極上 • 北海道(完) – 北海 滋味

富良野餐廳くまげら(Kumagera) 生牛肉飯

餐廳くまげら(Kumagera)位於 富良野駅附近，最著名係 生牛肉飯。那是將新鮮的A5富良野和牛切成片片牛肉刺身，再覆蓋在以富良野產的大米煮成的飯上面，牛肉片上的油脂分佈適中，片片都有雪花，入口嫩滑肉質軟綿無筋，牛味香濃，牛脂香而不膩，混合頂級的米飯，令我一試難忘，好想再食。

極上‧北海道 – Day 17

<<富良野>>

繼續上一篇Day 17行程，從 富良野果汁工場步行到 富良野紅酒厰「ふらのワイン工場(Chateau Furano)」。

ふらのワイン工場(Chateau Furano) – 是富良野的冠軍紅酒工場，紅屋磚建成的酒廠座落在葡萄山丘上，以富良野的本土葡萄作作釀酒原料，每年生產30萬瓶紅酒，紅酒的釀製都設於攝氏15-18度的地下室。

地下室藏有大量百年佳釀，唔知有冇變壞呢。

參觀完地下室，可以到樓上買酒。

免費自助試飲紅白餐酒，我覺得味道太酸，酒香唔夠，和澳洲歐洲酒眀顯有段距離。

這裡還有免費試飲葡萄果汁，味道和剛才果汁工場飲的差不多。

自費￥500試了杯紅酒，品質同樣麻麻，做了儍仔。

紅酒廠外的 薫衣草園，面積不大但亦好靚。

還有油菜花田，唔弱得過薫衣草啊！

飲完酒，要行3km才出到 富良野駅，這裡冇的士截架。出到 富良野駅，首先去食 生牛肉飯。

くまげら(Kumagera) – 小太熊話，這裡的生牛肉飯好出名架，一定要來食。

雖然不是食飯時間，但全店爆滿，等了15min才有位。

富良野和牛西冷(250g)(￥4300) – 肉質鮮嫩，牛油香和牛肉味較均等，質素甚高的和牛，同飛驒牛或宮崎牛有得揮，勁抵食。

富良野和牛刺身飯(￥1980) – 屬於神級的和牛刺身飯，牛肉入口即溶完全冇根，肉味和油香均衡，配上香軟飯粒，口感和味道同樣完美。這刺身和我早年在神户吃的神户牛刺身同樣頂級，是我吃過最好食的牛肉刺身飯。

吃完一餐還未夠，因為仲有本土名物未試。

日本多年來都提倡「ご当地グルメ(當地特色美食)」，其中北海道富良野的「咖喱奄列飯」便是其中推廣的本土美食。在富良野每個地方都有多間食店提供 咖喱奄列飯，賣相可能有少許分別，但必須依照特定的指引製造，包括使用當地出產的米、雞蛋、芝士、牛油、蔬菜和肉類，更一定要加入富良野牛奶，非常嚴謹 ! 小太熊話這間「唯我獨專」的咖喱奄列飯出晒名好好食，幾飽幾食唔落都一定要食喎。

「唯我獨專」咖喱奄列飯 – 幸好早些少到剛好有位，15min後已經排了十幾人等位。

紅蘿白汁(￥380) – 非常醒胃，用來分解剛才的和牛。

咖喱奄列飯(￥1150) – 自家製的咖喱汁沒有一般日本咖喱那麽甜，帶有適量的香料味道令咖喱味更見香濃，雞蛋加入了芝士和牛奶，非常香滑，與咖喱汁非常合襯。

完本食完飯會回到 中富良野睇煙花的，但行了一日都好攰了，又成身臭汗，決定取消行程，直接乘火車(￥1070)返 旭川，車程75min。

<<旭川>>

返到 旭川又身㡾想食埋最後一餐，決定去 旭川評分最高的「成吉思汗大黑屋本店」，食炭火燒羊肉。

  

成吉思汗大黑屋本店 – 內有約30個位，外面排了20人，等了一個鐘才有位

室內佈滿濃煙，店內的抽風系統甚差，食完周身臭油煙味

羊肉湯(￥350) – 是味精水，冇乜羊肉，又貴又唔好味，明揾笨實。

生ラム成吉思汗(￥700) – 羊肉薄切，肉味唔錯，但不及中午那間 白樺好食。

羊肩肉(￥700) – 味道和上一碟差不多，多了㸃油脂香，更加好味。

ラムロール(￥600) – 肉質較鞋，味道冇上面2碟咁好。

叫完羊肉，伙記會幫你燒埋。

因為用炭火，所以燒出來的羊肉特別香口。

這餐飯整體上很好味，只是比不上中那一餐。

返酒店浸完溫泉便瞓覺了，明天是最後一日，要回家了。

極上‧北海道 – Day 18(完)

