馬來西亞 吞食天地(01) – 尋覓 檳城老味道

馬來西亞檳城壁畫 ~ 追風少年

喬治市(George Town)是馬來西亞第一大島 檳城(Penang)的首府，也是馬來西亞衆多古老城鎮之一，2008年被列為世界文化遺產之後，城內的舊建築物不斷被改建為酒店和餐廳，2012年起檳城政府開始在城內引入大量富有當地居民色彩的壁畫，使George Town的勢頭在當時蓋過了馬來西亞其他古城。

馬來西亞 吞食天地 – 序

從南美洲回家不到三日，小太熊又話要去馬拉食榴槤，仲好快買了機票訂埋酒店，未休息夠又要出發，不過去馬拉比去南美輕鬆得多，好似去南丫島一樣，執幾件衫便可以出發，近十年真係去馬拉多過去南丫島。

很匆忙地安排了以下的9天「馬來西亞 吞食天地」旅程，詳細行程可點擊到相關文。

馬來西亞 吞食天地09天路線和行程重點(詳細行程可點擊到相關文章)

日數	行程路線	日程重點
Day 01	香港 → 檳城	住 : The Granite Luxury Hotel Penang 食 : 檳榔律馳名叻沙(Penang Road Famous Laksa) ; 檳城三條路888福建蝦麵 ; Joez Coconut ; 帝一榴 ; DUAN二杬
Day 02	檳城	住 : The Leith 食 : 龍鳳茶室(Loong Fong Café) ; 多春茶座(Toh Soon Cafe) ; 218浮羅山背榴槤園(218 Dusun Durian Balik Pulau) ; 南光茶室(Nan Guang) ; 白糖糕鹹煎餅攤檔 ; 海鮮朱(Seafood Choo)
Day 03	檳城	住 : The Leith 食 : 正宗橋頭福建蝦麵 ; 包德館 ; 廖石乾黑刺 ; 檳城安娣大蝦炒粿條 ; 義蓮魚頭米粉(Ghee Lian Green Tomyam) ; 唐人厝(China House)
Day 04	檳城	住 : Jazz Hotel Penang 食 : 姚氏姊妹炒粿角 ; Joez Coconut ; Ah Koo’s Hokkien Mee ; 羅記鴨肉棵條湯 ; Aneka Thai ; Nyonya Palazzo ; 義蓮魚頭米粉(Ghee Lian Green Tomyam)
Day 05	檳城	住 : Jazz Hotel Penang 食 : Roti Bakar Hutton Lane ; My Own Café ; Rasa Rasa 回味 ; 218浮羅山背榴槤園 ; 101浮羅山背榴槤 ; 長成榴槤水果(Chang Cheng Durian & Fruits) ; 巴生老街肉骨茶
Day 06	檳城 → 怡保	住 : Cititel Express Ipoh 食 : 寶麗鴨肉粿條湯 ; My Own Café ; 靚媽豆花店(Big Mom Beancurd) ; 新榮輝花生糖餅家 ; 南方餅家(Lam Fong Biscuit) ; 老黃芽菜雞沙河粉
Day 07	怡保	住 : Cititel Express Ipoh 食 : 東泰茶舖(Dong Tai Kopitiam Pasir Pinji) ; 40年老字號大樹腳紅豆冰 ; 兵如港忠記大樹頭炸料粉 ; 啊耀榴槤專賣店 ; 鬼式茶餐廳(The Museum) ; 黎記豆腐花 ; 奇峰豆腐花 ; 余合香餅 ; 永成茶樓(Restoran Weng Seng)
Day 08	怡保 → 吉隆坡	住 : Sleeping Lion Suites 食 : 南香茶餐室(Dai Makanan Nam Heong) ; 天津茶室(Restoran Thean Chun) ; 啊耀榴槤專賣店 ; 黃亞華小食店(Wong Ah Wah Restaurant)
Day 09	吉隆坡 → 香港	食 : Old Town White Coffee

