九州 鐵道行(2) – 福岡 • 鹿兒島 味覺漫遊

九州原田駅士多啤梨園 筑紫野いちご農園

九州的士多啤梨園採用溫室種植，每年12月至5月都盛產士多啤梨，所出產的士多啤梨又大又甜又多汁，我試過其中一款品種還帶有一點牛奶香味。在 筑紫野いちご農園，每人只需¥1900便可任摘任食園內的新鮮士多啤梨一小時，吃到的都係世界上最頂級的士多啤梨，令人回味無窮。我曾經在和歌山和澳洲塔斯曼尼亞都摘過士多啤梨，但都比不上今次這樣清甜多汁。

九州 鐵道行 – Day 2

<<福岡>>

今日行程豐富，晨早06:30便要起床Check out趕火車了，連酒店那份單人早餐都唔食了，因為小太熊Book了今朝09:00去摘 士多啤梨呀。

早上先在博多駅Lock好大行李(¥500)，然後乘07:34的JR往 原田駅，車程19min，到埗後從車站行25min便到士多啤梨園“筑紫野いちご農園”了。

士多啤梨園 筑紫野いちご農園

園內共有約8個溫室，種植了 甜王、佐賀穗香(さがほのか) 和 紅臉頰(紅ほっぺ)等多種士多啤梨，今天只開放4個溫室。

由於09:00至開始，時間還早，老闆招乎我們入屋坐一陣先。

園內出售的北海道煉奶(¥200)，用來送士多啤梨吃的。

坐到08:50，老闆先收我們每人¥1900，早少少放我哋入去，仲比我哋食到10:10添，正啊！

溫室内有地方可以摘完士多啤梨坐底慢慢食。

嘩！只係其中一個溫室已經大到嚇死人，我立即不停㨂出又大又紅的士多啤梨，狂剪狂食。

士多啤梨全部都又甜又多汁，唔同品種真係唔同味架，有一款仲有牛奶味添，正到無輪啊！

這樣不停食足70min食到一肚士多啤梨汁，好彩今朝冇食早餐又冇飲水。
食到10:00，要即走趕返出原田駅了。快步行了20min回到火車站，趕到10:26的JR，10:45回到博多駅。

到達JR博多駅後，要快步行返落博多地鐵站，乘11:05開向 姪浜 方向的火車，這班火車可不需轉車原車接駁到JR今宿駅，車程27min。

由於要乘10個地鐵站，所以有JR Pass地鐵職首都要我買張￥300地鐵票才準我入閘。

很順利11:32到達今宿駅，立即乘的士(￥2270)往今日的午餐地點“唐泊恵比須かき小屋”。

唐泊恵比須かき小屋

今日都唔少客，只剩下好少位。

門口放了大量貝類海產，見到都流晒口水。

停留時間只有60min，我立即去買嘢食，小太熊就去霸位先。

有2款生蠔套餐，包了炭火費和餐具費，分別只係蠔的份量。

我選了￥1400的A餐，包括這11隻生蠔，1個爐和2份餐具。

再另加4隻蠔(￥500)，有2隻超大，味道就全部都很鮮甜，蠔味亦很濃。

大蜆很貴，￥1000只有3隻，但唔夠甜。都係蠔抵食好多。

￥500有4隻螺，味道普通，乜都試吓囉。始終係蠔好食。

小太熊叫我一定要買這 生蠔飯(￥300)，味道幾好架，每人吃了一盒。

買了大元具1隻￥500，又巨型又鮮甜，很少吃到咁甜的大元具。

買了1隻大雪蝦(￥150)試試，好甜喎，攪到小太熊話我買得少。

小太熊好叻，咁多人都居然霸到窗口靚位。

海鮮很快便燒得香噴噴，隻元貝甜到爆。

隻螺都幾大隻，肉都算甜，但我唔係太喜歡，因為啲腸始終唔乾淨。

大蜆很好肉，但甜度不足。

整體上這餐很滿意，比上年在和歌山黑門市場吃到的好食好多。

趕到乘12:53的巴士回今宿駅，每位￥430，車程19min。

很Perfect地上到13:22從今宿駅回博多地鐵站的火車。13:51回到JR博多駅，攞返大行李再行一陣，轉乘14:36的JR特急往鹿兒島中央駅。

JR 新幹線，福岡往鹿兒島只需90min。

指定席的坐位非常舒適。

<<鹿兒島市>>

16:05到達鹿兒島中央駅，從火車站行15min便到今日的酒店“Hotel Dormy Inn(霧桜の湯ドーミーイン鹿児島)”，會連住2晚。

Hotel Dormy Inn(霧桜の湯ドーミーイン鹿児島)

