馬來西亞 吞食天地(04) – 檳城 味覺漫遊

檳城壁畫 爬牆小孩

檳城(Penang)是馬來西亞西北方的島嶼，屬於馬來西亞十三個聯邦州的其中一州，自從1957年馬來亞獨立之後，檳州政府的行政長官一直由華人擔任。檳州的首府 喬治市(George Town)在2008年被列為世界文化遺產，島上美食多籮籮，街頭小食和馬拉榴槤也是必食之選，百吃不嫌。除了美食，尋找喬治市內的衆多壁畫也是非常有趣的節目。

馬來西亞 吞食天地 – Day 04

<<檳城>>

昨晚住在The Leith，今日會搬去另一間酒店Jazz Hotel Penang住2晚。

08:00離開The Leith，行去 喜昌隆茶室食 鴨肉粿條湯，早上的George Town很少人。

行到周身汗終於去到 喜昌隆茶室(Kopitiam Khee Cheang Leong)，冇開門…. 乜事呢，見大門半掩店內有人，便入去問問，原來鴨肉粿條湯老闆又中了老漢肺炎，不停流鼻水開唔到工，所以冇開門，都唔知幾時好返，真可惜，上次來10日檳城只吃到一次，今次來6日一次也吃不到，可能冇乜緣。唯有去今日的Plan B 姚氏姊妹炒粿角。

姚氏姊妹炒粿角 – 米芝蓮推薦的檳城小食，檔口在小蓬萊茶室店前。這小店從1963年就開始賣炒粿角，人情味濃厚，大廚姚月蘭由70年代開始從父親手上接手檔口之後，一炒便是50年，現時和妹妹姚月芸一起經營。

今日由妹妹做主廚，以紫青雙鑊鏟揮動自如地灑出降龍十八鏟，鑊氣熏天，像表演武術一樣。

小蓬萊茶室(Kedai Kopi Seow Fong Lye) – 落完order便可以坐入去叫杯野飲等食。

凍白咖啡(RM 3.3) – 香滑濃郁的白咖啡，差點比得上怡保的出品。

姊妹炒粿角(RM 5) – 粿角的口感比較粉，沒有粿條那種軟滑柔韌咁好食，加了炸菜粒豬油渣和鴨蛋比較冶味，鑊氣十足，不過我都係喜歡炒粿條，這粿角試一次夠了。

Joez Coconut – 都係呢檔好食，今日又去，日日食都唔嫌。

Coconut Jelly (RM 5) – 冰涼清爽滑不溜口，椰子味濃郁，每人一個企埋一邊食完至走，透心涼。

繼續順路行去食 福建麵，沿途行吓景點。

華嚴寺 – 由一位清源法師和另一位揚宗法師創立於1945年的寺廟。

Ah Koo’s Hokkien Mee @ Classic Café – 始於1986的麵檔，位於George Town的Jalan Perak 126號，2011年已經開始幫襯，每次到檳城也必定來吃，招牌多年來也被 光華日報擋著，內有檳城最好味的 福建麵。雖然品質有點比不上從前，但依然是檳城最好食的 福建麵，會繼續來食。

白咖啡(RM 3.2) ; 薏米水 (RM 2.2) – 勁普通，這裡的飲品質素低，只用來解渴。

魚蛋福建麵(RM 9) – 湯底帶有鮮甜到極的蝦頭蝦膏鮮味，又濃又鮮正到暈，魚蛋爽口彈牙，油麵混合米粉的口感很好，只是麵質比較粉扣了點分，仍然無損整體上的美味，上次食明明跌了Watt，估唔到今次又改善返，希望可以保持質素，下次再來。

繼續行路去另一檔，熱到全身濕透了。

羅記鴨肉棵條湯 – 開業40年的小店，現時店舖設在華人公會內，聽說這裡的招牌鴨湯鮮甜味數十年不變，魚丸也超彈牙。檔主胡欽義說「湯底是粿條湯的靈魂，其他的都是其次，湯底主要是用上豬骨、鴨、江魚仔、沙葛去熬足四五小時才會清甜。

