聖誕快樂Merry • Christmas Island(1) – 聖誕島之迷

聖誕島(Christmas Island)特產 – 紅蟹(Red Crab)

從德國返來唔夠兩個月又要出發去 聖誕島(Christmas Island)了。點解咁急? 因為今年12月7、8日呢兩日係預計聖誕島紅蟹們會在沙灘產卵機會最高的日子，全年只有呢兩日睇到，所以趕啲都要啦。誰知人算不如天算，最後因為今年雨季返常冇乜雨水，攪到紅蟹們唔肯行落沙灘，終於要小太熊失望而回。。。小太熊話過多兩年要再來睇過喎！！今次聖誕島行程又係10日，又係夜機出發。本來以為好悠閒的十天假期，最後都係博到盡，玩得好辛苦。

聖誕島10天行程包括 :

Day 1 – 放工後去香港機場The Traveler’s Lounge晚飯，然後乘Air Asia夜機20:50從香港飛吉隆坡，在機場附近酒店瞓3粒鐘。

Day 2 – 朝早09:00乘馬航飛聖誕島。到埗後到酒店「The Sunset」 Check-in，住足7晚。中午在酒店附近四圍行吓，黃昏上半山食飯。

Day 3 – 早上2個Dives。中午往Greta Beach和Dolly Beach，晚餐自煮。

Day 4 – 03:35出發，行個半鐘上Drumsite的中學旁睇紅蟹大遷徒，再行返落酒店；早上2個Dives；中午往Hugh’s Dale、Martin Point和Waterfall行林樹，晚餐自煮。

Day 5 – 早上2個Dives。中午参加了半日團Bird Watching Tour，晚餐自煮。

Day 6 – 04:15出發，行個半鐘上Drumsite的中學，再行多25min到封了路的Murray Road睇紅蟹大遷徒，再行返落酒店；早上 2個Dives；中午休息，晚餐到西餐廳食。

Day 7 – 早上2個Dives；中午釣魚，晚餐到西餐廳食。

Day 8 – 早上行1粒鐘去Grotto玩1hr，再行返酒店休息。黃昏乘巴士往Drumsite的中學，再行多25min到封了路的Murray Road睇紅蟹大遷徒，在半山食飯。

Day 9 – 06:30跟Tour返去Murray Road睇紅蟹大遷徒，早餐後乘11:35機返吉隆坡。住Luxury Serviced Suites@Times Square Berjaya。

Day 10 – 早上四圍食，中午做2.5hr SPA，乘19:20班機回港。

今次話比人知去聖誕島，十個有九個都問 : 邊度黎架？點解叫聖誕島呀？未聽過喎。又係陽光海灘嗎？紅蟹？乜睇啲咁野好睇咩，去日本濕平咪仲好玩？鯨鯊？我响墾丁水族館都見過啦。要洗幾銀呀？三皮？？？？？？？去馬爾代夫好過啦。有咩好嘢食架？咁貴都要自已煮？你去埋我果份囉。返到來話我知好唔好玩啦。

出發前和返來後都比人問左幾十條關於聖誕島的問題，我嘗試精簡啲答吓先啦。

聖誕島之迷(1) – 聖誕島响邊鼠黎架？

聖誕島位於亞洲板塊上，印度洋上一個澳洲海外屬土，距離爪哇唔夠400km，島上用澳元。從吉隆坡飛去只需 2.5hr，從印尼Jakarta飛去只需幾個字，但這條航線已摺埋好耐。

聖誕島之迷(2) – 你去聖誕島？復活島吓wa？點解叫聖誕島Christmas Island呀？

聖誕島係唔同復活島嘅，除了名字和位置都唔同一個响東一個响西之外，仲有就係從香港去復活島貴過去聖誕島好很多。佢名字的起源聽講係三百幾年前最初發現聖誕島(Christmas Island)的英國人 – William Mynors在聖誕節那天發現這小島，就咁佢就幫小島起左「聖誕島」呢個名囉，就係咁簡單。

