自遊 韓國(1) – 慶州禪修 釜山行

韓國釜山 廣安里海鮮街

2009年農曆新年假期，小太陽去了韓國釜山及濟州島禪修緞練9天。因為港龍機票去釜山連稅都只是HK3,200，韓圜 W170兌HK $1，好抵，駛錢好放好開心。今次係第二次去韓國，對上一次已經差不多10年前，街上依然係只見韓文，只有極少量英文字，中文字更加完全唔見，都去得比較困難啊。

自遊 韓國 – Day 1

今日乘中午機，上機之前在機場Plaza Permium Lounge食免費午餐。

<<釜山>>

中午機直飛去韓國釜山機場，到埗已天黑了，氣溫只有0°C，好凍。乘的士從機場到廣安里的Homers Hotel(On99上了架貴啲嘅優質的士，咪錶W30000)。

韓國釜山 廣安里Homers Hotel – 酒店面向廣安里沙灘和大橋，鄰近廣安里海鮮街，但步行到地鐵站要15分鐘。

雙人海景淨房(HK$850) – 可望到廣安里大橋，酒店內有韓式三溫暖浴場。

放低行李，第一時間先到廣安里刺身街食餐勁先。

落樓下就望見 廣安里大橋，好似小型的青馬大橋。

沿着沙灘行了一陣20:00行到海鮮街，人客稀少，每當行過海鮮檔，每一檔都有大媽落力向我狂Sell，佢哋完全冇生意都好慘呀。

廣安里海鮮街

每檔賣的東西也是大同小異，最多係鮑魚、海螺和平目魚。

廣安里魚市場 – 入到魚市場內，人客依然稀少，內裡全是韓婦在工作，啲男人唔知死晒去邊呢，佢哋好勤力地sell我幫襯，問了幾檔，價錢大至相近，於是便幫襯最後問的一檔。

在地下魚市場買了海鮮後，檔主便帶我到樓上6/F掛了單的餐廳，然後坐低等食。

生劏平目魚刺身(街市價W16000) – 這平目魚是養殖魚，味道鮮甜偏淡，魚肉輕微韌韌哋，所以要薄切。

生劏海蔘刺身(街市阿姐免費送) – 口感較硬實，帶點海水味，嘛嘛哋。

2隻鮑魚刺身(每隻約200g) (街市價W20000) – 味道鮮甜，像脆身的螺肉，口感硬硬實實，灼熟佢會好味好多。

餐廳另收了廚費(W8000)、一窩熱湯灼熟剩下的平目魚骨腩(W9000)、一支清河(W3000)加一支可樂(W1000)。

平目魚骨腩湯 – 食完凍冰冰刺身，喝一些熱湯真係非常之舒服。把生鮑魚片放在湯裏拖一拖才吃，更加鮮甜好食好多喎。

食完回酒店的韓式三溫暖浴場沖涼，捱完凍之後浸一浸，舒服到難以形容。

自遊 韓國 – Day 2

今朝天氣唔錯呀，一早起床間房都好舒服。

出發前打長途電話訂了明晚去濟州島的船票，今朝晨早乘地鐵去釜山碼頭出票先。地鐵站內全部韓文好難搭呀。

原來船公司今日冇船出，所以櫃位今日唔開，要起航之前幾個鐘才可以出票，白行一躺添，於是到附近的商場搵早餐食。

樂天漢堡 – 第一次食呢間，雞同鴨講又溝通到喎，小太熊就乜都唔理坐低等食。

韓牛漢堡餐加蝦漢堡(W11000) – 非常美味，韓牛漢堡的牛肉Juice味道濃郁，蝦漢堡很有蝦味，對韓國的漢堡包十分驚喜。

乘地鐵回酒店攞返行李之後，轉的士去海雲台火車站買火車票去慶州。

釜山市海雲台火車站 – 買到下一班往慶州的火車，車程由12:35至14:00，票價W5500。

要一個鐘之後才有車，於是到附近商場的餅店食些蛋糕。

粟子蛋糕和麵包都好普通，咖啡亦係一般。

往慶州的火車準時到了。

<<慶州>>

火車準時到達慶州火車站。

慶州火車站外便是巴士站，轉乘巴士(W1500)到市外一間武寺「骨窟寺」，今晚會在寺內瞓一晚，進行禪修、靜心修身及上一堂1.5小時的「禪武道」(W40000包了寺內3餐、一晚住宿和所有活動。)

15:00落了巴士，看見路口有檔賣，便進內吃今年最後一餐肉。

辣肉泡菜餃子10隻(W3000) – 今年最後一餐肉，感覺特別好味。

食完餃子便揹上大背囊沿一條斜路往山上行15min，便到含月山山腳的骨窟寺大門口。

要開始22小時的佛寺禪修生活了。職員首先替我們登記，然後介紹這2天的課程和帶我們到宿舍。

今晚便睡在這座靜舍，男一間房，女一間房，打地鋪，年三十晚要和小太熊分開，唔好啊。

我和另外三個韓國的男同學瞓這間房。

骨窟寺的寺院依山而建，山上有很多石窟，山頂上有一座石如來。還有一個幾鐘自由時間，便四圍逛逛。

骨窟寺山腰的主樓

骨窟寺山頂的石窟

山頂上的大雄寶殿， 殿後面是山上的石窟， 最高有蓋的位置是 石如來。

行上石如來的一段山路都需要擒上擒落。

未正式上堂，自己先在石如來腳下練一練功，吸收吓佛氣先。

17:30在這飯堂食晚飯，之後便要明早才有嘢食了。

同學們一起排隊攞食物，男生坐右邊，女生坐左邊，唔可以過界架。

素菜任攞任食，但必需要食清光。

這碟就是年三十晚團年飯了，有芽菜、辣泡菜、青菜苗、煎素餃子、芽菜湯和白飯，很清淡，味道都OK架。

開餐開餐，同場九成是韓國人，只有少量老外和我們2個香港人。

19:00 – 19:30 ~ 到佛堂唱佛歌，和寺內高僧一同參禪，完全聽唔明架，又跪又拜見人哋做就跟住做啦。

19:30 – 21:00 ~ 在高僧指導下練習韓國古武術「禪武道」，禪武道 是骨窟寺高僧自創的一種武術，集瑜枷、丹田呼吸、健康體操及拳法於一身的武術。都有很多老外也長期在寺內修練這種古武術。 

首先師傅用韓文對 禪武道作出基本介紹(我估係講呢啲啦)。

跟著師傅教導一些熱身動作，同學們都一起做。

動作的難度不斷提高，跟到就盡量跟啦。

最後助教們出動埋，同學們分組練習，呢個鬼妺仔練得幾有工架，睇佢個樣應該學咗好耐囉。

晚上 21:00要返房睡覺了。明天04:00要起床禪修。第一次在佛寺生活，感覺新鮮又健康。不過因為今日太早吃晚餐又食得太清，現在已經很肚餓了，點捱到明天早餐呀，死啦。

---待續---