動感韓風 • 首爾(1) – 韓國首爾漢江煙火滙演

2016年10月 韓國首爾漢江煙火滙演

韓國首爾的漢江，把首爾市分成南北兩岸，有些像上海的黃浦江和曼谷的眉南河，是吃喝濕平以外旅遊首爾的好地方。今次短遊首爾的主要行程便是圍繞著漢江玩，感受一下首爾人的假日時光。

動感韓風‧首爾 – 序

今日其實冇乜心機去旅行，禾從未試過出發前完全冇睇過小太熊預備的行程和資料的，今次真係冇心機到咩都唔想睇，幸好小太熊今次只Plan了簡單的行程，佢想禾身體好一些，所以盡量安排些動感的行程。

今日會坐Jeju Air零晨飛首爾，放工回家後可以瞓一會才出發去機場。

今晚屋企的夜景依舊好靚，但好快便冇得再睇了。

今次因為冇晒啲信用卡，唔可以再入侯機室食免費嘢，往後的日子會越來越差了。

動感韓風‧首爾 – Day 1

<<首爾>>

飛機01:30起飛，05:45飛抵首爾仁川機場。勢估唔到勁多人排隊入境，排足55min才過關，07:00才順利入境。

今天第一個節目是到 首爾三清洞的「北村」遊覽，順便食埋早餐。「北村」有大量韓國古建築物和茶館，如果唔想濕平，在這裡消磨兩三粒鐘是唔錯的選擇。

入境後首先從機場乘地鐵到 鐘閣站(No.131)，車程75min，用T-Money車費₩4150。出了地鐡站後向北行20min便到「北村文化中心(북촌문화센터)」，沿途會經過些細景㸃。

曹溪寺 – 普通一間中式佛寺

森吉街 – 佈滿韓式舊建築，很多已經變成韓式餐廳，但時間太早，全部未開門。

到達目的地，位於 北村外圍的「本粥(본죽)」，小太熊話佢啲粥好出名喎，禾就大鄉里未聽過。

去到已經差不多09:00，但只有一個客，幾清靜。

鮑魚粥(진전복죽)( ₩15000) – 勁大碗，夠2人食，鮑魚份量唔少，啖啖都有，但切得很碎，連米粒都大過佢，鮑魚本身很淡口，個粥底唔錯，食完個胃好舒服。

松茸粥(자연송이쇠고기주고) (₩12000) – 菌味很香濃，粥底靚，好味道。小太熊專程來吃這碗粥的，是季節限定。

食完早餐便沿著小街逛逛 北村文化中心(북촌문화센터)，趁早還不算多人，可以清清靜靜看看首爾的古建築物。

Books Cooks(북스쿡스) – 是 北村很出名的茶館，原本想在這裡飲杯嘢，但不知為何今日冇開門。

繼續遊覽 北村八景，但其實景色都是差不多。

東洋茶文化館(Asian Tea Museum)(동양차문화관) – 位處 北村文化中心最高處，每位入場費要₩5000，包一杯飲品，休息一吓都唔錯。

露天座位可以從高處望晒 北村，環境算是最好了。

小太熊飲 熱綠茶，淡到水一樣；我飲 凍生薑蜜，太甜薑味亦唔夠，當是買個位休息一會兒吧。

沿高處的石級行返落大馬路，結束 北村行程。

馬路對面便是今天午飯的地方，小太熊Target了的麵店「三清洞手撕麵(삼청동수제비)」。

三清洞手撕麵(삼청동수제비)