聖誕島之迷(3) – 聖誕島有幾大呀？

好細啫，由島頭至島尾都唔夠20km，睇張地圖就知啦。呢張嘢賣成AUD$ 5架。

聖誕島之迷(4) – 聖誕島有咩勁嘢睇咁巴乜閉呀？

真係勁囉，全宇宙獨有的「紅蟹大遷徒」lor，十九幾年前太空館都有套戲介紹過，全地球僅此小島可見這奇特生態。紅蟹大遷徒期間，紅蟹們會沿住同一方向，老遠從山頂行十日八日落去海灘，再從海灘返回老家。

聖誕島之迷(5) – 聖誕島D紅蟹有冇分男女架？係咪男女都要舉家一齊大遷徒呀？

有架有架，同我地平時食開D凍花蟹和大閘蟹一樣，雄蟹奄仔尖D，雌蟹奄仔就圓D。

呢隻可憐的雌蟹冇咗隻手

呢隻係雄蟹

聖誕島之迷(6) – 聖誕島D紅蟹儍架咩？做乜要咁辛苦大遷徒？為揾嘢食嗎？

NO NO NO . . . . . 佢地唔儍，又唔係為揾嘢食，佢地咁辛苦大遷徒係因為佢地. . . . . . . 咸濕lor，同埋佢地有社會責任，要傳宗接代lor。

聖誕島之迷(7) – 聖誕島D紅蟹山長水遠行去海灘度咸濕仲唔係儍？好似人咁樣屋企度咸濕咪好lor？

唉. . . . 耐唔中都有人响海灘度咸濕比人周到仲上埋網啦，人都鐘意呢味嘢，何放係紅蟹？而且，佢地去海灘唔單止為咸濕，咸完濕雌蟹們還會留在海灘，等待下一個“The last quarter moon”之夜，潮水最高之時產卵，完成傳宗接代的使命。

聖誕島之迷(8) – 聖誕島D紅蟹點解會識路行去海灘嘅？佢地幾時開始行架？

前面條係好問題，但我問過島上啲地胆都答唔出. . . . . 後面條我知，由每年雨季第一場大雨開始行，落大雨就行快D，冇雨水就行慢些，所以通常會响雨季至去睇大遷徒。可借今年天氣反常地乾旱，11月尾才出現第一場大雨，之後又天天天晴，令大遷徒時間延後了。

聖誕島之迷(9) – 聖誕島D紅蟹成日要過馬路咪好危險？有冇交通燈架？D紅蟹識唔識睇燈架？車親蟹仔要唔要坐監架？

話時話，我記憶中响聖誕島玩了8日都冇見過交通燈，但見到D蟹仔過馬路真係好危險，佢地唔識睇車，好多賤精司機又完全唔理D蟹仔，我耐唔中聽到“Block Block”聲都好心痛，真想舉報那些賤精司機，他們包括很多賤鬼佬。車親蟹仔又唔冼坐監咁嚴重，不過最高罰款AUD$ 5500。

呢個賤精司機見我舉機影佢至即刻收油避蟹仔，唔係又死一兩隻了。

聖誕島之迷(10) – 乜聖誕島D紅蟹咁麻煩要等大雨至肯大遷徒，又定唔實幾時至落大雨，我地咪好難見到千軍萬蟹的大遷徒？好心佢地勤力D啦，出太陽都行得啫？

唉. . . . .哥仔，世界級自然奇觀喎，梗係難見到啦。你都儍嘅，叫你出猛太陽行十幾日山至比少少水你飲你都唔制啦，不過有D紅蟹真係好似你咁蠢，在列日下逞强繼續行，攪到未到海灘已乾死途中，慘慘. . . . . .

