韓國秋色(2) – 秋色 • 綠水 • 江原道

秋色‧綠水@韓國 江原道 雪嶽山

雪嶽山位於韓國江原道束草市近郊，即係北韓附近，山內有多條山徑可作2hr至2日不等的遠足，四季景緻分明。十多年前曾經到這裡賞雪，欣賞結了冰的山溪瀑布；今次秋天再次到來欣賞金秋紅葉，意外發現山上溪流還有綠水，風景實在絕色。

<< Sorak Park(雪嶽山公園)>>

韓國秋色 – Day 3

原本今日預算晨早起床，天未光便出發行山，登上雪嶽山頂1700m高的 大青峰。但昨天實在太攰了，攪到今朝要08:00至起到身，真係未出發已經登山失敗。

08：30落樓下食早餐，味道就麻麻了，靚景窗囗位又比人霸晒，唔係太enjoy份餐。

求其食啲嘢，再攞些麵包上山食，準時09：00離開起行。

再入公園，又要每人比W3500入場費。

今日係星期六，人山人海呀，九成半係韓國人。

公園入口處的秋色紅葉

今日會沿“千佛洞溪谷”上大青峰的路線行，預計行到14：00左右便回頭，18：00天黑前回到酒店。

起㸃不遠處有煎葱餅賣，好鬼香。

一開始便沿着入口處的河流前進，沿途的樹葉有一半已經落了。

雪嶽山區內奇特的岩石山

沿途都見人潮 賞紅葉

看見綠水了，伴在金秋景色下，好靚呀。

走過鐡棧道，又見碧綠水池。

不斷上上上，越高所見到的樹越枯。

整個千佛洞溪谷都見紅葉、金葉、綠水和鐡棧道，相信早2星期會更多樹葉更靚。

雪嶽山景㸃 五連瀑布

從高處看 五連瀑布，可清楚見到五層瀑布從上而下。

過埋五連瀑布冇幾遠便行到 陽瀑待避所，由於越上山樹便越枯，行到這裡樹葉已差不今落了9成，風景唔太特別，今日又行唔到上山頂，不想為行而行了，決定12：30在陽瀑待避所回頭落山走了。

回程時太陽升高了，景色比上山時更好。

落山又行了2個鐘，勁肚餓，在這裡停低休息幫襯亞婆食件韓國煎餅。

原本想食海鮮煎葱餅的，但溝通出了問題，來錯了件 什菌煎餅。

韓式什菌煎餅W15000 – 2人份量，雖然係叫錯了，但好好味道。

食完lunch返酒店攞返大行李去坐巴士。

小太熊出發前Target了雪嶽韓華度假村(Seorak Waterpia)附近一間豆腐店，U-Travel話係全韓國最好吃的豆腐，韓文地址係<강원 속초시 노학동 1011-1>，中文名佢譯做“元祖傳統奶奶嫩豆腐”。

U-Travel話江原道的嫩豆腐馳名韓國，這邊的豆腐村聚集了多間專賣豆腐料理的餐廳，“元祖傳統奶奶嫩豆腐”是其中數間較著名的。難得一到當然要試試啦。

原本想先乘巴士No.7-1返出束草市，再轉No.3巴士去豆腐店，但因巴士站大排長龍，心急上錯了架到附近停車場的接駁巴士(每位W1000)，去錯了停車埸。

在停車場下了車唔知㸃算時，見到有幾部的士，便走了上去，比豆腐店個韓文地址佢，司機就行條short cut隧道，只W6300便去到豆腐店了，又快又平，好過坐巴士啊！

<< Sokcho (束草)>>

司機在這間“元祖 金英愛”豆腐店停車。

我看GPS的定位，位置正確，便和小太熊四處看看，發現附近有幾間元祖乜乜物物豆腐店，但就是冇U-Travel講果間，於是便幫襯金英愛，貪佢最多人。

下午四㸃幾還有幾枱客，證明係好嘢啦。

這豆腐店沒有Menu，入來的人全部都係食W8000位的豆腐套餐，有一大碗豆腐碎上、一碗飯和配菜。

豆腐餐每位W8000，這碗豆腐碎上是主菜，很香豆腐味。

2人共6款配菜，很有水準。

食完飯，乘巴士No.3(W1200) 回束草市外巴士客運站，想買明天車票往Jumunjin，㸃知佢話不設預售，只售下一班巴士的票。

冇辦法，在巴士站乘的士去大浦港的酒店，只5km，原本預計最多只要W6000，但遇上大塞車，跳了W9100，司機收了我齊頭W9000。

今晚在大浦港住的酒店 Marine Guesthouse

雙人房連自煮早餐每晚W60000，算抵住，但又細又完全冇view。

大浦港的夜景

岸邊有很多人曬乾魚獲

附近有幾檔賣橙，價錢唔同架，小太熊買貴了。

大浦港的特色馬車

海邊就係海鮮檔和小食檔

有即烤海鮮

貝殼類海產即叫即燒

韓國特別小食

海鮮檔全部把海鮮放在市場內，揀完講好價錢便在後面向街的鋪頭食，不須㕑費加一等什費。當晚人流極多，甚難搵位，要到20：00後才見有吉位。價

錢檔檔唔同，必須要格多幾檔才可幫襯。

大浦港海鮮市場

當做的紅蟹，肉味鮮甜，每1kg約W40000。

松葉蟹每1kg約W50000，黃帝蟹1kg約W60000。

魷魚亦係時令海鮮

仲有大量平目魚可作刺身，5年前在釜山食過，很鮮味的。

格價問了4檔，價錢最多相差有成80%。

最後幫襯這檔，開價最平，但佢唔秤嘢，全部一隻隻賣。

我選了這 松葉蟹W50000，約1kg，蟹膏又多又甘香，肉仲十分鮮甜。剛才隔離檔開我W90000，當正我係肥蝗蟲。

紅蟹一隻W25000，約600-700g，味道鮮甜但不及松葉蟹。(隔離檔W40000)

櫻花蝦10隻賣W30000(隔離檔W40000)，只有約250g，超級鮮甜。

後舖全滿座，剛有一張枱食完。

韓國真露W3000，送乜都啱。

這櫻花蝦香港冇得食，肉質彈牙且極度鮮甜，從未吃過這麼甜的灼蝦，雖然貴但值得。

松葉蟹和紅蟹都好甜，尤其隻松葉蟹更係爆膏又甘香，冇得頂。

松葉蟹腿，又甜又好肉。

食完再過對面的人龍小食店幫襯

束草特色 魷魚糯米飯(W3000)，好好味，要試。

節目充實豐富的一天。

補充資料 :

1.)      雪嶽山公園周末極多遊人，不論公園大門新興寺附近、吊車以至各條山徑均人山人海，免得過都唔好周末去。

2.)        “元祖 金英愛”豆腐店的地址。

3.)      從束草市到Seorak Waterpia或附近的豆腐店可乘No.3巴士，車費W1200，乘的士約W6000。

4.)      從束草市到大浦港可乘No.7, 7-1或其它巴士，車費W1200，乘的士約W6000。

5.)      大浦港的海鮮檔間間唔同價錢，相差都好遠，要格多幾檔至好幫襯。

---待續---