馬來西亞 吞食天地 – Day 01

行程：香港 →檳城

今日乘08:40早機往檳城，晨早04:00便要起身，黑媽媽行去巴士站坐巴士去機場。

06:30去到機場，今次沒有免費候機室了，只好在太興食早餐，估唔到咁早就差點冇位。

免冶豬肉粥拼混醬腸粉(HK$55) – 機場太興限定的套餐，質素中下，腸粉完全不軟滑碗粥又稀，好彩奶茶和甜醬味道OK，不過下次一定唔再食。

頂級午餐肉通粉餐(HK$50) – 可以免費轉公仔麵，整體上的味道和平時食開的太興早餐完全唔同，蛋有點腥方包得半片又硬又冇牛油，煮公仔麵的水唔夠熱麵未煮開，浸到發水，不知所謂，廚師應該要自殺。

今次用10000里換了國泰去檳城的單程機票，再補HK$426稅和雜費，08:40從香港起機。

今日天色好靚，看到南丫島。

好多年沒有去 長洲了，我唔鍾意意留港消費。

早餐的主食比太興更多差10倍，睇樣已經有點反胃，事實亦非常難食。

進入泰國海域，很多小島的顏色令人驚艶。

飛過馬來西亞的高山，快到目的地了。

<<檳城>>

12:30降落檳城機場，只係兩年冇來，已經有點陌生，用Grab叫車後才發現上車的地方又變咗，跑來跑去才找到部車。

13:00上Grab車，30min便去到George Town的酒店，18km路程收費Grab 20 (最貴的時段會高達RM 55，不過這程車在2011年Coupon Taxi已經收RM 47)，落車時看見司機的電話顯示佢只收到RM 16，Grab收RM 4佣金。

The Granite Luxury Hotel Penang – 位置優越的酒店，在光大中心對面，附近有大量人氣食店，方便掃街。Check in時要收RM 200按金。

酒店最特色是天台的玻璃底泳池，向上望已經見有人在游水。

雙人房(不包括早餐)每晚HK$502 – 房間的裝飾有心思，大落地窗面向古城十分開揚，冷氣夠凍熱水夠大，抵住。

放下行李立即行去George Town掃街，路過光大中心有𣾀率最好的找換店，下次可以帶港幣在這裡換錢。

行上天橋Octopus Pedestrian Bridge，橋上望向Jalan Burma有很多翻新了的舊屋，這天橋有時會有些流浪漢在橋上，都幾可怕。

很快行到滿佈美食的 景貴街(Lebuh Keng Kwee)，一條多年前由馬拉檳州有錢佬 鄭景貴建設的街道，街上有食了十幾年都未嫌的「愉園茶室」和「檳榔律馳名潮州煎蕊紅豆霜」，不過已經食過好多次，今次試其他好嘢。

檳榔律馳名叻沙(Penang Road Famous Laksa) – 是米芝蓮推介的檳城傳統美食，店在1970年已經開始經營，曾經是駐在「愉園茶室」的亞參叻沙檔，現在已自成一店，由第二代及第三代一同主理，另有「老姨炒粿條」加盟。

今日人唔多，大把位唔使等，正。

桔仔酸梅冰(RM 3) ; 沙梨酸梅冰(RM 3) – 兩杯都超級勁好飲，酸酸甜甜咸咸的味道清新爽朗，日日幾杯都唔嫌。

檳榔律馳名叻沙(RM 8) – 是亞參叻沙，湯底用了沙典魚和大量香料熬煮，一啖湯入口鮮甜濃香重口味，瀨粉滑不溜口，湯底加了火炬薑(Torch Ginger)和菠蘿提鮮，微酸中帶㸃辣，伴上湯匙內的蝦醬更加鮮美。吃時用湯匙連湯帶粉一齊吃更加冶味。