今朝05:45要起床，趕乘06:30從 旭川開往 扎幌的巴士。巴士站正正在酒店樓下，小太熊就係貪佢呢樣野才㨂這酒店。

旭川開往 扎幌的巴士，車費￥2060，車程120min。

<<新千歲>>

巴士準時回到扎幌駅，立即轉JR去新千歲機場(￥1070)，車程40min。

去到機場才09:30，但16:30才是起飛時間，咁點解要咁早到機場呢？因為小太熊話要預留時間比佢在機場濕平喎。但濕平之前，佢話要先吃機場內的長龍拉麵店「一幻」。

拉麵店「一幻」10:00才開門，但09:45去到已經排了廿幾人等開門了。

終於等到開門，裡面可以坐三十多人，我可以第一Round入到去食。

一幻原味拉麵(そのまま)(￥780) – 這是以蝦頭熬製湯底的拉麵，加上炒香了的蝦乾碎，拉麵一上枱便蝦香四溢，使用粗麵以及肥瘦適中的叉燒，吃後那陣鮮蝦味揮之不去!

碗拉麵好好味，而且價錢唔貴，勁抵食。

吃完麵，小太熊又去了另一間人龍店「Bake Cheese Tart」買芝士撻，佢好鐘意排隊架。

  

流心芝士撻(￥194) – 芝士味道超濃郁，外皮鬆化勁香牛油，極度邪惡的甜點。

小太熊話喎，新千歲機場附近開了個Outlet「Rera」，專賣平貨，好多嘢濕平架，一定要預三四粒鐘比佢慢慢濕喎。

從機場往Rera的免費接駁巴士，約半小時一班車。

Rera特賣場，內有大量商舖和食店，可以給旅客消磨半天。

小太熊興高采烈地行，不斷睇衫、睇鞋、睇化裝品、睇乜乜、睇物物，又幫我買了2對波鞋，買吓買吓發現了我牡咩心機，因為濕平我一向麻麻，攪到小太熊話我令佢買得好唔舒暢又唔爽喎。

白之戀人雪糕(￥380) – 行到悶悶哋買一杯食，只是杯好味的北海道牛奶雪糕，冇乜白之戀人味。

因為我冇心機，所以小太熊只行了個幾鐘便走了，坐巴士返機場。

還有個幾鐘才入閘，所以在機場大樓再行。原來機場大樓仲多野賣，有齊全北海道各區的土產食物。

行過這商店，發現有新鮮禮文島馬糞海膽賣呀，立即買一份即開即食。

新鮮禮文島馬糞海膽(￥4318) – 今天才包裝，用鹽水浸着，保鮮期只有3日。這包海膽約100g，和禮文島上吃到的一樣咁好食。

原本小太熊想買多幾包回香港，可以自己嘆多兩日又可以送禮，夠晒名貴大方，但我諗諗吓決定唔賣了。

我覺得，世界上最好食的海膽，不應該離開北海道，甚至不應該離開禮文島，要食，應該自己來食。此外，最美好的回憶，亦不應該離開北海道。

時間很快便到14:30，可以入閘了。因為今天會坐國泰商務客位，所以可以用埋機場貴賓候機室。

北海道機場貴賓候機室Royal Lounge

候機室很少人，環境好過香港人山人海的候機室多多。

但食物就甚差了，完全冇野食。

北海道紅酒。 唔係咁好飲，又酸又鞋口。

食物只有散裝伊麵球和些粉賣￥120的飯團，死味。

16:00準時上機了，這班飛機的商務位很差，只是濶一些，唔可以打直瞓低。

上機後空少即送上香檳，叫做好過經濟位啦。

起機了，這雲海都有在 星野山頂看的咁靚。

可樂和澳洲紅酒，好飲過北海道紅酒多多啦。

飛機餐唔好食，頭盤和經濟位差不多。

主菜 澳洲西冷牛扒 – 又乾又鞋，牛味很淡，食了三分一就頂唔順了，仲衰過經濟位餐。

小太熊吃的 㗎喱海鮮飯 – 好少少，叫做入得口。

甜品 芝士拼盤 – 呢味最好食，送紅酒一流，唯有當主菜食了。

水果拼盤 – 品質一般啦。

哈根大師雪糕 – 呢杯嘢坐經濟位都耐唔中有得食。

熱奶茶 – 幾有茶香，算合格啦。

回到香港都天黑了.......心情極度差

補充資料 :

1.     ￥100 = HK$7.57 (永恆找換公司)

2.     乘火車從 富良野到 旭川駅，車程75min，車費￥1070。

3.     乘巴士從 旭川往 扎幌，車費￥2060，車程120min。

4.     從 扎幌駅 乘JR去新千歲機場，車費￥1070，車程40min。

5.     單程 國泰商務客位從 扎幌到 香港，Asia Mile 30000里換取。

-----極上‧北海道(完)-----