體驗真正台灣味(完) – 中華味 • 梅山鄉 台中市

清晨時份的瑞里民宿 阿本的家

可能每位到訪過台灣 的朋友也會感受過 台灣人的熱情好客，感受過 台灣人如何熱愛台灣這片土地，不論是 的士司機、民宿主人或行山時遇到的台灣人，他們都會不斷向我介紹自己土地裡的好東西，有吃的亦有玩的。台灣人視台灣這片土地為自己的家，因此會把大自然保存得好好，像玉山和瑞里景區，雖然每天都遊人不絕，但我不曾見過有垃圾，因為「你會在自己屋企隨地掉垃圾嗎？你會在自己屋企隨地疴屎疴尿嗎？」

這些就是我體驗過的 中華味，完全不屬於強國人的生活態度。 

<<嘉義縣 梅山鄉 瑞里>>

體驗真正 台灣味 – Day 5

今日好夠瞓，07：30才起床，08：00食早餐。

瑞里風味早餐2人份，我覺得係咁多日最好味的早餐，有大量新鮮自家種蔬菜，最特別係那味 茶葉煎蛋。

食完早餐，08：30開始行山4hr。阿本的家就在 青年嶺的入口旁，住在這裡很方便行山。青年嶺 是瑞里一個山谷，內有名景㸃 雲潭瀑布、蝙蝠洞、燕子崖和吊橋，因整段山徑的高低落差超過300m，而且要不斷上上落落，難度唔低，要青年的體能才可完成，因此名為 青年嶺。

從阿本的家向山下行3min至瑞里國小，轉右行入山路便見到這座 山神廟。

廟宇旁邊是一片茶園

跟著便要不斷落，急降超過300m，共1700級樓級。

行約30min，便到 蝙蝠洞。

但你係唔會响蝙蝠洞見到蝙蝠的，只會見到洞。

  