聖誕島之迷(11) – 聖誕島咁多紅蟹，你有冇捉返隻嘆吓先？好唔好味架？冇，信你至奇。佢地食乜架？同埋. . . . . . 島民唔食佢地架咩？

真係冇捉黎食呀，點知好唔好味喎，信唔信由得你。聽講，當地的人是不會吃紅蟹的，因為紅蟹肉有種枯葉的臭味，同埋以前曾試過有居民吃過紅蟹就一直不舒服(我估可能食物敏感啫)。而且當地政府極度保護紅蟹，唔準人食。

紅蟹一般會食植物，呢隻食緊塊新鮮嘅樹葉。

紅蟹亦會食死了的同類，經常見佢地食死在馬路上的同類。

聖誕島之迷(12) – 聖誕島有幾多隻紅蟹呀？政府有冇生育管制呀？一路多落去又唔準人食，咪食清島上的植物？

今年最Update估計有4500萬隻，但數量冇一路增加，而且比高峰時減少了一半以上，因為十幾年前有一種外來種的螞蟻 – 黃瘋蟻(Yellow Crazy Ant)隨貨船移民到聖誕島，黃瘋蟻會分泌蟻酸攻擊紅蟹的眼睛，紅蟹眼睛被弄瞎後就只能任螞蟻擺佈，黃瘋蟻同時亦會攻擊幼紅蟹，估計因黃瘋蟻的出現而令紅蟹的數量大減。

聖誕島之迷(13) – 你又話當地政府極度保護紅蟹？啲車又成日車死蟹？係咪真係有人被罰款先？

鬼知咩，我去咗幾日咋，乜都問。不過紅蟹大遷徒時，政府便會封路，當地有大型告示牌，顯示那段路是因紅蟹封閉，在大遷徒最高峰期間，差不多全部道路也會封閉的。

聖誕島之迷(14) – 去聖誕島剩係睇紅蟹？仲有冇其牠蟹睇？

有有有，今次在聖誕島見到都有五種蟹，這隻叫 藍蟹(Blue Crab)，唔會大遷徒，只生活於樹林內，數量遠遠不及紅蟹。

這隻叫 椰子蟹(Robber Crab)，當地人又叫佢做 山蝦，估計島上有100萬隻。佢哋最大有成百歲，一般都有成70~80歲，呢隻起碼都四、五張嘢了。

聖誕島之迷(15) – 椰子蟹最大有幾大隻架？我上次去沖繩見到賣好貴架喎，聽講仲好鮮甜添，你有冇捉隻食呀？正唔正呢？有成100萬隻，你日日捉一隻？

一般見到都有小太陽咁大隻架。其他問題. . . . . . 曉. . . . . 你話呢。

聖誕島之迷(16) – 椰子蟹點解叫椰子蟹呀？係咪真係食椰子架？英文又點解叫Robber Crab唔叫Coconut Crab呀？

Yes，椰子蟹真係食椰子架，可能因為咁所以叫佢哋做椰子蟹啦。至於英文名，你不如問返你個英文先生啦。

聖誕島之迷(17) – 喂喂，我對D蟹興趣普通咋，聖誕島有冇其牠嘢睇呀？

可以令我唔駁紅假請足五日大假至去得10日，仲要用接近三皮嘢，食得差住得只係普通，當然有好多好嘢睇啦。聖誕島共有海、陸、空三寶，陸上D蟹講到悶了，講講空中之寶 – 大鳥啦。

