自遊 韓國(完) – 再見韓國 釜山 • 濟州島

韓國濟州島 龍頭岩(용두암)

龍頭岩 位於韓國濟州島的濟州市西部海岸，是200萬年前漢拏山火山熔岩冷卻後形成的火成岩，因為形狀似龍頭而得名。龍頭岩是典型的旅遊景點，因此也進駐了很多海女售賣即劏海產。

自遊 韓國 – Day 8

<<濟州>>

昨晚唔見了錢包，今朝心情依然很差，冇乜心機。早上要乘機返釜山市，所以09:00離開酒店，去機場前到旅館旁邊的 濟州島名勝 龍頭岩一遊。

到達 龍頭岩，見到的遊客全是強國團，勁多人，同胞們太利害了。

海女們都進駐了 龍頭岩，不過太早冇乜人食海鮮。

很快便行完，乘的士去機場，轉機回去釜山市。

<<釜山>>

下午回到釜山機場，乘巴士(W6000)去 海雲臺。今日住好啲，位於海雲臺的Paradise Hotel温泉酒店海景房。

海雲臺Paradise Hotel – 位於沙灘旁，行5min便是海雲臺步行街。酒店設有露天溫泉泳池，很適合悠閒假期。

雙人海景房(不包括早餐)每晚HK$1230 – 房間有全海景和大露台，舒服到呢。

間房看到的景觀

忙碌了半日都未食嘢，到下午15:00終於有時間吃飯了，今餐試韓國特色菜----盲鱔。

海雲臺步行街 – 整條街都是地道食店和土產店，很適合遊客揾食濕平，街內有數間盲鱔專門店。

盲鱔專門店 – 門口養了大缸盲鱔很生猛，又見店內有人客，決定幫襯呢間。

這店只有一味菜式，就係 韓式味醬生炒盲鱔，必須每人要一份。

韓式味醬生炒盲鱔(雙人份量W18000) – 老細劏完在盲鱔，撈埋配菜之後便在你面前生炒，炒時那些盲鱔仲會郁郁吓，好變架。

炒吓炒吓，差唔多食得了。

這碟制成品 韓式味醬生炒盲鱔，味道唔錯，比上海炒鱔糊好食，最襯韓國清酒。不過韓國人把內臟放埋落去一齊炒，感覺有點唔衞生。

一啖盲鱔一啖清酒，一流享受啦。

食完盲鱔肉之後，隔籬枱一對韓國朋友用韓文同我吹水，吹吹吓還幫我order了2碗白飯，並叫伙記把白飯加紫菜和剩下的盲鱔汁炒到燶燶哋食，很香口好吃的。

韓國大叔大讚這款炒飯好食，我試過之後覺得又真係好香口好好食。

食完飯乘巴士到 釜山太宗台，黃昏17:30到達太宗台看日落。

太宗台的環保電動火車(W1500)

太宗台燈塔

個個都在這裡等日落

太宗台日落 – 今日多雲，看不到太陽沉落海了。

晚上到釜山市 扎嗄其市場食海鮮。

市場的樓下是街市，買了海鮮後拿到二樓食店代煮，也可做刺身。

海鮮的種類繁多，主打海貝類和魚蝦蟹。

500g松葉蟹(W10000) – 好抵食呀，就要呢隻。

在街市買多一條1.5kg的 油金魚(W15000)，可以做刺身。

㨂完海鮮，檔主便帶我們上樓上2/F掛單的食店坐下。

廚費(W11000) – 包括了大量前菜；可樂(W1000)；韓國清酒(W3000)。

清蒸松葉蟹 – 賣相普通，但比日本吃到的松葉蟹更鮮甜，令人驚喜。

油金魚刺身 – 味道鮮甜肉質微韌，刀功麻麻食到有啲骨，而且太大條，2個人食頂唔順。

酒店房的夜景，看見第一晚的廣安里大橋。

今晚瞓得好舒服。

自遊 韓國 – Day 9(完)

今日冇特別節目，瞓到安樂醒之後去浸溫泉。

酒店的露天温泉和暖水泳池，凍凍哋浸真係舒服。

因為冇早餐食，便早少少到附近搵嘢食，在海灘旁邊發現這間韓牛店，便入去食。

海雲臺沙灘旁的 炭火韓牛店

門口放了韓牛凍櫃

炭燒韓牛肉(W54000) – 牛肉味十分香濃，味道十分好。

另外餐廳送上了一碟 韓式煎蛋卷和 石鍋豆腐湯(共收W6000)；我自己再加了一支 清酒(W3000)。

臨走前行沙灘，很大浪很多海鷗。

因為太凍了，要入Coffee Shop飲杯熱咖啡(每杯W5000)。

最後乘巴士(W6000)去機場，在機場候機室坐一陣。

這次韓國旅程相當精彩，去了佛寺禪修，冰天雪地行漢拏山，食了韓牛、極黑豬、三刀刺身、鮑魚刺身、松葉蟹，節目豐富。遇到的所有韓國人也很友善。下次一定再來……….

 

 

 

 

-----自遊 韓國(完)-----