行多5min便到 燕子崖，真係有燕子架。

燕子崖旁邊就係 青年嶺吊橋，條橋夠長又夠震，很好玩的。

過完橋就大鑊了，要不斷向上行，上足30min冇得停。

在09：45行出了山徑，出到這條馬路。

再往上行5min，右轉入這山徑，往雲潭瀑布走。

這斷路風景亦唔錯，夠自然，有深谷木橋。

不斷上上落落20min，於10：05又行出了馬路，往下行多10min便到瀑布了。

這裡有間食堂，可補充糧水。

雲潭瀑布 - 細細條幾Cute。

這條瀑布分三層，但又冇時間又腳飮，決定回頭了。

行返上食堂，又飲支凍寶礦力補充補充。

10：30起步離開，快步行行行，又再穿過吊橋和蝙蝠洞，來到1700級樓梯的最低處了。

11：20從這裡開始上1700級。

好攰呀，腳都軟，行足40min，12：00終於回到起㸃 阿本的家了。

沖個沖吹陣風扇，又要走啦。今日又包了昨天架的士從瑞里回到台中，車費NT4000，車程只要2hr。

司機很準時，12：20出發，飛快地走公路，2hr便回到台中，比我預算快了一個鐘。

今日小太熊Target了很多台中景點，又係不斷食食食。

<<台中市>>

宮原眼科 – 前身是 宮原眼科診所，現在已把這古績改建為雪糕餐廳，內部裝修特別。 

每日都有大量遊人排隊買雪糕，不過這裡的雪糕像雪葩，話好健康但唔夠香滑。

地下裝修獨特，放了很多藥櫃。

鳳梨酥和其他手信都包裝成書本，幾有趣。

這是最出名的 哈利波特圖書館

宮原眼科共分4層，地下是手信店和外賣雪糕屋，2/F和4/F是餐廳，3/F是露台。

一場來到，當然要上2/F 醉月樓沙龍 ，嘆吓，順便參觀參觀。

唔係太多人，坐到窗口位。

因每人有NT380最低消費，所以叫了三樣嘢。

荔枝冰淇淋配鬆糕(NT320) – 冰淇淋似雪葩唔似雪糕，味道唔太特出，其餘配料都OK，整體上合格的。

伯爵冰淇淋配西多士(NT380) – 冰淇淋一樣令人失望，但西多都幾好味。

芒果沙冰(NT280) – 冇芒果味的芒果冰淇淋配冇芒果味的沙冰，勝在夠消暑。

在宮原眼科玩了個幾鐘，16：00埋單走人。

行過幾個街口，到達 台中市的太陽餅街，小太熊要吃呢間 阿明師太陽餅。

阿明師太陽餅(10個NT200) – 酥皮鬆化奶香味重，餡料不太甜有口感，加了豬油，非常香口好味。

沿大路行15min去到 台中公園。 

穿過公園便到 一中夜市，人山人海。

行了一陣，對那些小吃興趣不大，只試了塊雞扒。

一中豪大雞排(NT50) – 勁大塊，炸得鬆脆咸咸哋，但完全冇雞肉味，嚴格來說只係一大塊椒鹽炸雪肉。

冇咩好行，提早在17：15乘的士（NT130)往今日的晩飯地㸃 乾杯燒肉，車程15min。

乾杯燒肉，用炭火烤肉。

早到，客人不算多。

先來杯 黑生啤(NT110) – 幾易入口，唔錯。

鹽蔥牛舌(NT160) – 味道較淡，普通。豬頸肉(NT180) – 水準一般。

澳洲和牛牛排(NT450) – 約150g，極高水準，牛味足油味唔輕，用炭火烤至5成熟，味道一流，有驚喜，超抵食。

牛味極香濃，肉質亦夠嫩，估佢唔到咁好味。

海肥蝦(NT220) – 有差不多120g重，啖啖肉，隻蝦好新鮮，味道和自己街市買的生猛花竹蝦一樣鮮甜彈牙，抵食又好食。 

小太熊好錫我，佢讓多一啖蝦肉比我食，仲讓埋個蝦頭比我，hehehe....

食完烤肉，坐的士(NT140)到全台灣最大型的夜市 - 逢甲夜市。

台中 逢甲夜市

夜市旁邊就係 逢甲大學

夜市極度旺場，很多人龍小食。

 大腸包小腸 - 甚多人排隊，但小太熊唔肯試，佢話一定唔好味喎。

另一人氣特色小吃 炒麵麵包 - 將炒麵放入麵包中間做餡料，真係估佢唔到，呢味連我都唔想試。

86碳烤雞排 - 同剛才食的那一塊完全一樣，冇試了。

懶惰蝦(10隻NT50) – 賣相唔錯，連殼一齊食，但蝦唔新鮮，食完個口腥腥哋，買了10隻，我只吃了2隻，小太熊吃了一隻就唔肯再食。

最後入了呢間舖食麵，在大學對面街。

油豆腐湯(NT15) – 正常豆腐湯味道。

餛飩麵(NT45) – 正常好味的一碗麵，幾大碗。

蜂蜜愛玉(NT45) – 味道一般，但超搵笨，極少愛玉，千其咪幫襯呢檔，這是我在台灣飲過最差的愛玉。

逢甲夜市啲嘢唔係好啱食，整體上台中夜市的小食完全比不上高雄六合夜市和台北士林夜市，六合和士林好好味道的。

冇咩想食，所以提早20:00乘的士(NT235)去高鐡站，去到才20：20，趕到20：35返桃園的車。

高鐡台中去桃園，票價NT570，車程40min。

從桃園高鐵站去機場可乘巴士 - 統聯客運705號，每位NT30，車程15min，途經今晚住的機場酒店Novotel。 

桃園機場諾富特酒店Novotel Taipei Taoyuan International Airport

雙人房連早餐HK$917

21:37到達酒店，還趕得切22：30泳池關門前入去游幾轉。

酒店泳池好靚，內有按摩池和蒸汽浴。

執吓嘢睇吓電視，都攪到01：30至瞓覺。

體驗真正 台灣味 – Day 6 (完)

瞓得4hr，05：30要起床食早餐了，早餐05：30開始供應，味道普通啦。

Novotel的自助早餐

乘06：30接駁巴士到機場，乘08：20班機，因為仲有時間，可以入候機室再食啲免費嘢。

桃園機場候機室

這候機室好靚，食物亦高水準。

乘08：20班機，10：00返到香港，又玩完lur。小太熊立即又要計劃5月尾和6月中的行程，佢好忙架. . . . . .

補充資料 :

1.         瑞里的山徑都很自然，景點亦唔錯，最好預留一天遊覧。

2.         包車(4人的士)從 瑞里回到台中市，車費NT4000，車程只要2hr，沿途可落車遊覽，全程限時4hr。我問了約10間Agent，只有兩間報價NT4000，分別係 小楊(e-mail: peiyu.yang@msa.hinet.net) 和 悠遊台灣旅遊網(e-mail : profun02@gmail.com)，其餘都報NT5000或以上。

3.         台中逢甲夜市乘的士去高鐡站要NT235，車程20min。

4.         台中乘高鐵去桃園票價NT570，車程40min。

5.         由高鐵桃園站去機場要乘接駁巴士750號，車程15min，票價NT30。

---體驗真正 台灣味‧自然感受 中華美 (完)---