西伯利亞 萬里長征(3) – 東方之極 海參崴(Vladivostok)

俄羅斯西伯利亞鐵路東方起點 海參崴火車站

海參崴(Vladivostok)是位於北韓和中國黑龍江毗鄰的俄羅斯沿海城市，對岸是日本，因此這𥚃多年來也是蘇聯和俄羅斯的軍事重鎮，亦是前蘇聯太平洋艦隊的司令部所在地。「海參崴」是她清朝時的中文名字，因為她曾經是清朝的領土，只是後來在1860年割讓了給俄羅斯沙皇，俄文Vladivostok是「征服東方」的意思。海參崴的旅遊業並不發達，外語極不通行，外地遊客也少，只是偶爾遇到中國大陸團。

西伯利亞 萬里長征 – Day 3

<<海參崴(Vladivostok)>>

今日天氣時晴時大雨，好彩落大雨時都係食緊飯，沒有影響到行程。

今天原本想跟Local Tour到市郊或附近的小島玩一日，晚上開始西伯利亞鐵路首段旅程，可惜出發前聯絡了當地旅行社都沒有回覆，昨天在市內行了一整天也見不到有旅行社，酒店又沒有資料加上溝通困難，所以今日要靠自己了。

Lonely Planet介紹了海參崴市郊14km左右有一處較大型的軍事要塞遺址「Fort No.7」，話從巴士站「Академическая」行上山20min便到，我check過Google Map在海參崴火車站有No.59, 106和107都會路過，於是吃完早餐Check out後便去火車站等巴士。

到了火車站看見原來No.107是去機場的小巴，司機話唔去「Fort No.7」的，於是再等另外2架，但等了30min都冇車......

想話坐的士算了，但的士司機開價RUB 700，比市價高差不多一倍，雖然唔係好多錢，條氣始終唔多順，還是繼續等巴士算了。

No.59巴士 – 從09:30等到10:13，終於有巴士了，車費RUB 21，去巴士站「Академическая」的車程45min。

車上沒有叫落車的鐘，見沿途的車站都是司機自己停車上落客的，巴士快到「Академическая」站時，見司機無意停車，而且越開越快，我便行到司機旁説next stop next stop，點知條PK唔理我的番話竟然飛站.......妖

我唯有不斷講「Fort No.7」的俄文發音，條PK司機最後駛遠了大約1km才停車，正一冚家剷。

在這條高速公路落車後，要行15min才返到去「Академическая」站。

附近完全沒有往「Fort No.7」的路牌，只能用Maps.me顯示的山路行，荒山野嶺鬼影都冇，都咪話唔驚。

行吓行吓，發現Maps.me 顯示的那條山路已經變成地盤，不能進入，只能自己找其他路向着7號堡壘的方向行，條路越行泥越濕，行到對鞋濕透了，而且勁多草到連路都見唔到，踩蛇都話唔定，正想放棄回頭時，終於見到第一座堡壘了。

7號堡壘(Fort No.7)

7號堡壘(Fort No.7)是個廢棄了的堡壘，散落在山上多處地方，堡壘內的地下通道已經完全封閉，只可以在外參觀。參觀期間，我碰不到一個遊人。

圍牆和堡壘的入口均鎖上了鐵閘。因為覺得這裡很荒涼想快些離開，所以只是快快地行了30min。

行完堡壘後出返大路，在這鬼影都冇的地方居然有部無牌的士等客，立即問價回到市中心，諗住開RUB 2000都比佢了(因為天氣熱到爆，行返落巴士站要40min，還可能要等成粒鐘才有巴士)，㸃知成16km距離佢只開RUB 400，完全是市價，立即成交出車，直往今日午餐的地點 – 北韓平壤餐廳Pkhenyan (Пхеньян)。

平壤餐廳Pkhenyan (Пхеньян)

小太熊話這餐廳真正是北韓開的，內𥚃有正宗的北韓菜，包括連 劉時鎮都好鐘意食的北韓冷麵，所以一定要試試。

步入餐廳已感到一股朝鮮之氣，好有Feel呀。

職員都是又白又滑的北韓女生。

入鄉隨俗，先來一杯俄羅斯Vodka(RUB 195 – 50ml) ; 小太熊飲可樂(RUB 120 – 500ml)。

辣泡菜豬肉(RUB 450) – 伴菜有豆腐、辣泡菜和年糕，加送6小碟配菜，豬肉味一般好，醬油味道十分濃，中辣，送Vodka唔錯，不過小太熊唔太鍾意食。始終遠遠比不上南韓的極黑豬。

