日本 關西(6) – 極品の牛 神户牛

極品の牛 神户牛西冷 – 肉質鮮嫩，牛味香濃，油香充足，是人間最完美的食品。

飄櫻幻景•温泉醉鄉 日本關西 – Day 6

<<京都>>

今朝07:30起身，check-out後居然見太陽和藍天呀。即刻行過隔離的円山公園攖花樹王影張相先。

円山公園 陽光下的攖花樹王

從円山公園行約20min，便到 櫻花鐵路。櫻花鐵路兩旁種滿攖花樹，而且開始落櫻了，每當有風吹過櫻花便如飄雪一樣地散落，如仙景一般，可惜陽光只見一會便消决了，又變回陰天。

京都 櫻花鐵路

有人在飄櫻幻景下影結緍相呀。

沿路繼續行到 哲學之路，其實都幾流，早知唔去了。

哲學之路 – 沿途見攖花樹和小河。

沿哲學之路行到 銀閣寺，賞完櫻，坐巴士No.203返酒店，攞返行李行去坐火車到神户。

揹住行李沿白川河到 京都河原盯駅，沿路都係櫻花靚景。

又見女生扮藝妓了，都幾神似。

離開京都最後一段路，都比我再遇到 飄櫻幻景。

<<神户>>

在京都河原盯駅乘 阪急電鐵(特急)，12:15便到 神户三宮駅。從三宮駅行5min，到了今個假期的重點節目 – 神户牛午餐。

神户牛名店 ビフテキのカワムラ(Beef Steak Kawamura)

餐店是樓上鋪，估唔到食午餐都等了20min。

清酒(￥735)

今日做大豪客，和小太熊每人點了一份￥9240的神户牛午餐，每人有5片神户牛刺身和110g神户牛西泠，好滿足的一餐。

頭盤 極品火炙神户牛刺身 – 話佢神級美味真係完全冇誇大，完美的一片牛刺身，那種刺激全身細胞的味覺感受，未試過真係好難明白，值得專程由香港飛過來食。

牛尾湯 – 質素甚高的清湯，我連所有湯渣都清晒。

雜菜沙律 – 新鮮爽口

食完頭三味，師傅開始燒紅塊鐵板，炒雜菜。

然後再把二人份量共220g的 神户牛西泠放在我面前，只見塊扒係中間靚位，切去了周邊的肥膏，220g很足料啊！

師傅開始煎牛了，好想食呀。。。

睇住件牛慢慢被煎熟，特然覺得做人其實真係幾有福氣。

師傅完成了，放在眼前就係我到現時食過最好味的牛肉。

牛の極品‧神户牛西冷 – 肉質鮮嫩，牛味香濃，油香充足，是人間最完美的食品，亦係我到現時食過最好味的牛肉。配上日本清酒，更加把牛味和牛油香發揮至極限，好食到不能形容。。。。。實在唔捨得一口一件，呢件牛我分了兩啖細味品嘗。

白飯 – 有飯香又有咬口，剩食都OK。

椰子雪糕 – 好好味道

咖啡就普通少少，但都唔差架。

食完完美午餐，在神户三宮乘地鐵到 谷上，再轉有馬線到 有馬溫泉駅。有馬溫泉最出名就係 金湯和銀湯，區內很少旅店同時供應兩種溫泉，但旅店 竹取亭円山就例外。

神户電鐵有馬線

<<有馬>>

有馬溫泉駅，從這裡向上步行15min便到今晚的旅店 – 竹取亭円山。

今晚住的旅店 – 竹取亭円山

Welcome小食有炭酸燒餅，味道幾好的。

竹取亭円山大堂上放滿了 竹林小公主，小太熊見到又話要做一日 竹林小公主啊，當然冇問題啦。

要做小公主，首先揀一套浴衣，有幾十款任揀。

跟住大堂職員便用 人力車載小太熊穿過這走廊，然後乘Lift直達4/F房間。

小太熊今次又訂了好嘢，全間 竹取亭円山只有一間房有提供私人金湯泉水，佢就係位處4/F的「月見の間」，仲未夠，小太熊再每人加多￥8000，將今晚的普通懷石料理upgrade做 神户牛懷石料理(每人150g)，真係抵錫。

竹取亭円山「月見の間」每晚￥84000，包雙人神户牛懷石料理晚飯、早餐和45min私人金銀湯露天風呂。

「月見の間」金湯露天風呂

Welcome鮮果碟

第一時間試試 竹取亭円山的公共温泉，話就話公共，其實得我一支公。

金湯温泉浴場 – 金湯含極高金屬離子，離開地底遇到空氣便立即氧化變成鐵銹顏色，浸完上水如果唔立即沖身，好快就會周身痕。

銀湯温泉浴場 – 銀湯天然帶有少許漂白水味，很奇怪的天然成份。

浸完温泉，到2/F妃の湯旁的休息室嘆按摩椅。

好快又天黑了，大堂都幾舒服，冇乜人。

又到開飯時間，很期待今晚的 神户牛懷石料理。

餐前酒 草莓甜酒 – 酸酸甜甜，很醒胃又好味。

頭盤三拚 冷八爪魚、熟蛋卷和燒魚 – 味道不過不失

熱湯 蝦丸清湯 – 普通日式清湯一碗

刺身拚盤 中拖羅、油金魚、鯛魚、魷魚和牧丹蝦 – 只係中上貨式，有啲失望。

主菜 鵝肝加150g神户牛西冷 – 單看賣相已心裡一寒，同中午食的那件有段距離。

燒熟後試一口，鵝肝就好得，但件牛就令人失望，只係二流貨式，在日本是但行入間燒肉店用三分一價錢都靚過呢件，實在呃錢。不過實話實說，件牛唔差的，只係太貴和我太高期望。

食埋白飯三寶，想唔飽都難。

日本水果 – 好清甜新鮮

食飽飯著住對木拖，行返落火車站附近行夜街，但原來 有馬係冇夜街行架，完全冇人，像鬼城一樣，小太熊又一邊行一邊媽义我，話我好揾啲咁嘢玩喎。。。。危險架。。。。。比人老笠點算喔。。。。命都冇呀。。。。啲錢未洗晒，冇咗條命幾唔抵呢。。。。你話係咪吖。。。。你有冇聽我講嘢架。。。。做乜冇返應架。。。。被小太熊邊媽邊行覺得條街其實又唔係太靜太可怕。

好快行到神社 天神泉源

返到酒店房，當然要享受吓 有馬獨有的 金湯温泉啦。

補充資料 :

1.        乘巴士No.203由銀閣寺返知恩院和順會館，車費￥220，班次都幾密。

2.        乘阪急電鐵(特急)由京都河原町駅去 神户三宮駅，車費￥600，車程約70min，每10min一班車，需在大阪附近的 十三駅轉車。

3.        在神户三宮去 有馬，最快可乘地鐵到 谷上，再轉有馬線到 有馬溫泉駅，車費￥900，車程約40min。

---待續---