聖誕島的大鳥多到嚇死你，出海時小心比佢哋撞到呀。

聖誕島之迷(18) – 唓！普通海鳥啫，有冇咩特別品種呀？

有，呢隻係聖誕島獨一無二的品種，金黃色的Golden Bosunbird。

聖誕島之迷(19) – 唓！見到金色雀仔好叻咩，仲有冇多D先？

有呀，睇住多兩隻先，呢隻係 水果蝙蝠(Fruit Bat)，佢食水果大架，唔吸血的。

呢隻係Brown Booby

聖誕島之迷(20) – 聖誕島的海中之寶又係乜喔？鯨鯊？唓！我有個Fan去過聖誕島潛水，佢話聖誕島的海底水係夠清，鯊魚海豚都見到，但就冇見鯨鯊囉。

唉. . . . 你個Fan見唔到唔代表冇架，佢黑仔啫。我潛了5日水，4日都遇到鯨鯊，由5~15m長不等，有次仲係零距離同佢玩了十幾分鐘添，啲相全部我影架。

聖誕島之迷(21) – 聖誕島的海中只有鯨鯊啫？冇其他啦嘛？

喂，呢位弟兄要求都算好高喎；好，話多樣你知，嘅然神創造得聖誕島這大自然寶藏，聖誕島的海中當然唔只得鯨鯊，佢仲有 ------- 鯊魚，仲係一樣同佢地零距離。

呢條鯊魚向我迎面遊來，在我肚下面遊過，條魚翅差一點點就掂到我個肚，係剌激，不過好驚架。

聖誕島之迷(22) – 你講到聖誕島正成咁，我聽人講又話想去要一年前Book定，係咪好多遊客好Full架？

又唔係喎，遊客少得可憐。以前印尼去聖誕島的航線已摺埋，現在只有每星期一班機從吉隆坡飛去和每星期三班機從澳洲柏斯飛去，主要都係島上千幾個居民幫襯。就我所見，我從吉隆坡飛去時隻機只有廿幾個客，遊客不足10人。聽講近年每年到聖誕島的遊客只有500人。

從吉隆坡起飛後看看隻機，冇乜人咋，我第二次搭這麽少客的飛機，第一次係十幾年前由冰島飛去格凌籣。

聖誕島之迷(23) – 你講到聖誕島正成咁又少遊客，果度咪世外桃園一樣，靚過馬爾代夫？

又唔係喎，聖誕島係唔靚嘅，而且海灘仲有垃圾，D沙又粗，你睇下面個Look覺唔覺佢靚先？實景來的。

聖誕島之迷(24) – 嘩！見到有座勁樣衰的工廠物體，乜泥架？好樣衰啫，影衰晒個島，拆左佢咪好囉。

拆左佢D島民食風咩？呢座嘢大過你同我加埋呀，佢係開採島上 磷酸鹽(Phosphate)的工廠，係小島的經濟命脈，加上你地D人又唔肯去聖誕島玩，攪到更加唔可以拆左佢，可惜可惜。

聖誕島之迷(25) – 咁少人去聖誕島，佢個機場咪超細？出入如無人之境？

機場係超細，但入境時廿幾個客開三個Counter都攪足20min至入到境，唔係因為Check得嚴，而係因為D職員掛住同D入境中的居民吹水，浪費時間頂住後面。

聖誕島之迷(26) – 你去10日都要用接近三皮嘢，住咩好嘢先？

住？呢間The Sunset的2/F海景房囉，雙人淨房每晚AUD$ 160。

聖誕島之迷(27) – 我想住好D呀，有冇大型Resort呀？

大型Resort？有，呢間Christmas Island Resort啦。呢間Resort在1997金融風瀑時摺左，在2010年才重開，但網上評分甚差。

聖誕島之迷(28) – 聖誕島有冇超級市場架?

