韓國秋色(1) – 金秋 • 紅葉 • 雪嶽山

韓國秋色 雪嶽山紅葉

從不丹回來3星期，又出發去韓國睇金秋紅葉啦。今次請2日假，坐HK Express晚機去早機返玩足4日。小太熊今次批準的6天預定行程十分豐富。

Day 1

放工後到機場食晚飯，乘HK Express 21:50班機飛往首爾仁川機場。

Day 2

零晨02：25到埗，乘03：50通宵機場巴士往首爾火車站Seoul Station。

到火車站附近的汗蒸幕Silloam Fire Pot Sauna休息。

早上到 無等山食韓牛做早餐，然後乘高速巴士往束草市，轉巴士往雪嶽山公園。下午行山賞秋色。

晚上住在公園入口Kensington Stars Hotel。

Day 3

全日在雪嶽山公園內行山賞秋色，晚上到大浦港食海鮮。

晚上住大浦港Marine Guesthouse。

Day 4

早上行大浦港魚市場，再到束草市魚市場。

中午乘車到江陵市附近的市鎮Jumunjin，入住童話蘑菇屋Songene Pension Hotel，晚上在屋外BBQ。

Day 5

早上乘巴士回首爾，然後食醬油蟹、鰻魚、韓牛、炸雞....行景福宮、明洞......

最後到汗蒸幕沖涼休息。

Day 6

乘01:20巴士從首爾站到機埸，乘03:55班機回香港，返工...

韓國秋色 – Day 1

放工後到機揚，在禁區Plaza Premium Lounge食晚飯。

近月真係少左蝗蟲來香港了，這鐘數Lounge竟然唔多人，係好事啊!

航機準時21:50起飛，HK Express真係又平又準時。

<<Seoul(首爾)>>

韓國秋色 – Day 2

飛機02:10便到仁川機場了，早了15min。原本打算在機場小睡，乘03:50的巴士(每位W10000)到首爾站，但剛有架泥猛的兜客，每位收W20000。

好啦，比多少少，可早1hr出到首爾早些嘆，OK啦。

條死人司機死都要釣足6個客才開車，等到03:05才開車，真唔爽。

泥猛的飛咁快只需50min，03:50便直接送我們到首爾站附近的汗蒸幕Siloam Fire Pot Sauna。

韓式浴湯 汗蒸幕Silloam Fire Pot Sauna，24hr營業，夜場每位W15000。

汗蒸幕Siloam Fire Pot Sauna分有5層，G/F係更衣室。

我先到地庫的浴場沖涼、按摩池、Sauna、蒸氣浴、瀑布浴，都好多嘢玩。

沖完涼後上樓上休息，有好多種房比你揀架。

2/F的酸素房(Oxygen Room) – 比較涼爽的一間房。

黃土房(Loess Fomentation Room) – 50度室溫，焗汗一流。

玉汗蒸幕(Jade Fomentation Room) – 60度室溫，地上的粗玉石粒好很熱，留幾分鐘就頂唔住。

冰房(Ice Room) – 負16度，玩完剛才幾間房再入來都頂到3、5分鐘。

火汗蒸幕 – 86度高溫，唔係比普通人玩的。

因太多野玩，只能小睡了45min便要走了，好眼瞓，但節目太豐富嘛，唔走趕唔切架。

06：00離開汗蒸幕，乘的士(W11900)到首爾數一數二的炭火韓牛店“無等山”，食一級韓牛做早餐。

韓牛店 無等山，24hr營業。

早上06：30時，居然仲有三枱客，真意外。

2人order了260g燒牛和200g生韓牛，連飲品共食了W160000。

韓國燒酒 真露W5000 – 味道非常粗礦的重酒精清酒，韓國人至like，食乜肉都用佢來送，些粉只賣W1200，平到笑。

第2貴的韓牛西泠肉(130g-W53000) – 價錢不下於神戶牛或飛驒牛等一級和牛，牛味極香濃，比一般和牛更優勝，肉質細嫩度不及一級和牛。

最貴的韓牛肉眼肉(130g-W59000) – 即100g要HK$340，牛味香濃度和西泠一樣，肉質比西泠淋和細嫩，送韓國真露更顯出其香濃肉味。

韓牛Tartare(200g - W43000) – 韓牛生吃，牛味遠不及和牛剌身，相對上極唔抵食，試過一次就算，下次一定唔再叫。

韓國食飯名碼實價，不收加一配菜等雜費，全餐早餐叫了4樣野，加埋就係W160000。

食完牛又打的(W7200)到東首爾綜合巴士客運站(Dong Seoul Bus Terminal)，即場買飛去束草市，但要08：59班車才有位，要等1hr。

巴士站售票處買票，每位W17300，首爾到束草車程2hr15min，中途只停一站。

乘這大巴士出發，坐位又濶又舒服，上車即刻再瞓。

<< Sokcho (束草)>>

話咁快11：15便到束草市，還未瞓飽啊～

束草市外巴士客運站(Sokcho Intercity Bus Terminal)

