2017年10月19日

西伯利亞 萬里長征(2) – 踏進 普京帝國 • 盛世俄羅斯

宇宙最強的型男,曾經徒手力戰北極熊300回合的強人總統,比強國甩毛主席更強的Sir

俄羅斯聯邦,前蘇聯最大的加盟國,現為當今世界上最大的國家,領土範圍覆蓋整個亞洲及歐洲11個時區,天然資源豐富,石油多過礦泉水。俄羅斯國民大都十分敬重普Sir,隨街都會見到普Sir嘜頭的啤牌、俄羅斯公仔或聖相等紀念品,可見普Sir的受歡迎程度。在普Sir的強勢領導下,俄羅斯亦踏進了空前盛世的年代。




西伯利亞 萬里長征 – Day 1

今天陽光普照,航機應該可以準時起飛了。好的開始,希望今次旅程順利,無風無險。


今天會乘S7航空黃昏機往 海參崴,上機前先在機場Plaza Premium Lounge食免費晚飯。

Plaza Premium Lounge – Gate34,食物都豐富好味,魚蛋粉、XO醬腸粉和生啤都正。


航空公司好衰,把我和小太熊個位分開咗,正衰人。飛機準時起飛,但去到 海參崴時太大雨降落唔到,要改飛1000km外的俄羅斯城市 伯力(Khabarovsk)暫時降落,再等運到。



西伯利亞 萬里長征 – Day 2

<<伯力(Khabarovsk)>>

01:20降落Khabarovsk Novy Airport,個個立即霸幾個位眠一眠。


運氣不是太差,只等了個多小時,03:10已經可以再起飛,04:20成功在雨中降落 海參崴。很快04:40已經攞埋行李入埋境,立即在機場的ATMRUB 10000用住先。


<<海參崴(Vladivostok)>>

行到Taxi BoothGoogle Translate想買的士飛去酒店,但個睇場的俄姨只答了我一句「No Taxi」。嘩!估唔到佢識番文,後來我才知道一般俄羅斯人最叻的英文就係「NO」和「Busy」,整個行程聽得最多。

冇辦法,唯有自己行出外面搵車,落住大雨截車都幾麻煩,濕晒腳,仲要同機組人員爭車,幸好都有些零星的士駛進來,爭了幾部車便有,司機開價RUB 1500,成52km距離又唔貴喎,立即成交。05:10開車,06:00終於到達今天在 海參崴的酒店Teplo Hotel,比原定時間只是遲了3.5hrS7航空的效率都很高。

落車時我比RUB 1500比司機,但佢支呢啫囉和我講俄文,又攞張RUB 500銀紙我看,小太熊完全唔明佢噏乜春,但我明喎,佢話車程很遠,條路又上又落佢揸車好辛苦,想要多RUB 500車費囉。

邊可以咁架,我唔啋佢直接行入酒店算了。

Teplo Hotel – 位於海參崴火車站附近400m的小酒店,地理位置方便。


雙人房(連雙人早餐)每晚RUB 3510 – 房間非常細,一眼望晒衣櫃都冇,似炮房多過酒店,冇冷氣冇風扇只有望街景的窗,有浴室但廁所要公用,算幾乾淨。


立即沖個涼瞓一陣先,瞓到09:30起身食早餐。

早餐在大廳食,幾有Home Feel


食物一般啦,腸仔烚蛋Cereal多士都有,味道都唔差的。


食飽後開始行街了,首先到附近的銀行換錢,看了3間滙價間間不同,最後換了USD2000USD 1RUB 58.6

跟著到附近的 海參崴大景點「戰士廣場 pl Bortsov Revolutsil Square

戰士廣場(pl Bortsov Revolutsil Square) – 今天海參崴市有節慶,廣場十上很多攤位,十分之熱鬧。


還有不同單位的大巡遊,十足嘉年華會。


性感俄國美女都一齊巡遊


在廣場中心沿著海旁向東行,經過GUM百貨公司,但這間GUM好細,不像莫斯科紅場旁邊的GUM咁大。


聖安德魯敎堂 紀念二次世界大戰勝利的敎堂,位於C-56潛水艇旁邊。


教堂旁的石碑刻滿了二次世界大戰期間陣亡的蘇聯軍人名字。


C-56蘇聯退役潛水艇 這潛水艇曾經參與二次世界大戰,仲話佢成功擊沉了14艘德國戰艦添,蘇聯當年都幾威水。入場費RUB 100


潛水艇內部分已經改為博物館,展覽舊日蘇聯軍隊的裝備。


潛水艇內的設備很複雜,還有潛望鏡架!


這是魚雷的發射口,好堅喎。


碌魚雷都好粗,爆起來相信都很勁,德國戰艦應該係衰响佢手上了。


C-56潛水艇旁邊是退役戰艦Storozhevoy Korabl(登船RUB 50)


船上冇乜特別,只是可以從不同角度欣賞 金角灣大橋(Golden Horn Bridge)


繼續沿海東行,向纜車站進發,沿途路過些景點。

金角灣大橋(Golden Horn Bridge)


1904 – 1905日本俄羅斯戰爭紀念碑


Military-Historical Museum of Pacific Fleet – 是個小型的軍事公園,展示早期蘇聯較小型的軍備,激似台灣集集的軍史公園。


