聖誕快樂Merry • Christmas Island(2) – 聖誕島奇幻旅程

聖誕島上住了一百萬隻椰子蟹，佢哋最喜歡食椰子。

遠在香港西南方4000km外的印度洋上，有一個名叫 聖誕島(Christmas Island)的奇異小島，島上除了二千多位島民之外，也住了大約1,000,000隻椰子蟹，牠們能用鉗子弄破椰子的外殼然後吃其果肉，最老可以超過100歲，一般都有成70~80歲。椰子蟹雖熊遍佈島上，總有一隻在附近，而且肉厚鮮甜，在沖繩和斐濟等地的售價高昂，但當地人不會食用椰子蟹，因為椰子蟹很喜歡以動物的腐屍作糧食，當地人認為是不潔的，加上政府保護，使得椰子蟹能在這小島大量存活。

聖誕快樂Merry•Christmas Island – Day 1

放工後去香港機場The Traveler’s Lounge食免費自助餐，然後乘Air Asia夜機20:50從香港飛吉隆坡，今次隻機準時起飛呀。

The Traveler’s Lounge的魚蛋粉味道唔錯

聖誕快樂Merry•Christmas Island – Day 2

<<吉隆坡>>

00:45到達吉隆坡LCCT機場，Book了機場附近的酒店The YouniQ Hotel，酒店有專車接送機場，每位每程收RM 5，抵坐過的士。

吉隆坡機場附近的酒店The YouniQ Hotel

雙人房(不包早餐)每晚HK$300 – 雖然冇窗但都算乾淨舒服，價錢合理。

瞓4粒鐘又要起身了，坐酒店車去KLIA機場。

有張Priority Pass真好，去到咩機場都有免費餐食，今次去吉隆坡KLIA機場的 Plaza Premium Lounge。

地方大人亦唔多，早餐質素就中下啦。

<<聖誕島>>

09:00乘馬航專機往聖誕島，只飛2.5hr，但來回票價每人要S$ 920，因為隻機只有唔夠兩成客。

見到聖誕島的半山區(Poon Saan)了

準時10:30到埗落機

入境處開了 3個Counter招呼廿幾個客，但都攪足20min至入到境，因為啲官好Hea架，仲掛住同街坊們吹水。

出發前通知了當地唯一的澳洲導遊Lisa我們的到埗時間，約了她車我們去酒店。步出機場後，以為Lisa會自動出現，點知影都冇，要靠啲街坊call佢至即刻飛過來，等左佢幾個字。

從機場路過這超市，Lisa停車比我哋入返啲糧食先。

買啲罐頭買啲酒水，預備未來幾日的早晚餐。

到今次住的酒店The Sunset了，住足 7晚，位於The Settlement的角落Rocky Point，後面就係潛水店Wet ‘n’ Dry Adventures，隔離有餐廳和酒吧，行去超級市場約10min，是冇車一族的最佳選擇。