今日不是假期，只等了20min便有位，算是十分快。

店內坐得很疏不用搭枱，這是老漢肺炎之後的安排。

鴨湯鮮香樸鼻，好吸引啊。

檸蜜(Honey Lemon)(RM 2.9) – 估唔到好好飲喎，蜂蜜味清香微甜，檸檬微酸味道啱啱好，消暑清熱。

怡保芽菜(RM 2) – 沒有在怡保市吃到的那麽爽脆清甜食唔停口，只係一般好食，唔試也不可惜。

鴨肉湯河粉(RM 7) – 河粉軟滑有米香值100分，鴨肉味香濃鴨湯清甜可口，魚丸也美味彈牙，把粿條、湯 和魚丸一啖入口簡直是絕配，好食，不過我覺得 喜昌隆茶室的鴨湯底更鮮美。

繼續行去下一站按摩，途經另一佛寺。

Wat Buppharam Buddhist Temple Penang – 建於1942年的古怪寺廟，供奉着泰國、道教和印度教的神像。

這些很像是中式道觀常見的神像。

寺廟內的人工石洞放了大量類似土地神。

泰國四面佛

呢個似係印度濕婆

其他滿天神佛，有排拜。

Nusa Dua Massage Treatment House (Pulau Tikus) – 今日訂了在這裡按摩，感覺比早2天高級些。

全身按摩60分鐘每位RM 128，手勢唔錯可以再來。

按摩完已經13:00，乘Grab去今晚的酒店Jazz Hotel Penang，車程5km車費RM 8，但未到15:00 Check in時間，便先在附近行一陣。

附近有家大型超級市場Lotus’s Tanjung Pinang，售賣家常菜的食材、紀念品、生活雜貨、保健產品、日常藥物等等都好多野睇，找換店的滙率也很好。

Aneka Thai – 超級市場美食廣場的泰國菜，聞到香噴噴過來看看。

過了午餐時間，人流很少，坐得幾舒服，在這裡等夠鍾。

芒果糯米飯(Mango Sticky Rice)(RM 10) – 好好味呀！糯米飯又軟又甜，芒果都好甜，加上椰汁一同吃仲正，在泰國布吉島都冇咁平咁好食。

Jazz Hotel Penang – 距離George Town 7km，勝在價錢平質素高，乘Grab往返市中心由RM 10~30，視乎叫車的時段，附近也有巴士到George Town，每位RM 2。

今日酒店有Function，泊滿了林寶堅尼跑車，出出入入嘈到拆天。

雙人房(不包括早餐)每晚HK$375 – Check in時又收了RM 3唔知咩稅。房間又大又舒服，不過向正對面樓沒有景觀，房內的燈光很暗，小太熊夜晚唔敢一個人留在房內。今次會住2晚。

健身室設在頂樓勁開揚，先在這裡玩一陣間。

天台泳池也被對面樓頂住，欠了點景觀，不過估唔到冇乜人，游得好舒服，泳池酒吧都唔開了，可能人太少冇生意。

在酒店玩了2個鐘頭之後，乘Grab車回到George Town的 僑生博物館，車程7km車費RM 9。

檳城僑生博物館(Pinang Peranakans Mansion) – 博物館建於1893年，由當地富豪峇峇 鄭景貴的豪宅和店鋪改建而成，展現出馬來西亞獨特的峇峇娘惹文化，現時館內展示了超過1000件古董收藏。「峇峇娘惹」又係乜東東呢？自從明朝閹人鄭和下西洋帶來第一批中原移民到馬六甲，之後中國移民與當地原住民通婚而生的混血後代，男性被稱為峇峇(Baba)，女性被稱為娘惹(Nyonya)，呢班大帝的生活習慣和氣牆便成為了現在留傳千古的峇峇娘惹文化。