老姨炒粿條(RM 9.5) – 落重一隻鴨蛋加埋豬油渣一同炒，十分邪惡美味香口，兩隻蝦爽口鮮甜，河粉香滑夠鑊氣，下次再食。

繼續做步兵行去下個目標「三條路888福建麵」，順便幫助消化增加戰鬥力。

檳城三條路888福建蝦麵 • 鹵麵 – 又係米芝蓮推介的檳城傳統美食，超過30年的區內名店，今日剛剛開檔，唔駛排長龍。

燒肉福建面(RM 10) – 湯底蝦味濃郁鮮香，燒肉有肉味，油麵米粉質感都唔差，多年來水準穩定好食，下次繼續來。

七條路巴刹(Pasar Lebuh Cecil) – George Town內的一個街市，小太熊話Check過裡面有平靚正榴槤，因為比較少遊客所以價錢很大眾化，今日專程來看看。

下午街市內大部分的魚檔已經收爐，很多貓貓在吃賣剩的魚仔。

部分舖還未收檔，魚蝦蟹都唔覺得新鮮，質素比較下欄完全唔吸引。

蔬果檔的貨同樣唔吸引，小太熊多數又比網上的失實資訊老點了。

終於搵到榴槤檔，細紅蝦RM 35/kg，黑刺RM 80/kg，只係比市內平少少，而且得幾個太少貨，唔吸引唔買了。

再慢慢行去Joez Coconut買點外賣甜品，沿途見很多舊屋被不斷翻新，沒有了十年前那種殘舊感覺。

Joez Coconut – 檳城最好味椰青果凍就在這裡，幫襯多年味道從未改變，可惜今次椰子奶昔已經大跌Watt，有點失望，又少一樣好嘢。

Coconut Shake (RM 6) – 從前濃烈椰香的奶昔已經變成冇乜椰子味，好彩不是太甜，以前的椰子雪糕已被換成雲呢拿雪糕，唔夠香滑偏多冰粒，唔好味下次唔再叫了 ; 椰子果凍(Coconut Jelly)(RM 5) – 冰涼消暑柔軟搖晃的椰子果凍，清甜之中帶有濃濃的椰香，每一啖也如此清新，伴上鮮嫩的椰青肉更加完美，食極都唔嫌，下次繼續幫襯。

暹羅路木炭炒粿條(Siam Road Char Koay Teow) – George Town30多年的老字號，以前由一位80後的阿風伯主理，曾獲全球50大街頭美食排行榜中的第14名，這檔炒粿條的特別之處就是用傳統的火炭炒出香氣四溢的粿條，任何時段也是大排長龍。2年前來時阿風伯還在，炒到火花四濺，今日變了後生仔主理，沒有了阿風伯的氣勢。

見條隊不夠20人，預計等半個鐘左右，便排隊試吓佢手勢，點知等了15分鐘條龍完全唔郁，最前一個買十幾份，見廚師每次最多炒兩份，每份炒3～4分鐘，見唔對路，走為上着。

榴槤中路(Durian Central Macalister) – 回到George Town這條榴槤街，小太熊話今日一定要食一個先，唔食唔肯返酒店。

阿德榴槤(Ah Teik Durian Stall) – 檳城衆多賣榴槤的攤販之中，最出名和最多貨的要算是George Town的「榴槤德」了，以前賣的全部都係又平又靚的頂級貨，即開即食唔靚包換不另收費，可惜由於佢後來生意太好，榴槤的價錢越賣越貴，我近年已經沒有幫襯，加上近兩次發現睇檔的人已經不是德哥，所以更加冇興趣再幫襯。

話說回來，阿德榴槤依然是全街最多貨和最貴，大黑刺RM 95/kg，貓山王RM 75/kg，價錢比其他檔貴RM 10左右。

帝一榴 – 今年發現街上有些舊榴槤檔已經摺埋，例如榴槤興也不見了，但同時亦多了新檔口，「帝一榴」這連鎖點第一次進駐喬治市。

榴槤都唔平，但揀了咁耐有點攰了，見佢價錢都差不多，決定博一博試吓佢。

紅蝦榴槤(RM 87~1.83kg) – 賣RM 48/kg，足5房肉，口感稀鬆黏稠度低，味道苦甜夾雜但不夠濃香而且花香味不足，品質一般只值50分，香港買的更優勝，失望。食完才記起上次在吉隆坡SS2的帝一榴食了一個類似的紅蝦又係這品質，以後也不再幫襯「帝一榴」。

