日本 關西(5) – 櫻雪古都 京都

日本京都 – 櫻花樹下的文化遺產 清水寺

飄櫻幻景•温泉醉鄉 日本關西 – Day 5

<<大阪>>

今朝07:30a.m.起身，check-out後揹埋行李，再去一次 大阪城。先坐地鐵(￥200)由 心齋橋去 谷町四丁目，把大行李Lock在地鐵站(￥300)，出地鐵站行5分鍾便到 大阪城公園。

大阪城公園 護城河

櫻花非常茂盛，但早幾日已開滿，今日開始落花了。

櫻花 大阪城

大阪城公園見到的櫻花是這次行程最靚最盛放的，比京都更美。

<<京都>>

賞完花，乘地鐵到 梅田，轉乘阪急電鐵去 京都河原盯站。11:30到京都河原町站，一到京都，即時落出雨，仲越來越大，直至深夜，認真掃興。出站後先順路去食嘢，因為今朝未正式食早餐架。今次揀了間京都Number One的炭燒鰻魚老店，貴嘢來的，啲書話好好味喎。

炭燒鰻魚專門店 – 松乃

一進大門便見師傅起勢燒燒燒，只獨沽一味燒鰻魚。

清酒(￥580)

燒鰻魚飯(梅丼)(￥2750) – 只有剛好一個人的份量，但又真係幾鬼好味，雖然好貴。如果香港都有得食，我一定再幫襯。

食飽後沿白川河向旅店方向行，沿途又賞吓櫻啦。不過毛毛雨下都好唔方便。

在円山公園旁的酒店「和順會館」放低行李後，正式開始京都一日遊。先遊 円山公園。

円山公園 櫻花樹王

円山公園 – 今日都仲算係櫻花盛放，好多本地人都來賞櫻。

行完円山公園，沿清水寺方向走，路上都係盛放的櫻花。

京都 高台寺

街上唔少女生穿上和服，但佢地只係遊客咋。

仲有人扮藝妓添呀，一定係假架啦，邊有藝妓會隨街比人影相架。

按行程行到 三年坂的360年豆腐老店 – 奧丹，四年前因為佢裝修食唔到，今日專程再來試吓名震京都的 地下水豆腐。

京都360年豆腐老店 – 奧丹

中午15:00最少人的鍾數，唔駛等位之餘仲坐到園境靚位，Good呀。

兩個人點了一份豆腐套餐和一份甜品，因為都預佢麻麻哋。

一人份豆腐料理(6道菜 – ￥3150)

頭盤 花生醬冷豆腐 – 好香花生醬味，但豆腐味唔濃，質感唔特出，平平無奇。

湯類 凍豆腐湯 – 滑潺潺幾核凸，而且冇乜味，都唔知佢攪邊科。

燒物 串燒豆腐 – 睇賣相都估到咩味啦，咸咸哋的豆腐囉，但唔滑的。

炸物 雜菜天婦羅 – 普通炸菜一碟

主菜 清湯豆腐鍋 – 清水煮埋六件豆腐，九龍城義香賣十雞港紙，佢就賣三千円，味道就義香正啲，不過呢啲豆腐係用京都地下水造，好出名架，而且佢係三百年老店，食名氣都抵啦。。。。。。不過真係只得名氣。

白飯加蘿蔔，清淡的一餐。

自已加甜品 薑汁豆乳布丁(￥420) – 配上京都宇治抹茶蜜，又香又滑又清甜，最好食呢味。

食完奧丹睇埋櫻花，叫做還晒心願，以後唔再唸來京都了。

雨越落越大，繼續沿三年坂行去清水寺。

到清水寺啦，4年前來過一次，今次再來冇晒新鮮感了，櫻花樹亦比想像中少，仲要落雨，失望啊！

櫻花樹下的清水寺

只行了一個鍾便給人清場了，仲以為可以行到晚黑睇埋夜櫻，原來夜晚要再比錢入場架。冇乜好行，沿路返酒店Check-in先，今晚住「知恩院 和順會館」。

知恩院 和順會館

雙人淨房每晚￥22000

休息一陣已天黑了，再出動去賞夜櫻。

円山公園的櫻花樹王，晚上公園內只有這樹王被打了燈。

非常大雨下，再沿三年坂行去清水寺。

清水寺賞夜櫻，入場又收￥400，有些呃錢。

晚黑的清水寺又確係幾靚。

一陣又行完，跟住去「花見小路」。

「花見小路」上真係見好多風塵女子同大企業社長和臭口組組長 we wet呀. . . . 死未

雨中夜遊 白川河

肚餓了，是但行入一間河邊有很多人等位的鐵板燒店 – 祇園たんと(www.gion-tanto.com)，好好味道的，等了15min才有位。

傳统的日式鐵板燒 – 祇園たんと

每人前面都有塊鐵板，邊燒邊食。

熱清酒￥600

雜錦炒烏東(￥1280) – 好好味道，好夠火喉。

牛肉大阪燒餅(￥880) – 又係好嘢，昨晚的大阪燒同佢冇得比。

夜晚在酒店的大浴場沖涼，免費的。

上得床瞓又24:00了，每日都係如比忙碌，明早又早起，去櫻花鐵路賞早櫻。

補充資料 :

1.        乘地鐵由 心齋橋去 谷町四丁目，車費￥200。

2.        谷町四丁目 地鐵內有Locker，收￥300和￥400。

3.        乘地鐵由 谷町四丁去 梅田，車費￥230。

4.        乘 阪急電鐵(特急) 由梅田去 京都河原盯站，車費￥390，車程43min，每10min一班車。

5.        清水寺 日間入場收￥300，17:00清場。夜晚18:30再開始夜場，每位收￥400。

---待續---