拉司機話要RM 20，但我由酒店出來時只係RM 15，最後我還價RM 15成交。點知個死司機唔識路兜來兜去，最後要我帶路至揾到間 隱世酒店，到酒後又亞支亞咗好似嫌錢少，不知所謂。

返到酒店了，今晚去酒店內一個最大的 石灰岩洞酒窖(Jeff’s Cellar)，內藏大量美酒，又有冷氣，保持氣温在25°C左右和乾爽的濕度，而且內有像土耳其綿花堡的水台，都好有特色。

石灰岩洞酒窖(Jeff’s Cellar)外的古井

石灰岩洞酒窖(Jeff’s Cellar)入口，凉風陣陣。

石灰岩洞酒窖(Jeff’s Cellar)內像土耳其綿花堡的水台

石灰岩洞酒窖(Jeff’s Cellar)嘆酒的地方，難得係這麽正的地方亦冇乜人到，這間 隱世酒店真係貴得有道理。

難得可以包起個山洞，當然買杯 紅酒(RM 35)揀個龍位嘆吓啦…..

RM 35包起個山洞，仲有杯紅酒嘆，真係電費都收唔返。

夜晚臨瞓前食埋半個榴槤，雪凍好味過中午好多呀。。。

補充資料 :

1.    從The Banjaran Hotsprings Retreat乘的士出怡保市最少 25分鐘車程，最耐塞車要55分鐘車程。酒店Call車後，最快等了25分鐘，最耐等了50分鐘，都幾浪費時間。車費每程RM 15。

2.    怡保的芽菜名不虛傳，又平又脆又肥大又甜，正。但大頭蝦淡過水，垃圾。

3.    怡保的華人的士司機同聲同氣，開出的價錢亦都合理，未試過要講價，但馬拉司機就獅子開大口，而且講好價後都多多聲氣，No Good。

4.    怡保去吉隆坡的火車每位RM 35，車程2hr13min，每日只有5~6班車。

---待續---