甘榜榴槤(Kampung) – 紅蝦榴槤最後一房肉爛了，職員送了一個 甘榜榴槤補數。甘榜是沒有品種名稱的榴槤，不屬於純種榴槤，但以前也食過又平又靚的甘榜。這個甘榜有4房肉但勁大核，味道比紅蝦更好，重牛奶味肉質更Creamy，OK收貨。

食完榴槤回到酒店游水，泳池設在頂樓，是無邊際設計，對面是檳城最高的 光大大廈。

光大大廈(Komtar Tower) – 檳城的最高建築物，1985年落成時是馬來西亞最高的摩天大樓，樓高251m，地下是大型購物商場。

泳池尾有一個玻璃底金魚缸，企在上面真係清楚望到地面的車，如果畏高的人一定感到心寒。

游完水行去食晚飯，今晚揀了亞洲Fusion 菜餐廳「DUAN二杬」。

DUAN二杬 – 檳城喬治市主打無豬肉的亞洲Fusion菜人氣餐廳，餐牌包括有馬拉、印度和中式料理，小太熊話網上評價好好架，份量又足。

室內設計得幾有文化，主打懷舊。

可樂(RM 6.9)；招牌二杬咖啡(RM 9.2) – 味道完全沒有驚喜的太興質素咖啡，大部分老牌茶室的咖啡比較優勝。

秘制沙爹雞肉串(RM 19.6) – 同樣是沒有驚喜的沙爹雞，不知為何在馬來西亞吃到的肉永遠也感覺不太新鮮和Overcooked，不論豬牛雞羊也是一樣，這雞串的肉也像雪了十年的彊屍肉。沙爹醬和雞肉醃料很冶味，炭火香味十足，只欠了鮮嫩的雞肉。

家鄉炸魚肉炒面條(RM 21.9) – 炒粉唔錯但完全比不上大部分老牌茶室的炒粿條，魚肉又硬又嚡又淡卻又炸得鬆脆可口，整體上OK的，只係一定唔會再試。

咖喱羊肉椰漿飯(RM 27.7) – 椰漿飯冇乜椰漿味又鬆散又硬，咖喱很濃味但羊肉的肉味淡，肉質比較硬所以難吞，如果只可以二選一我必定揀炸魚肉炒面條。

被小太熊老點的一餐，小太熊話自己都係被人老點，未試過點知喎，啲人講到好好食架。

晚上的George Town人流比較少，感覺卻比南美洲安全得多。

補充資料 :

1.     國泰航空由香港飛檳城單程經濟機票每位10000里另加HK$426稅項雜費。

2.     尖沙咀永恆找換店 HK$1.72 = RM 1

3.     檳城機場滙率HK$1.86 = RM 1，比永恆找換店差8.2%。USD 1 = RM 4.06 (HK$1.93 = RM 1)，比港幣兌換更差。光大中心的找換店HK$1.69 = RM 1，比較永恆找換店平1.75%。所以最著數是用港幣在光大中心換錢。

4.     今日檳城很多地方也收信用卡和ApplePay，可以少帶現金。

5.     入境馬來西亞前要先上網填寫<<Malaysia Digital Arrival Card (MDAC)>>

6.     檳城現在市面上已經沒有的士，連George Town也沒有，只在機場還有Coupon Taxi。馬來西亞雖然有幾個叫車Apps，但只有Grab可以真正叫到車，其他Apps次次都話冇車。

7.     在檳城用Grab叫車的價錢像買股票一樣，不斷升升跌跌，最高和最低價錢可以相差3倍，全馬來西亞也是這樣。每1km的價錢RM 1~3。

8.     檳城的巴士班次不太疏，每小時也有1～3班車，而且可以用Google查到巴士時間表。

 

---待續---