法國 初夏(7) – 走過 普羅旺斯的足跡

法國 普羅旺斯山城 – Entrevaux

今日行程豐富，首先自駕125km到Saint-André-les-Alpes火車站，追踪金城武和陳慧琳細個時拍「薰衣草」走過的足跡；再漫遊普羅旺斯山區的薫衣草田，最後往天空之城Gordes食飯，沿途是但停車休息的地方就係極美的山城Entrevaux，精彩的一Day，希望順順利利啦。

法國 初夏 – Day 6

<< Eze(艾日)>>

今朝07:30起身，坐出露台飲杯茶食件餅，嘆世界。

隔離房老外在露台吃早餐啊，我太cheap唔捨得食，小太熊好乖冇怪我啊！

有了前2日的慢車經驗，今早要忍痛提早check-out，嘆到約10:00 要起行了。

<< Touët-sur-Var, Provence(普羅旺斯)>>

車子從Eze出發行了70km已用了80min，阿甲要落車义電飲個B了。

今次停在小鎮Touët-sur-Var，見到山上有座城，好得喎，於是阿甲和阿乙就去飲個B，我同小太熊就四圍遊覽影吓相。

普羅旺斯山中小鎮Touët-sur-Var

估唔到是但在普羅旺斯一個小鎮停停車休息已經靚得咁鬼緊要，好快四圍遊覧了半個鐘，阿甲阿乙就喜歡郁都唔郁坐足半粒鐘，阿甲亦义爆了電，又要趕路了，但. . . . . . . 可能電池用耐咗始終唔耐用，义爆了的電一般只捱到90min左右又要再义。

回泊車處攞車，撞鬼，車尾無啦啦花了，都花得幾深，賠梗了。

<< Entrevaux, Provence(普羅旺斯)>>

車子又行20min，經過另一山城Entrevaux，嘩嘩嘩！一條護城河再加座古式古鄕的舊城，好似拍緊魔戒一樣，正到......今次我叫停了，睇少啲薰衣草都要停啊！

法國 普羅旺斯山城 – Entrevaux

大門口好正啊，可惜真係要趕路唔夠時間入內逛逛了！

<< Saint-Julien-du-Verdon, Provence(普羅旺斯)>>

車子又行多45 min，到普羅旺斯另一山中湖Saint-Julien-du-Verdon。頂！乜今日啲中途景正成咁架，完全出乎意料～於是又要停返十幾分鐘啦。

普羅旺斯山中湖Saint-Julien-du-Verdon

<< Saint-André-les-Alpes(聖安德魯), Provence(普羅旺斯)>>

過埋湖行多6km，終於在13:00來到Saint-André-les-Alpes(聖安德魯)火車站了，這裡是「薰衣草」的場景，當日陳慧琳帶金城武到普羅旺斯的Chateau de Bois(波爾士古堡)買完最靚的薰衣草乾花後，便到這車站等火車去 梵帝岡。

普羅旺斯 Saint-André-les-Alpes(聖安德魯)火車站

這火車站每日只有6班車來往普羅旺斯山區和尼斯，係去唔到 梵帝岡架。

就係呢個電影場景了，確係尋常絕色，小太熊好開心呀，佢話要做陳慧琳喎。。。冇問題，我老豆唔學得陳慧琳個老爺啫。

小太熊幫我影相，自己唔肯上鏡lor。

行完火車站，到外邊小鎮逛逛，又係寧靜得過份。

有間教堂，入去祈個禱，求個平安順暢先。

神啊！求今日平平安安，陽先普照下見到薰衣草啊！

祈完禱人都精神晒，出外面廣場露天雅坐食個Lunch先。

要了一份Set Lunch，€15有齊頭盆、主菜、酒和咖啡，抵食喎。

頭盆 燒肉碎釀番茄沙律 – 好味。

餐酒一杯，幾清香。

主菜 牛扒伴薯條 – 頂！仲好食過禽日中午餐貴嘢。

咖啡味道好過香港茶餐廳啦。

食完飯出得車都15:00了，繼續沿Route N202 – N85 – D907 – D953往Puimosson方向行，沿這尋找薰衣草。

又見薰衣草了，但天色開始灰，想落雨啊！！

車子駛到D953 / D8交界，有好大塊 薰衣草田啊！但落出毛毛雨了。

仲有水果檔添，小太熊話想吃普羅旺斯的蜜瓜，我買了2個比佢食，好淋好甜架。

响這塊 薰衣草田玩了一陣，唔掂呀，開始大雨，要上返車。

今日Plan了沿D953往Puimosson再到Riez，再轉入D952去Roumoules，再轉入D56後出右轉返出D953，最後沿D8返Valensole，因為小太熊在網上睇到Puimosson/Riez/Roumoules這三角地帶好多薰衣草田，可是我真係一塊都見唔到，但在最後D8一段卻見到好多大型薰衣草田，比早兩日見得大得多，可借外面落狗屎，落唔到車了。