海鮮葱餅(RUB 450) –普通 好食，沒有在南韓食到的咁好味，葱沒有南韓咁粗咁甜。

豬肉冷麵(RUB 450) – 超勁大碗，一碗足夠2人食，但唔好味的，豬肉冇乜味湯又唔靚，麵質很怪有㸃像薯粉，只吃了1/4便放棄了。南韓的冷麵很好味的，我可以食完一碗又一碗。

明太魚冷麵(RUB 490) – 又係唔好味的，魚肉味道很怪，後悔。

難怪北韓人去到南韓後都唔想再返去，單是食物南韓已經好北韓九條街，看來肥仔柑真係要諗諗計。

食了一餐唔多滿意的北韓菜後，小太熊決定一陣再去ZUMA食多餐好嘢才去上火車，現在還有些時間，便到附近的燈塔「Токаревский маяк」遊一遊。

「Токаревский маяк」是位於 海參崴火車站南部6km的燈塔，沒有公共交通可達，的士是唯一選擇。

在北韓餐廳門口等了15min便有的士，4km距離開價RUB 200，是貴了些少，但太小車冇得選擇了，成交。

的士只能停在燈塔700m外，最後一段路要自己行。

這是段碎石路，當地居民喜歡自駕來這裡曬太陽。

最後100m路好危險架，一個大浪便成褲濕晒，我都中了招。

在燈塔回望向海參崴市和金角灣大橋，又是另一番風貌。

離開的時候......大鑊了，冇的士，要在烈日當空三十九幾度下行2km上上落落的馬路才到最近的巴士站，熱到底底都濕透，沿途一架的士都冇，好辛苦行到巴士站時，特然有架七人貨Van停在我旁邊，司機講了堆俄文，我明喎，佢問我要去哪裏，我便用Google Translate話去「ZUMA」，6km路程佢開價RUB 300，又是有些貴，但太熱了，又唔係多錢，立即成交上車。

好快又來到ZUMA，今天的皇帝蟹做大特價RUB 990 - 1kg，一定要隻大的嘆返吓。

要了隻2.9kg的大蟹，好生猛。

2.9kg皇帝蟹(RUB 2871) – 比昨天那隻大一半，口感好爽脆，都很鮮甜，只是沒有昨天那隻咁甜，仍然是極品。

這2餐蟹是整個俄羅斯之旅最好的2餐了，未來的日子已經冇乜真正好嘢再食。

食完飯慢慢walk返去酒店攞行李，然後行去火車站，沿途在小販檔和超級市場買了很多水果、零食、紅酒和水帶上火車。火車站對面便有間大型超級市場，很方便旅客。

海參崴火車站 – 從左邊樓梯行落月台便可以正式踏上西伯利亞火車了，好興奮。

今次乘001號列車，小太熊話車次數字越細代表架車越靚，價錢亦是最貴。

水牌顯示的是莫斯科時間，比海參崴慢7hr，即是陣間19:10火車便正式開往莫斯科。

海參崴火車站唔算大，只有6個月台，這個火車站已經有90年歴史了。

001號列車的火車頭，沒有以前的蒸氣火車頭咁靚。

火車身上畫了整段西伯利亞鐵路的路缐，這個火車夢終於逐步成真了，好緊張呀。

月台上展出了舊日的西伯利亞蒸氣火車頭，是海參崴最人氣的旅遊景點，這是二次世界大戰時由蘇聯設計，美國製造的火車頭，已經70歲。

9288紀念碑 – 紀念完成整段總長度達9288km，從西方莫斯科遠征致東方海參崴的西伯利亞鐵路。

開車前45min已經可以上車，見到傳說中的俄羅斯大媽服務員了，她正在為乘客的車票對名和Passport Number。Lonely Planet説，每列車廂都有一名大媽服務員(Conductor)，她們在車上是至高無上的，乘客必須對她絕對服從，否則她會把你整治。