11:30已經很多人了，剛好還有一張2人枱，好彩。

前菜是自助的，任攞任食。

韓國米酒(동동주)( ₩3000) – 飲過很多次了，酸酸的幾過癮，和尼泊爾山區村民自釀的米酒和在南非貧民區飲的自釀啤酒差不多味道。

煎海鮮蔥餅(녹두전)( ₩13000) – 味道合格，不過不失，但肯定比香港的韓式煎蔥餅好食好多。

手撕麵(수제비)( ₩8000) – 是招牌麵，味道和質感都冇乜特別，像一碗二流的刀削麵。

食完麵，沿景福宮外圍慢慢行去「土俗村蔘雞湯」吃午餐，景福宮唔入去了，以前去過2次，金秋和雪景都見過了。

景福宮外圍

土俗村蔘雞湯(토속촌삼계탕) – 12:25去到已經排了62人，好彩條隊去得很快，只排了20min便有位。

真係 全店滿座，個個都係食蔘雞湯。

韓國真露(₩4000) – 隻酒太勁，只飲了唔夠一半，有同事教禾，可以用個膠水樽倒起佢，留返下一餐再攞出來飲喎。

土俗村烤雞(전기구이통닭)( ₩15000) – 電爐烤的，味道普通牡咩雞味，只可以說是唔難食。

土俗村蔘雞湯(토속촌삼계탕)( ₩16000) – 蔘味和雞味都偏淡，雞身內的糯米飯幾好味，整體上過得去。

食完飯，乘地鐵從 景福宮站(No.327)到 市廳站(No.132)，去洒店check-in，T-Money扣₩1250。

首爾 南大門，位於酒店對面。

Courtyard Marriott Seoul Namdaemun – 今次會連續住2晚，小太熊貪佢係新洒店，乾淨啲喎。

雙人房(不包早餐)每晚₩165,000 – 房間係很乾淨舒適，但只是望樓，收得都幾貴。

在房間休息一會兒，便乘地鐵到 汝矣渡口(No.527)( ₩1250)，今晚會在那裡睇煙花。

地鐵站「汝矣渡口」內勁多人，因爲今晚有煙花，中午又有嘉年華會，所以像新年咁多人。

小太熊原本想在 汝矣島(여의도)上租單車踩2個鐘，但島上近漢江邊的單車店不知為何連續三日都冇開門。

好彩 汝矣島上的公園內亦有單車租，我們便租車在島上兜兜風。

沿公園的單車徑都很多人踩車，而且一般人的技術都較差。

公園內冇乜特別景㸃，只適合冇乜節目時消磨吓時間。

在 汝矣島上，沿著 漢江都很多人踩車。

首爾的 單車徑非常完善，和馬路完全分隔，又濶又安全，比台灣和香港更好。

這次租的單車性能很差，冇得轉波，上斜非常吃力，所以覺得唔係幾好玩，踩了一個小時便還車算了。

比預算早了還車，所以特然多了2個鐘唔知去邊好，唯有在漢江邊無無聊聊行吓嘉年華會。

很多韓國人已經一早在草地上霸位飲酒吹水，等晚上睇煙花。

嘉年華會有很多攤位，有很多本土文化及小食。

這擋熱狗腸最多人，小太熊話肚餓了，禾便排隊買條腸比佢食。

巨型脆皮豬肉腸(₩3000) – 味道很好，但燒得唔夠熱。

汝矣島上越夜越多人，韓國人直情在公園草地上露營。

行到大約18:30已經非常迫人，要開始霸位了，禾㨂好位後，便企响果度唔再郁，靜靜地等多50min直至放煙花。

19:20 世界首爾煙火節 準時開始，煙花巧鳩呀。

整場煙花都好靚呀，而且當日天清有風，濃煙很快便吹散。

睇到20:05，見到有人開始走了，決定唔睇最後的20min，怕散場後太多人，可能幾個鐘都迫唔到上車。

最近會場的地鐡站 汝矣渡口(No.527)封了，要行1km到較遠的 汝矣島站(No.528)站才有地鐡坐，由於沿途實在太多人，行得極慢，差不多用了40min才行到地鐵站。

從 汝矣島站(No.528)站去 明洞(No.424)站(₩1250)，到Line Friends Shop探一探 熊大先，這間店有隻3m幾高的 熊大坐在門口，想同佢影相要排隊架。

熊大好大隻呀！100隻小太熊加埋都冇咁大。

原本想買些熊大兔兔的浴簾和地毯，但居然冇得賣，有些失望。

跟著慢慢行去附近的食店 新村食堂(새마을식당)食晚飯，小太熊話那最出名食烤豬肉，好好味的。

新村食堂(새마을식당)

接近22:00了，開始有些吉枱唔駛等位。

全店用炭火來烤肉，勁大油煙，強力抽風機都抽唔掂。

五花腩肉(소금구이)(₩10000) – 只有2大件共150g，賣相一流，枱枱都叫。

這鹽燒五花腩豬肉味幾濃，很好食，但可惜始終比不上2009年在濟洲島吃的 極黑豬腩肉炭火燒。

韓式辣醬豬肉薄切(열탄불고기)(₩16000) – 每份₩8000但最少叫2份，是招牌菜。

伙記替我們 整盆肉放進烤爐，好香啊。

這豬肉片的肉味比五花腩更香，而且小小辣十分冶味，送清酒一流。

今早飲剩的 真露用水樽入起了，現在拿出來飲埋佢，但又比小太熊話我Cheap了，其實只係唔想浪費啫。

辣泡菜冷麵(₩4000) – 湯底帶著微酸辣相當醒胃消滯，麵質又爽口又彈牙，食完一碗再叫多一碗食。

飯後慢慢行15min返酒店，穿過隧道時見到很多露宿者，都有啲驚比人老粒。

補充資料 :

1.     ₩10000 兌 HK$71。

2.     Jeju Air香港來回首爾機票(包寄15kg行李)每位HK$2260。

3.     首爾仁川機場入境要預最少1hr排隊。

4.     從仁川機場乘普通地鐵地市中心(鐘閣站)，用T-Money扣 ₩4150，車程75min。

5.     在首爾市內乘地鐵，用T-Money一般每程扣₩1250。

6.     汝矣島有單車租，頭1hr租金₩3000，然後每15min加₩500，日落前要還車，可以用1張証租2部車。

7.     出租的單車質素甚差，我第一天租錯加沒有波段的車，第二天的轉波制壞了，踩得甚吃力。

---待續---