九州 鐵道行(3) – 九州版富士山 開聞岳火山

九州版富士山 開聞岳火山山頂

開聞岳是九州鹿兒島縣最南端的火山，高924m，外型似足富士山。登上開聞岳山頂比上富士山容易得多，從登山口巴士站開始來回山頂只需6hr，天清時在山上可這望屋久島，是遊鹿兒島一個很健康又特別的節目。但最好穿上行山鞋和帶隻勞工手套。

九州 鐵道行 – Day 3

今日節目極豐當，時間緊迫，所以晨早05:30便要起床趕火車往 指宿駅。

早上只有 2℃，從酒店快步行15min到鹿兒島中央駅，買了些飯團和牛角酥做今日的早餐和午餐，乘06:21 – 07:27 JR南下 指宿駅。

開往 指宿駅的早車，只有 2卡，15min前已可上車。

<<指宿>>

火車準時到達指宿駅，附近都冇乜人氣。

火車站馬路對面是交通售票處和往開聞岳的巴士站，在這裡可以買張￥1000的 1日巴士票，慳返唔少車錢。

巴士07:55開出，沿途見到彩虹呀。

在巴士上遠望 開聞岳，真係似足富士山喎。

08:45巴士到達 開聞岳登山口，落車。

08:47從這裡起行，出發。

開始一段係行馬路，只行10min便到 1合目。

繼續行便見到這樹林，氣氛都幾恐佈。

09:07行到2合目，從這裡開始便要不斷行山路了。

開頭一段山路唔太難行，但最好著行山鞋啦。

09:40到達 4合目。

09:56行到 5合目，這裡有處觀景台可休息食啲嘢。

在平台望出去啲風景幾靚架。

繼績上山，越行得高風景越好。

在這裡可以遠望 屋久島，可惜今日霧氣重見唔到。

再上山會見到有個山洞，叫 仙人洞，但又話危險叫人唔好入去。

過了 7合目山路開始難行了，要高高低低手脚並用跳來跳去，所以最好帶隻手套囉，但我事前唔知所以冇帶。

10:48行到 8合目，仲有最後800m。

居然開始見到積雪，積滿在山路和樹葉上。

大件事，越來越多雪，我冇預咁凍咁惡劣架，開始擔心上唔上到山頂。

11:08終於行到 9合目了，還剩最後400m。

頂！得 -2℃，冇帶手套呀，啲手指凍到好痛。

2隻嘢忍住凍都要影張靚相先。

爬上這條木梯，隻手要捉住啲雪借力，冇凍傷手指算係見證咗神積了。

將近上到山頂時，雪景又確係靚到暈。

最後52m便到山頂了，今次終於唔駛再登山失敗了，因為最近幾次行山都唔成功。

11:33成功登上 開聞岳山頂，好開心。

山頂上又凍又大風，鼻哥耳仔手指都凍彊了，只係影了幾張相，監硬留 5min睇吓風景。

11:37開始落山，中途休息了15min食嘢，14:17回到起點。

還有半個鐘才有巴士，便到附近的 枚聞神社逛逛，從巴士站行6min便到。

枚聞神社(ひらききじんじゃ) – 普通日本神社，間一間場還可以，專程去就無謂了。

下個節目係坐14:43的巴士去 唐船峽食流水麵。書話，唐船峽是流水麵的發源地，每天湧出10萬噸甘泉般的清水，被泉水泡過的麵，清涼甘香咁話喎。

巴士14:50便到 唐船峽，沿摟梯直落就到 流水麵店。

看見餐廳了，要趕快在15:00 Last Order前落單。

唐船峽谷內養滿了鯉魚和鱘龍。

嘩！我今日很豪，包晒個場同小太熊撑枱脚，實行縱壞小太熊。

日本燒酒(￥330) – 比得上强國的 玉冰燒。

流水麵套餐(A)(￥1650) –有燒河魚、鯉魚刺身、飯團、麵豉湯和一大盆流水麵，味道很鄉土又有特色，值得一試呀。

2份套餐份量的流水麵，足夠任何人食到飽。

先把麵條放在流水中行幾個圈，再用筷子挾起佢。

蘸上葱和醬油一齊食，一啖咬落去，麵條真係清涼彈牙，從未吃過如此彈牙的涼麵，值得專程去一試。

很從容地享用了 1hr午餐，乘16:04-16:35的巴士返回頭去 日本另一頂級露天風呂“Healthy Land(ヘルシーランド)”，巴士站落車後行10min到海邊便到。

Healthy Land(露天風呂ヘルシーランド) 的入口，今日女賓部面向這山峰浸泡。

男賓部就面向開聞岳睇日落。

但幸福唔係必然的，男女賓部不時會對調。

當氣温只有 5℃，可以想像在行完 1日山後，可以一邊浸泡在這温泉一邊欣賞日落下的開聞岳係幾咁寫意。

涼完身後，在大堂飲了支鮮奶，甘香到冇朋友。

浸完都天黑了，乘尾班巴士(18:05 – 18:29) 返指宿駅，在火車站旁的名店“青葉”食鹿兒島豬肉。

さつま黒豚と郷土料理 青葉

店內坐位很濶很舒適，最多坐20人，我們2人坐了入房。

泠清酒 菊水の辛口(￥720)

二人份量的 鹿兒島黑豚鍋(2人價￥4320) –大大份，黑豚肉係極品，豬肉味極濃，美味程度絕不讓鹿兒島的和牛比下去，下次一定再食。飲食男女話，這裡的黑豚被飼養時都會讓牠們浸温泉的，唔知堅定流呢。

只有70min食這餐飯有點匆忙，但過程都非常Enjoy佢嘅美味。

乘19:47 – 20:52的JR回鹿兒島中央駅，住昨日的酒店Hotel Dormy Inn。

<<鹿兒島市>>

鹿兒島中央駅上的 幸福摩天輪

路過 鹿兒島市屋台村，但只係假屋台，唔去都唔可惜。

鹿兒島市四處都可見的石像

晚上再上天台的露天風呂 霧桜の湯浸一浸，消徐一整日的疲倦。

明天可以07:00才起身，瞓足6.5hr。

補充資料 :

1.)     鹿兒島中央駅乘JR往指宿駅 車程66min，單程¥1000，可用JR Pass。

2.)     在 指宿乘巴士遊覧可買 1天巴士票，只￥1000，坐2程已返本。在指宿駅馬路對面是交通售票處買票。

3.)     指宿駅乘巴士往 開聞岳登山口車程50min。

4.)     Healthy Land(露天風呂ヘルシーランド) 入場費每位￥500，要自備毛巾或在大門口買。

---待續---