踏進屋內是一片豪華新天地，不過原來要入場費的，唔適合孤9寒的人，走為上着。

其實今日的目標不是睇博物館，而係去隔離的米芝蓮推介餐廳Nyonya Palazzo食傳統娘惹糕，俾了入場費就冇錢食糕了。

Nyonya Palazzo – 2021年才開業的娘惹咖啡館，室內全使用昔日精美的家具和擺設，主打供應傳統娘惹糕點美食。

慘了，太遲來娘惹糕點已經賣得七七八八，剩返少量四五款，唯有全部都試吓，冇得揀了。

全店只有兩枱人，坐得很舒服。

Iced Nyonya Latte (RM 19.7) – 娘惹白咖啡香滑濃郁好味，貴得都算有價值 ; Lemongrass Ginger Tea (RM 10.9) – 這檸檬草薑茶比較普通，檸檬和薑味較淡但偏甜了點。

傳統娘惹糕(RM 41.4) – 賣剩四款糕分別有Kuih Sago Gula Melaka (西米製成的甜糕，口感Q彈，外層裹上椰絲，配上濃郁的Gula Melaka椰糖甜味，入口軟糯香甜)、Kuih Kosui (斑蘭味的蒸糕，外層軟糯甜度適中，帶有淡淡椰香和斑蘭葉的清香)、Kuih Koci (用香蕉葉包裹蒸熟的糕點，外層是煙靭的糯米粉皮，餡料是香濃椰絲椰糖，甜而不膩)和Yam Cake(是最中間的鹹點芋頭糕，用芋頭和米漿蒸成，口感紮實，表面撒上蝦米、蔥酥和辣椒，鹹香微辣，非常開胃美味)。

招牌娘惹糕點的味道好正，四款賣剩的娘惹糕也各有特色，味道和口感都不同，一次過試晒十分過癮。

Nyonya Dumpling (RM 15.3) – 鹹口味的娘惹糯米粽，餡料有豬腩肉、冬菇蝦米等等，糯米用蝶豆花染成藍色十分搶眼，口感煙靭味道鹹香有層次。

很滿意這裡的糕點，小太熊冇揀錯。今晚再去舊關仔角食魚頭米粉，因為昨晚太好食，所以今晚再去。

檳城戰爭紀念碑 – 位於舊關仔角海旁紀念第一次世界大戰陣亡士兵的紀念碑，曾於二次世界大戰時被摧毀，及後在1948年才再次修復。

舊關仔角美食廣場 – 今日早到所以大把位，唔駛同人爭又唔駛成日有人想來搭枱，可以慢慢食。

新鮮水果Buah Potong – 昨天又係在這裡買果汁，很好飲的，今日再來。

沙梨冰(RM 8)(左) – 咸咸酸酸有點甜，用沙梨鮮榨，飲極都唔嫌；西瓜汁(RM 7)(右) – 用西瓜鮮榨冇溝水，清甜消暑到極。

義蓮魚頭米粉(Ghee Lian Green Tomyam) – 今日唔駛排半個鐘了，不過都等了超過10分鐘，全場得佢要排隊，個個都識食。

鮮石斑魚頭青東炎米粉(RM 16) – 石斑魚頭肉爽嫩鮮美，米粉幼細好食，冬陰功湯底微辣中帶少少青咖哩香，和酸味異常均衡，好食到不得了，如果唔駛排隊我一定要多一碗食，不過食完之後已經要排隊半個鐘，唯有等下次有機會再食。

食完之後叫Grab車回酒店，短短7km已經加價到RM 30，出來時只係RM 9，條氣唔多順，決定行一陣街等價錢回落才回去。

Hema Hema Ice Cream – 很多人排隊的雪糕店，在 白糖糕鹹煎餅攤檔斜對面，Mark低佢下次日頭少人時試吓。

白糖糕鹹煎餅攤檔 – 喬治城的50年老字號，只在非假日每天17:30-20:00開檔，白糖糕經常很早便賣完，早2日好彩食到。今日想再食，但去到又係已經賣完白糖糕，只剩鹹煎餅…又冇得食，估唔到想吃件白糖糕也這麼難。