雙人房(不含早餐) 每晚￥7600。

在酒店安頓後，便立即出外行街食飯。

鹿兒島市 天文館大街

今日小太熊安排了食2餐晚飯，分別係食 鹿兒島牛和燒鰻魚。

 第1餐食 うなぎの末よし備長炭燒鰻魚

17:30已有唔少客，呢間嘢應該唔差。

鰻魚飯套餐(￥1420) 加日本燒酒(￥190) – 鰻魚用炭火燒得很香，好好食，比得上名古屋的篷萊軒和京都的松乃。

鰻魚大碗飯(￥1420) – 味道差不多，一樣咁好食，主要分別係啲汁走晒落啲飯。

飯後行陣街，嘩！啲蜜瓜好貴呀，原來香港唔係貴好多咋。

買了盒鹿兒島士多啤梨(￥1058)，靚係靚，但味道和今早吃的有段距離。

阿蘇牛奶1 liter(￥410) – 香濃幼滑，牛奶香味濃濃不散，牛奶中的XO。

Shop完平之後，到“焼肉多聞”吃鹿兒島牛。

很多書介紹呢間嘢，今晚裡面冇乜客，随便坐下一看. . . . . . 中計了，唔係用炭火燒，早知唔來了。

鹿兒島黑毛和牛舌(極上塩タン)(￥2000) – 雖然係薄切，但極香口，抵食。

燒牛舌十分好味，如果有炭火便十二分好味了。

A4鹿兒島黑毛和牛(特撰牛ミスジ)(￥1800) – 肉味濃油份非常充足，比香港買到的鹿兒島牛好食好多，但價錢只係四份一。

鹿兒島地鶏(地鶏塩焼き)(￥800) – 又淡又鞋口，叫錯了呢味。

鹿兒島香腸(￥550) – 普通好食的香腸。

A4鹿兒島黑毛和牛(極上ヒレ)(￥2800) – 雖然肉味很夠，但實在太多油了，非常滯，唔係幾接受到。

小太熊只吃了一件便叫太肥頂唔順。

馬肉刺身壽司(￥1900) – 味道很像和牛壽司，肉質鮮嫩入口甘香，可惜壽司的飯太濕太鬆散。

食完返到酒店都21:30，上天台的露天風呂浸一浸。

Hotel Dormy Inn的天台露天風呂 霧桜の湯

今晚瞓6hr，明天5:30起身行山。

補充資料 :

1.)     博多駅乘JR往原田駅“筑紫野いちご農園” 車程19min，單程¥370，可用JR Pass。

2.)      博多地鐵站 乘火車直往JR今宿駅“唐泊恵比須かき小屋”燒蠔場，單程¥510，車程37min，因為由博多至姪浜的10個站係地鐵線，所以用JR Pass要買¥300地鐵票才可入閘，到今宿駅出示Pass便可出站。回程時可以出示Pass先在今宿駅上火車，回到博多地鐵站出閘時在票務處補回¥300便可出閘。最抵最方便當然係¥520買張一天地鐵票啦。

3.)     從今宿駅乘的士往“唐泊恵比須かき小屋”燒蠔塲約15min，車費¥2270。

4.)     從“唐泊恵比須かき小屋”乘巴士往今宿駅車程20min，車費每位¥430。

5.)     博多駅乘JR特急往鹿兒島中央駅車程90min，單程票¥10650，可以用JR Pass，必須要Book位。

6.)     Hotel Dormy Inn霧桜の湯ドーミーイン鹿児島晚上有免費拉麵供住客宵夜，天台有露天桔仔風呂，環境唔錯。

---待續---