酒店The Sunset – 2/F向海的4間房唔錯，地下的就差好多囉，但價錢差不多。我們住2/F最右邊的大露台房，日落海景好靚架。

雙人海景房Superior Ocean View Room(不包早餐)每晚AUD$ 160。

間房夠大又幾乾淨，冷氣亦夠力。

浴室廁所都唔細，熱水和水力都好夠。

這間房有特大單邊露台，係全酒店最好的一間房，但只比樓下貴AUD$ 20。

酒店有個小泳池和BBQ爐

The Sunset後面係另一老牌酒店 – VQ3 Lodge

The Sunset隔離有另一間酒店(只有一間房) – Captain's Last Resort，淨房每晚AUD$ 160，有獨立廚房，下次再來可能會住呢間。

放低行李，小太熊就話肚餓要食飯，我又冇車，只有沿馬路Gaze Road行返出超巿附近食。

沿路只有少量平房，都冇乜人行，又見到幾間廢屋。

觀音廟都有一間

行了10min到超市對面的 華人公館食飯，呢間嘢只做午市。

對住個海食，環境OK啦。

干炒牛肉粿條(AUD$ 13) – 勁大碟味道都可以。

冬陰米粉(AUD$ 12) – 夠酸夠辣，唔錯。

食完飯繼續向前行，經過全島唯一的迴旋處。

位於迴旋處的廣告板

再向前行就係Flying Fish Cove

Flying Fish Cove只係個沙又粗廢物又多的海灘，仲望正間鹽礦廠，唔靚。不過話呢度都會有好多紅蟹，只係今日未行到落泥囉。

Flying Fish Cove的碼頭，常常有來自四方的難民上落，賣相甚差，見到都想嘔。

雖然有好多海鳥，但我真係唔覺呢度靚囉。

Flying Fish Cove旁邊全是呢類似公屋的物體，住的清一色係馬拉人。

雖然呢度唔靚，但一場來到，都落海邊行吓啦。

呢種蟹叫Grapsus Crab，彈跳力好强，成日見佢地响岩石上跳來跳去，好得意。

見到 紅蟹(Red Crab)了，因為今日天氣熱，蟹仔們都在陰涼之處休息呀，但….. 數量這麽少，比想像中少好多呀，乜12月唔係紅蟹大遷徒高峰期麽?

唔係太多蟹仔，有些失望。繼續向前行，行到另一地標Tai Jin House，即係聖誕島行政長官的屋企。

Tai Jin House隔離有些二次大戰的遺跡。

行到五點幾返到迴旋處，想話上半山食飯加睇戲，Lisa話聖誕島的居民都好Nice，截順風車好易喎，唔駛吓吓幫襯佢咁貴。免費嘢，我當然要試啦。我們站在路口，面皮薄的小太熊怕食檸檬唔肯幫手，我只好單支出去截車囉，估唔到截第一架就停車，仲要講廣東話添，太順利了！！好人司機唔單止載我們，佢仲話紅蟹近日已開始遷徒，在Drumsite的學校隔離條Murray Road晨早會見到成條路紅晒，非常壯觀。

話咁快就上到半山，如果行路要上斜半粒鐘都好金，而且條路又斜多彎及不設行人路，很危險。

半山住的大部份係華人，九成懂廣東話。

半山有一間華人開的超市，營業時間較長。

聖誕雞，成晚叫過不停。

半山只有兩間中菜館，今晚食這間Lucky Ho Restaurant。

黑椒炒蝦球(AUD$ 25) – 味道幾好，不過得8隻蝦，好細碟，勁貴。

辣炒魚片(AUD$ 20) – 同上面那味的評價一樣。

食飯時聽伙記講，近兩朝因為有大雨，學校附近勁多蟹，叫我哋快啲去睇喎，小太熊決定食完飯即刻行去睇蟹，放棄睇戲。

由Lucky Ho Restaurant行去學校要25min，途經這路牌。

行行吓，特然在馬路上見到好大隻椰子蟹呀. . . . . .

天灰行到天黑，入黑後蟹仔開始休息，但都見唔少蟹向着同一方向大遷徒，好睇呀。

紅蟹羣中又見一隻藍色的細椰子蟹

睇了半個鐘，勁多蚊，蟹仔又開始休息，於是行回頭路返去。

今晚冇乜人睇戲

行到斜路口我又截順風車，今次冇咁順利了，截了 3架老外車都唔肯停，第4架馬拉朋友至肯載我們，都好快截到車吖，兩個人今晚共慳了AUD$ 50車錢。

明天一早開始潛水了，真開心。

補充資料 :

1.        從吉隆坡LCCT機場去The YouniQ Hotel要 15min車，酒店可安排專車接送KLIA或LCCT機場，每位每程收RM 5，抵坐過的士。

2.        Air Asia所有吉隆坡航機都在LCCT機場昇降，其餘大部份航空公司國際機都用KLIA機場。

3.        RM 1兌HK$2.54，AUD$ 1兌HK$ 8.07。

4.        馬航逢星期六有一班機從吉隆坡來回聖延島，票價每位S$ 920，航程飛2.5hr。

5.        在聖延島唔識揸車都幾唔方便，因為島上的士已摺埋，巴士有等於冇，唯一方法係聯絡島上唯一的Travel Agent – Ms Lisa Preston (lisa.preston26@gmail.com)安排交通。

6.        從聖延島機場到市中心The Settlement約15min車，Lisa收費每位AUD$ 60 (2位起)，包機場來回市中心接送。Lisa服務一流，只係耐唔中遲吓到。

7.        到聖延島要換定足夠澳元，因為我未見過島上有找換店和銀行。

8.        由The Settlement上半山只有一條2km的行車路連接，天黑後禁止行人。如要往返兩地又冇車，只有截順風車或幫襯Lisa，來回The Settlement和半山接送每位AUD$ 25(2位起)。順風車都算易截。

9.        住了8日，見過最多紅蟹過馬路的地方係Drumsite的學校附近條Murray Road。

10.    半山看電影AUD$ 5入場，不過好多Local人唔買飛坐响外圍睇。

---待續---