九州 鐵道行(5) – 漫遊 霧島火山 • 溫泉

九州霧島溫泉酒店 – 旅行人山莊 赤松の湯

九州霧島溫泉酒店“旅行人山莊”位於丸尾溫泉區最高處，私隱度極高，山莊內有5個露天風呂位於山林之中，靈氣逼人，其中以赤松の湯靚得最過分。山莊內外亦時常有野生鹿出沒，隨時一邊浸溫泉一邊和鹿仔打招乎。

九州 鐵道行 – Day 5

<<指宿>>

今朝06:30起床上天台“天の湯殿「天空野天風呂」”浸溫泉，跟著07:30食早餐。

早餐有魚有肉非常豐富，住多幾日實重10磅。

先來 紅蘿蔔汁一小杯清清腸胃。

溫泉豆腐 賣相滿分

昆布麵豉湯好正，每人2碗。

食完早餐返房浸一陣浴缸，執埋嘢，08:45離開酒店，乘的士(¥770)到指宿駅，剛趕到09:01開往鹿兒島中央駅的JR。

10:20到鹿兒島中央駅，¥500 Lock好大行李，在火車站附近行街食嘢。

軟雪糕(¥250)，鮮奶(¥147)，一般日本食品的高水準。

11:50乘JR指定席往 霧島神宮駅。

12:34到達 霧島神宮駅，先把大行李Lock在火車站(¥500可以Lock 24hr)，只帶輕便行李出發，方便行山。

霧島神宮駅外的巴士站。

乘這12:56的巴士(¥480)往丸尾，車程28min。

到達丸尾後，幸運地見到架的士，立即截咗佢，直到巴士站 大浪池登山口 車費¥2320。

<<霧島火山>>

巴士站 大浪池登山口

從這裡出發不斷向上行35min便到霧島火山湖 大浪池。

沿途路上積滿雪，非常跣，我落山時真係跣底了，好彩冇受傷。

在半山遇到雪人呀！好得意。

繼續沿途上山都係滿地雪，唔穿雪爪都幾危險。

跣住跣住終於响14:25上到 大浪池了，叫做行過霧島火山啦。

霧島火山 大浪池

在池邊四圍行一陣，約15:00要落山了，因為路太跣，落山比上山更耐，用了足足40min才回到起點。

在登山口乘每日只有一班(16:04)的巴士，返回丸尾¥320。

落巴士後想坐的士上旅行人山莊，但今次唔好彩了，冇車，要行30min上山頂的酒店。

<<丸尾>>

開始15min不斷落斜，到達這路口後向上不斷行15min便到，條路都好很斜，好彩唔駛揹大行李啫。

沿途見到幾個鹿牌，即係經常有鹿仔出沒架。

行到死死吓得幾度都標晒汗，終於到 旅行人山莊了。

一位女職員見我响門口影相，即刻出來招乎我。佢見我標晒汗，話叫我下次可以call佢哋去巴士站車我上來喎.....冇所謂啦，我一向唔喜歡做廢人嘛。

旅行人山莊的後花園

山莊內的 足湯“龍石の湯”

今次住大露台上一層的和洋室，看着這個View。

雙人和洋室(含雙人早晚餐)每晚¥31968。

房間有超大露台，景觀都好靚。

山莊外有條自然步道，話有野生鹿仔架喎，唔知真定假呢。

再向前行就係山莊的樹林了，明早有時間至行。今次右轉到私人風呂。

山莊4個私人露天風呂之一“もみじの湯”

深山中的浸溫泉，難得的體驗，偶然還會有野生鹿經過架，只係今日見唔到咋，明早真係見到有呀！

日落西山前到公用溫泉嘆嘆～

大隅の湯(小太熊攝)

我浸 錦江の湯，浸泡在這裏，可以同隔離的小太熊吹到水架。

黃昏日落浸溫泉，做人有時候其實唔係太差啫。

浸完溫泉19:00在旅館食晚飯，都肚餓了。

晚飯餐牌，共10道菜，非常豐富！

成枱都係，賣相好得，見到就流口水。

4色刺身 – 質素普通，但呢個價錢我係滿意的。

整體上其餘食物都係普通，但氣氛很好的。

鹿兒島縣黑䐁肉雞肉野菜鍋 – 豚肉和昨晚差不多咁正，好好味。

甜品果物 中上貨式

飯後回到房間休息一陣嘆吓世界。

今天送的宵夜甜點

晚上浸另一私人露天風呂“ひのきの湯”

同樣位於深山之中，靚到冇朋友的溫泉，延年益壽啊！

今晚很舒服，可以瞓足8個鐘了。

補充資料 :

1.)     指宿駅 乘JR往鹿兒島中央駅車程86min，單程¥1000，可以用JR Pass。

2.)     鹿兒島中央駅 乘JR往 霧島神宮駅 指定席單程¥1960，車程44min，可以用JR Pass。

3.)     旅行人山莊外真係有野生鹿仔，應該預留時間行一行山莊外的自然步道。

4.)     旅行人山莊提供免費接送往來丸尾巴士站，可以致電預約。

5.)     從丸尾乘的士往大浪池登山口車程約15min，車費¥2320。

---待續---