7.1大悠行@馬來西亞(1) – 夜遊吉隆坡(Kuala Lumpur)

馬來西亞 刁曼島(Palau Tioman)

今年7.1小太熊話要去馬來西亞大悠行加食榴槤，今次選了一處認識了20年但從未到過的小島 – 刁曼島(Palau Tioman)。我認識刁曼島時她好像自稱是世界十大未受污染小島之一，那時樂浪島(Palau Redang)還未興起，我認識去過的人個個對她都贊口不絕。今次5日行程唔算太趕，可惜成日都係煙霞厚雲，看不到日落。

Day 1 – 中午機去吉隆坡，晚上到埗。晚餐於大樹頭蘇記、黄亞華小食及Jin Alor食榴槤。晚上住Piccolo Hotel。

Day 2 – 晨早到 阿喜肉骨茶食早餐，乘08:00機去刁曼島(Palau Tioman)，住全島最貴的酒店Japamala Resort Hillside Sarang。全日在Resort浮潛、休息、SPA、嘆世界。

Day 3 – 早上浮潛，中午Check-out後乘船到另一酒店Berjaya Tioman Resort。下午出海潛水，黄昏出海釣魚，晚上在Resort外的餐館食釣到的魚獲。

Day 4 – 早上乘09:20機回吉隆坡，再轉的士去 馬六甲。下午馬六甲半日遊。晚上19:00乘巴士回吉隆坡，遊覽唐人街。深夜乘的士往機場。

Day 5 – 乘00:55機回香港。



7.1大悠行@馬來西亞 – Day 1

早上要返半日工，今日又係同上次一樣好大鑊，打緊風，多班航機都要Delay。中午先在機場禁區The Traveler’s Lounge食免費午餐。近年The Traveler’s Lounge越來越多人，又越來越少嘢食，以前有Häagen-Dazs雪糕批、出前一丁碗麵、蝦蛟燒賣. . . . 依家乜都冇晒，如果唔係免費都唔會去。

香港機場禁區The Traveler’s Lounge

好彩碗魚蛋河味道還可以，湯底唔夠味可加XO醬。

<<吉隆坡>>

準時上到飛機，但上機後即落大雨，Delay了一個鐘。飛機晚上19:00p.m. 日落時到達吉隆坡。

吉隆坡國際機場 日落

由機場乘的士往酒店。小太熊今晚Book了Jin Alor附近的Piccolo Hotel，話貪佢近Jin Alor可以食榴槤喎。

吉隆坡Piccolo Hotel

雙人房(不包早餐)每晚HK$790

從酒店步行5分鐘，便到吉隆坡馳名60年的名店，飲食男女話連頂頂大名的 岳少食過都贊好的 – 大樹頭蘇記炒粉。飲食男女也贊到她天上有地下無，來到吉隆坡怎可不試。

吉隆坡 大樹頭蘇記炒粉

廚房露天的，睇住佢哋炒都算亁淨衞生，而且勁有鑊氣。

晚上九點幾唔算多人，好易揾位。

冰凍大啤(RM 15)；椰青(RM 6)；話梅柑桔冰(RM 4)

滑蛋炒牛河(RM 11) – 大樹頭蘇記的名菜，飲食男女話「這炒粉，吃一次會永遠記住」，雖然跨了少少，賣相亦麻麻，好似太多汁，但食落完全不覺油淋淋，河粉煙韌彈牙又香又滑，牛肉只有牛味沒有梳打味，有咬口又不覺韌，最正還是那充滿肉汁香味的汁底，在香港從未吃過這麽好味的牛河，來到吉隆坡都唔食就笨。(Remark : 2017年11月再專程來幫襯，已經變了普通貨式，可惜。)

中蝦炒麵(RM 40) – 大樹頭蘇記的另一名菜，麵底不是頂級，炒得脆脆的唔覺油口，但香港也有這水準，一隻約4兩的中蝦味道也普通，不過，一撈埋啲汁一齊食就唔同晒，那汁底充滿鮮蝦香味，明顯是用大量蝦頭熬出來的，令人回味無窮，不過真係好貴。(Remark : 2017年11月再專程來幫襯，中蝦變了雪藏貨，完全冇味肉質亦硬實，麵底又硬又斷碎又油口完全冇味，那無敵的蝦汁底也沒有了，已經完全變了垃圾一碟，可惜。)

食完麵，行過Jin Alor食榴槤，即場食一個，再買兩個攞走，明天一個後天一個。

樹上熟榴槤最平1kg ~ RM12，最貴是貓山王1kg ~ RM28，雖然已比强國人炒貴了很多，但都仍然只係九龍城榮記的15%價錢，而且靚同新鮮好多，抵食。我先買一個1.5kg的蘇丹皇(1kg ~ RM18)和1.4kg的貓山王(1kg ~ RM28)。

葫蘆(1kg ~ RM 18) – 即場開個 2kg的葫蘆，雖然味道和上年在檳城榴槤園吃到的葫蘆差得遠，但也算皮爽肉Creamy，帶輕微甘苦又不太甜，好味。只是有少少發育不良，有20%果肉還未夠熟。

食完榴槤轉個彎行入Jin Alor，滿街食店人山人海非常熱鬧。

今晚另一目標，就係Jin Alor人氣食店 – 黄亞華小食店。

黄亞華小食店的名菜就係 炭火燒雞全翼，靚到呢. . . . . . 點忍得住口。

話梅柑桔冰(左)(RM 2.5)；夏枯草涼茶(RM 2.5)(右)

炭火燒雞全翼(每隻RM 2.5) – 黄亞華小食店的燒雞全翼，那皮脆肉嫩的程度我從未感受過，而且完全冇皮下脂肪，第一口咬下去那種“卜”一聲的感覺令人難忘，賣相100分，如果加多些蜜糖會更加完美。食到2018年也未試過跌Watt。

燒魔鬼魚(RM 28) – 黄亞華小食店的另一名菜，肉質幼滑脆口帶點微辣，有新鮮感，只是完全給燒雞全翼比下去。

食完已23:30，回酒店瞓4個幾鐘又要起身搭早機去Palau Tioman。

補充資料 :

1.    馬航 吉薩坡~香港來回機票(連所有附加費及稅)每位HK$ 2189。

2.    香港百年找換店兌換價HK$2.5兌RM 1。吉隆坡國際機場兌換價HK$ 2.67兌RM 1；US$ 1兌RM 3.02。在香港換錢最少着數3%。

3.    吉隆坡國際機場乘的士出市區要買Taxi Coupon，車費一律RM 74.6，最多坐 4人，連程40~50分鐘。

4.    吉隆坡國際機場有行季寄存服務。

5.    九龍城榮記成日吹到自已的 馬來西亞榴槤神一般美味，加上近年雜誌們都一窩蜂地吹棒，令貓山王的價錢已由一年前HK$300 ~ 1kg升至2012年7月的 HK$440 ~ 1kg，但品質卻不斷下降，我近期幫襯榮記買了一個幾舊水的馬來西亞榴槤，雪到過晒火差點變埋質，難得個老細仲七情上面吹到點正點頂級，明呃啲唔識食嘅有錢人，以後一定唔會再幫襯啲咁唔老實的水果店，佢啲貨又貴又差。

---待續---