大媽替我檢查完車票後，帶我上車到我間房，佢還懂得簡單的英文，亦冇傳說中咁惡，只是身型和樣貌和傳說一様。

走廊鋪了紅地毯，頭等車箱係唔同啲。

西伯利亞鐵路頭等房 – 上車時已經鋪好了床單被鋪，不像二、三等要自己動手。車廂裝飾沒有在網上見到的舊款車廂咁古式古鄕，有些失望。冷氣微弱偶然標汗，窗可開。

茶枱下面有一個插頭，义電唔駛同人爭。

送了樽裝水和茶包麵包等小食，二等沒有的。

火車上的物價唔算貴，唔駛10蚊港紙有支水，可以接受。

19:10準時開車，好開心好興奮呀，終於開始夢想的西伯利亞鐵路旅程，好幸福啊。

房內有茶杯，可以攞些熱水泡茶。

嚇屎禾……熱水像咖啡咁深色，因為混了大量啡泥，大媽攪乜春呀！冇茶飲了，好彩不是泡杯麵。

剛才在超級市場買的俄羅斯紅酒(RUB 170) – 有少少似藥酒味，太甜，唔多好飮的紅酒，後來發現俄羅斯出產的紅酒都是差不多咁難飲。

隔離的二等傷殘人士車廂有浴室，沖涼每位RUB 150，水力強勁又夠熱，只限001列車，其他車次沒有浴室。

19:10準時開車了，這程車會坐71hr足足3日3夜，直達 伊爾庫次克(Irkutsk)，車費每人HK$3419。

開車後，餐卡的職員無釐頭走過來問我們明天的午餐吃什麼？原來頭等車票包了食的，佢話明天13:00會把午餐送到房間，但又冇話今晚的飯包唔包，不過包都食唔落了，吃了這麼大隻蟹現在還很飽。最後才知道，這程長途車只包一餐午餐，認真無釐頭。

開始一段路的風景都OK，有海有草地，由於很有新鮮感，時間過得很快，一陣就過了2hr，到達一個中途站「Уссурийск」。

<< Уссурийск >>

當地時間21:10到達中途站「Уссурийск」，停車15min可以落車鬆一鬆，但大媽話只可以行「Five minutes」，佢驚我上唔切車就大近視了。

時間有限，只可以在車站的小食部買些東西，這樣已經很有新鮮感覺得好好玩......不過未來的28天仲有排玩呢啲。

俄羅斯甜筒(RUB 60) – 物價唔算貴，雪糕的牛奶味很重亦很香滑，只是蛋筒唔脆的，整體上都算好食。

買完嘢立即極速返上車，因為真係驚睇錯時間便大檸樂，要流落異鄉做乞兒。

開車之後天黑了，又未想瞓覺，於是到廁所用水抹抹今日啲臭汗換了件衫後，便到其他車廂看看傳說中的西伯利亞火車衆生相。小太熊就話攰唔去了，唯有自己一個行。

三等車廂 – 感覺很靜也很整潔，沒有傳說中的酸餿噏臭混和Vodka味，溫度亦幾舒服適中，令我對三等廂的印象唔差，那知後來到我自己坐三等時完全不是這樣。

餐卡的營業時間到Local Time 23:00，還有1hr，我便入去看看。

餐卡內一個人都牡，職員一見我行入去便立即迫我坐㡳，又隊本Menu過來，看來餐卡平時都真係冇乜人幫襯。

飲品價錢由RUB 80 ~ 400，其實又可以接受，當買個位坐靜靜哋都幾舒服。

無酒精啤酒(RUB 150) – 味道和真啤酒一樣，以前在摩洛哥都飲過，自己一個人靜靜地在西伯利亞鐵路上嘆啤酒，講真真係好好Feel。

坐到差不多關門才走，始終只有我一個客。這張單只收了RUB 150，沒有加乜加物等Hidden Price，怎料到未來幾日幫襯佢時會亂咁收錢。

補充資料 :

1.)      USD 1 兌 RUB 58.6 (當地銀行現金兌換價)，即太約 HK$1 = RUB 7.48。

2.)      海參崴市內的交通尚算方便，巴士唔難搭，只需先在Google Map對清楚車站位置；的士價錢亦唔貴，只要上車前Confirm清楚價錢和地點便可以。俄羅斯人都很老實，不像印度人永遠都那麽冇口齒開了車才反價。

3.)      乘001號車次西伯利亞鐵路從 海參崴(Vladivostok)到 伊爾庫次克(Irkutsk)，車程71hr，頭等房每位RUB 24903，包1餐午飯。

4.)      俄羅斯的火車95%以上都準時或早到，只是偶然會遲到幾分鐘。

5.)      火車每次離站前都沒有預警，所以每次落車舒展前最好和Conductor 再三對清楚開車時間，小心駛得萬年船。

6.)      西伯利亞火車上的餐卡食物又貴又難吃，杯麵肯定好食過佢，只適宜飮杯嘢坐他媽的2粒鐘。

7.)      火車上沒有下一站資料，也沒有每站停車時間，和很多人遇過的不同。

---待續---