台灣 森山行(3) – 漫步阿里山森林鐵路

台灣中部山區 – 塔塔加

唔睇書都唔知，原來台灣著名的阿里山森林鐵路，近10年來因大地震和風災而不斷停駛，只有祝山線和神木線兩小段在一年前重開，其餘99%仍在維修中，現在整段鐵路仍然荒廢，可趁這機會用自已對脚走一走這條聞名已久的阿里山森林鐵路。

台灣‧森山行 – Day 3

<<奮起湖>>

今早安樂醒，看見一片藍天白雲，正呀. . . . . . 誰知未到中午又開始烏雲密佈，跟住仲一直落狗屎添，唉. . . . . . . . .

食早餐先，酒店的台式自助早餐味道唔錯。

食完早餐，開始阿里山森林鐵路探險旅程，今日會從這咖啡店旁的火車軌作起點，沿荒廢了的路軌向阿里山站方向不斷行，看看可行多久. . . . .

阿里山森林鐵路探險旅程，約10:00從這裡起步。

鐵路沿線生晒青苔，荒廢了好耐。

一邊行一邊感覺幾新鮮，因為唔知會行到邊和行到幾時。

沿途見最多就係杉樹和青竹。

行了約20min，便望到整個奮起湖。

再行多10min，到了一條隧道口，裡面黑媽媽乜都睇唔到，好鬼恐佈，但旁邊個牌寫住只有百幾米長，便胆粗粗攞住支電筒仔行入去看看。

入到去真係好恐佈，小太熊話好驚喎，好彩行冇耐就看見遠處出口一點光，但一邊行山洞一邊有水滴，又驚有蛇，又驚有獅子老虎大怪獸，又驚特然有火車駛入就死梗，响黑嘅地方真係特別驚. . . . . . . 下次唔玩呢啲了。

終於穿過了隧道，好可怕。

行多十多分鐘，看見有工人正在維修鐵路。

再行多十幾分鐘，又見一條隧道，新建的，但呢條太長了，真係唔敢玩，唯有回頭了，估唔到只行了一個鐘多些就要回頭。

見到鐵路上有隻超細的新品種青蛙

小太態話呢隻叫 石蛙喎，都唔知堅定流。

又要穿過剛才的隧道了，小太熊都仲係驚. . . . .

只行了2hr便回到起點，完成阿里山森林鐵路探險旅程，講真，行入隧道確係好驚險嘅。

返到老街，幫襯昨天那檔燒肉，今次買了一隻竹雞(NT 120)，一隻班鳩(NT 120)和一條竹筒飯(NT 50)。

買完外賣行上「好望角咖啡」坐低食

好望角咖啡 個景好好，望晒奮起湖。

今日的午餐，好味過昨晚果餐多多聲。

凍高山黑咖啡(NT 120) – 味道很差，冇乜咖啡香；玫瑰花果茶(NT 130) – 太甜，味道像啫喱溶了再加冰。都係樓下舖的凍愛玉好味。

飯後再入老街行吓食吓，今次試這間 奮起湖豆腐店。

泡菜豆渣餅(NT 25) – 味道幾特別，應該試一試；豆腐花加凍豆漿(NT 25) – 夠滑夠豆香又夠涼爽，好食。

行完老街還有差不多2hr時間，便到附近的森林棧道行吓，但天開始黑，像快要落大雨。

首先行10min上 觀景平台，從觀景平台看奮起湖。

順道往前行，到奮起湖 神社遺跡。

沿奮起湖步道再行，地上長滿青苔，很跣。

奮起湖步道 – 竹林

奮起湖 – 木馬棧道

行到奮起湖 翠竹坡，開始落雨了，回頭。

行到「松竹軒」開始落狗屎，便入去嘆多杯 招牌愛玉(NT 60)。

奮起湖最後的節目，就係返奮起湖大飯店食「鐵路便當」。

阿坤伯鐵路便當(堂食NT 120) – 勁多餸，有雞下髀、豬扒、滷水蛋、菜、筍，全都很入味，而且飯底也是台東珍珠米煮成，有咬口，這鐵路便當我覺得幾好食，但小太熊就唔多鐘意食囉。

今日Book了車15:00從奮起湖去塔塔加的東埔山莊，今晚會在東埔山莊住一晚，明天晨早出發，即日來回挑戰3952m的玉山主峰。

未出車時雨勢還未算超大，但開車不久便落狗屎，真担心明天不能上山。

<<塔塔加>>

塔塔加 – 東埔山莊

東埔山莊 大廳

東埔山莊床位，每人每晚NT 300。

暴雨停了一陣，我行出山莊到外面逛吓，見到這裡的生態很自然青綠，四圍都長滿地衣，證明空氣質素甚佳。

可惜行唔夠15min又再狂風暴雨，有遮都濕晒，大鑊。

返東埔山莊沖完沖便食飯，中午在奮起湖大飯店買了兩盒鐵路便當外賣和老街的樹番茄汁，算豐富了。今日早D瞓，預備明早以最佳狀態攻山。

鐵路便當外賣(每盒NT 100) – 是日晚餐，凍左都好味；樹番茄汁(NT 30) – 清甜醒胃。

補充資料 :

1.    由奮起湖去塔塔加沒有公車，包車要NT 2000 (奮起湖大飯店報價要成NT 3000添)，車程約70分鐘。

2.    塔塔加住宿只有 東埔山莊，山莊只有約130個床位加被舖，需自備糧食，但有廚房和熱水沖身，每人每晚NT 300。

3.    塔塔加周邊的風景好好，可早點去行吓，可惜我那時落狗屎。

4.    東埔山莊 當晚室温約有12~14℃，被舖夠暖。

---待續---