單戀大馬雙城(1) ~ 一起再踏 檳城的日子

馬來西亞 檳城 喬治城(George Town)的人氣壁畫 – 姊弟騎乘

馬來西亞 檳城的George Town自從成為世界文化遺產後，環境不斷改善，一年比一年靚，2012年起檳城政府更在城內加入了大量富有當地人文色彩的壁畫，為這小城加添不少特色，加上榴槤飄香，處處地道美食，實在值得一去再去。

Hong Kong Express今年開了 檳城直航機呀！連稅都只係千鬆啲，梗要幫襯啦。。。小太熊都鐘意做式式嘛！

今次大馬之旅一共玩5天，去埋從未到過的 浮羅交怡(Langkawi)，行程算幾充實。這次 單戀雙城計劃行程如下:

Day 1

乘14:55班機往檳城，在喬治城晩飯掃街食榴槤。夜晚住世界文化遺產 古建築精品酒店<馬車房Muntri Mews>。

Day 2

05：30起身，先去懷舊茶居<大東酒樓>飲茶，然後穿過George Town行2km去碼頭，乘08：30船往浮羅交怡。

到浮羅交怡後乘的士去沙灘Pantai Cenang食海鮮，再去遊<東方村>吊車，然後到酒店<The Westin Langkawi Resort and SPA>Check in，留在酒店嘆世界。

Day 3

早上在酒店早餐後，出發 浮羅交怡紅樹林一日遊，晚上食海鮮。

Day 4

早上留在酒店嘆到11：30 Check out，然後到Alun-Alun SPA做Massage，跟著乘14：30船回檳城。

包的士從碼頭出發，往 松花江茶室食燒雞翼，再去Golden Thai食野生河魚<忘不了>，最後去榴槤果園 寶盛園Bao Sheng Durian Farm，住泳池房，食新鮮榴槤做宵夜。

Day 5

06：00起身，食剛從樹上跌下的榴槤做早餐，然後返房游水，10：00乘的士離開，回George Town。

11：00開始George Town一日遊，17：00乘的士住機場，乘19：10班機返香港。

單戀大馬雙城 – Day 1

今日返半日工，早上出發時見到大彩虹，好靚啊！

放工後打的去機場，在Plaza Premium Lounge食免費午餐。

港式魚蛋粉，味道唔差架。

飛機準時14：55起航，18：20便到檳城。

出機場後，有位華人司機話RM 40車我去去George Town，我見比Coupon Taxi的公價RM 44.7平，便幫襯佢。今天第一站係先去Time Square的 阿吉海鮮飯店食飯，食完才去酒店Check-in。

開車後，司機便開始sell我，話阿吉啲嘢唔好味，不斷想車我們去佢介紹嘅地方，又話有檔海鮮平靚正想車我去，曉。。。我不斷「唔駛啦唔駛啦no no no.....」直至到Time Square落車。

佢最後話可以時租RM25一粒鐘包佢架車，嘩！比我2011年來檳城時的公價RM35一粒鐘平好多，我便問佢攞了卡片，佢叫我要車就call佢喎。

在這裡Time Square門口落車，見到 光大中心 ，天色好好。

今日係檳城榴槤節，在Time Square門口開了檔 榴櫣檔，小太能話要即刻嘆一個先。

買了個最貴的 貓山王，即開即食。

貓山王榴槤每1kg – RM 35，這個重1.5kg賣RM 53。皮亁爽，肉creamy，重口味，先微苦後帶濃甜，齒甲留香，靚嘢。

2個人隊完個 貓山王已飽了一半，但仲有排食啊。

食完榴槤已經天黑了～

按書上地址行入Time Square揾 阿吉海鮮，但揾極都唔見，問人才知道執了！！

吓，咁咪白來？

唔緊要，行5min便到 小巷夜市，果度都有好多嘢食。

小巷夜市人山人海，睇賣相應該幾好味。

小太熊最想食 福建蝦麵，就試呢檔啦。

福建蝦麵(RM 4) – 湯底不及從前吃到的鮮甜，屬普通貨，但都算好味。

龍眼冰(RM 1.8) – 幾清甜，有龍眼味，OK。

食完小巷夜市，又行5min到 榴槤興，今次試 白蜈蚣，每1kg – RM 20，這個1.2kg賣RM 24。白蜈蚣榴槤肉質奶白色，果肉密度極高，質感極黏，奶味及甘苦味濃烈中帶微甜，香味獨特，我覺得比 貓山王好味。