外面橫風橫雨行雷閃電，天氣是14天行程最差的2小時。

在車上焗了2個鐘，雷雨落足2個鐘，這次旅程見到最大的薰衣草田又响這2個鐘，係咪咁絕呀？？可能神咁arm聽緊歌，聽唔到我祈禱啦，但. . . . . 最絕係我決定離開Valensole，駕車出返大路時，出太陽呀！！！

只係Valensole薰衣草田落暴雨咋。。。。心裡面即時啍起陳奕迅 :「. . . . . . 絕得不能絕 絕到溶掉我. . . .」

<<Forcalquier, Provence(普羅旺斯)>>

無奈地繼續向小鎮Forcalquier前進，從Valensole到Forcalquier只30km，因大雨提早離開Valensole，18:00便到Forcalquier了。在這裡小息30min。

泊位倒車時，因阿甲技術係Co.Ltd.，要阿乙幫忙睇位，因溝通問題攪完一輪都泊得甚樣衰，我當然冇所謂啦，但阿甲就因泊得樣衰覺得冇面發晒爛渣小阿乙，態度惡劣，阿乙於是同佢玩冷戰。。。。

我心裡面即時又啍起王菲 :「. . . . . . 相對不發一言　似是你共我有了默契 永不要幼稚的罵戰　但表情彼此表情悄悄地暗示這是冷戰. . . . .冷戰再冷戰再冷戰　一錯再錯我卻愛上這個錯 . . .」

普羅旺斯小鎮Forcalquier

特然想同小太熊影呢張相，但佢話無聊啊！

小太熊就很有聊地幫襯這小店食雪糕

杏仁雪糕(€2) – 我覺得唔錯，但小太熊話味道似藥水。

休息完繼續開車行多60km，約19:30到達南法名城Gordes。飲食男女話，早2年柯震東拍的Canon廣告就係响呢度拍的，而且，宮崎駿天空之城也在這裡取景。

<<Gordes, Provence(普羅旺斯)>>

南法名城Gordes – 又真係好鬼似天空之城。

進入古城，在這迴旋處旁有停車場，泊好車揾飯食。

迴旋處旁呢間餐廳爆滿，其它餐廳就水靜河飛，決定幫襯呢閒。

Pizza係用木炭燒烤焗的，要試要試。

Culatello Ham(€8) – 味似巴瑪火腿，味OK但沒有驚喜。

Mozzarella水牛芝士球(€7) – 奶香味濃質感合格，比香港超市買的好吃。

炭燒Pizza Margherita(€12) – 鮮制的炭燒餅底配少量芝士和茄醬，太少餸了，但算OK啦。

Pasta Pomodorini(€12) – 每日鮮制的Pasta幾好味，但又係. . . . 冇乜餸lor。

由於上菜非常慢，攪到21:30才食完埋單。臨走再看看Gordes的夜景。

天空之城 Gordes的夜景

從古城到今晚的民宿La Bastide des Gros約4km，因為網站的地圖位置唔清楚，只靠佢幾句description去揾，但因天已黑透，唔開車頭燈便完全見唔到條街，極難認路，而且越行越荒涼，屋都冇間，阿甲極度驚慌地叫人關好所有窗，驚比人老笠，小太熊又自信地己直覺話我帶錯路冇奶油咁荒涼，最後三條友都不負責任地話我帶錯路卻又全無主見，幸好我做足功課亦對自己認路能力有信心，唔理班友繼續向前行，終於在22:30找到民宿La Bastide des Gros了。

民宿主人還在等我們啊！我們一到佢就瞓了。

雙人房Lavande(含早餐)每晚€95

今晚實在好驚臉，揾唔到間民宿都唔知點算，下次必定唔會天黑後才check-in了。

補充資料 :

1.         今日駕車310km，用了€34入油，公路費€2.2，冇泊車費。

2.         今日見最多薰衣草在Volensole出發D8公路旁，另外在D15公路旁(由D15/D4交界至Volensole那一段) 亦唔少。Puimosson/Riez/Roumoules這三角地帶就完全冇薰衣草田

---待續---