行5min到海邊，見到很多海鳥啊！

海邊有好多賣魚的攤檔，賣的都係每朝捉返泥嘅時令海魚。

工人們正不斷從魚網揀出魚獲，然後立即拎去隔離的攤檔賣。

魚獲其實只有呢啲，不是什麼貴價魚，味道亦普通，只勝在新鮮。

岸邊亦有很多坐位可以用炭火來燒呢啲魚食，一場來到，梗要試吓啦。

標準二人份量鮮魚W10000，共有13條，價錢已經全包配菜、炭火和什費，抵玩呀！

又來一支真露(W3000)，魚味都很新鮮，好有特色。

食完魚再沿海邊往南行，來到束草魚市場旁邊的一個海港。

小太熊話呢度係宋慧橋拍攝藍色生死戀的場景泥架，仲話佢成日坐那隻船慘慘地行來行去添。

中午約13：15從束草魚市場乘巴士(No.7-1)往雪嶽山公園，每位W1200，車程30min。小太熊Book了的酒店正正在公園入口前。

<< Sorak Park(雪嶽山公園)>>

最近雪嶽山入口的酒店Kensington Stars Hotel

酒店外擺了2架倫敦巴士，堅嘢泥架。

酒店大堂的圖書館

酒店有很多VIP會員，估唔到會見到張柏芝喎。

大堂放了很多巨型 胡桃甲子添。

未夠15：00酒店唔肯派房，只有放下行李入公園行咗山先，公園的入場費加價了，每人要W3500。

才進入公園門口，好多紅葉好靚呀。

公園內唯一的酒店“雪獄山觀光酒店”，我15年前住過3晚了，雙人大露台雪嶽山景房只係W64000，又平又靚又方便，可惜最近已結業，否則一定再住呢間。

雪嶽山新興寺大佛

今日會行上八百多米高的“蔚山岩石”，沿途的金秋紅葉風景很美。

沿途經過這間 四天王寺

從新興寺行到上蔚山岩石頂約90min，最後30min段路十分斜，但唔難行，沿途秋色都極美。

行約20min便到一間餐廳，可在紅葉下野餐。

繼續上山，仍是金秋紅葉。

望到山頂了，開始要不斷行鐵梯上山了。

沿鐵梯不斷上，自認底子唔好就咪試了。

山上的樹林形態十分奇特

16:24日落前登上岩石頂了，非常大風，好開心呀!

16:40開始落山了，景色同樣壯觀。

18:00左右回到酒店時天色全黑了，先返房休息。

雙人冇景房連早餐HK$1730 - 極貴啊，小太熊話係因為星期五晚加埋紅葉季節喎，冇辦法架，今晚已全Full了，Book遲些都冇房。

餓了，到2/F的英式餐廳食。

鮑魚海鮮湯石頭鍋定食(W19900) - 湯底幾鮮甜，內有鮑魚、蝦、青口、細蟹、魷魚和蜆肉，但全都唔係好得，另配上大量配菜和白飯一碗。

烤牛肉蘑菇石頭鍋定食(W19900) - 牛肉好好味份量又多，蘑菇和洋蔥很甜，另配上大量配菜和白飯一碗，抵食。

補充資料 :

1.)      百年價 HK$1兌W132，在景福宮大門前都係呢個價。

2.)        仁川機場價 HK$1兌W129，開24hr。

3.)        明洞找換店價 HK$1兌W134。

4.)        簽VISA後銀行HK$1兌W134，最抵。

5.)      HK Express香港到首爾來回機票(不包寄行李)每位HK$1946。

6.)      首爾仁川機場乘深夜巴士到首爾站車程70min，每位W10000，開03:50。

7.)      首爾仁川機場深夜有泥猛的到首爾站車程45min，每位W20000，司機會在巴士售票處前兜客。

8.)      首爾仁川機場乘的士到首爾站車程45min，跳標約W61000(已計20%深夜附加費)，另加一程W7600公路費。

9.)      東首爾綜合巴士客運站(Dong Seoul Bus Terminal) (MTR Gangbyeon站 – No.214)乘巴士往束草市外巴士客運站(Sokcho Intercity Bus Terminal)，每位W17300，車程2hr15min，中途只停一站。

10.) 束草市內巴士每程W1200。

11.) 束草市可乘巴士No.7或No.7-1到雪嶽山公園門前，途經大浦港，車程約30min，每程W1200。

---待續---