看看Grab車，7km車費已經回落至RM 16，算幾合理，成交。

Jazz Hotel Penang – 回到酒店又游一陣夜水，都幾好feel。

補充資料 :

1.     尖沙咀永恆找換店 HK$1.72 = RM 1

2.     今日檳城很多地方也收信用卡和ApplePay，可以少帶現金。

3.     檳城現在市面上已經沒有的士，連George Town也沒有，只在機場還有Coupon Taxi。馬來西亞雖然有幾個叫車Apps，但只有Grab可以真正叫到車，其他Apps次次都話冇車。

4.     在檳城用Grab叫車的價錢像買股票一樣，不斷升升跌跌，最高和最低價錢可以相差3倍，全馬來西亞也是這樣。每1km的價錢RM 1~3。

5.     檳城的巴士班次不太疏，每小時也有1～3班車，而且可以用Google查到巴士時間表。

 

---待續---

馬來西亞 吞食天地09天路線和行程重點(詳細行程可點擊到相關文章)

日數	行程路線	日程重點
Day 01	香港 → 檳城	住 : The Granite Luxury Hotel Penang 食 : 檳榔律馳名叻沙(Penang Road Famous Laksa) ; 檳城三條路888福建蝦麵 ; Joez Coconut ; 帝一榴 ; DUAN二杬
Day 02	檳城	住 : The Leith 食 : 龍鳳茶室(Loong Fong Café) ; 多春茶座(Toh Soon Cafe) ; 218浮羅山背榴槤園(218 Dusun Durian Balik Pulau) ; 南光茶室(Nan Guang) ; 白糖糕鹹煎餅攤檔 ; 海鮮朱(Seafood Choo)
Day 03	檳城	住 : The Leith 食 : 正宗橋頭福建蝦麵 ; 包德館 ; 廖石乾黑刺 ; 檳城安娣大蝦炒粿條 ; 義蓮魚頭米粉(Ghee Lian Green Tomyam) ; 唐人厝(China House)
Day 04	檳城	住 : Jazz Hotel Penang 食 : 姚氏姊妹炒粿角 ; Joez Coconut ; Ah Koo’s Hokkien Mee ; 羅記鴨肉棵條湯 ; Aneka Thai ; Nyonya Palazzo ; 義蓮魚頭米粉(Ghee Lian Green Tomyam)
Day 05	檳城	住 : Jazz Hotel Penang 食 : Roti Bakar Hutton Lane ; My Own Café ; Rasa Rasa 回味 ; 218浮羅山背榴槤園 ; 101浮羅山背榴槤 ; 長成榴槤水果(Chang Cheng Durian & Fruits) ; 巴生老街肉骨茶
Day 06	檳城 → 怡保	住 : Cititel Express Ipoh 食 : 寶麗鴨肉粿條湯 ; My Own Café ; 靚媽豆花店(Big Mom Beancurd) ; 新榮輝花生糖餅家 ; 南方餅家(Lam Fong Biscuit) ; 老黃芽菜雞沙河粉
Day 07	怡保	住 : Cititel Express Ipoh 食 : 東泰茶舖(Dong Tai Kopitiam Pasir Pinji) ; 40年老字號大樹腳紅豆冰 ; 兵如港忠記大樹頭炸料粉 ; 啊耀榴槤專賣店 ; 鬼式茶餐廳(The Museum) ; 黎記豆腐花 ; 奇峰豆腐花 ; 余合香餅 ; 永成茶樓(Restoran Weng Seng)
Day 08	怡保 → 吉隆坡	住 : Sleeping Lion Suites 食 : 南香茶餐室(Dai Makanan Nam Heong) ; 天津茶室(Restoran Thean Chun) ; 啊耀榴槤專賣店 ; 黃亞華小食店(Wong Ah Wah Restaurant)
Day 09	吉隆坡 → 香港	食 : Old Town White Coffee