䌫車站 是一座不起眼的建築物,除時行過龍都唔知,從這裡可以乘坐纜車上到 鷹巢山的半山觀景台,鳥瞰海參崴全貌。


纜車班次很密,唔駛5min就到半山站,車費每位RUB 12,上車後買票。


半山觀景台 𥚃可以清楚睇晒海參崴的全貌,包括金角海灣和金角灣大橋。


坐返纜車落山,落車時大意把碎銀包留在車上,幸好票務員追出來還給我,俄羅斯人真係好好人。

䌫車站附近便是巴士站,乘No.31巴士(東行約4km)前往位於金角灣末端的乾濕貨市場China Market Place,感受一吓當地的民生。在「Спортивная站」落車,車費RUB21,落車比錢,司機有找續,班次很密。

China Market Place – 非常大的市場,所有民生日用品和食品都有,內有MTC的街霸檔口賣電話卡。


乾果、凍魚、咸魚等等連豬頭都有,只是...行了半個Market也見不到有海參賣。


最後小太熊買了些水蜜桃,又甜又多汁好正架,差點比得上日本貨。


行完街市坐返31號巴士回到大廣場附近,再向西行去Sportivnaya 海灣,那裡有海灘、烤肉啤酒小食等攤位,還有機動遊戲。

Sportivnaya海灣附近的 東正教堂,這類教堂在俄羅斯多過香港的7-11


Sportivnaya海灣是個大公園,很多海參崴居民都喜歡到那裡散步消嫻,附近很多街邊小食亭售賣啤酒烤肉雪糕汽水,俄羅斯小朋友都玩得好開心。




連港式雞蛋仔都有,正呀。


海邊有個小沙灘,都有些三點式在曬太陽,雖然今天時晴時陰。


出發前小太熊已經用e-mail book了今天的晩飯,去餐廳「Zuma」食皇帝蟹,從沙灘行500m便到。

Zuma餐廳 室外坐位很熱,職員只安排了2/F向後巷的窗口位給我們,問佢可唔可以轉其他位,佢只回答一聲「NO」,這個字確係俄羅斯人用得最精最叻的英文。


看看餐牌,on9.....原來明天起一星期皇帝蟹做特價,每1kg - RUB 990,今天每1kgRUB 2310 (大約每1HK$188),雖然貴成倍有多,但是相對韓國日本香港還是平的,所以order了一隻2kg的蟹。

2kg生猛皇帝蟹 Order後職員主動拿出來給客人驗貨和影相,又幾細心喎。


日本淸酒100ml (RUB 418) – 普通Cheap ; 特飮Siam (RUB 330) – 果汁加蔬打水,幾好飮。


壽司卷「Zuma(RUB 583) – 即係三文魚親子反卷,有6件加上俄羅斯之寶Sour Cream同吃。三文魚子很甘香但份量太少,三文魚很流,壽司飯又凍又硬正rubbish,加上Sour Cream味道怪怪的,整體上好唔得掂,難食。


海膽刺身50g(RUB 605) – 入口甘苦味濃厚近似馬糞海膽的味道,夠新鮮,食完齒甲留香,是上等海膽刺身,有北海道馬糞海膽的7~8成咁好食,正。


活元貝刺身(每隻RUB 319) – 味道鮮甜的元貝,好食。


清蒸皇帝蟹2kg(RUB 4620) – 八分鮮甜,啖啖蟹肉令人超滿足,是隻好食的皇帝蟹,亦是今次俄羅斯之旅最好食的一味,而且非常扺食。


吃飯時突然狂風暴雨,幸好食完飯又停返雨,海參崴的天氣真係反覆無常。食完飯都天黑了,到聞名的 海參崴火車站一遊,順便把行程一半的火車票print出來。

海參崴火車站 西伯利亞鐵路的東方起點,舊式的蒸氣火車頭是這𥚃的地標,但後來才知道西伯利亞鐵路沿綫的很多火車站也展出了同類的舊式蒸氣火車頭。


晚上金角灣放了25min煙花,今天算幾好運啊。

今天好攰,要返酒店瞓覺了。




補充資料 :

1.)      USD 1 RUB 58.6 (當地銀行現金兌換價),即太約 HK$1 = RUB 7.48

2.)      S7航空 香港飛海參崴單程直航機票每位HK$2209

3.)      海參崴機場有多部ATM提款機,可用香港的提款卡提款,滙價和在當地銀行兌換差不多,但每次收大約HK$20手續費。

4.)      海參崴機場乘的士到火車站附近RUB 1500,約52km,車程50min。的士要上車前議價。

5.)      海參崴非常不流行英語,連火車站的出票機都只有俄文,Google Translate 是必備的Apps

6.)      在海參崴行了2日也見不到一間有Local Tour的旅行社,在網上用英文和俄文分別問了幾間旅行社都冇回覆,要在海參崴出Local Tour有一定難度。






---待續---

10 則留言:

  1. 境象很不同, 已發展了不少, 真不可同日而語

    回覆刪除
    回覆
    1. 這裡應該和大陸發展得差不多快了。你幾耐之前去架?

      刪除
    2. 他們開放不久, 說來有十幾廿年前

      刪除
    3. 那時候一定很難去了,全部俄文又冇地圖又冇Google Translate,相信會比現在去更加有趣👍🏻。

      刪除
    4. 係乜都無, 只有一本書, 不過當時都遇到好多好心人帶路, 語言不通, 大嬸捉著我的手帶我行幾個街口, 都是美好的回憶!

      刪除
    5. 對啊,以前無資料時都是去到至不斷問人,現時資料多了返而少咗這種經驗。

      刪除
  2. 海參威都好旺,記得無缐都曾經介紹過。

    回覆刪除
    回覆
    1. 係呀,我記得東方昇四圍去搵海參添,不過我都搵唔到。

      刪除
  3. 回覆
    1. 唔似是熱的,睇個樣香港的雞蛋仔正好多。

      刪除