自遊 韓國(4) – 向濟州島出發

濟州島神山 – 漢拏山

濟州島是韓國的特別自治道，位於朝鮮半島南方一個小島，首府是位於島內北方的濟州市，濟州市也是島內的交通中樞。濟州島也是韓國人的旅遊天堂，島上景點眾多，分佈島內各處，包括 城山日出峰、西歸浦、偶來小路、漢拏山、神奇之路等等數之不盡。

自遊 韓國 – Day 5

<<濟州>>

今天早上06:00準時到達濟州市碼頭，落船後立即乘的士到濟州市的酒店Ramada Hotel，今次會在這酒店住2晚。因為時間太早酒店未有得check-in，便先放低行李在Reception，今晚玩完回來才攞房。

濟州市Ramada Hotel

濟州島最出名的食物是鮮鮑魚，味道和賣相同青島鮮鮑魚差不多，濟州市內很多鮑魚專門店，可能近年太多大陸團，鮑魚的價錢已很貴了。

酒店對面的鮑魚專門店，24hr營業，在這裡食早餐。

晨早07:30未有客，我們入到舖才開燈，不過立即有位大媽招呼我們。

鮑魚粥(每碗W10000) – 叫了兩碗鮑魚粥做早餐，十分之大碗，每碗用一隻濟州島鮮鮑魚制成，共送6小碟配菜，鮑魚粥底的味道較清淡，但鮑魚肉味很鮮甜。

小太熊出發前在網上Book了個濟州島一日遊的旅行團，每位只需W40000可以玩足一日，包埋自助午餐(價值W10000)及全部門票(價值W29000)，超平。

豪華巴士準時08:30在酒店接我們出發。

第一站 神秘道路 – 那是一條微微斜的道路，最神秘的地方就係反地心吸力，聽說車輛入空波後會自動向上流動，非常之神奇。

神秘道路起點 – 從肉眼看見，道路明顯是從起點開始微微斜向上至終點，但係巴士入空波之後真係向上移動喎。

第二站 綠茶博物館 – 在這裡停留30min，可以參觀戶外茶園和室內的博物館。

綠茶園 – 面積不算大，和斯里蘭卡的大茶園差得遠。

綠茶博物館內的茶室，夠時間坐低食小小嘢。

  熱綠茶(W5000)；綠茶雪糕(W3000) – 味道普通。

第三站 Happy Town – 像馬戲的雜技表演，幾精彩的，鐵球內有7架電單車飛馳。

第四站 小人國 – 像深圳的世界之窗，可以行45min，都幾得意。

行完之後便在園內的餐廳食自助午餐(價值W10000)，有60min可以慢慢食，都唔難食的。

第五站 橙果園 – 濟州島出產的橙在韓國相當有名，又大又甜又好水。

樹上熟濟州橙3個W5000，個個客都買了幾個歎吓，即摘即食。

第六站 天地淵瀑布 – 位於濟州島南部的 西歸浦，是濟州島內的人氣景點。

第七站 西歸浦海岸自費遊船河 – 每小時W15000，可以觀賞海上的岩洞和餵海鷗食蝦條，非常之好玩。

海鷗仲多過瑞士Interlaken，佢哋勁鐘意食蝦條架。

海上的岩洞好像西貢。

最後一站 柱石節埋 – 即係六角柱石地質公園，又係勁似西貢。

巴士回到酒店已經18:00，可以Check in了。

Ramada Hotel雙人房(不包括早餐)每晚HK$530 – 房間只有城市景，海景房貴好多的。

沖完涼之後步行15min到附近的濟州市海鮮街食晚餐。

濟州市海鮮街 – 靜ing ing 鬼影都冇隻，巧得人驚啊，不過間間店都有開門架，樓下揀海鮮，揀完就上樓上食。

油甘魚和鮑魚都係主打，檔檔都有賣。

行吓行吓……走過藍色招牌這間店.....大發現呀。

魚王三刀 – 就係這條約10兩重的 魚王三刀啦，成條海鮮街得一條都比我望到，注定我有食神了。問一問價，W30000一條，即刻成交。

另外揀了4隻螺(W10000) ; 一隻八爪魚(W20000)和一隻約250g的大鮑魚(W15000)，揀完便上樓上坐底。

今餐好豐富喎～

三刀魚刺身(W30000) – 賣相滿分。清蒸三刀魚我食過幾次，魚味香濃油香充足。三刀刺身我第一次食咋，味道新鮮微甜，別有一番風味。

BBQ螺4隻(W10000)；八爪魚剌身(W20000) – 八爪魚啲鬚仲識郁架，入口時啲吸盤仲會吸住條舌頭，好新奇有趣。BBQ螺肉很鮮甜。

大鮑魚刺身(W15000) – 這隻生劏鮑魚刺身正囉，又巨型又鮮甜，肉質比較硬實，但因為天氣太凍，吃了太多生嘢，煑熟食肯定更正。

最後送上三刀魚骨腩湯，熟了的三刀魚仲好食啦，把鮑魚片放在熱湯拖一拖，更加鮮甜味美口感更佳。

行回酒店途中有間M記，因為剛才吃了太多生冷野便入去食返個蝦漢堡暖暖胃，好香蝦味好好食。

明天清早便要起床，行9hr挑戰濟州第一高峰，高1950m的 漢拏山。

---待續-----