只有這一間，星期一至五只開朝九晚五，星期六只開早上和星期日休息。其他時間想買嘢要上半山區華人開的辧館。

聖誕島之迷(29) – 聖誕島咁少遊客，有冇旅遊局架？

有架，呢間就係啦，職員仲好Helpful添。

聖誕島之迷(30) – 聖誕島得千幾個居民，有冇警察架？

有，仲有警局添，但聽島民講話聖誕島係零罪案的，D警察冇嘢做日日响警局入面睇DVD。

聖誕島之迷(31) – 咁聖誕島有冇銀行架？

唔知呢，但真係唔覺有lor，返而Court同郵局都有。冇換定澳元去到都唔知點算。

聖誕島的法庭。

聖誕島的郵局，寄張Postcard返香港要AUD $1.65。

聖誕島之迷(32) – 聖誕島有冇學校架？

有一間位於Drumsite，學校附近係觀看 紅蟹大遷徒的熱門地點。

聖誕島之迷(33) – 我想去聖誕島潛水，島上有邊間潛水店好呀？

現在島上只剩下這一間潛水店Wet ‘n’ Dry Adventures，冇得你揀。

這間係另一間潛水店Christmas Island Divers，早幾年“U乜加仙” 記者幫襯過，但現在都摺埋了。

聖誕島之迷(34) – 聖誕島有咩好嘢食先？貴唔貴架？

講價錢先啦，在茶記食一碟普通到極的炒牛河要AUD$ 13，我就覺得OK啦，食完之後啲肉未有刺痛的感覺。

講真，要食好嘢就咪去聖誕島了，响呢度多數自已煮丁麵加罐頭。下面呢間係我試過最好味的西餐廳了，炸魚薯條AUD$ 30。

聖誕島之迷(35) – 聖誕島內有咩交通架？我聽人講話島內只有一部的士，有巴士站但從未見過有巴士，所以一要租車，冇車牌就唔可以去了，因為邊處都去唔到，只可以租單車去Town附近的地方，冇乜意思又冇乜好玩，係咪真架？

唉唉唉. . . . . . . 你聽乜水講架，錯得好離譜啫，佢有冇去過聖誕島架？亂咁吹。等我講出今時今日的情況先啦。

i) 聖誕島內確係有部Island Taxi，Christmas Island Tourism Association的網頁都話有，但我去之前e-mail比Tourism Association話想Book車，佢哋答我Island Taxi已經摺埋了。

ii) 聖誕島內真係有巴士站，仲真係有巴士添，每日4班車來往The Settlement – Flying Fish Cove (Beach) – Poon Saan(半山) – Drumsite(The School)，單程每位AUD$ 2，我坐過一次。

iii) 我都想租單車，以前亦真係有單車租，但Tourism Association話依家又摺埋了。

iv) 有車代步當然Good啦，但冇又未致於唔去得聖誕島嘅。好似我咁冇車牌咪一樣玩得幾開心見到晒要見嘅好嘢，Join幾Tour加自已行多幾粒鐘咪得囉。

聖誕島之迷(36) – 聖誕島屬澳洲，果度係咪住晒老外，去果度係咪要講英文架？

唔係喎，果度超過一半係華人，識講廣東話架，正。其餘三成係馬拉人，澳洲人只有二成。

你睇幾多中文，仲有觀音廟添。

聖誕島之迷(37) – 聖誕島居民係咪全部住平房架?

唔係喎，呢D類似公屋物體係馬拉人住的，位於Flying Fish Cove，向海。

聖誕島之迷(38) – 聖誕島居民的生活係咪好Dry，冇乜娛樂架？

對呀，Dry到爆，島上只有一個露天戲院，位於半山，每星期六晚播一套戲，每位AUD$ 5。

其餘時間佢地會釣吓魚，吹吓水又一Day。

聖誕島之迷(39) – 聖誕島釣唔釣到大魚架？

大到冇朋友呀弟兄。

聖誕島之迷(40) – 聖誕島的居民係咪都好客熱情呢？

一DD啦，華人最熱情，可能大家都講廣東話啦，馬拉人都好肯幫助遊客，我截過幾次順風車，全部肯載我的都係華人和馬拉人，老外唔係Fing頭就係咋睇我晤到，差D。

其中一晚截順風車仲遇到個熱情爆燈的華人阿姨，我們上車後佢立即夜媽媽車我們四圍去，一路車一路介紹聖誕島，這是觀音廟、這是Tai Jin House、這是開採Phosphate的工廠、這是墳場……..又帶我哋去到一處四野無人伸手不見五指的海邊開椰子，睇椰子蟹，又話帶我地去Casino(我知1997年後Casino已摺埋左)，但小太熊話太夜眼瞓唔去了。

阿姨夜媽媽帶我哋去開椰子，在車頭燈光下像冇頭鬼一樣，實在太驚嚇。

一個充滿奇遇的聖誕島假期。

---待續---