法國 初夏(8) – 戀上 普羅旺斯(Provence)薰衣草

法國普羅旺斯 波爾士古堡(Le Château du Bois)

波爾士古堡(Château du Bois) 位於普羅旺斯山區海拔1100m山頂上的Lagarde d’Apt，是電影「薰衣草」的主要場景，當日陳慧琳帶着金城武來到這裡尋找最美最憂鬱的薰衣草。從 亞維農(Avignon)出發，可以走Route D900，到達Apt後轉入D22，直行再轉入D34，經過D34又窄小又彎曲的山路上到山頂後，見到Château du Bois的指路牌便右轉行多3km左右便到。古堡現只剩下一小幅破舊城牆，四面山坡均種滿薰衣草，加上藍天白雲，站在舊城牆旁像真走進天堂一樣。

法國 初夏 – Day 7

<<Gordes, Provence(普羅旺斯)>>

今日瞓到08：00才起床，行出房間露台，天色甚灰，但很開揚啊！

昨晚我就係認得民宿門口這招牌，才能找到這裡。

民宿La Bastide des Gros大門口好靚，係傳統普羅旺斯山區民居的設計。

民宿有個小泳池，很乾淨游得水的。

民宿La Bastide des Gros的正面，二樓的露台和左邊那個窗就係我間房，係咪好靚呢。

民宿主人已經預備好早餐，有雜果、果汁、雞蛋、麵包和粟米片，好豐富呀。

早餐每朝08：30開始，食lur食lur。

吃飽後09：15出車，自駕65km經過D570N公路往Arles(阿爾)。

飲食男女記載，從Avignon往Arles那一段D570N公路的兩旁有大量向日葵花田，今日係專程去睇的。 

行過D570N，真係見到向日葵花田呀，好大好多好壯觀呀，可惜天灰啲花又背向我啦～

可能太陽未升起晒啦，啲太陽花頭Dup Dup。

<< Arles(阿爾), Provence(普羅旺斯)>>

好快去到Arles(阿爾)了，但入到城卻冇位泊車，全街車位爆滿，最後轉了入舊城，大鑊了，啲路窄到爆又像迷宮一樣，攪了好耐至轉返出大街，最後好彩叫做揾到個唔知係咪車位的車位，唔理咁多了，泊咗至算。

看看錶，從入城至泊好車，已經過咗成個鐘了，預算行Wensday Market和舊城的時間沒有了，迫住Skip了這環節，真可惜。

來Arles的最主要目的，就係到 梵高咖啡店(Café Van Gogh)朝聖，看看梵高的名畫“Café Terrace at Night”。

梵高咖啡店(Café Van Gogh)

咖啡店門口放了梵高的名畫“Café Terrace at Night”，聽講話梵高細個時常在這小店飲咖啡，之後仲畫低當年咖啡店的樣子，並且取名“Café Terrace at Night”。

就算冇時間行街，都要學梵高咁，坐低嘆杯咖啡。

Cappuccino(€4.5) – 味道普通唔緊要，最重要係地㸃不平凡。

12:45要走了，跟著會自駕105km到 波爾士古堡(Le Château du Bois)。

回程又路過D570N，太陽花全都抬起頭了，很壯觀呀！

雖然送唔到天上的月亮給小太熊，但都想把地上的太陽全送給她啊！

車子又回到民宿附近，再繼續沿D900往前行，到達Apt後左轉入D22公路後，直行再轉入D34，經過D34又窄小又彎曲的山路上到山頂後，見到Château du Bois的指路牌便右轉行多3km，終於在15:00到埗了。

<<Le Château du Bois(波爾士古堡), Provence(普羅旺斯)>>

Le Château du Bois的大門口是這一間小屋

從小屋前的小路右轉沿路行幾百米便到了。。。好興奮呀！

波爾士古堡(Le Château du Bois)

站在這1100m高的山頂上，沉醉在紫色憂鬱的薰衣草幽香之中，真係好似上咗天堂一樣，這個電影場景實在夢幻得過份。

波爾士古堡附近都是薰衣草田，但未盛放啊！唔緊要，已經好夢幻了，下次盛放時再來過。

在古堡只停留了1hr，又要離開向Sault(蘇城)進發。

沿着D34 – D245往Sault(蘇城)，因時間唔夠冇入城了，在城外圍轉入D943返Gordes。

見到觀景台便落車影張相

沿途見到唔少賞薰衣草的單車團

在D943公路上又見到薰衣草田，呢塊田好紫啊！

回到Gordes後行多3km左右，便足普羅旺斯最人氣的景點Abbaye Notre-Dame de Senanque(塞農克修道院)，修道院外有一片薰衣草田，可惜今日仍未盛放啊，遊2星期應該靚好多啦。

<< Abbaye Notre-Dame de Senanque(塞農克修道院), Provence(普羅旺斯)>>

Abbaye Notre-Dame de Senanque(塞農克修道院)

18:30返到Gordes，回程到Gordes要行6km有多，因為係單程路。

<<Gordes, Provence(普羅旺斯)>>

藍天白雲下的Gordes

今日可以慢慢行吓這古城了。

行到19:30，在古城入口處這餐廳食晚飯。

法國紅酒一支375ml(€12) – 味道簡單而果香味厚，好飲。

Order了2份有3道菜賣€36的Set Dinner，包括頭盆、主菜和甜品。

頭盆 牛油果芒果蝦肉沙律 – 幾好味道。

頭盆 蜜糖鴨肝醬 – 鴨肝醬很香濃，伴蜜糖吃很清新特別，和紅酒最爽。

主菜 香煎劍魚配芝麻汁 – 香口但魚油味比預期冇咁濃。

主菜 煎牛扒 – 很香口亦冇根，肉幾嫩，但法國牛扒的味道都只係一般般。

甜品 法式焦糖布甸 – 外皮脆口內裡蛋味濃郁，好正。

21:00的黃金天空之城Gordes

回到民宿La Bastide des Gros仍見到太陽的金光

和小太熊從房的露台看普羅旺斯日落，很幸福啊！

補充資料 :

1.         今日駕車230km，冇入油，冇公路費，冇泊車費。

2.         飲食男女話普羅旺斯的向日葵從6月中開花到9月中。

3.         今日見最多薰衣草在波爾士古堡(Le Château du Bois) 和D943公路旁。

---待續---