台灣 森山行(2) – 螢火世界 奮起湖

台灣奮起湖夜晚 – 螢火蟲飛舞

真係唔講又唔知，原來台灣奮起湖唔係湖，只係一個山中小鎮，位於阿里山森林鐵路沿線一個大站。佢最出名嘅就係林金坤伯伯的「鐵路便當」，好多書話未食過「阿坤伯」的鐵路便當，等於冇去過奮起湖。

台灣‧森山行 – Day 2

<<奮起湖>>

繼續上一篇的Day 2行程。中午13:10從阿里山乘公車，坐到14:05才到奮起湖，落車時雨勢仍時大時細，但部分天空雲層已冇咁厚。

山中小鎮 奮起湖

落車後沿着這小街行去今晚住的酒店 奮起湖大飯店

奮起湖大飯店就係 阿坤伯開的酒店，每個來奮起湖的遊客都會來這裡嘆返盒大名鼎鼎的 鐵路便當。

奮起湖大飯店

今日好彩，遇上了奮起湖大飯店老細 阿坤伯。

精緻日式雙人VIP房(連台式自助早食)每晚NT 4320

每間房都會送一盒高山烏龍茶，仲有兩包泡湯，可揀中药或花香，在房內的大木桶浸浴。

昨晚整晚冇瞓過，立即涼都唔沖小睡個半鐘先。

16:00瞓完覺居然停雨了，出外行吓，由火車站開始行。

轉入老街很多水果檔，當地人喜歡把桃子切開再加些話梅粉一齊食，幾好味的。

呢檔燒肉非常好食，我連續幫襯了2日。

班鳩(左1)(NT 120一隻)；燒野山豬肉(左2)(NT 120一塊)；竹雞(左3)(NT 120一隻)；竹筒飯(右)(NT 50一條) – 全部都都好味，唔試就笨。

買完豬肉，行上「松竹軒」坐底一邊飲一邊食。

蜂蜜愛玉(NT 50) – 非常好飲，愛玉晶瑩滑溜又彈牙，又涼又爽。

愛玉係長於1200~1800m潤濕的高山上的果實，綠皮白點形似芒果，把愛玉果實曬乾後取出愛玉子，在水中搓到佢凝固像啫喱，加點蜂蜜便變成消暑飲品，我一日最少飲兩杯。

阿里山高山烏龍茶(NT 120) – 普通。

返入老街，發現了一種「樹番茄汁」，非常好飲啊。

呢D就係「樹番茄」，佢D汁真清甜醒胃。

奮起湖火車站旁買便當的飯堂，名氣不及阿坤伯，太多野想食所以冇試。

奮起湖老街內的商店

試了一舊鳳爪，味一般。

呢間「火車餅舖」在老街很出名，我買了一個綠茶火車餅(NT 30)試，麻麻地，下次唔再食。

老街內的豬肉紙幾好味的，我買了6包。

行出老街後，不斷落斜路，行到電影「星空」的場景星空小木屋」。

跟住沿「杉木棧道」行一陣。

杉木棧道終點 – 土地公廟

夜晚19:00剛入黑，從奮起湖大飯店行10分鐘去到福華公路旁的賞螢區睇螢火蟲，可能落完雨，螢火蟲的數量不太多，但像鬼火一樣飛來飛去，第一次睇覺得好得意。螢火蟲初時還四處飛，睇耐左就停晒在樹上唔再飛，只見一點點微光。

螢火蟲累了. . . . . 只見一點點微光

返到老街差不多21:00了，只關剩這間餐廳有飯食。

炒生香菇(NT 150) – 過得去。

茶油雞(NT 400) – 冇雞味，太多油，很差。

返酒店浸了個花香浴，很舒服啊，終於有覺好瞓。

補充資料 :

1.    阿里山附近的瑞理至奮起湖一帶，4~10月都話有螢火蟲睇。我住當晚係星期六，問了幾十間該區的民宿都話冇房，只剩奮起湖大飯店的貴房有位。

2.    睇螢火蟲最好剛入黑約19:00的時侯，再入夜D蟲蟲就冇咁活躍，多數只停在樹上唔肯飛。

3.    奮起湖除了老街，還有多條森林棧道，時間多的話在這裡行吓食吓，玩一日一夜都唔錯。

4.    阿里山及奮起湖一帶盛產烏龍茶，當地居民流行一種冷泡茶葉方法，只把茶葉放進泠礦泉水內泡12小時便可飲用，凍烏龍茶清香消暑，最適合香港夏天時飲。冷泡茶葉不可用自來水，茶館職員話茶葉和自來水的化學物質會使茶變質，只有礦泉水才適合長時間冷泡及引出茶香。

奮起湖高山冷泡茶

---待續---