吃了一粒，其餘果肉打包真空帶去Langkawi食。

買完榴槤，沿Jalan Penang行去酒店。

經過一間古老戲院

轉入Jalan Muntri，見到很多舊民居已改為商用了，最多係餐廳酒吧和精品酒店。

再行前就是 天后古廟 

檳城名壁畫 功夫女孩 

到了今晚的精品酒店了，是由一所古老大宅的馬房改建成的《馬車房Muntri Mews》，屬於檳城二級保護建築，世界文化遺產的一部份。

馬車房Muntri Mews的門口是酒吧，內裡是客房。

21：00都好似冇乜客，冇人飲嘢。

酒店只有約10間房，上層是從前馬伕住的，唔開揚又冇view。

我住最平的房，即地下最近大門口那間，以前是馬住的。

房間外有枱凳，可以坐底飲杯茶。

雙人淨房每晚RM 330，面積細細一眼睇晒，算幾乾淨，裝修幾懷舊特別，值得一試。

房間送的茶㸃和清水。

浴室水力較弱，但都OK。 

在酒店休息了一陣，又再出擊，今次行去附近的<紅園夜市Red Garden Café>。

紅園夜市Red Garden Cafe人山人海，有拉濶音樂表演。

BBQ海產，價格唔貴但唔係好吸引。

行遍整個場都冇乜睇得上眼，除了這檔檳城蝦麵和蠔煎，貼了好多報道出來，話檳城特首都吃呢檔喎！

檳城蝦麵(RM 5) – 唔講得難食，但話好味就呃你嘅，湯底偏淡蝦味不夠，比剛才小巷夜市那碗差，不吃也擺。

蠔煎(RM 10) – 蠔仔肥美份量亦足，但小太熊唔鐘意個餅底一pat pat，話好難吃喎！

食完呢餐，小太熊開始敎育我了，佢話我做唔好功課喎，揀的地方一係唔好味一係執笠喎，佢話要我勤力啲去改善喎！知道！認罪悔改！

返酒店沖完涼上陣網，約24：00瞓覺。

單戀大馬雙城 – Day 2

今朝05：45起床，天未光就要Check out了，為的是可以上船前嘆個懷舊早茶。

檳城的懷舊茶居<大東酒樓>，06：00開市。

像是40年前香港的舊式茶居，仲有推車仔賣㸃心架，人情味濃厚。

乾蒸燒賣(RM 3.6) – 冇驚喜，味道及新鮮度都算可以入得口，當係食佢的懷舊環境啦。

魚翅蛟(RM 3.1) – 魚翅有些硬，整體上可以入口。

帝皇包(RM 5.2) – 這裡的人氣點心，內有冬菇、雞肉和糯米飯，像是大包糯米雞，味道......怪怪的唔灘食，但個包幾有質感亦夠鬆軟。

蛋撻(RM 1.8) – 流到爆又貴到漚，凍的，呢個價錢响香港可以買到世界Number One的蛋撻了。 夠鬆軟。

飲茶坐到約07：00離開，慢慢沿George Town的老街行路去碼頭，沿途經過舊城的建築物，近年番新後都變得又靚又懷舊，檳城的保育做得比香港出色。

George Town舊城區 

行到碼頭旁的船公司已07:40，順利攞到綱上訂了的船票，出發去Langkawi。

這就是檳城的碼頭，14年前我就係由呢度坐船去印尼的蘇門搭臘了。

隻船原定開08:30，航程2.5hr。但啲馬拉人做嘢總係Me Me Mor Mor你急佢唔急，攪到09:05才起航，仲要行足3hr才到埗，攪到小太熊又再細心教導我，話應該坐飛機喎......知道！

補充資料 :

1.)      香港快運Hong Kong Express香港來回檳城機票每位HK$1104，不包餐和寄行李費。

2.)      在當地換錢的滙價又差又浮，最着數係簽VISA，用Cash就一定要去百年換。

Yahoo 參考價：RM 1 兌 HK$2.4

百年：RM 1 兌 HK$2.445

檳城機場：RM 1 兌 HK$2.632

USD$ 1 兌 RM 3

Langkawi碼頭：USD$1 兌 RM 3.05

RM 1 兌 HK$2.632

Langkawi Pantai Cenang沙灘：USD$1 兌 RM 3.125

RM 1 兌 HK$2.632

簽VISA : RM 1兌 HK$2.455

3.)      檳城機場乘Coupon Taxi去George Town定價RM44.7，車程約30min。亦可以自行和司機議價，我的司機收我RM 40。

4.)      檳城往Langkawi的船碼頭位於George Town。來回船票每位HK$307，船程足3hr，可在綱上訂票，再於上船前去船公司攞票。

---待續---